Tü nüshajalakat Lucas 6:1-49
-
Nia Laülaaka Jesús saaʼu tü sükaliakalü eemerawaa (1-5)
-
Aawalaasü najapü wanee wayuu joso ajapüchi (6-11)
-
Na Polookana Piamamüin Aluwataaushi (12-16)
-
Ekirajüshi Jesús jee anasü nutuma wayuu eekai ayuulin (17-19)
-
Na wayuu anakuwaʼipaliikana otta na wayuu eʼreenakana müliaa (20-26)
-
Alinjana nüpüla wanee wayuu na nüʼünüükana (27-36)
-
«Juuʼulaa suulia ayoujaa wayuu» (37-42)
-
Jiyaawateerü aaʼu nakuwaʼipa sükajee tü naainjakat (43-45)
-
Tü miichi ashaʼwaleʼennakat saaʼu ipa otta tü ashaʼwaleʼennakat saaʼu mmashii (46-49)
6 Shiasaʼa soʼu wanee kaʼi neemeraakalü oʼu na judíokana, nülatapünaaka Jesús süpaʼapünaa wanee suuʼulia trigo, nasürüttapünaaka na nikirajüinkana shiʼichi tia trigokat, nooloʼojuin shia süka najapü sümaa neküin shia.
2 Namakalaka waneinnua fariseo namüin: «¿Jamüshiikai jaaʼinraka wanee kasa apülajünaka soʼu sükalia eemerawaa?».
3 Nusoutaka Jesús namüin: «¿Nnojotsükai jaashajeʼerüin süchiki tü naaʼinrakat David namaa na nümaajanakana soʼu outuin naya jamü?
4 Mataashi nikerotokoi suluʼumüin nipia Maleiwa, saapünaka nümüin tü pan aapünajatkat nümüin Maleiwa, nikiraaka shia namaa na wayuu nümaajanakana. Nnojotpejeʼe müinjatüin sukuwaʼipa tia naashin Maleiwa, nayainjana neʼe ekaka tia na sacerdotekana».
5 Anuukalaka nünüiki Jesús namüin: «Nia Laülaaka chi Süchonkai Wayuu saaʼu tü sükaliakalü eemerawaa».
6 Shiasaʼa soʼu wanee kaʼi neemeraaka oʼu na judíokana, nikeroloko Jesús suluʼumüin tü ekirajüleekat nüchiki Maleiwa, nuʼttakalaka sünain ekirajaa. Eejachikalaka yala wanee wayuu jososü tü najapü nikiakat.
7 Niʼrajaanaka maʼin Jesús natuma na karaloʼutamaajanakana otta natuma na fariseokana, natüjawee aaʼu aneechire chia wayuukai nutuma sükalioʼu eemerawaa süpüla süsalainjachin nia natuma sünainjee tia.
8 Shiasaʼa süka nütüjaain saaʼu Jesús tü suluʼukat naaʼin naya wayuukana, nümakalaka nümüin chi wayuu joso ajapüchikai: «Pütamaa, anashi püshaʼwalaale yaa pasanain wanain». Nütamaaka chi wayuukai sümaa nüshaʼwalaain pasanain nanain.
9 Nümakalaka Jesús namüin: «Tasakirüin paala jia sünain wanee kasa. ¿Kasache anaka süpüla aaʼinnaa sükalioʼu eemerawaa? ¿Shiache aaʼinnajatka wanee kasa eekai anain, shiataapa aaʼinnajatüin wanee kasa eekai mojuin? ¿Anasüche nuʼtteʼennüle* wanee wayuu, shiataapa anain nuʼutunule aaʼin?».
10 Niirakaaka Jesús namüin na wayuu eejanakana nüʼütpünaa, nümakalaka nümüin chi wayuu joso ajapüchikai: «Piyurula pütüna». Anamaataka najapü chi wayuukai niyurutpa nütüna.
11 Üttakalaka maʼin naaʼin na karaloʼutamaajanakana otta müshiʼiya na fariseokana, naashajaajiraaka nikiira Jesús.
12 Shiasaʼa soʼu wanee kaʼi, nuʼunakalaka Jesús saaʼumüin tü uuchikat süpüla nuʼuraajüin nümüin Maleiwa. Siraasü aikat naaʼu sünain oʼuraajaa.
13 Shiasaʼa jaʼipa kaʼikat, nuunejitkalaka Jesús na nikirajüinkana, nüneekaka polooshii piamamüin naʼakajee, «aluwataaushi» münüshii naya nutuma.
14 Eejachi Simón, chi Pedro münakai nutuma Jesús, Andrés, chi nuwalakai Pedro, Santiago, Juan, Felipe, Bartolomé,
15 Mateo, Tomás, Santiago, chi nüchonkai Alfeo, Simón «chi Yalayalakai aaʼin»,
16 Judas, chi nüchonkai Santiago otta müshia Judas Iscariote, chi aapakai nikii Jesús.
17 Nüshakataka Jesús saaʼujee tü uuchikat namaa na aluwataaushikana. Ashakatüshii naya eemüin wanee mma patajatshiisü. Watta naalii nikirajüin Jesús eejanakana napüla otta müsia watta saalii wayuu suluʼujeejatü tü mmakat Judea, Jerusalén otta müshiʼiya na wayuu kepiakana sotpünaa tü palaa chakat Tiro otta müsia Sidón. Antüshii naya süpüla aapajaa nünüiki Jesús otta süpüla naawaleʼennajanain suulia tü ayuulii nanainkat.
18 Jaʼitakajeʼe neʼe na wayuu müliakana maʼin sutuma kaleʼeruʼuin naya yolujaa, anashii naya nutuma.
19 Nipettüneeka Jesús natuma na wayuu wattakana naalii süka natüjaain saaʼu naaʼinreechin wanee kasa eekai pülain aneenaka atuma naya.
20 Niirakaakalaka Jesús namüin na nikirajüinkana jee nümakalaka namüin:
«Anakuwaʼipalii jia wayuu müliakana süka jiʼreerüin tü kasa anasü eejeetkat nuluwataapeena Maleiwa.
21 »Anakuwaʼipalii jia alatirakana jamü süka emireenain jia.
»Anakuwaʼipalii jia aʼyalajakana maaʼulu süka jüsirajeenain.
22 »Anakuwaʼipalii jia süʼürülakana wayuu naalinjee chi Süchonkai Wayuu, jia üttakana saaʼin wayuu, jia aʼülüjünakana amüin otta jia mojukana anülia sutuma wayuu.
23 Talatashaata maʼin jaaʼin jiʼrapa tia makat süka jiʼreenain kasa anasü nutuma Maleiwa.* Mapuʼusia tü aaʼinnakat namüin na nünüikimaajana Maleiwa namaiwajanakana natuma natuushinuu naya wayuukana.
24 »Aluʼutaʼaleeshiijaʼa jia washinnuukana süka saapünüitpain jümüin tü kasa talatakalü atuma jaaʼin.
25 »Aluʼutaʼaleeshiijaʼa jia emirakana maaʼutpünaa yaa süka jülatireenain jamü.
»Aluʼutaʼaleeshiijaʼa jia asirajakana maaʼutpünaa yaa süka mojeerüin jaaʼin otta jiʼyalajeenain.
26 »Aluʼutaʼaleeshiijaʼa jia anale sünüiki wayuu jüchiki, mapuʼusia nanüiki natuushinuu naya wayuukana nachiki na nünüikimaajanayaakana Maleiwa.
27 »Anuupejeʼe tanüiki jümüin jia aapajakana tanüiki, alinjana jüpüla na jüʼünüükana, kamaneeinjana jia namüin na aʼürülaakana jünain.
28 Jücheka kasa anasü napüleerua na mojukana anüiki jümüin otta juchunta napüleerua na aʼülüjakana jümüin.
29 Niʼyaatüle wanee wayuu puwalapünaa, shia anaka aluʼu pujununtaale süpüla niʼyaatajatüin tü wane. Nüsütüle wanee wayuu saajuna püsheʼin, anasü paapüle nümüin tü sutujunakat püsheʼin.
30 Anashi püsülajüle wanee kasa sujulijünüle paaʼu. Nnojo pülejüin süchikuaʼa wanee kasa süsütünüle puulia.
31 »Jaaʼinra kasa anasü sümüin wayuu maʼaka saaʼinneein jümüin.
32 »Müleka nayale alin jüpüla na wayuu aikana apüla jia, ¿kasa saamaka tia jümüin? Jaʼitakajeʼe neʼe na kaainjaraliikana, aishii napüla na aikana apüla naya.
33 Müleka jaaʼinrüle neʼe kasa anasü napüleerua na wayuu aaʼinrakana kasa anasü jümüin, ¿kasa saamaka tia jümüin? ¿Aashin müinña neʼe nakuwaʼipa na kaainjaraliikana?
34 Müleka nayale neʼe jaʼanapirüin na wayuu awalaajüinjanakana jümüin, ¿kasa saamaka tia jümüin? Jaʼitakajeʼe neʼe na kaainjaraliikana, aʼanapiraʼawaishii naya süpüla suwalaajünajatüin namüin.
35 Eekajasaʼa jiakana, alinjana jüpüla na jüʼünüükana, aaʼinrajana jia kasa anasü, aʼanapirüinjana jia sümaa nnojoluin jaʼatapajüin shiiteʼennüin jümüin. Wainmeetkalaka kasa aapünaka jümüin otta nüchonjeena jia chi Maleiwa Miyoʼushikai, jama nüsülajülin, jaʼitakajeʼe neʼe namüin na wayuu matüjainkana aapaa analuʼut jee namüin na mojulaashiikana.
36 Amüliajüliinjana jia maʼaka nümüliajülin chi Jüshikai.
37 »Juuʼulaa suulia ayoujaa wayuu suulia jiyoujunuin. Nnojo mojuin jünüiki sujuuna wayuu süpüla nnojoluinjatüin mojuin sünüiki wayuu jujuuna. Moto jaaʼin saainjala wayuu moteetka aaʼinñüü tü jaainjalakat.
38 Asülajüliinjana jia, jüsülajüneenaka amüin. Wainmeerü maʼin tü ejitünakat suluʼu tü jüsheʼin jüshataakat, ayuunanneerü, aseʼejüneerü otta ejituujeerü tü asülajünakat jümüin. Tü jaaʼinrakat sümüin wayuu shieeria neʼe tü aainjünakat jümüin».
39 Kayaawaseka nutuma Jesús tü nikirajakalü anain, müshi nia: «Jamüshijaʼa wanee wayuu eekai moʼupaʼain, nnojoishi süpüla najattüin wane eekai moʼupaʼain wanaa nümaa, ¿aashi müin? Ojunuujiraaweena naya piamaleʼeya suluʼu wanee ishi, ¿aashin mayaain?
40 Chi wayuu ekirajünakai, nnojoishi alanaain nuulia chi wayuu ekirajakai nia, eekajasaʼa chi wayuu anakai ekirajia paala, meechi aka naaʼin chi wayuu ekirajakai nia.
41 ¿Jamüsü shiakaʼa piʼrüin tü yarüttüshii yalakat suluʼu noʼu chi puwalakai? ¿Jamakaʼa nnojotka piʼrüin tü wunuʼu suluʼukat poʼu?
42 ¿Jamataalainjachika süpüla pümüin nümüin chi puwalakai ‹icheʼe tayuʼlai türa yarüttüshii suluʼuka poʼu› sümaa nnojoluin piʼrüin tü wunuʼu juʼttakat suluʼu poʼu? Wayuu piama oʼupünaachi pia. Shia anaka aluʼu piyuʼrule palajana tü wunuʼu juʼttakat suluʼu poʼu. Aneetkalaka pümüin ayuʼlaa tü yarüttüshii suluʼukat noʼu chi puwalakai.
43 »Tü wunuʼu eekai anain nnojotsü süpüla ittüin süchon. Akaajasaʼa tü wunuʼu eekai mojuin, nnojotsü süpüla anain süchon.
44 Atüjaana aaʼulu anain wanee wunuʼu sutumajee tü süchonkat. Jamüsüjaʼa tü higokot, nnojotsü atpajünüin sünainjee manna, akaʼaya tü uuwakat, nnojotsü ashottünüin sünainjee wunuʼu keipüsesü.
45 Wanee wayuu eekai anamiain, aashajaashi süchiki kasa anasü süka anain tü suluʼukat naaʼin, akaajasaʼa wanee wayuu eekai mojulaain, aashajaashi süchiki kasa mojusü süka mojuin tü suluʼukat naaʼin. Tü naashajaakalü achiki wanee wayuu shia tü suluʼukat naaʼin.
46 »¿Jamakaʼa ‹Señotkalee› jümaka tamüin sümaa nnojoluin jaaʼinrüin tü taluwataakalü anain?
47 Taküjain paala jümüin jaralin müin aka nukuwaʼipa chi wayuu arütkaakai tanainmüin, aapajakai tanüiki otta aaʼinrakai tü tamakat.
48 Müshi nia maʼaka naaʼin chi wayuu akumajakai nipia, oʼutusü maʼin tü mma nupotokot süpüla nüshaʼwaleʼerüin suuʼui nipia saaʼu ipa. Shiasaʼa wanaa sümaa süsetüin tü wüinkat, katchinshaatasü maʼin tü süchikat, nnojotpejeʼe süsaapünaain amaa tü miichikat, jama anain maʼin sukumajia.
49 Akaajasaʼa chi aapakai neʼe tü tamakat sümaa nnojoluin naaʼinrüin shia, müshi aka naaʼin chi wayuu akumajakai nipia saaʼu mmashii, nnojoipejeʼe apotuin nia süpüla tü suuʼulinjatkat. Süsetaka tü süchikat sooʼomüin tia miichikat, süsaapünaaka sümaa, ojutta müsüjaʼa shia sutuma».
Noota
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
^ «Chaa iipünaa» maluʼulu tia suluʼu griego.
