Tü nüshajalakat Lucas 19:1-48
19 Nüntakalaka Jericómüin jee nülatakalaka pasanainpünaa sünain tia pueulokot.
2 Eejachi chayaa wanee wayuu kanüliashi Zaqueo. Nekiipüʼü nia na achekajüliikana nneerü neʼipajee na sülaülakana mma, wayuu washirü nia.
3 Oʼunushi wayuukai chia shiiʼiree niʼreein Jesús. Nnojoipejeʼe nia niʼrüin süka wattain saalii wayuu jee motsochoin nia.
4 Nuʼunakalaka palajana jee noʼotookalaka saaʼu wanee wunuʼu kanüliakat Sicómoro, süka nülatajachin Jesús yalapünaa.
5 Nüntapa Jesús eejachire Zaqueo, niirakaaka iipünaa jee nümakalaka nümüin: «Zaqueo püshakata yalejee, makatajachi taya pipialuʼu soʼukai».
6 Nüshakatamaataka Zaqueo jee talataka maʼin naaʼin süka nutunkaapünaainjachin Jesús nipialuʼu.
7 Neʼrapa tia na wayuukana, naʼyounalaaka sünain maa: «Anashiaakaijeʼe wayuukai chii nutunkaaka nümaʼana wanee wayuu kaainjarai».
8 Nütamaakalaka Zaqueo jee nümakalaka nümüin chi Señotkai: «Señotkalee, taapeerü shiatapünaa tawashirüin namüin na wayuu maʼletsekana otta na wayuu tasütakana oulia wanee kasa, taleʼejireerü suluʼu pienchituain shia namüin».
9 Anuujeseʼe nünüiki Jesús namüin naya wayuukana: «Kateerü noʼu wayuukai chii namaa na nüpüshikana, jama nüchoin nia Abrahán.
10 Antüshi chi Süchonkai Wayuu süpüla achajawaa nachiki na wayuu amülouikana paala jee nuʼtteʼereena naya».
11 Wanaa sümaa naapajüin na wayuukana tü nüküjakat Jesús, kayaawasekalaka nutuma tü nikirajakalü anain, jama pejejachin nia sünain Jerusalén. Jee naaʼinruʼu na wayuukana antalaa müinjachiaa Maleiwa sünain aluwatawaa saaʼu tü mmakat.
12 Anuujeseʼe nünüiki Jesús namüin naya wayuukana: «Eejachi wanee wayuu süchon wayuu washinnuu, oʼunajaashi nia suluʼumüin wanee mma wattamüin shiiʼiree nüneekünüinjachin süpüla aluwatawaa jee aleʼejüinjachi nia mapa süchikijee tia.
13 Neenajiraka polooshii nüchepchia, naapakalaka namüin poloosü nneerü kanüliakat ‹mina›* jee nümakalaka namüin: ‹Jiʼyateʼera tapüla nneetkat tüü›.
14 Aʼürülaanapejeʼe nia natuma na wayuu chejeʼewaliikana nuumainpaʼajee jee naluwataakalaka waneinnua wayuu süpüla namüinjanain nümüin: ‹Nnojotsü wacheküin süchiki puluwataainjachin waaʼu›.
15 »Nüleʼejapa wayuukai nüchikuaʼa süchikijee nüneekünüin süpüla aluwatawaa, nuutkajeʼeraka na nüchepchia naapakana amüin tü nneetkat süpüla nütüjaain saaʼu jeʼrain maʼin süchon tü nneerü naapakat namüin.
16 Nürütkaakalaka chi palajachikai jee nümakalaka nümüin: ‹Señotkalee, tü waneesükat «mina» paapaka tamüin akanajüsü poloosü «mina» sooʼomüin›.
17 Anuujeseʼe nünüiki chi aluwataashikai: ‹Anasü maʼin tü paaʼinrakat tachepchiee, wayuu anashi pia otta oonooshi pia sümaa tanüiki, laülaajeechi pia tatuma saaʼu poloosü pueulo›.
18 Nüntakalaka chi wane jee nümakalaka nümüin: ‹Señotkalee, tü waneesükat «mina» paapakat tamüin akanajüsü jaʼraisü sooʼomüin›.
19 Akaataajaʼa neʼe nünüiki nümüin chiaʼaya: ‹Laülaajeechi pia tatuma saaʼu jaʼraisü pueulo›.
20 Nüntaka waneʼeya nümakalaka nümüin: ‹Señotkalee, anuu tü waneesükat «mina» paapakalinka tamüin, chajatü tounjuluin suluʼu wanee kuluulu.
21 Mmotshireʼe taya süka tatüjaain saaʼu wayuuin mojulaashi pia, paapaain tü kasa nnojotkat pünaajaalain otta pukotchojuin süchon tü nnojotkat püpünajalain›.
22 Anuujeseʼe nünüiki chi aluwataashikai nümüin: ‹Achepchiee mojulaashi pia, süsalainjachi pia jooluʼu tü püküjakat, pütüjaa aaʼurula maʼin wayuuin mojulaashi taya, taapaʼawalin wanee kasa nnojotka tanaajaalain jee takotchojüin süchon tü nnojotkat tapünajalain.
23 ¿Jamakaʼa nnojotka pünaajaain tü tanneetsekat suluʼu wanko, kachonyütkalejeʼe shia tapüla taleʼejapa?›.
24 »Nümakalaka chi aluwataashikai namüin na yalajanakana: ‹Jüsüta nuulia türa minakat jee jaapa shia nümüin chira kamaʼanashikai poloosü «mina»›.
25 Anuujeseʼe nanüiki nümüin: ‹Señotkalee, eeitpa poloosü «mina» nümaʼana›.
26 Nusoutakalaka namüin: ‹Chi wayuu eekai amaʼana wanee kasa aapüneerü sooʼomüin nümüin. Eekajasaʼa chi nnojoikai kasain amaʼana asütüneerü neʼe nuulia wanee kasa eekai eeyaain nümaʼana.
27 Jüntira tamüin na taʼünüü ayoutakana süchiki taluwataainjachin naaʼu, juʼutajatü naaʼin yaa toʼupala›».
28 Keraapa nünüiki Jesús, ayatakalaka nuʼunuin chai nukua Jerusalénmüin.
29 Nülüʼülaapa sünain tü pueulo kanüliakat Betfagué otta Betania, eekai tü wutai kanüliakat Olivos, nüjütakalaka piamashii nikirajüin
30 sümaa nümüin namüin: «Juʼuna eemüin tüsa pueulokot, jüntapa samüin, eejeechi jüpüla wanee püliiküchon nnojoiyüitkai seʼejenain wayuu, jüsiwateetka tü nüpükat sümaa jajattüin nia yaamüin.
31 ‹¿Jamüinjachikai jüsiwatakaʼa nüpü chira püliikükai?›, sümüle wayuu jümüin, ‹choʼujaashi nümüin chi Señotkai› meena jia sümüin».
32 Noʼunakalaka na nikirajüinkana Jesús, eejachika napüla chi püliiküchonkai maʼaka nüküjain shia Jesús namüin.
33 Nasiwatapa nüpü chi püliiküchonkai, namünaka amüin natuma na kapüliisekana: «¿Jamüinjachikai jüsiwatakaʼa nüpü chira püliiküchonkai?».
34 «Choʼujaashi nümüin chi Señotkai», namakalaka namüin.
35 Najattaka chi püliiküchonkai eemüin Jesús, neʼitaakalaka na nikirajüinkana Jesús tü saajunakat nasheʼin naaʼu chi püliiküchonkai, noʼotookoloko Jesús naaʼu chi püliiküchonkai.
36 Sümaʼainruʼu nuʼunuin Jesús, nawayalayaa namaka na wayuukana tü saajunakat nasheʼin süpaʼa tü wopukot.
37 Wanaa maʼin sümaa nülüʼülaain Jesús sünain tü wopu sejetkat sünainjee tü wutai kanüliakat Olivos, talatüshii maʼin na wayuu nikirajüinkana jee naʼwaajüin chi Maleiwakai sümaa emetuluin nanüiki saaʼujee tü kasa pülasü neʼrakat.
38 Anuujeseʼe nanüiki: «¡Anataʼaleeshijaʼa maʼin chi Aluwataai nüjünalakai Jehová!* Kasataalejeseʼe anajiraain wayuu nümaa Maleiwa jee nuʼwaajünüin Maleiwa chaa iipünaa».
39 Anuujeseʼe nanüiki nümüin Jesús noʼutku na fariseo yalajanakana naʼaka na wayuukana: «Ekirajüikalee, püchiaa nala pikirajüinkana».
40 Nusoutakalaka Jesús namüin: «Anuu tanüiki jümüin, jaʼitakajeʼe koʼutule nala wayuukana, shieerü aʼwaataka tü ipakalüirua».
41 Nülüʼülaapa Jesús Jerusalénmüin, eirakaashi nia sümüin sümaa niʼyalajüin,
42 nümakalaka: «Aluʼutaʼaleeshiijaʼa maʼin jia chakana Jerusalén nnojoliika jiyaawatüin saaʼu soʼukai tü jaaʼinrüinjatkat süpüla jimatüinjatüin jaaʼin. Nnojotpejeʼe jiyaawatüin saaʼu tia süka suunjunnüin juulia.
43 Soʼu wanee kaʼi anteena na jüʼünüükana jooʼomüin jee noutkajeena jia süka wunuʼu kasaja eʼichirü, pasanainjeena jia nanain sümaa mülieerüin jaaʼin natuma.
44 Oʼunaʼanneena aaʼin jia natuma otta müsia süpüshuaʼa türa ipakat, osolojuneerü, jama nnojoluin jiyaawatüin saaʼu wanaa sümaa süsalain jia jaainjala nutuma Maleiwa».
45 Nikerotkalaka Jesús suluʼumüin tü aʼwaajüleekat Maleiwa jee nüjünajaaka yalejee na oikaaliikana.
46 Nümakalaka Jesús namüin: «Müsü tü Karaloʼuta Nüchikimaajatkat Maleiwa: ‹Oʼuraajüleeinjatü tepia›, shipiapejeʼe neʼe shia kaʼruwarannuu jutuma».
47 Ekirajüshi nia weinshi suluʼu tü aʼwaajüleekat Maleiwa, oʼutuneepejeʼe naaʼin Jesús natuma nekiipüʼü na sacerdotekana, na karaloʼutamaajanakana otta natuma na wayuu kojutukana atumawaa.
48 Nnojotpejeʼe naainjain tia, süka jamüin, isasü nachiki tü sukuwaʼipainjatkat süpüla noʼutajachin naaʼin Jesús, jama wattain naalii na wayuu jülüjawaikana aaʼin nünüiki Jesús.
Noota
^ Pünaʼla tia suluʼu tü kanüliakat «Sooʼomüin pütchi B14».
^ Pünaʼla tia suluʼu tü kanüliakat «Sooʼomüin pütchi A5».
