Tü nüshajalakat Lucas 15:1-32
15 Nayasaʼa na achekajüliikana nneerü neʼipajee na sülaülakana mma otta na wayuu kaainjaraliikana, arütkaashii nünainmüin Jesús süpüla naapajüinjatüin nünüiki.
2 Naʼyounalaaka na fariseokana namaʼaleeya na karaloʼutamaajanakana jee namakalaka: «Kamaneeshi wayuukai chii namüin na wayuu kaainjaraliikana jee ekaashi nia namaa».
3 Anuujeseʼe nünüiki Jesús sümaa kayaawasein nutuma tü nikirajakalü anain:
4 «Jamüshijaʼa eetaale wanee wayuu jaʼakajee kamüʼlüinkai poloo shikii anneerü jee amülouitaale waneesia nuulia, ¿aashin nüpüteerüin chaa wünaʼapü tü mekietsatkat shikii mekietsatmüin jee nüchajaweetka süchiki tü amülouisükat nüntaleepa sünain?
5 Talatakalaka maʼin nia nüntapa sünain jee noʼotoko shia nunuloʼupünaa.
6 Wanaa sümaa nüntüin nipialuʼumüin, neenajüin na nütünajunnuukana jee na wayuu kepiakana nüʼütpünaa sümaa nümüin namüin: ‹Anashii talatüle jia wanaa tamaa, jama tantüitpain sünain tü anneerü amülouikat paala›.
7 Tamüshii paala jia, miyoʼuleejeerü maʼin talataa chaa iipünaa niyaawajaale wanee wayuu suulia naainjala, suulialeʼeya tü talataa eejeetkat natuma na mekietsaliikana shikii mekietsatmüin wayuu nnojoliikana choʼujaain amüin nayaawajaain suulia naainjala.
8 »Jamüsüjaʼa eere wanee wayuu kamaʼanaka poloosü nneerü* pülaata, amülouitaale waneesia suulia, ¿aashin suchuwajaweerüin wanee ranpara jee shipitajeetka tü shipiapaʼakat sünain achajawaa tü nneerü amülouikat suulia süntaleepaʼaya sünain?
9 Jee süntapa sünain, suunejireena na sütünajunnuukana jee na wayuu kepiakana süʼütpünaa jee sümeetkalaka namüin: ‹Anashiisaʼa talatüle jia wanaa tamaa, jama tantüitpain sünain tü nneerü amülouikat paala toulia›.
10 Tamüshii paala jia, na aapiee nümaʼanajeejanakana Maleiwa, talatüsü maʼin naaʼin niyaawajaale wanee wayuu suulia naainjala».
11 Ayatüshi yootuin Jesús sünain maa: «Eetaashi wanee wayuu piamashii nüchooin.
12 Nümakalaka chi nüchon emülieekai: ‹Taataa, paapa maa tamüin tü piʼipünaainjatkat tapüla›. Naapaka chi nüshikai tü niʼipünaainjatkat napüla na piamashiikana nüchooin.
13 Maʼaka jeʼra kaʼi süchikijee tia, nuʼunakalaka chi emülieekai suluʼumüin wanee mma wattamüin, maaʼatshi maaʼinkai naaʼin, nüshaita akat tü eʼipünaalaakat nüpüla.
14 Sajaʼlajaapa süpüshuaʼa tü nünneetsekat, eekalaka wanee jamü aisü maʼin suluʼu tü mma nüntakalü aluʼumüin, müliaka maʼin nia.
15 Nuchuntaka aʼyatawaa nümüin wanee wayuu nipiajachi suluʼu tia mmakat, nüjütakalaka nia suluʼumüin wanee mma sünain aaʼinmajaa püülükü.
16 Nnojoishi jaralin ekirüin nia, nikeekalaka sümüin tü shiküinkat püülükü.
17 »Anuujeseʼe nünüiki niyaawajaapa naaʼin: ‹Matüjainsat nnojoluu eküülü namaʼana na wayuu aʼyataakana nümüin chi tashikai, aniipejeʼe neʼe taya alatirüin jamü.
18 Anainjaʼa taleʼejüle nümaʼanamüin chi tashikai jee tameechikalaka nümüin: «Taataa, kaainjalashi taya nuʼupala Maleiwa* otta puʼupala piakai.
19 Nnojolitchipa anain taya süpüla puchoinjachin taya, shia anaka aluʼu piʼyateʼerüle neʼe taya»›.
20 Nüleʼejakalaka nüchikuaʼa nipialuʼumüin chi nüshikai, niʼnnaiwaʼaya wattajee nutuma chi nüshikai, sümülialaaka naaʼin naalin. Nuwataakalaka nüpanapa sümaa nukoʼojooin nünain jee nutuʼlaka nuwalapaʼa.
21 Anuujeseʼe nünüiki nümüin chi nüshikai: ‹Taataa, kaainjalashi taya nuʼupala Maleiwa otta puʼupala piakai, nnojolitchipa anain taya süpüla puchoinjachin taya›.
22 Nümakalaka chi nüshikai namüin na nüchepchiakana: ‹¡Juuntawaataa! Jaʼata nünain wanee kuluulu eekai miyoʼuin jee eekai anain maʼin. Jiʼitaa wanee süttiija sünain najapü jee koʼusuluʼu nia jutuma.
23 Jüsaaja chi paaʼachon akaüsijuushikai, juʼuta naaʼin wekaiwa nia shikiira nüleʼejüin chi tachonkai.
24 Müshijaʼa outakai naaʼin paala chi tachonkai, asoʼiraapejeʼe naaʼin nüchikuaʼa, machikisai paala, aniikaʼa nia aleʼejüin nüchikuaʼa›. Suʼttakalaka tü miʼiraakat natuma.
25 »Nüntakalaka chi epayaakai, chajachi nia unaʼapü. Shiasaʼa nülüʼülaapa sünain miichikat, naapakalaka shiiʼira muusika otta yonna.
26 Neenajakalaka wanee nüchepchia jee nüsakirakalaka nia süchiki kasain alatüin.
27 Nusoutakalaka chia achepchieekai nümüin: ‹Aleʼejüshi nüchikuaʼa chi pimüliakai sümaa anain nia, nuʼutinnaka aaʼin nutuma chi püshikai chi paaʼachon akaüsijuushikai›.
28 Jashichikalaka maʼin chi epayaakai jee niyoutakalaka ekeroloo, nujuʼitaakalaka chi nüshikai nünainmüin jee nuchuntaka maʼin nümüin süpüla nikerotüinjachin.
29 Anuujeseʼe nünüiki nümüin chi nüshikai: ‹Kakaliaichi maʼin taya aʼyataain pümüin maʼaka naaʼin wanee achepchiee jee nnojoishi taya eʼrüichin wayumüin pümüin. Eeyaai neʼe püsülajüichin tamüin waneeshiaakaijeʼe kaaʼulachon süpüla tekaain namaa tatünajunnuu.
30 Eekajasaʼa chira püchonkai nia puʼutiraka ayaaluʼu chi paaʼachon akaüsijuushikai, eerejeʼe najaʼttirüin puulia tü puwashirüinkat sünain jieyuu maaʼinsat›.
31 Nümakalaka chi nüshikai nümüin: ‹Tachonchee, pia tamaajachikaʼaya, pukorolo süpüshuaʼa tü kasa eekat tamaʼana.
32 Ekaainjana neʼe waya saaʼu nüleʼejüichipain nüchikuaʼa chi pimüliakai, talatüinjatü waaʼin nümaa, müshi outakai naaʼin paala, asoʼiraapejeʼe naaʼin. Machikisai paala, aniipejeʼe nia aleʼejüin nüchikuaʼa›».
Noota
^ «Poloosü nneerü dracma» maluʼulu tia suluʼu griego. Shia nükanainpuʼuka tia wanee wayuu soʼu poloo kaʼi. Pünaʼla tia suluʼu tü kanüliakat «Sooʼomüin pütchi B14».
^ «Siruma» maluʼulu tia suluʼu griego.
