Tü nüshajalakat Lucas 7:1-50
-
Kanoulashi maʼin wanee sülaüla surulaat (1-10)
-
Nüsoʼireʼera aaʼinchi Jesús süchon wanee wayuu outa aʼwayuuset chejeʼewat Naín (11-17)
-
Kojutushi nutuma Jesús Juan chi Awoutisaajüikai (18-30)
-
Süsalashii naainjala na wayuu nnojoliikana kachipünaain aaʼin wanee kasa (31-35)
-
Alatinnüsü saainjala wanee wayuu maaʼinsat (36-50)
-
Nachiki na wayuu kojuyaalakana (41-43)
-
7 Süchikijee nikirajüin Jesús na wayuukana, oʼunushi nia suluʼumüin tü mmakat Capernaúm.
2 Eejachi wanee sülaüla surulaat mayeinkai maʼin achepchia, aishi chi nüchepchiakai nüpüla.
3 Wanaa sümaa naapüin chi sülaülashikai surulaat nüchiki Jesús, nuluwataaka waneinnua laülaashii napüleerua na judíokana süpüla nachuntajanain nüntajachin Jesús jee naawaleʼerüinjachin chi nüchepchiakai.
4 Noʼunaka eemüin Jesús jee anuuka nanüiki nümüin: «Jaliaʼaya maa tü nümakat pümüin chi wayuukai,
5 jama alin nüpüla wayuu yaajeʼewat woumainpaʼa, nia kakumajiralaka wamüin tü ekirajüleekat nüchiki Maleiwa».
6 Nuʼunakalaka Jesús namaa naya wayuukana. Shiasaʼa nülüʼülaapa maʼin sünain tü miichikat, nuluwataaka chi sülaülashikai surulaat wanee nütünajunnuu sünain maa nümüin Jesús: «Señotkalee, nnojoishi keraain taya süpüla püntüinjachin tepialuʼumüin, wayuʼulaa neʼe taya.
7 Eetaayaai kasashin wayu taya süpüla toʼunajachin pümaʼanamüin. Anasü püküjale naawalaajeechin chi tachepchiakai, aneechika nia.
8 Jamüshijaʼa tayakai, taaʼinrawalin tü aluwataanakalü anain taya natuma na laülaakana tapüleerua otta taluwataain joo na surulaat laülaakana aaʼu taya. Jamüshijaʼa tamüle nümüin wanee, ‹anashi puʼunule sünain tü makat yaa›, oʼunamaatüshi nia, ‹jalaichi› tamüle nümüin chi wane, antamaatüshi nia otta ‹anashi paaʼinrüle tüü›, tamüle nümüin chi tachepchiakai, naaʼinramaatüin shia».
9 Ponusü maʼin naaʼin Jesús tü nümakat chia wayuukai jee nümaka namüin na wayuu wattakana naalii: «Tamüshii paala jia, nnojoishi teʼrüichin wanee wayuu yaa Israel eekai kanoulain maʼin maʼaka naaʼin wayuukai chii».
10 Nalenapa miichipaʼamüin na aluwataanüshiikana, anakalaka chi achepchieekai napüla.
11 Süchikijee tia, nuʼunakalaka Jesús suluʼumüin wanee pueulo kanüliasü Naín. Noʼunaka na nikirajüinkana nümaa jee müsia watta saalii wayuu.
12 Nülüʼülaapa soʼuluʼumüin tü pueulokot, niʼrakalaka niʼikünajachin wanee wayuu outushi. Süchon nia wanee wayuu outa aʼwayuuset, waneeshiaʼala neʼe nia sümüin. Watta maʼin saalii wayuu pueulopaʼajeejana sümaa.
13 Niʼrapa Señotkai tü wayuukat, aisü maʼin sümüliala nümüin jee nümaka sümüin: «Nnojo piʼyalajüin».
14 Nürütkaakalaka Jesús nünainmüin müliashii jee nipettaka tü alüʼüjiraanakalü aaʼu nia. Ashaʼwalaashiijeseʼe na wayuu alüʼüjakana nia, nümaka nümüin müliashii: «Pütamaa waaʼiraa».
15 Nüikalaaka chi jimaʼaikai sünain aashajawaa. «Anii püchon», nümakalaka Jesús sümüin nii chi jimaʼaikai.
16 Ponoko saaʼin wayuu süpüshuaʼa tü kasa shiʼrakat jee suʼwaajüin Maleiwa sünain maa: «Eeichipa waʼaka wanee nünüikimaajachi Maleiwa pülashi maʼin» jee müshii naya: «Sotushii naaʼin Maleiwa na nüpüshikana».
17 Suʼwalakajaaka nüchiki Jesús sainküinpünaa Judea jee sainküinpünaa tia mmakat.
18 Nayasaʼa na nikirajüinkana Juan naküjain nümüin süpüshuaʼa tü kasa naaʼinrakat Jesús.
19 Nuluwataakalaka Juan piamashii nikirajüin nümaʼanamüin chi Señotkai süpüla nasakirüinjachin nia: «¿Piaʼaya chi antajachikai anülia? ¿Iseeyüittaapa wane?».
20 Anuujeseʼe nanüiki na wayuukana nantapa nümaʼanamüin Jesús: «Nuluwataain waya Juan chi Awoutisaajüikai süpüla wasakirüinjachin pia müleka pialejeʼeya chi antajachikai anülia, ¿iseeyüittaapa wane?».
21 Soʼu kaʼikat tia, anashii nutuma wayuu eekai ayuulin, eekai alin kasa nanain, eekai kaleʼeruʼuin yolujaa jee koʼushii nutuma na moʼupaʼasaliikana.
22 Nümaka Jesús namüin: «Anashii juʼunule süpüla jüküjain nümüin Juan süchiki tü kasa jiʼrakat jee tü jaapakalü achiki, koʼupaʼashii na eekai moʼupaʼain, awarairaashii na eekai masaʼain, ashatüsü nata na eekai ajaʼttüin nata sutuma ‹lepra›, kacheʼeshii na eekai macheʼein, asoʼiraasü naaʼin na eekai outuin otta aküjünüsü süchiki tü pütchi anakat maʼin namüin na wayuu maʼletsekana.
23 Anakuwaʼipaitaʼaleejaʼa maʼin chi wayuu eʼitaakai naaʼin tanain sümaa nnojolin wainmajüin naaʼin».*
24 Noʼunapa na nikirajüinkana Juan, naashajaaka Jesús namaa na wayuu wattakana naalii süchiki nukuwaʼipa Juan, nümaka namüin: «¿Kasa jünaʼalaaka amüin chaa isashiipaʼa? ¿Shia jünaʼalaaka amüin wanee türiia liantaka sutuma joutai?
25 ¿Kasakaʼa jünaʼalaain amüin? ¿Niache jünaʼalaaka amüin wanee wayuu anakai maʼin asheʼin? Eekajasaʼa na wayuu anapüijakana asheʼin jee wainmakana amaʼana kasa, chashii nepialuʼu na aluwataashiikana.
26 ¿Kasakaʼa jünaʼalaain amüin? ¿Niache jünaʼalaaka amüin wanee nünüikimaajachi Maleiwa? Tamüshii paala jia, alanaʼaleesia maʼin nukuwaʼipa Juan nuulia wanee nünüikimaajachi Maleiwa.
27 Aashin niayaain chi münakai achiki: ‹Tajüteechi püpüleerua chi anülieemaajachikai. Meerü neerutkai saaʼin wopu püpüleerua süpüla pülatajachin suluʼupünaa puʼunajaapa›.
28 Annu tanüiki jümüin, nnojoishi eeichin wanee wayuu eekai nülanaʼaleeinña nuulia Juan. Eekajasaʼa nuluwataapeena Maleiwa, nieechi kapülainreeka nuulia Juan chi wayuu eekai meʼraajuuin maʼin chaa nümaʼana Maleiwa».
29 Naapapa tia na wayuukana jee na achekajüliikana nneerü neʼipajee na sülaülakana mma, naküjain lotuin nukuwaʼipa chi Maleiwakai, jama woutiisain naya nutuma Juan.
30 Eekajasaʼa na fariseokana jee na wayuu atüjakana süpüleerua tü Pütchi Aapünakat nümüin Moisés, nayouta achikit niainjachin Maleiwa oʼunirüin nakuwaʼipa, jama nnojoluin nacheküin woutiisain naya nutuma Juan.
31 Nümakalaka Jesús: «¿Kasa maka aka saaʼin nakuwaʼipa na wayuukana maaʼulu? ¿Jaraliiche na makana aaʼin naya?
32 Müshii naya maʼaka naaʼin na tepichi joyotokana metkaaraluʼu, aʼwoolojokana namüin na waneinnua sünain maa namüin: ‹Waʼyalajirüin jümüin tü kanüliakat «flauta», nnojoliipejeʼe jia ayonnojuin. Aʼyalajüshii waya jümüin weeʼirainruʼu, nnojoliipejeʼe jia aʼyalajüin›.
33 Jamüshijaʼa Juan chi Awoutisaajüikai nnojoishi nia eküin pan jee nnojoishi nia asüin wiino, ‹wayuu yolujaashi neʼe chira›, mapejeʼe jia nümüin.
34 Niasaʼa chi Süchonkai Wayuu, eküshi nia, asüshi nia, anuupejeʼe jünüiki nüchiki: ‹Wayuu kasa aleʼechi neʼe chira makai. Asüi wiino otta aleewashi nia namaa na achekajüliikana nneerü neʼipajee na sülaülakana mma jee aleewashi nia namaa na kaainjaraliikana›.
35 Ayaawatüneetpejeʼe saaʼu kekiin maʼin wanee wayuu sünainjee anain tü kasa naaʼinrakat».
36 Eejachikalaka wanee fariseo ounejaakai maʼin Jesús sünain ekawaa nipialuʼumüin. Nuʼunakalaka Jesús nipialuʼumüin chi fariseokai jee nüikalaakalaka sünain ekawaa.*
37 Eejatkalaka wanee wayuu eʼraajünüsü sutuma wayuu sünain maaʼin shia, saapakalaka süchiki chajachin Jesús sünain ekawaa nipialuʼu chi fariseokai. Süntaka nünainmüin sümaa wanee amüchichon aainjuushi süka tü ipa kanüliakalü «alabastro»,* kaluʼusü seita jemeta eejuut.
38 Yalajatka tü wayuukat nüchiiruajee Jesús jee shiʼyalajaka wanaa maʼin sümaa tü nuuʼuikat, süparatkalaka tü suʼwuirakat saaʼu nuuʼui jee soosojoko shia süka suʼwala. Sutuʼluin nuuʼui jee sushorottirüin tü seita jemetakalü eejuut saaʼu.
39 Niʼrapa tia chi fariseo ounejaakai Jesús sünain ekawaa, nümakalaka suluʼu naaʼin: «Shiimainrejeʼe nünüikimaajachin Maleiwa wayuukai chii, nütüjaa aaʼulujeʼe wayuuin maaʼinsat wayuukat tüü».
40 Nütüjaapa Jesús saaʼu tia, nümaka nümüin chi fariseokai: «Simón, eesü wanee kasa taküjainjatka pümüin». Anuujeseʼe nünüiki Simón: «Püküja pümaala tamüin Ekirajüikalee».
41 «Eejana piamashii wayuu kojuyaalakana nuulia wanee wayuu aʼanapirüi nneerü. Kojuyaalashi wanee 500 ‹denario›* nuulia otta müshia chi wane 50 ‹denario›.
42 Shiasaʼa süka isain nachiki nawalaajüin tü nojuyaalakat, nuuʼulaaka tü nünneetsekat napüla. ¿Jaraiche chi aireejeechikai apüla chia wayuukai?».
43 «Niataa chi wainmakai ojuyaala nuulia», nümakalaka Simón nümüin. Anuujeseʼe nünüiki Jesús nümüin: «Aa, shiaʼaya tia».
44 Niirakaaka Jesús sümüin tü wayuukat jee nümaka nümüin Simón: «¿Piʼrayaainchejeʼe wayuukat tüü?, antüshi taya pipialuʼumüin nnojotpejeʼe paapüin tamüin wüin suʼlojiainjatü tooʼui. Eekajasaʼa wayuukot tüü, süparalüin suʼwüira saaʼu tooʼui jee soosojuin shia süka suʼwala.
45 Eetaayaai putuʼluin tawalapaʼa tantaiwaʼaya. Eekajasaʼa wayuukot tüü, mooʼulaainyülia shia suulia atuʼlaa tooʼui.
46 Nnojotsü pushulerüin seita jemeta eejuut saaʼu tekii. Eekajasaʼa wayuukot tüü, sushorottirüin tü seita jemetakalü eejuu saaʼu tooʼui.
47 Alatinnüitpa saainjala tü wayuukot suulia mayaainjeʼe wattain maʼin saalii, jama alin maʼin taya süpüla. Nnojotsü alin maʼin wayuu nüpüla wanee wayuu müleka paliʼirüle tü naainjala alatinnakat nuulia».
48 Nümakalaka Jesús sümüin tü wayuukat: «Alatinnüitpa paainjala puulia».
49 Nayasaʼa na wayuu yalajanakana sünain ekawaa nümaa Jesús, namajiraaka: «¿Jaraikajasaʼa wayuukai chii, alatirakai saainjala wayuu suulia?».
50 Nümakalaka Jesús sümüin tü wayuukat: «Oʼttaajeerü pia süka kanoulain pia, puʼuna pümaala».
Noota
^ «Ashanaashi» maluʼulu tia suluʼu griego.
^ «Aikalaashi süʼütpaʼa meesakat» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Nneerü kachueera nanneetsepuʼuka na romanokana. Pünaʼla tia suluʼu tü kanüliakat «Sooʼomüin pütchi B14».
