Tü nüshajalakat Lucas 4:1-44
-
Ooʼulakünüsü naaʼin Jesús nutuma chi Yolujaakai (1-13)
-
Oʼttushi Jesús sünain aküjaa pütchi chaa Galilea (14, 15)
-
Mojutusai atumawaa Jesús chaa Nazaret (16-30)
-
Antüshi Jesús suluʼumüin tü ekirajüleekat nüchiki Maleiwa chaa Capernaúm (31-37)
-
Naawaleʼerüin Jesús tü nimeshikat Simón namaʼaleeya waneinnua wayuu (38-41)
-
Chajachi Jesús suluʼu wanee mma yüütüüisü, süntaka watta saalii wayuu nüchiirua (42-44)
4 Nuʼuninnaka Jesús sutuma tü nüpülainkat Maleiwa wattamüin suulia tü süchikat Jordán. Wattashi nia sutuma isashiipaʼamüin
2 soʼu pienchi shikii kaʼi jee suuʼulakünaka naaʼin nutuma chi Yolujaakai. Nnojotsü kasayaain niküin Jesús soʼu kaʼikat tia, outakalaka maʼin nia jamü.
3 Nümakalaka chi Yolujaakai nümüin: «Nüchonlejeʼe pia Maleiwa eküülüjaa* putuma türa ipakat».
4 Anuujeseʼe nünüiki Jesús nümüin: «Müsü tü Karaloʼuta Nüchikimaajatkat Maleiwa: ‹Nnojotsü shiain neʼe katüin atuma noʼu wanee wayuu tü eküütkat›».
5 Süchikijee tia, nümaanaka Jesús nutuma chi Yolujaakai süraloʼumüin wanee uuchi miyoʼu. Niiʼiyataka nümüin suumain wayuu maʼleekalia sainküin tü mmakat.
6 Nümakalaka chi Yolujaakai nümüin Jesús: «Taapeerü pümüin süpüshuaʼa tü suumainkalüirua wayuu otta pieechi laülaaka saaʼu, süka tayain aneekuushin süpüla laülawaa saaʼu jee taapeerü shia nümüin chi wayuu tachekakai süpüleerua.
7 Taapeerü pümüin süpüshuaʼa tü piʼrakat, puʼwaajüle taya, jaʼitasü uwatuain neʼe».
8 Nümakalaka Jesús niʼipajee: «‹Nia puʼwaajüinjachika Jehová* nümüiwaʼa, nia Pümaleiwaseka otta nia piʼyataainjachika amüin›, mataasü sümakai tü Karaloʼuta Nüchikimaajatkat Maleiwa».
9 Nümaanaka Jesús nutuma chi Yolujaakai Jerusalénmüin, nüshaʼwaleʼeraka nia süraloʼu tü miichi aʼwaajüleekat Maleiwa. Nümakalaka chi Yolujaakai nümüin: «Nüchonlejeʼe pia Maleiwa, pumutta pümata yaajee.
10 Anuu tü sümakat tü Karaloʼuta Nüchikimaajatkat Maleiwa: ‹Nüjüteena Maleiwa na aapiee nümaʼanajeejanakana süpüla naaʼinmajüin pia›,
11 otta ‹Najapuluʼujeechi pia suulia süsheʼetuʼulaain puuʼui sünain ipa›».
12 Nusoutakalaka Jesús niʼipajee: «Müsü tü Karaloʼuta Nüchikimaajatkat Maleiwa: ‹Nnojo puuʼulaküin naaʼin Jehová* chi Pümaleiwasekai süpüla pütüjaain saaʼu shiimainre pülashin nia›».
13 Kettaapa chi Yolujaakai süchiki ooʼulakaa naaʼin Jesús, oʼunushi nia nümaʼanajee süpüla nüleʼejüinjachin nüchikuaʼa soʼu wanee kaʼi anashiika oʼu shia nümüin.
14 Nüleʼejaka Jesús nüchikuaʼa Galileamüin sutuma tü nüpülainkat Maleiwa, saapaka wayuu nüchiki sainküinpünaa tia mmakat.
15 Jee müshia nia ekirajüshi suluʼupünaa tü ekirajüleekat nüchiki Maleiwa otta kojutukalaka nia sutuma wayuu maʼleekalia.
16 Nuʼunakalaka mapa Nazaretmüin eejachire miyoʼuin nia. Nikerotaka suluʼu tü ekirajüleekat nüchiki Maleiwa soʼu tü sükaliakalü eemerawaa maʼakaapuʼu naaʼinrüin shia jee nüshaʼwalaaka sünain aashajeʼeraa.
17 Sülatinnaka nümüin tü rooyo nüshajalakat Isaías chi nünüikimaajachikai Maleiwa, nujutatkalaka shia jee nüntaka sünain tü pütchi ashajuushi makat mayaa:
18 «Eesü tü nüpülainkat Jehová* taaʼu süka nüneeküin taya süpüla taküjainjachin pütchi anasü namüin na maʼletsekana, nuluwataain taya süpüla nojuʼitinnajanain na püreesashiikana, süpüla koʼuinjanain na moʼusaliikana jee süpüla jutatajatüin nakuwaʼipa na wayuu müliakana atumawaa,
19 süpüla taküjainjatüin sümüin wayuu kasoʼuluinjatüin anain sukuwaʼipa süchikuaʼa nutuma Jehová».*
20 Süchikijee tia, nukoʼoloko tü rooyokot jee niiteʼeraka shia süchikuaʼa nümüin chi akaalinjashikai suluʼu tü ekirajüleekat nüchiki Maleiwa. Jee nüikalaaka Jesús, nayasaʼa napüshuaʼa na wayuu yalajanakana jülüjasü naaʼin tü nümakat.
21 Nümakalaka Jesús namüin na wayuukana: «Ekeraajüsü soʼukai tü pütchi jaapüitpakat suluʼujee tü Karaloʼuta Nüchikimaajatkat Maleiwa».
22 Anakalaka sünüiki wayuu maʼleekalia nüchiki jee ponusü naaʼin anain maʼin sukuwaʼipa nünüiki, anuu nanüiki: «¿Aashin niain nüchon José chii?».
23 Nusoutaka Jesús namüin: «Shiimainjaʼa meerüin jünüiki tachiki: ‹Anashi paawalaale pümüiwaʼa süka tottoolin pia›. Jee meerü jünüiki: ‹Anasü paaʼinrüle yaa puumainpaʼa tü kasa waapakalü achiki sünain paaʼinrüin chaa Capernaúm›».
24 Jee müshi nia: «Shiimain tanüiki jümüin, chi nünüikimaajachikai Maleiwa, mojutusai atumawaa nuumainpaʼa.
25 Shiimain tanüiki jümüin, wattapuʼu saalii jieyuu outaka aʼwayuuse chaa Israel soʼu nükalia Elías, wanaa sümaa nnojoluin süʼitüin juya soʼu apünüin juya sümaa aipirua kashi jee soʼu alin maʼin jamü sainküinpünaa tia mmakat.
26 Nnojoipejeʼe ajütünüin Elías namaʼanamüin naya jieyuukana, ajütünüshi neʼe nia sümaʼanamüin tü wayuu outa aʼwayuuset chajatkat kepiain Sarepta, suluʼu tü mmakat Sidón.
27 Akaʼaya nükalioʼu Eliseo chi nünüikimaajachikai Maleiwa, wattapuʼu naalii wayuu ajaʼtta atachii chaa Israel sutuma tü ayuulii kanüliakat ‹lepra›,* nnojoliipejeʼe naya aawalaain nutuma. Nia neʼe aawalaaka nutuma Naamán, chi chejeʼewaikai Siria».
28 Nayasaʼa na wayuu chajanakana suluʼu tü ekirajüleekat nüchiki Maleiwa, naashichijaakalaka naapaiwaʼaya tü nümakat Jesús.
29 Natamaajaaka na wayuukana jee nayuʼlamaataka Jesús suluʼujee tü pueulokot, namaakalaka nia süraloʼumüin wanee uuchi sukumajünaka aaʼu tü pueulokot. Namaashi nia chamüin shiiʼiree nojutajachin nia iipünaajee süpüla nuʼttajachin süka nüraloʼu mmoluʼumüin.
30 Nülatapünaaka Jesús pasanainpünaa nanain jee nuʼunakalaka namaʼanajee.
31 Nüntaka suluʼumüin tü pueulo kanüliakat Capernaúm, wanee mma chasü Galilea. Ekirajawaishi nia wayuu soʼu tü sükaliakalü eemerawaa.
32 Ponusü naaʼin na wayuukana tü sukuwaʼipakat nikirajia Jesús süka kaawain nünüiki.
33 Shiasaʼa suluʼu tü ekirajüleekat nüchiki Maleiwa, eejachi wanee wayuu kaleʼeruʼushi yolujaa. Nuʼwaataka sünain maa:
34 «Aaj, ¿jamajanakai waya pümüin Jesús, pia chejeʼewaikai Nazaret? ¿Antüshi pia süpüla pajaʼttirajanain waya? Tatüjaa aaʼuchi piain chi Nüjünalakai Maleiwa».
35 Naaʼayajaaka Jesús saaʼin tü yolujaakat sümaa nümüin sümüin: «Koʼuta neʼe pia, pujuʼita nüleʼeruʼujee chira wayuukai». Nujuttakalaka mmoluʼumüin chi wayuukai sutuma tü yolujaakat pasanain sünain wayuu jee sujuʼitakalaka nüleʼeruʼujee sümaa nnojolin jamajüin nia sutuma.
36 Saashajaajiraaya sümaka wayuu süka ponuin maʼin saaʼin tü shiʼrakat, anuu sünüiki: «¿Kasakai wayuu chii? Jaʼitakajeʼe neʼe tü yolujaakalüirua jüüjüüsü nümüin süka sujuʼitüin süleʼeruʼujee wayuu saapaiwaʼaya nünüiki».
37 Suʼwalakajaaka nüchiki Jesús sainküinpünaa tia mmakat.
38 Nujuʼitapa Jesús suluʼujee tü ekirajüleekat wayuu nüchiki Maleiwa, nüntaka nipialuʼumüin Simón. Tuttaka* maʼin tü nimeshikat Simón, suchuntunaka nümüin Jesús naawaleʼerüinjatüin shia.
39 Nürütkaakalaka Jesús sünainmüin jee naawaleʼeraka shia, nnojoluitpa tuttuin. Sütamaaka sünain aʼlakajawaa nayaaluʼu.
40 Wanaa sümaa numotsojooin chi kaʼikai, antinnüsü nümüin Jesús wayuu eekai ayuulin sutuma ayuulii eekai eein, niʼitaaka najapü naaʼu waneʼewai nakua jee anakalaka naya nutuma.
41 Wainma wayuu ojuʼitawaika aleʼeruʼujee yolujaa jee maʼwaisü sünüiki shikiisaluʼu: «Pia chi Nüchonkai Maleiwa». Nüchiaapejeʼe shia Jesús jee nnojotsü shia nusoutirüin süka sütüjaain saaʼu tia yolujaakalüirua niain Cristo.
42 Shiasaʼa wattachon maalü, nuʼunaka Jesús suluʼumüin wanee mma yüütüüisü. Wattapejeʼe saalii wayuu oʼunaka nüchiirua jee antaka chaa eejachire nia. Naʼalijiraka nia shiiʼiree makatajachin nia namaa.
43 Anuupejeʼe nünüiki Jesús namüin: «Oʼunajachiaʼaya taya suluʼupünaa waneirua pueulo sünain aküjaa tü pütchi anakat maʼin süchiki niainjachin aluwataain Maleiwa saaʼu wayuu, jama shiain ajütüüshin apüla taya tia».
44 Ayataka nia sünain nikirajüin wayuu suluʼupünaa tü ekirajüleekat nüchiki Maleiwa chakat Judea.
Noota
^ «Pan» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Shia wanee ayuulii ittaka atuma süta wayuu. Pünaʼla tia suluʼu tü kanüliakat «Jamaluʼulu pütchikat».
^ Jee shiale «poloonaka, oushuuka, saapuuka».
