Tü nüshajalakat Juan 19:1-42
19 Nuluwataaka Pilato na surulaatkana süpüla namaainjachin Jesús jee süpüla naʼyaajüinjachin nia.
2 Nayasaʼa na surulaatkana nakoʼojuin wanee keipüsesü, nakumajaka wanee kotse süka, naʼataka shia sünain nikii Jesús otta naʼataleeinña nünain wanee kuluulu jepisiiyaa.
3 Narütkaakalaka nünainmüin sünain maa: «¿Anayaashijeʼe pia aluwataashikai naaʼu na judíokana?» jee naʼyaajakalaka nuwalapünaa.
4 Nujuʼitaakalaka Pilato nüchikuaʼa jee nümakalaka namüin na wayuu wattakana naalii: «Jaapaja tanüiki, aniisa nia tantirüin anooipaʼamüin jümüin süpüla jütüjaainjatüin saaʼu nnojoluin kasain naainjalain wayuukai chii, süsalainjachikai anainjee nia tatuma».
5 Nujuʼitaakalaka Jesús sümaa nünain tü kotse akoʼojuushikat süka keipüsesü jee nünainsü tü kuluulu jepisiiyaakat. «¡Anii wayuukai!», nümakalaka Pilato.
6 Niʼnnaiwaʼaya Jesús natuma nekiipüʼü na sacerdotekana jee natuma na waariakana, naʼwaatakalaka sünain maa: «¡Pükachera sünain wunuʼun!, ¡pükacherapan!». Nusoutakalaka Pilato namüin: «Anashi jümaale nia süpüla juʼutajachin naaʼin. Nnojotsü kasain naainjalain wayuukai chii saaʼin tamüin».
7 Nasoutakalaka na judíokana nümüin: «Eesü wanee pütchi aluwataanaka anain waya nutuma Maleiwa, saashin tia pütchikat outajachi wayuukai chii, jama nüchoin nia Maleiwa naashin».
8 Mmorüleeka maʼin Pilato naapapa tü namakat.
9 Nikerotokoloko Pilato nüchikuaʼa suluʼumüin tü nipiakat sünain aluwatawaa jee nümakalaka nümüin Jesús: «¿Jalejeʼewai maʼin pia?». Koʼutakalaka neʼe Jesús nuulia.
10 Anuujeseʼe nünüiki Pilato nümüin: «Nnojoishira maʼin asouteein pia tamüin. Nnojotsükai pütüjaain aaʼu laülaashin taya süpüla tajütirajachin püchiki jee shiale toʼutirajatüin paaʼin».
11 Nusoutakalaka Jesús nümüin: «Nnojoishije laülaashin pia taaʼu nnojoireje piʼitaanüin sünain laülawaa nutuma Maleiwa, müsüjeseʼe sülanaain maʼin naainjala chi wayuu aapakai tekii pümüin».
12 Suluʼujee tia, nüchajaakalaka sukuwaʼipa Pilato süpüla nüjütirajachin nüchiki Jesús. Emetutpejeʼe nanüiki na judíokana sünain maa: «Püjütirüle nüchiki wayuukai chira, nnojoishijaʼamata naʼaleewain pia ‹César›.* Chi wayuu aluwataakai naashin, peʼipaashi nümaa ‹César›».
13 Naapaiwaʼaya Pilato tü namakat na wayuukana, nümaakalaka Jesús anooipaʼamüin, nüikalaakalaka Pilato saaʼu tü einasee naikalaapuʼukalü aaʼu na laülaashiikana süpüla kasalajanainjatüin saainjala wayuu natuma, kapaʼajanasü ipa tia mmakat, Gábbatha münüsü suluʼu hebreo.
14 Alatüsü tia soʼu tü kaʼi yapajakalü oʼu wayuu süpüla tü Pascuakat,* kaleʼujatü, maʼaka saaʼin las doce.* Anuukalaka nünüiki Pilato namüin na judíokana: «¡Anii chi aluwataakai jaaʼu!».
15 Emetutkalaka nanüiki sünain maa: «¡Puʼutira naaʼin! ¡Outajachin! ¡Pükachera sünain wunuʼun!». Nusoutakalaka Pilato namüin: «¿Toʼutirajachi aaʼin chi aluwataakai jaaʼu?». «Nia neʼe aluwataaka waaʼu ‹César›», namakalaka nekiipüʼü na sacerdotekana nümüin Pilato.
16 Süchikijee tia, naapünakalaka ekii Jesús namüin* nutuma Pilato süpüla nakacherajachin nia sünain wanee wunuʼu süpüla outaa.
Nümaanakalaka Jesús natuma.
17 Nülüʼüjakalaka tü wunuʼu* akachennajachikai anain nia. Chaʼwai nia suluʼumüin tü mma kanüliakat «Shikii Wayuu Outusü», «Gólgota», münüsü tia süka hebreo.
18 Nüchitünaka Jesús sünain tü wunuʼukat namaa piamashii wayuu naʼatoʼu, pasanainkalaka nia nanain.
19 Nüshajakalaka Pilato wanee pütchi sünain wanee taapüla jee niʼitaakalaka shia sünain tü wunuʼu akachennakalü anain Jesús. Müsü tü pütchikat mayaa: «Jesús, chi Nazaretjeʼewaikai, chi aluwataashikai naaʼu na judíokana».
20 Watta naalii na judío aashajeʼerakana tia pütchikat süka pejein sünain Jerusalén tü mma eejachire nükachennüin Jesús jee ashajünüsü tia pütchikat suluʼu hebreo, latín sümaʼaleeya griego.
21 Anuupejeʼe nanüiki nekiipüʼü na sacerdote judíokana nümüin Pilato: «‹Chi aluwataashikai naaʼu na judíokana›, nnojotsü müinjatüin tü püshajakat. Shia anaka aluʼu püshajüle tü nümakat: ‹Aluwataashi taya naaʼu na judíokana›».
22 Nusoutakalaka Pilato namüin: «Tashajüitpasa türa makat, keraweerü maaʼayan».
23 Nüchitünapa Jesús sünain tü wunuʼukat, naapaakalaka na surulaatkana tü nüsheʼinkat, pienchikalaka shiʼipa natuma nakaaluʼu. Naapaakalaka tü sutujunakat nüsheʼin, maʼyapüjiasat tia sutujunakat nüsheʼin, waneepüshisü neʼe.
24 Müshiijeseʼe namajiraain na surulaatkana: «Nnojo wasüküijaain tü nüsheʼinkat, anashii washantanajiraale saaʼu süpüla watüjaain saaʼu jaralinjachin kasheʼin shia». Alatüsü tia makat süpüla shikeraajüinjatüin tü pütchi ashajünakat suluʼu tü Karaloʼuta Nüchikimaajatkat Maleiwa, tü makat mayaa: «Neitajüin nakaaluʼu tü tasheʼinkat jee nashantanajira aaʼulu shia». Shiajaʼaya naaʼinraka tia na surulaatkana.
25 Süʼütpaʼa tü wunuʼu akachennakalü anain Jesús eejatü tü niikat sümaa tü suwalakat jee eejatü María, tü nuʼwayuusekat Clopas sümaʼaleeya María Magdalena.
26 Niʼrapa Jesús tü niikat yala nüʼütpaʼa otta chi nikirajüin aishikai nüpüla nümakalaka sümüin tü niikat: «Iraa püchon»,
27 jee nümakalaka nümüin chi nikirajüinkai: «Nnaa pii». Soʼujeʼereeya kaʼikat tia sümaanakalaka tü niikat Jesús nutuma chi nikirajüinkai nipialuʼumüin.
28 Süchikijee tia, niyaawatapa saaʼu Jesús nikeraajüitpain süpüshuaʼa tü nuluwataakalü anain nia chi Nüshikai, nümakalaka: «Wüinñaasüshi taya». Shikeraajakalaka suluʼujee tia tü sümakat tü Karaloʼuta Nüchikimaajatkat Maleiwa.
29 Eejatkalaka wanee iita kaluʼusü wiino jashüʼüsü. Sücholetinnakalaka maawüi shiroku, shiʼichiruʼusü wanee wunuʼu* jee sürütkeʼennaka sünain niimata Jesús.
30 Anuujeseʼe nünüiki Jesús nuuʼulakapa tü wiino jashüʼüsükat: «¡Taaʼinrüitpa süpüshuaʼa tü puchuntakat tamüin!». Nejepülaka nikii jee sajaʼttalaa sümaka sütchin naaʼin.
31 Kaʼikat tia shia tü yapajakalü oʼu wayuu süpüla tü sükaliakalü eemerawaa, müshiijeseʼe nachuntuin na judíokana nümüin Pilato süshanaajünajatüin nasaʼa na wayuu akacheʼennüshiikana jee süpüla nashakatinnajanain yalejee süka nnojoluin nacheküin yalainjanain naya kachetüin soʼu tü sükaliakalü eemerawaa, jama sükaliain eemerawaa tü kaʼi süchikijeekat tü Pascuakat.
32 Noʼunakalaka na surulaatkana sünain ashanaajaa nüsaʼa chi palajachikai wayuu nümaʼaleʼeya joo chi wane yalajachikai akachennüin naʼatoʼu Jesús.
33 Nantapa eemüin Jesús, nayaawatakalaka saaʼu outuichipain nia, müshijeseʼe nnojolin nashanaajüin nüsaʼa.
34 Eepejeʼe wanee surulaat atkakai Jesús nuwatsenain, süparalamaataka isha sümaa wüin.
35 Toʼupalajatü* tia makat, taküjakalaka süchiki jee shiimain tü tamakat. Tatüjaa aaʼu nnojoluin alawaain shia. Taküjainjeseʼe shia jümüin süpüla junoujainjanain sünain.
36 Alatüsiaʼaya tia makat süpüla shikeraajüinjatüin tü pütchi ashajuushikat suluʼu tü Karaloʼuta Nüchikimaajatkat Maleiwa, tü makat mayaa: «Nnojoleerü ashataanüin waneesiaakaijeʼe niipüse».
37 Jee eesü wanee pütchi suluʼujeejatü tü Karaloʼuta Nüchikimaajatkat Maleiwa makalü anüiki mayaa: «Eirakaaneechi amüin chi wayuu asotunakai».
38 Eejachikalaka wanee wayuu kanüliashi José, chejeʼewai Arimatea. Nikirajanain nia Jesús, nuunjulajapejeʼe süchiki tia süka mmoluin nia neema na judíokana. Antüshi nia nümaʼanamüin Pilato süpüla naapünajachin Jesús nümüin. Naapünakalaka nümüin nutuma Pilato, nülüʼüjainjeseʼe müliashii.
39 Jee antüshiaʼaya Nicodemo, chi wayuu antakai paala soʼu wanee ai nünainmüin Jesús. Alüʼüjashi Nicodemo wanee wunuʼu jemeta eejuut kanüliasü «mirra»* sümaa «áloes»,* eetaasü maʼaka saaʼin 33 kilo saawain.
40 Nakoʼoloko Jesús süka wanee kuluulu kanüliasü lino jee neʼitaakalaka tü wunuʼu jemeta eejuutkat suluʼu. Naaʼinrüin tia maʼaka naaʼinrapuʼuin shia na judíokana neʼitaainjachipa wanee wayuu eekai outuin.
41 Eejatkalaka wanee yüüja yala peje sünain eejachire nükachennüin Jesús sünain tü wunuʼukot jee suluʼu tia yüüjakat eejatü wanee woowira jeketü meʼitaajuyütka aluʼu wayuu.
42 Niʼitaanaka Jesús suluʼu tia woowirakat, jama pejein shia jee alüʼütsü tü kaʼi yapajakalü oʼu na judíokana süpüla tü sükaliakalü eemerawaa.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Maʼaka aipirua oora süchikijee nujuʼitaain kaʼikai» maluʼulu tia suluʼu griego.
^ Eeshiijaʼa süpüla nayain aapünüin amüin na sacerdotekana jee nayale na surulaatkana.
^ Shia tü akachennapuʼukalü anain wanee wayuu süpüla outajachin nia. Nuchuntuin Jesús tia pütchikat süpüla niyaawajeʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
^ «Hys′so·pos» maluʼulu tia suluʼu griego. Eesüjaʼa shiale wanee wunuʼu kooʼuliakat chaa Palestina, eesü süsaʼwatüle maʼaka saaʼin 1.8 metro sajaʼapüin.
^ Eeshijaʼa niale Juan koʼupalajachin tia.
^ Pünaʼla tia suluʼu tü kanüliakat «Jamaluʼulu pütchikat».
^ Wunuʼu jemeta eejuut tia, sushuletpuʼuka wayuu sünain süpüla jemetüin seejuu.
