Tü nüshajalakat Lucas 5:1-39
-
Watta saalii jime nasirü. Na palajanakana nikirajüin Jesús (1-11)
-
Aawaleʼennüshi wanee wayuu kanainshi tü ayuulii kanüliakat «lepra» (12-16)
-
Anashi nutuma Jesús wanee wayuu makutulaainkai sutuma ayuulii (17-26)
-
Eenajaanüshi Leví nutuma Jesús süpüla nümaataralin nia (27-32)
-
Asakinnüshi Jesús süchiki jamüin maamajüinka na nikirajüinkana (33-39)
5 Soʼu wanee kaʼi chajachi Jesús shaʼwatüin sotpaʼa tü laa miyoʼu kanüliakat Genesaret,* wattaka saalii wayuu jutkataka nüʼütpünaa shiiʼiree saapajeein nünüiki Maleiwa.
2 Niʼraka Jesús piamasü anuwa sotpaʼa tü laa miyoʼukat. Ashakatüshii na olojuliikana suluʼujee tü anuwakat jee yalajanaka naya sünain ashijawaa tü nakusuinkat.
3 Noʼotooko Jesús suluʼu wanee anuwa, naʼanuwain Simón tia jee nuchuntaka nümüin nuʼunirajatüin shia nümaa mamüin aka tüsa. Nüikalaaka Jesús suluʼu tü anuwakat jee nikirajaka na wayuukana yalejee.
4 Keraapa nünüiki Jesús süchikijee ekirajaa nümakalaka nümüin Simón: «Anashi puʼunirüle tü anuwakat chaa eere oʼutuin tü wüinkat, jujuteetka tü kusukat süpüla kasirüinjanain jia».
5 Anuujeseʼe nünüiki Simón nümüin: «Ekirajüikalee, siraasü aikat waaʼu sünain olojoo nnojotpejeʼe kasain wasirüin, tojutuinjaʼa paala tü kusukat saaʼu puluwataaichipain taya sünain».
6 Shiasaʼa nojutapa shia, watta saalii jime nasirü. Süchatajaayaa sümaka tü kusukot, jama wattain saalii tü jimekat.
7 Neenajaka süka najapü waneinnua wayuu aʼyataajiraashii wanaa namaa sulujuna wane anuwaya. Neenajüin naya süpüla nakaalinjünüinjanain natuma. Narütkaakalaka naya wayuukana jee nepirajaka tü piamasükalü anuwa, emeroteematüsü tü piamasükalü anuwa saaʼujee wotuin maʼin shia.
8 Niʼraiwaʼaya tia Simón Pedro, nüsapainkaka nia nümülatuʼu Jesús sünain maa nümüin: «Señotkalee, wattaluʼu pia toulia, wayuu kaainjarai taya».
9 Ponoko maʼin naaʼin Pedro jee na wayuu eejanakana nümaa wattain maʼin saalii tü jime nasitkat.
10 Ponusiaʼaya naaʼin tia Santiago otta Juan, na nüchonniikana Zebedeo, aʼyataajiraashii naya nümaa Simón. Anuuka nünüiki Jesús nümüin Simón: «Nnojo mmoluin pia, noʼujeʼereeya kaʼikai chii, achajaajeechi pia nachiki wayuu wanaa tamaa maʼaka püchajaain süchiki tü jime pulojokot».
11 Nantirapa tü anuwakat sotpaʼamüin tü palaakat, napütakalaka süpüshuaʼa tü kasa eejatkat namaʼana jee noʼunaka nümaa Jesús.
12 Wanaa sümaa chajachin Jesús suluʼu wanee pueulo, arütkaashi wanee wayuu nünainmüin, kanainshi tü ayuulii kanüliakat «lepra».* Nüsapainkakaʼa nia nümülatuʼu jee nuchuntaka nümüin sünain maa: «Señotkalee, tatüjaa aaʼu aneechin taya putuma müleka pücheküle süchiki».
13 Niyurutka nütüna Jesús nünainmüin jee nipettaka nia sünain maa: «Tacheküin süpüleerua paawalaainjachin». Saawalaaka nuulia tü leprakat.
14 Nuchuntaka nümüin chi wayuukai nnojoluinjatüin shia nüküjain sümüin wayuu jee nümakalaka nümüin: «Anashi puʼunule nümaʼanamüin chi sacerdotekai otta piʼikajaa tü asülajünajatkat nümüin Maleiwa naashin Moisés süpüla sütüjaanajatüin saaʼu anaichipain pia».
15 Suʼwalakalaaka nüchiki Jesús sainküinpünaa tü mmakat. Antüsü watta saalii wayuu nünainmüin süpüla aapajaa tü nikirajakalü anain jee süpüla naawaleʼerüinjatüin tü ayuuliikat noulia.
16 Oʼunawaishi Jesús sünain oʼuraajaa suluʼu wanee mma eekai yüütüülin.
17 Soʼu wanee kaʼi, chajachi nia ekirajüin suluʼu wanee miichi, yalajanaka joyotuin waneinnua fariseo otta waneinnua ekirajülii süchiki tü Pütchi Aapünakat nümüin Moisés. Antapaashii naya suluʼujee tü mmakat Galilea, Judea otta Jerusalén. Eejatkalaka tü nüpülainkat Jehová* naaʼu Jesús süpüla anainjatüin nutuma wayuu eekai ayuulin.
18 Nantapaaka wanee wayuuinnua nümaa wanee wayuu makutulaainkai sutuma ayuulii, alüʼüjiraanüshi nia natuma, nekerotireeka nia paülüʼümüin nünainmüin Jesús.
19 Shiasaʼa süka wattain naalii na wayuukana, nnojoishii jalapünaainjanain naya. Noʼotookalaka saaʼumüin tü miichikat, nashakatitka pasanain sünain wayuu chi wayuu makutulaainkai sutuma ayuulii, wanaapünaa maʼin sümaa eejachire Jesús.
20 Niyaawataka saaʼu Jesús kanoulain naya wayuukana, nümakalaka nümüin chi wayuu makutulaainkai sutuma ayuulii: «Waʼle, alatinnüitpa paainjala puulia».
21 Nayasaʼa na karaloʼutamaajanakana jee müshiʼiya na fariseokana namajiraaka: «¿Jaraikai chi eʼrüikai wayumüin süka nünüiki? Nnojoishi jaralin alatirüin saainjala wayuu suulia, nia neʼe Maleiwa».
22 Nütüjaapejeʼe saaʼu Jesús tü suluʼukat naaʼin naya wayuukana, nümakalaka namüin: «¿Kasakai tü jüsakirakalü anain jaaʼin?
23 ¿Kasache anaka saaʼin jümüin? ¿Shiache anaka aluʼu tamüle nümüin chi wayuukai ‹alatinnüitpa paainjala puulia›? ¿Shiataapa anain tamüle nümüin ‹pütamaa pümaala püwarairaai›?
24 Jülüjataa jaaʼin tü taaʼinrajatkat süpüla jütüjaain saaʼu niʼitaanüin chi Süchonkai Wayuu* yaa mmapaʼa süpüla nülatirüin saainjala wayuu». Nümakalaka nümüin chi wayuu makutulaainkai sutuma ayuulii: «Anuu tanüiki pümüin, pütamaa pümaala, paapaa türa pujulejiakat, puʼuna pümaala pipialuʼumüin».
25 Nütamaaka chi wayuukai noʼupala na wayuu yalajanakana yala, naapaaka tü nujulejiakat jee nuʼunaka nipialuʼumüin sümaa nuʼwaajüin maʼin Maleiwa.
26 Ponoko maʼin saaʼin wayuu süpüshuaʼa tü kasa naaʼinrakat Jesús, suʼwaajaka Maleiwa. Anuujeseʼe nanüiki sutuma ponuin maʼin naaʼin tia: «¡Anakatche maʼin tü kasa weʼrakat soʼukai!».
27 Shiasaʼa nuʼunapa Jesús yalejee niʼrüin wanee wayuu kanüliashi Leví, achekajüi nia nneerü neʼipajee na sülaülakana mma, joyotushi nia suluʼu tü miichi eere süchekajünüin nneerü, nümakalaka Jesús nümüin: «Anashi tamaataraire pia».
28 Nüpütaka Leví süpüshuaʼa tü kasa eejatkat nümaʼana, nütamaaka sümaa nuʼunuin nümaa Jesús.
29 Süchikijee tia, eejatka wanee ekawaa nutuma Leví chaa nipialuʼu, nüntia Jesús tia nutuma. Eejana sünain tia ekawaakat watta naalii wayuu achekajülii nneerü neʼipajee na sülaülakana mma otta eejana waneinnua wayuʼuya.
30 Nayasaʼa na fariseokana namaʼaleeya na karaloʼutamaajana eejanakana naʼaka, aʼyounalaashii naya namüin na nikirajüinkana Jesús jee namaka namüin: «¿Jamüshii jikaaka namaa na wayuu achekajüliikana nneerü jee namaa na wayuu kaainjaraliikana?».
31 Nütüjaapa Jesús saaʼu tia, nümakalaka namüin: «Nnojotsü choʼujaain niʼrajeʼerüin wanee wayuu anale nia, akaajasaʼa ayuuire nia, oʼunushi nümaʼanamüin wanee tottoot.
32 Nnojoishi antüshin taya süpüla ekirajaa na lotokana akuwaʼipa, naya tekirajüinjanaka na kaainjaraliikana süpüla nayaawajaain suulia naainjala».
33 Namakalaka nümüin Jesús: «Aamajawaishii na nikirajüinkana Juan otta oʼuraajawaishii naya. Müsia neʼe tü naaʼinrakat nekirajüin na fariseokana, eekajasaʼa na pikirajüinkana shia jülüjaka neʼe naaʼin ekawaa».
34 Nusoutaka Jesús namüin: «Nnojoishii süpüla jaamajirüinjanain naʼaleewainyuu wanee wayuu eekai kaʼwayuuseinjachin müleka eeyüire nia namaa, ¿aashi müin?
35 Eejeetpejeʼe wanee kaʼi nümaaneechika oʼu chi kaʼwayuuseinjachikai, naamajeenaka naʼaleewainyuu naalinjee».
36 Kayaawaseka nutuma Jesús tü nikirajakalü anain, müshi nia: «Nnojotsü achotoonuin wanee kuluulu eekai jeketüin süpüla suruwentajiain wanee kuluulu eekai laülaain. Saaʼinnüle tia, asüküijaweerü tü kuluulu laülaakat sutuma tü kuluulu jeketükat. Jee mojeerü shiyolojo tü kuluulu laülaakat sutuma karuwentajiain shia.
37 Nnojotsü alaʼannüin wiino eekai jeketüin suluʼu süta* wiino eekai laülaairüin. Mülejeʼe shia atumawaa, eesü süpüla süchatajaain, amüla meeria wiinokot. Nnojoleerü kasain anain apüla tü sütakat wiino.
38 Eekajasaʼa tü wiino jeketükat alaʼannüsü shia suluʼu süta eekai jeketüin.
39 Chi eekai asüin wiino eekai saashüʼüjüüshin nnojoluitpa nüseein tü wiino jeketükat, ‹shia anaka tü wiino eekai saashüʼüjüüshin›, müshi».
Noota
^ «Tü palaa chakat Galilea» münüsü shiaya.
^ Shia wanee ayuulii ittaka atuma süta wayuu. Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ Tia sütakat wiino, aainjuushi süka süta mürüt. Pünaʼla tia suluʼu tü kanüliakat «Jamaluʼulu pütchikat».
