Karaloʼuta namüinjatka na Hebreokana 8:1-13
8 Tü waküjeekalü achiki yaʼayaa shia müinña nukuwaʼipa chi laülaashikai napüleerua na sacerdotekana, chi niʼinaajalakai Maleiwa wamüin otta aikalaashi nia chaa iipünaa nikialuʼujee chi Maleiwakai.
2 Aʼyataashi nia suluʼu tü kuatta shiinaluʼusükat tü aʼwaajüleekat Maleiwa jee aʼyataashi nia suluʼu tü miichi shiimainsükalüjaʼaya nukumalain Jehová,* tü nnojotkat sukumalain wayuu.
3 Napüshuaʼa na laülaashiikana napüleerua na sacerdotekana, aneekünüshii naya süpüla nasülajüinjanain wanee kasa jee noʼutajatüin saaʼin mürüt nümüin Maleiwa. Akaainjatia neʼe sukuwaʼipa nutuma chi laülaashikai napüleerua na sacerdotekana, asülajüinjachi nia wanee kasa nümüin Maleiwa.
4 Nnojoishijeʼe nia sacerdotein yaayüirejeʼeya nia saaʼu tü mmakat, jama eein na wayuu asülajakana wanee kasa nümüin Maleiwa wanaapünaa sümaa tü aküjünakat suluʼu tü Pütchi Aapünakat nümüin Moisés.
5 Tü aʼyatawaa naʼyataakalü anain naya wayuukana nümüin Maleiwa müsü aka saaʼin tü kasa eekat chaa iipünaa jee shiyaawase shia, maʼaka nüküjainkain shia Maleiwa nümüin Moisés süpülapünaa nukumajüin tü miichi aʼwaajüleekat, anuu nünüiki nümüin: «Pukumajüinjatü tia sümaa jülüjain paaʼin tü kasa eeʼiyatünakat pümüin chaa uuchoʼu».
6 Alanaʼaleepejeʼe suluʼu anain tü aʼyatawaa aapünakat nümüin Jesús, jama nüküjain süchiki wanee pütchi apansaajünaka anaʼleekat maʼin suulia tü palajatkat. Aikaleʼennüsü shikii tia pütchikat sükajee süküjünüin süchiki anaʼleejeerüin maʼin tü kasa eejeetkat.
7 Jamüsüjaʼa anale tü pütchi apansaajünakat palajana nnojotsüje choʼujaain süpansaajünajatüin wane shiiʼiraka.
8 Nütüjaa aaʼu nnojoluin lotuin nakuwaʼipa naya wayuukana, müshijeseʼe nümüin: «Anuu tü nümakat Jehová:* ‹Alüʼülaasü maʼin tü kaʼi tapansaajüinjatkalü oʼu wanee pütchi jeketü namaa na wayuu chakana Israel otta müsia namaa na wayuu chakana Judá.
9 Nnojoleerü müin aka saaʼin tü pütchi tapansaajakat paala namaa na jutuushinuukana soʼu tü kaʼi tayuʼlakalü oʼu naya Egiptojee. Nnojoishii jaa müin naya sümüin tia pütchikat, müshiijeseʼe nnojoliinnapain kachipünaain naya taaʼin›, shia nüküjaka tia Jehová* namüin.
10 »‹Anakalaka tü pütchi tapansaajeetkat namaa na wayuu chakana Israel sülatapa tia kaʼikat, meerü teʼitaakai saaʼin suluʼu nekii jee meerü tashajakai saaʼin suluʼu naaʼin tü pütchi taluwataakalü anain. Namaleiwaseechi taya jee tapüsheenakalaka naya›, müshi Jehová.*
11 »›«¡Anashi jiʼraajüle Jehová!»,* nnojoleechi eein wanee wayuu makai anüiki namüin na wayuu juumainpaʼajeʼewaliikana jee namüin na juwalayuukana, jama neʼraajeechin taya napüshuaʼa naya wayuukana, jaʼitashi chira eekai joʼuuin jee laülaaichirejeʼeya nia.
12 Talatireerü sooʼopünaa taaʼin tü kasa mojukuwaʼipatkat natuma naya wayuukana jee nnojoleerü sotuin taaʼin tü naainjalakat›».
13 Sutuma nüküjaichipain Maleiwa süchiki nüpansaajüinjatüin «wanee pütchi jeketü», nnojoluitpa kasain saamüin tü pütchi nüpansaajakat paala, jamüsüjaʼa süʼlaülaʼalaale wanee kasa jee nnojoluitpale kasain anain apüla shia, alüʼütsü sükalia süpüla sajaʼttajatüin.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
