Tü nüshajalakat Juan 12:1-50
12 Antüshi Jesús Betaniamüin aipirua kaʼi süpülapünaa tü Pascuakat.* Antüshi nia nipialuʼumüin Lázaro, chi wayuu nüsoʼireʼerakai aaʼin paala süchikijee outaa.
2 Süʼlakajaanaka niyaaluʼu, shia Marta eitajaka neküin. Yalajachi Lázaro naʼaka na wayuu ekaakana wanaa nümaa Jesús.
3 Saapaakalaka María shiatapünaa litro seita jemeta eejuut kojutuka maʼin, aainjuushi süka tü «nardo»* kaaʼukat maʼin. Shiʼyotoko shia saaʼu nuuʼui Jesús, süchikijee tia, soosojuin nuuʼui süka tü suʼwalakat. Jemetuuikalaka suluʼupünaa tü miichikat sutuma tü seitakat.
4 Anuujeseʼe nünüiki wanee nikirajüin Jesús, chi kanüliakai Judas Iscariote, chi aapüinjachikai nikii Jesús:
5 «¿Jamüsü nnojotkaʼa suikünüin saaʼu 300 ‹denario›* türa seitakat? Saapünayütkejeʼe tü süliakat namüin na wayuu maʼletsekana».
6 Nnojotpejeʼe müin nünüiki süka nükaalinjeein na wayuu maʼletsekana, mayaasü neʼe nünüiki süka kaʼruwaralin nia. Nia kajapuluʼuka tü kojonchon ejitünawaikalü aluʼu tü nneetkat jee naapaʼawalin süpüshi.
7 Nusoutakalaka Jesús nümüin: «Jimata pia suulia wayuukat. Ketsia saainjai tü saainjakat süpülapünaa teʼikünüin outapeena taya.
8 Süpülajachire joo taya yaawaa jümaa waneepia, eekajasaʼa na wayuu maʼletsekana yaajeena jümaa waneepia».
9 Wattaka naalii na judío aapakana süchiki chajachin Jesús Betania. Noʼunaka sünain anaʼlawaa nümüin otta sünain anaʼlawaa nümüin Lázaro, chi nüsoʼireʼerakai aaʼin paala süchikijee outaa.
10 Nayasaʼa nekiipüʼü na sacerdotekana, naashajaajiraaka nikiira Lázaro süpüla noʼutajachin naaʼinya,
11 jama wattain naalii na judío eʼrakana tü aaʼinnakat nüpüleerua Lázaro jee nanoujaka nünain Jesús suluʼujee tia.
12 Waneemüin kaʼi, na wayuu antakana sünain tü miʼiraakat naapa achikit nülüʼülaain Jesús Jerusalénmüin.
13 Naapaaka na wayuukana alanatüna jee napanapajaka nia. Aʼwaatüshii sümaa emetuluin maʼin nanüiki sünain maa: «¡Anashi nuʼtteʼennüle! ¡Anataʼaleeshijaʼa maʼin chi nüjünalakai Jehová,* chi Aluwataakai saaʼu Israel!».
14 Eejachikalaka wanee püliiküchon nüpüla Jesús, noʼotooko naaʼu maʼaka süshajünüin paala sünain maa:
15 «Nnojo mmoluin jia wayuu chakana Sion, iseeichi chi aluwataakai jaaʼu, naaʼushi nia wanee püliiküchon».
16 Nnojotsü nayaawatamaatüin aaʼu na nikirajüinkana tü alatakat. Nayaawatapejeʼe saaʼu tia kojutupa atumawaa Jesús süka sotuin naaʼin tü ashajünatüjütkalia paala nüchiki otta ayatüsüjaʼaya alatüin tia.
17 Nayasaʼa na wayuu eejanakana wanaa sümaa nüküjain Jesús nümüin Lázaro nujuʼitajachin suluʼujee tü woowirakat jee nüsoʼireʼerüin naaʼin, naya aküjakana süchiki tü kasa alatakat.
18 Shiajaʼa nüpanapajünaka Jesús natuma na wayuu wattakana naalii, jama naapüin süchiki tü kasa pülasü naainjakat.
19 «¡Nnaalein! Kasakataayaai neʼe nia watuma, oʼunayaa müsü wayuu maʼleekalia nüchiirua», namajiraayaa namaka na fariseokana.
20 Eejana waneinnua wayuu griego naʼaka na wayuu antakana sünain aʼwaajaa Maleiwa soʼu tü miʼiraakat.
21 Narütkaakalaka nünainmüin Felipe, chi chejeʼewaikai Betsaida tü mma chakat Galilea. Jee namakalaka nümüin: «Señotkalee, aashajaweeshii waya nümaa Jesús».
22 Nüküjakalaka tia Felipe nümüin Andrés, noʼunaka piamaleʼeya sünain aküjaa nümüin Jesús.
23 Nusoutakalaka Jesús namüin: «Antüitpa tü kaʼi kojutuinjachikalü oʼu atumawaa chi Süchonkai Wayuu.
24 Shiimain tanüiki jümüin, jamüsüjaʼa wanee soʼu trigo nnojorüle sujutuuin mmoluʼu sümaa nnojoluin sujulujaain,* ayatüsia soʼuin shia trigo. Akaajasaʼa sujulujaale sümaa süpünajünüin, watteerü maʼin saalii süchon.
25 Nieechi outaka chi eekai oʼttaweein. Eekajasaʼa chi ayoutakai süchiki katüin noʼu maaʼutpünaa, nieechi katakai oʼu* süpüla kaʼikat süpüshuaʼa.
26 Chi eekai niʼyataweein tamüin, anashi nuushikajaale süchiirua takuwaʼipa. Jalapünaale taya, cheechi tamaa chi tachepchiakai. Chi eekai niʼyataain tamüin, kojuteechi nutuma chi Tashikai.
27 Süpüleerua aaʼinchi maʼin taya tü mojuukalü aaʼin, ¿jamüsüche paala tanüiki jümüin? Taata, pükaalinja taya suulia tü kasa alatajatkat tamüin, shiapejeʼe tantüin apüla tü makat yaa.
28 Taata, kasataalejeseʼe shiʼraajüin wayuu pünülia otta kojutuin pia sutuma». Saapünakalaka wanee pütchi chaa iipünaajee sünain maa: «Teʼraajirüitpa tanülia jee teʼraajireerü shia süchikuaʼa».
29 Nayasaʼa na wayuu yalajanakana yala, naapüin tia. Naküjaka sünain sütüttüin juya otta eeshii na makanaya: «Aashajaashi nümaa wanee aapiee nümaʼanajeejachi Maleiwa».
30 Anuujeseʼe nünüiki Jesús: «Tia pütchikat nnojotsü süpülajatüin anain neʼe takuwaʼipa tamüiwaʼa, süpülajatü anain jukuwaʼipa jiakanaya.
31 Süsalasü saainjala wayuu maaʼutpünaa jee ojutuneechi anooipaʼamüin chi aluwataashikai saaʼu wayuu.
32 Takachennapa sünain wunuʼu, tarütkeʼereerü tanainmüin wayuu maʼleekalia».
33 Nüküjain tia süpüla sütüjaanajatüin aaʼu jamüinjatüin nukuwaʼipa outapeena nia.
34 Anuujeseʼe nanüiki na wayuukana nümüin: «Saashin tü Pütchi Aapünakat nümüin Moisés,* eeinjachi Cristo süpüla kaʼikat süpüshuaʼa. ¿Jamakaʼa nükachennüinjachika chi Süchonkai Wayuu paashin? ¿Jarai maʼin chi Süchon Wayuu münakai?».
35 Nusoutakalaka Jesús namüin: «Müshi taya maʼaka saaʼin wanee luusa, motsomüinjeetpejeʼe neʼe tamaa jaʼaka. Waraitta jia soʼunnaa eein luusa, suulia sükanalüin jia tü piʼyuushikat. Chi eekai waraittüin saʼaka piʼyuushi, maaʼawain meechi.
36 Anoujainjana jia sünain tü luusakat sümaʼainruʼu eein shia jaaʼu süpüla müin jia aka saaʼin süchon tü luusakat».
Nuunjulaaka Jesús noulia süchikijee nüküjain tia namüin.
37 Mayaainjeʼe naainjain wainma kasa pülasü noʼupala, nnojoishii naya anoujain nünain.
38 Alatüsü tia süpüla shikeraajüin nünüiki Isaías, chi nünüikimaajachikai Maleiwa, tü makat mayaa: «Jehová,* ¿eetaayaai jaralüin anoujain sünain tü wamakat? ¿Jarat aküjünaka amüin süchiki tü nüpülainkat* Jehová?».*
39 Nüküjainña Isaías tü nnojotkat nanoujeein anainjee tia, anuu nünüiki:
40 «Müshii nasürünnakai aaʼin oʼu nutuma jee iche aaʼinchii naya nutuma. Naainjain tia süpüla nnojoluinjanain neʼrüin wanee kasa jee nayaawatüin saaʼu. Nnojoleena naya aleʼejüin nünainmüin Maleiwa shiiʼiree anain naya tatuma».
41 Nüküjain tia Isaías nüchiki Cristo, süka niʼrüin kojutuin nia atumawaa.
42 Wainmapejeʼe na aluwataakana naaʼu na judíokana anoujakana nünain Jesús. Nnojotsü naküjain tia suʼupala wayuu, jama mmoluin naya seema ajünajaanaa* natuma na fariseokana suluʼujee tü ekirajüleekat nüchiki Maleiwa.
43 Kamalainreesia maʼin namüin naʼwaajünüinjanain sutuma wayuu suulialeʼeya anain nakuwaʼipa noʼuluʼu Maleiwa.
44 Emetutkalaka nünüiki Jesús sünain maa: «Chi wayuu eekai nunoujain tanain, nnojoishi tayain neʼe nunoujain anain tamüiwaʼa, nunouja anainchia chi Kajünalakai taya.
45 Chi eekai niʼrüin taya, müshijaʼa niʼrakai naaʼin chi Kajünalakai taya.
46 Antüshi taya saʼakamüin wayuu maʼaka saaʼin wanee luusa, chi eekai nunoujain tanain nnojoleechi saʼakain piʼyuushi.
47 Chi wayuu aapajakai tanüiki sümaa nnojoluin noonooin sümaa, nnojoleechi süsalain naainjala tatuma, jama nnojolin tantüshin süpüla kasalajanainjatüin saainjala wayuu tatuma. Antüshi taya süpüla suʼttaainjatüin tatuma.
48 Chi eekai nnojolin kasajachin taya nümüin otta chi nnojoikai aapaain sümaa tanüiki, süsaleechi nia naainjala soʼuweena wanee kaʼi* sutuma tü taküjaitpakat.
49 Nnojotsü taküjain tü tekiiruʼujeejatkat neʼe, shiaʼaya taküjaka maʼin tü nuluwataakalü anain taya chi Tashikai, chi Kajünalakai taya.
50 Tatüjaa aaʼulu katüin soʼu wayuu süpüla kaʼikat süpüshuaʼa sutuma tü nümakat. Süpüshuaʼa tü pütchi taküjakat, shiaʼaya maʼin tü nüküjakat tamüin chi Tashikai».
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Nneerü kachueera nanneetsepuʼuka na romanokana. Pünaʼla tia suluʼu tü kanüliakat «Sooʼomüin pütchi B14».
^ Pünaʼla tia suluʼu tü kanüliakat «Sooʼomüin pütchi A5».
^ «Outuin» maluʼulu tia suluʼu griego.
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ «Nütüna Jehová» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ «Tü chiiruaajatkat kaʼi» maluʼulu tia suluʼu griego.
