Tü nüshajalakat Lucas 23:1-56
23 Nümaanaka Jesús sutuma wayuu süpüshuaʼa nümaʼanamüin Pilato.
2 Naküjaka nüchiki Jesús sünain maa: «Eekajasaʼa wayuukai chii, nootuin wayuu sünain eʼraa wayumüin. Mojusü naashin awalaajaa tü nneerü aapünajatkat nümüin ‹César› otta nia Cristokai naashin, wanee aluwataashi».
3 Nüsakinnaka Jesús nutuma Pilato: «¿Shiimainña piain aluwataain naaʼu na judíokana?». Nusoutakalaka Jesús niʼipajee: «Aa, shiaʼaya tia pümakat».
4 Anuujeseʼe nünüiki Pilato namüin nekiipüʼü na sacerdotekana otta namüin na wayuu wattakana naalii: «Nnojotsü kasain naainjalain wayuukai chii süsalainjachikai anainjee naainjala nia tatuma».
5 Mapejeʼe nanüiki nümüin Pilato: «Nootuin wayuu sünain eʼraa wayumüin sainküinpünaa Judea. Chejeeshi nia oʼttuin Galileajee, aniika joo nia antüin yaamüin».
6 Naapaiwaʼaya tia Pilato, nüsakiraka sünain wayuule Galileajeʼewai Jesús.
7 Nütüjaapa saaʼu Pilato niain Herodes aluwataain saaʼu tü mma eejeʼewaire Jesús, nüjütakalaka nia nümaʼanamüin. Chajachijaʼa Herodes Jerusalén wanaa sümaa tia.
8 Talatakalaka naaʼin Herodes niʼrapa Jesús, kakaliaichi niʼreein nia. Watta saalii kasa anasü naapaka nüchiki jee niʼree amüinchi Jesús sünain aaʼinraa kasa pülasü.
9 Wainma kasa asakinnaka anain Jesús nutuma Herodes, koʼutapejeʼe neʼe nia nuulia.
10 Eekajasaʼa nekiipüʼü na sacerdotekana otta müshiʼiya na karaloʼutamaajanakana, atamaashii naya sümaa jashiee jee wainma tü kasa naliʼrajakalü aaʼu Jesús.
11 Mojutukalaka Jesús nutuma Herodes otta natuma na nusurulaatsekana jee nimeeʼerainpalashi nia. Kasheʼinyaashi Jesús nutuma Herodes wanee kuluulu anasü maʼin. Süchikijee tia, nüleʼejitkalaka nia nümaʼanamüin Pilato.
12 Aleewajiraaka Herodes nümaa Pilato soʼujeʼereeya kaʼikat tia. Paʼünüüwajiraashii naya paala.
13 Nuutkajeʼeraka Pilato nekiipüʼü na sacerdotekana namaʼaleeya na aluwataashiikana otta müshiʼiya na wayuukana.
14 Nümakalaka namüin: «Jüntirüin tamüin wayuukai chii süka nootuin wayuu jaajüin sünain eʼraa wayumüin. Tasakitpejeʼe nia juʼupala otta nnojotsü kasain kasalajanainjachin anainjee nia tatuma.
15 Nüleʼejirüin nia wamüin Herodes, jama nnojoluin kasain kasalajanainjachin anainjee nia nutuma. Nnojotsü kasain naainjalain wayuukai chii, outajachika anainjee nia.
16 Shiakalaka anain taʼyaajirüle nia jee süchikijee tajütireechi achiki».
17 *
18 Aʼwaatapejeʼe na wayuukana sünain maa: «Puʼutira naaʼin chira wayuukai, nia püjüta achiki wamüin Barrabás».
19 Püreesashi atumawaa Barrabás süka nootuin wayuu sünain eʼraa wayumüin namüin na sülaülakana mma suluʼu tü pueulokot jee uwomuyuushi nia.
20 Nuunejitkalaka naya Pilato nachikuaʼa süka nüjütireein nüchiki Jesús.
21 Aʼwaatapejeʼe naya sünain maa: «¡Pükachera sünain wunuʼun!, ¡pükacherapan!».
22 Apünüintuaka nukua Pilato sünain maa: «¿Kasanainjeejachikai jümüin? ¿Kasakai naainjalaka juulia wayuukai chii? Nnojotsü kasain naainjalain outajachika anainjee nia. Shiakalaka anain taʼyaajirüle nia jee süchikijee tajütireechi achiki».
23 Naʼwoorolooko maʼin shiiʼiree nükachennajachin Jesús sünain wanee wunuʼu süpüla outajachin nia. Kaawainreeka maʼin tü nachuntakat.
24 Nuluwataaka Pilato saainjünajatüin tü nachuntakat naya wayuukana.
25 Nüjütirakalaka Pilato nüchiki chi wayuu achuntunakai nümüin. Chi püreesakai atumawaa saaʼujee uwomuyuuin nia jee saaʼujee nootuin wayuu sünain eʼraa wayumüin. Naapapejeʼe nikii Jesús süpüla naaʼinrajatüin tü naaʼinreekat nüka.
26 Nümaanajachipa Jesús chejee, nütaʼünakalaka wanee wayuu kanüliashi Simón, chejeʼewai suluʼujee tü mmakat Cirene, sejechi anooipaʼajee sünain tü pueulokot. Soʼotunaka nunuloʼupünaa tü wunuʼu* akachennajachikalü anain Jesús süpüla nülüʼüjain shia nüchiirua.
27 Watta saalii wayuu oʼunaka nüchiirua Jesús, eejana jieyuu asheʼejakana naʼluuwain süka mojuin maʼin naaʼin jee aʼwaatüshii naya neʼiraluʼu.
28 Nujununtaaka Jesús nanainmüin na jieyuukana jee nümakalaka namüin: «Jia jieyuu chejeʼewaliikana Jerusalén, nnojo jiʼyalajüin taalin. Anashii jiʼyalajüle jaalin jiakana jee naalin jüchonnii.
29 Anteerü tü kaʼi müneetkalü oʼu: ‹Anataʼaleeshiijaʼa maʼin na jieyuu maratkana, na nnojoliikana kachooin otta na jieyuu nnojoliikana atujeʼerüin›.
30 Nameenakalaka na wayuukana sümüin tü uuchikat: ‹Juunjula waya› otta meena naya sümüin tü namünakat: ‹Jiyaamaʼa waya›.
31 Shialejeʼe alatüin tia wüitaiwaʼaya chi wunuʼukai, ¿jamataaleetkaʼa joo nukuwaʼipa jutpa nia?».
32 Namaanaka wanaa nümaa Jesús piamashii wayuu mojulaashii, oʼutunajana aaʼin wanaa nümaa.
33 Shiasaʼa nantapa suluʼumüin tü mma «Shikii Wayuu Outusü» münakat, nüchitünaka Jesús sünain tü wunuʼukat, akaʼaya neʼe na piamashiikana kaʼruwarannuu. Akachennüshi wanee nikialuʼujee otta chi wane nipeʼeruʼujee.
34 Nümakalaka Jesús: «Tashikalee, moto paaʼin tü naaʼinrakat, nnojotsü nayaawatüin aaʼu tü naaʼinrakat». Nashantanajiraaka na surulaatkana saaʼu nüsheʼin Jesús süpüla natüjaainjatüin saaʼu jaralinjachin apütüüin apüla tü nüsheʼinkat.
35 Watta naalii na wayuu eʼrajakana nukua Jesús. Nayasaʼa na aluwataashiikana naaʼu, nemeeʼerainpalashi Jesús jee namakalaka: «Eesü wayuu kataka oʼu nutuma, nialejeʼeya chi kanüliakai Cristo chi nüjünalakai Maleiwa, chi aneekuushikai nutuma, ¿jamakaʼa isaka nüchiki katüin noʼu?».
36 Jaʼitakajeʼe neʼe na surulaatkana nemeeʼerainpalashi Jesús, arütkaashii naya nünainmüin süpüla nasiʼrajachin nia wiino jashüʼüsü.
37 Jee müshii naya nümüin: «Pialejeʼe aluwataain naaʼu na judíokana, anakajaʼa puʼttaajiraale pümüiwaʼa».
38 Shiʼitaanaka wanee taapüla iipünaa sünain nikii, ashajünüsü sünain wanee pütchi müsü mayaa: «Anii chi aluwataashikai naaʼu na judíokana».
39 Mojukalaka nünüiki nümüin Jesús wanee wayuu mojulaashi yalajachikai akachennüin wanaa nümaa. Müsü nünüiki nümüin: «¿Aashin piayaain chi Cristokai? Anakajaʼamata puʼtteʼerajiraale pümüiwaʼa, puʼtteʼeraleeya maa waya».
40 Naaʼayajaanaka aaʼin chi wayuukai nutuma chi wane akachennüshikai wanaa nümaa: «¿Nnojoishikai kojutuin chi Maleiwakai pümüin? ¿Aashin süsalaichipain pia paainjala wanaa nümaa wayuukai chii?
41 Wachajaala wooʼomüin tü makat kasalajanain aaʼujee waya. Eekajasaʼa wayuukai chii, nnojotsü kasain naainjalain».
42 Anuujeseʼe nünüiki chia wayuukai nümüin Jesús: «Sotoiwa taya paaʼin Jesús puluwataapeena».
43 Nusoutakalaka Jesús nümüin: «Shiimain tanüiki pümüin soʼukai: eejeechiaʼaya pia tamaa suluʼu tü Paʼaraiisükat».
44 Kaleʼuweematapa saaʼin kaʼikat maʼaka saaʼin las doce,* epiʼyuushijaasü süpüshuaʼa tia mmakat sünainmüinreʼeya maʼaka saaʼin las tres* aliika.
45 Nnojotsü jaʼyain nuwarala chi kaʼikai, süchatajaakalaka pasanainpünaa sünain tü kuluulu soʼulujunakat tü kuatta shiinaluʼusükat tü aʼwaajüleekat.
46 Nuʼwaataka Jesús sümaa emetuluin maʼin nikiisa: «Taataa, teʼitaain pajapuluʼu sütchin taaʼin». Jee süchikijee müin nünüiki outakalaka nia.
47 Nuʼwaajünaka Maleiwa nutuma chi sülaülashikai surulaat niʼraiwaʼaya tü kasa alatakat, nümakalaka: «Shiimainjaʼaya maʼin wayuuin loto akuwaʼipachi wayuukai chii».
48 Nayasaʼa na wayuu yalajanakana sünain eʼrajaa sukua tü kasa alatakat, aleʼejüshii nepialuʼumüin sümaa nasheʼejüin naʼluuwain.
49 Shaʼwashawatshii mamüin aka tüsa na wayuu eʼraajakana Jesús. Eejanaʼaya sünain eʼrajaa sukua tü kasa alatakat na jieyuu nümaajanakana Galileajee.
50 Eejachikalaka wanee wayuu anamia, loto akuwaʼipachi kanüliashi José. Noʼutku nia na laülaashii sulujunakana tü laülaapiakat.
51 Nnojotsü wanaawain naaʼin namaa na aashajaajiraakana nikiira Jesús. Wayuu Arimateajeʼewai José, wanee pueulo chasü Judea. Naʼatapajüin nüntajachin Maleiwa sünain aluwatawaa.
52 Nuʼunakalaka nümaʼanamüin Pilato süpüla naapünajachin Jesús nümüin.
53 Nüshakatitkalaka José müliashii, nukoʼoloko nia süka wanee kuluulu anasü maʼin aainjuushi süka lino. Niʼitaakalaka nia suluʼu wanee koʼushii meʼitaajuyutkalia aluʼu wayuu.
54 Soʼujatü tia tü kaʼi yapajakalü oʼu wayuu süpüla tü sükaliakalü eemerawaa.
55 Otta müshiʼiya na jieyuu nümaajanakana Jesús Galileajee, oʼunushii naya eemüin tü woowirakat. Nanaʼlaaka eejachire niʼitaanüin Jesús.
56 Naleʼejaakalaka nachikuaʼa süpüla yapajüin natuma wunuʼu eekai jemetüin eejuu jee müsia seita eeka jemetüin eejuu. Eemeraapejeʼe naya soʼu tü kaʼi eemeraanajatkalü oʼu naashin Maleiwa.
Noota
^ Ashajünüsü wetsiikulokot tüü suluʼu waneirua Biblia, nnojotpejeʼe shia eʼitaanüin suluʼu waneirua karaloʼuta sümaiwajatü ashajuushikat suluʼu griego. Pünaʼla tia suluʼu tü kanüliakat «Sooʼomüin pütchi A3».
^ Shia tü akachennapuʼukalü anain wanee wayuu süpüla outajachin nia. Nuchuntuin Jesús tia pütchikat süpüla niyaawajeʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
^ «Maʼaka aipirua oora süchikijee nujuʼitaain kaʼikai» maluʼulu tia suluʼu griego.
^ «Maʼaka mekietsat oora süchikijee nujuʼitaain kaʼikai» maluʼulu tia suluʼu griego.
