Tü nüshajalakat Juan 18:1-40
-
Aapüna ekiichi Jesús nutuma Judas (1-9)
-
Awataashi Pedro sümaa chajaruuta nooʼomüin wanee wayuu (10, 11)
-
Eʼikajaanüshi Jesús nümaʼanamüin Anás (12-14)
-
Palajatka nukua Pedro sünain nüküjain nnojolin niʼraajüin Jesús (15-18)
-
Shaʼwatüshi Jesús nümülatuʼu Anás (19-24)
-
Piantua sümaa apünüintuain nüküjain Pedro nnojolin niʼraajüin Jesús (25-27)
-
Shaʼwatüshi Jesús nümülatuʼu Pilato (28-40)
-
Nnojoishi taya shiʼinaajalain wayuu süpüla taluwataainjachin (36)
-
18 Süchikijee nüküjain Jesús tia, nuʼunakalaka namaa na nikirajüinkana waneemüin saʼata tü luwopu kanüliakat Cedrón, nekerotokalaka suluʼu wanee yüüja eejatka yala.
2 Niasaʼa Judas, chi aapajachikai nikii Jesús, niʼraajüin eeʼewaliire naya, jama chapuʼuin Jesús outkajaain namaa na nikirajüinkana.
3 Nüntakalaka Judas sümaa wainma surulaat otta namaa nawaariase nekiipüʼü na sacerdotekana jee na fariseokana, sikoʼumaashii naya, ranparamaashii, wunuʼumaashii otta chajaruutamaashii.
4 Niyaawatapa Jesús saaʼu tü aaʼinnajatkat nüka, nürütkaakalaka nanainmüin jee nümakalaka namüin: «¿Jara jüchajaaka achiki?».
5 Nasoutakalaka nümüin sünain maa: «Nia wachajaaka achiki Jesús chi chejeʼewaikai Nazaret». «Taya tayakai», nümakalaka namüin, eejachikalaka Judas namaa, chi aapajachikai nikii Jesús.
6 «Taya tayakai» nümaiwaʼaya Jesús namüin, nansünajaakaʼa sünain noʼnnajaain mmoluʼu.
7 Nüsakitkalaka naya Jesús nachikuaʼa sünain maa: «¿Jara jüchajaaka achiki?». «Nia wachajaaka achiki Jesús, chi chejeʼewaikai Nazaret», namakalaka nümüin.
8 Anuujeseʼe nünüiki Jesús namüin: «Mataashi taküjayüikai jümüin tayain tayakai, tayalejeʼeya jüchajaain achiki, juuʼulaa jümata noʼunaiwa wayuukana naainnua».
9 Alatüsü tia süpüla shikeraajüin tü pütchi nümatüjütkalia Jesús sünain maa: «Nnojoishi eein wanee eekai amüloulin naʼakajee na wayuu piʼitaakana tajapuluʼu».
10 Eejatkalaka wanee chajaruuta nümaʼana Simón Pedro, nuwataakalaka nooʼomüin nüchepchia chi laülaashikai napüleerua na sacerdotekana jee nushottoko tü nücheʼe nikialuʼujeejatkat, Malco nünülia chi achepchieekai.
11 Anuujeseʼe nünüiki Jesús nümüin Pedro: «Pünaajaa tü chajaruutakat suluʼu süta, ¿aashin tasüinjatüin tü asüüshi naapakat tamüin chi Tashikai?».
12 Nütaʼünnakalaka Jesús sümaa kapüin nia natuma na surulaatkana, natuma nawaariase na judíokana otta chi sülaülashikai surulaat.
13 Palajana, eʼikajaanüshi nia nümaʼanamüin Anás, chi nüshimiakai Caifás. Soʼu juyakat tia nia laülaashika Caifás napüleerua na sacerdotekana.
14 Nia chi aküjakai namüin na judíokana shiain anain outule waneeshia wayuu naaʼu suulialeʼeya najaʼttinnüin napüshuaʼa.
15 Niasaʼa Simón Pedro nümaa wanee nikirajüin Jesús, oʼunajüshii naya nüchiirua Jesús. Niakalaka ekeroluin chi wane nikirajüinkai Jesús suluʼumüin nüpaatiase chi laülaashikai napüleerua na sacerdotekana, jama niʼraajünüin nutuma.
16 Makatapejeʼe Pedro anooipaʼa, soʼuluʼu tü paatiakat, niasaʼa chi wane nikirajüinkai Jesús, chi eʼraajünakai nutuma chi laülaashikai napüleerua na sacerdotekana, aashajaashi nia nüpüleerua Pedro sümaa tü wayuu aaʼinmajüsükat soʼu tü paatiakat, nikerotkalaka Pedro nümaa.
17 Shiasaʼa tü achepchieekat, tü aaʼinmajüsükat soʼu tü paatiakat, sümakalaka nümüin Pedro: «¿Aashin napüshin pia na nikirajüinkana chia wayuukai?». «Nnojo, nnojoishi taya nikirajanain», nümakalaka Pedro sümüin.
18 Nayasaʼa na achepchieekana namaʼaleeya na waariakana, achuwajaashii karuwon, eejanaka naya shaʼwashawalüin sünain aatulujaa süʼütpaʼa tü karuwonkat, jama alin maʼin tü jemiaikat, eejachikalaka Pedro namaa sünain aatulujaa.
19 Nüsakinnakalaka Jesús nutuma chi nekiipüʼükai na sacerdotekana nachiki na nikirajüinkana jee süchiki tü nikirajakalü anain.
20 Nusoutakalaka Jesús nümüin: «Aashajaapuʼushi taya suʼupala wayuu maʼleekalia jee ekirajapuʼushi taya waneepia suluʼu tü ekirajüleekat nüchiki Maleiwa otta suluʼu tü aʼwaajüleekat, eere noutkajaʼawalin napüshuaʼa na judíokana jee nnojotsü eein wanee kasa tounjulajaka achiki.
21 ¿Jamüshi püsakiraka taya? Naya püsakira na wayuu aapajakana tanüiki, nnaaʼasa naya, naya atüjaaka saaʼu jamüin tanüiki».
22 Wanaa sümaa nüküjain Jesús tia, nuwataakalaka wanee waaria nooʼomüin jee niʼyaataka nia nuwalapünaa sümaa nümüin nümüin: «¿Jamüsü makaʼa pünüiki nümüin nekiipüʼü na sacerdotekana?».
23 Anuujeseʼe nünüiki Jesús nümüin: «Mojuluʼurülejeʼe tü tamakat, püküja tamüin kasain mojuin aluʼu shia, shiimainrejeʼe tü tamakat, ¿jamakaʼa piʼyaataka taya?».
24 Nuʼuninnakalaka Jesús nutuma Anás sümaa kapüin nia atumawaa nümaʼanamüin Caifás, chi laülaashikai napüleerua na sacerdotekana.
25 Eekajasaʼa Simón Pedro, ayatüshia nia shaʼwatüin sünain aatulujaa jee nüsakinnakalaka: «¿Aashin napüshin pia na nikirajüinkana Jesús?», nüküjapejeʼe nnojoluin shiimain tia jee nümakalaka: «Nnojo, nnojoishi taya nikirajanain».
26 Niasaʼa wanee nüchepchia chi laülaashikai napüleerua na sacerdotekana, nüpüshi chi wayuu ochotoonokoi paala acheʼe nutuma Pedro, müshi nümüin: «Mataashi teʼrakai pia nümaa chaa yüüjapaʼa».
27 Nüküjapejeʼe Pedro nüchikuaʼa nnojoluin niʼraajüin Jesús jee wanaa maʼin sümaa tia nukootoleerajaaka wanee kaliina.
28 Nümaanakalaka Jesús nipialuʼujee Caifás chaa nipialuʼumüin chi laülaashikai, wattachonjatü tia, nnojoliipejeʼe naya ekeroleein nipialuʼumüin chi laülaashikai süka nnojoluin judíoin nia, nnojotsü nacheküin yarüttüinjatüin nakuwaʼipa noʼuluʼu Maleiwa, jama nekaainjanain soʼunnaa tü Pascuakat.
29 Müshijeseʼe nujuʼitaain Pilato chaa eejanale naya jee nümakalaka namüin: «¿Kasakai naainjalaka wayuukai chii?».
30 Anuukalaka nanüiki nümüin: «Nnojoirejeʼe kaainjaralin wayuukai chii, nnojoishije nia wantirüin pümüin».
31 Anuujeseʼe nünüiki Pilato namüin: «Jümaapan, jieenakalaka aküjain kasain süsalainjachin aaʼujee nia jutuma wanaapünaa sümaa tü jukuwaʼipapalakat». Nasoutakalaka na judíokana nümüin: «Nnojoishiisaʼa waya eʼitaaushin süpüla woʼutajanain saaʼin wayuu».
32 Alatüsü tia süpüla shikeraajüinjatüin tü nümatüjütkalia paala Jesús wanaa sümaa nüküjain jamüinjatüin nukuwaʼipa atumawaa nuʼutunapa aaʼin.
33 Nikerotoko Pilato nüchikuaʼa suluʼumüin tü nipiakat sünain aluwatawaa, neenajakalaka Jesús sümaa nümüin nümüin: «¿Shiimainña piain chi aluwataashikai naaʼu na judíokana?».
34 Nusoutakalaka Jesús nümüin: «¿Pikiiruʼujeejatü tü pütchi püsakirakalü anain taya, eetaapa na wayuu aküjakana pümüin tachiki?».
35 Nusoutakalaka Pilato nümüin: «¿Judíojasa joo taya? Aashin aapünayaain pikii tamüin natuma na wayuu puumainpaʼajeejanakana namaʼaleeya na sacerdotekana, ¿kasakai maʼin paainjalaka?».
36 Anuujeseʼe nünüiki Jesús nümüin: «Aneekünüshi taya süpüla aluwatawaa, nnojoipejeʼe taya shiʼinaajalain wayuu süpüla taluwataainjachin, mülejeʼeya shia atkaashiije tapüleerua na tamaajanakana süpüla nnojolin taapünüin ekii namüin na wayuu judíokana. Nnojoipejeʼe taya shiʼinaajalain wayuu süpüla taluwataainjachin».
37 «¿Wayuukaʼa aluwataashi pia?», nümakalaka Pilato nümüin Jesús. Anuukalaka nünüiki Jesús nümüin: «Aa, nnaaʼasa püküjaitpain wayuuin aluwataashi taya, shiaʼaya joʼuuka apüla taya tia jee shia tantaka apüla tia naʼakamüin na wayuukana süpüla taküjainjachin süchiki tü shiimainkat. Chi wayuu aapaakai sümaa tü shiimainkat, naapajüin tanüiki».
38 Nüsakinnakalaka Jesús nutuma Pilato: «¿Kasa wayu tü shiimainkat?».
Süchikijee nüsakirüin nia sünain tia, nujuʼitaka nüchikuaʼa eemüin na judíokana jee nümakalaka namüin: «Nnojotsüsa kasain naainjalain wayuukai chii.
39 Juchuntawalin tamüin soʼunnaa tü Pascuakat tajütüinjachin nüchiki wanee wayuu eekai püreesain, ¿jücheküin tajütüin nüchiki chi aluwataashikai naaʼu na judíokana?».
40 Emetutka nanüiki nachikuaʼa sünain maa: «Nnojo, nnojoishi niainjachin püjütüin achiki. Anashi niale püjütüin achiki Barrabás». Wayuupejeʼe neʼe kaʼruwarai chi Barrabás münakai.
