Tü nüshajalakat Lucas 8:1-56
-
Waneinnua jieyuu nümaataralii Jesús (1-3)
-
Nüchiki wanee wayuu apünajüi (4-8)
-
Tü kayaawasekalü aaʼujee tü nikirajakalü anain Jesús (9, 10)
-
Nüküjain Jesús jamaluʼuluin tü nikirajakalü nüchiki chi apünajüikai (11-15)
-
Shipejaanüle wanee ranpara, nnojotsü aʼwachinnüin wanee kasa saaʼu (16-18)
-
Tü niikat Jesús namaa na nuwalayuukana (19-21)
-
Niimaleʼerüin Jesús wanee wawai (22-25)
-
Nüjütüin Jesús tü yolujaakalüirua süleʼeruʼumüin püülükü (26-39)
-
Nüchon Jairo. Shipettüin wanee wayuu sot nüsheʼin Jesús (40-56)
8 Süchikijee tia, oʼunushi Jesús sainküin pueulo eekai miyoʼuin jee eekai joʼuuchoin. Aküjashi nia pütchi jee ekirajüshi süchiki tü pütchi anakat maʼin süchiki niainjachin aluwataain Maleiwa saaʼu wayuu. Oʼunushii nümaa na Polookana Piamamüin aluwataaushi
2 jee oʼunushii nümaa waneinnua jieyuu niyuʼlakana paala aleʼeruʼujee yolujaa jee anakana nutuma, eejatü María tü Magdalena münakat, tü ayuʼnnakalü aleʼeruʼujee akaratshisü yolujaa.
3 Eejatü Juana, tü nuʼwayuusekat Cuza, chi nüneekakai Herodes süpüla laülaain saaʼu nipia. Eejatü Susana otta waneinnua jieyuu aapakana nümüin Jesús jee namüin na aluwataaushikana wanee kasa choʼujaale shia namüin.
4 Nantaka watta naalii wayuu naʼakamüin na wayuu antüshiikana suluʼujee waneirua pueulo. Jee naashajaaka Jesús namaa sümaa kayaawasein nutuma tü nikirajakalü anain, anuukalaka nünüiki:
5 «Eejaittaa wanee wayuu apünajüshi, shiʼipaʼaya nüpünajüin ejituusü süpüshi tü waüyeekat sotpaʼa tü wopukot, süʼliikatünaka aaʼu jee shikaka shia wüchii.
6 Eesü tü ejituukat saaʼu ipa, susonuwaayaa sümaka ojulujaapejeʼe shia süka josoin maʼin tü mmakat.
7 Eesü tü ejituukat saʼaka mojuui keipüsesü, sujulujaaka miyoʼupa tü mojuui keipüsesükat.
8 Eepejeʼe tü ejituukat saaʼu mma anasü, susonuwaayaa sümaka jee kachonkalaka shia, eesü tü pünajüt polookat shikii süchon». Süchikijee nüküjain Jesús tia nümakalaka: «Eekai kacheʼejüin sümüin tü pütchikat naapaainjatü amaa».
9 Nüsakinnaka Jesús natuma na nikirajüinkana süchiki kasain kayaawasein tü nikirajakalü anain.
10 Nümaka namüin: «Jia ayaawataka saaʼu tü kasa nütüjaakalü aaʼu Maleiwa, jama niainjachin aluwataain. Eekajasaʼa na waneinnua kayaawasesü namüin, koʼushii naya nnojoleetpejeʼe kasain neʼrüin, kacheʼeshii naya nnojoleetpejeʼe kasain naapüin otta nnojoleerü kasain nayaawatüin aaʼu.
11 Anuu shiyaawase tü tekirajakalü anain, tü waüyeekat shia tü nünüikikat Maleiwa.
12 Tü waüyee ejituukat sotpaʼa tü wopukot müsü aka nakuwaʼipa na wayuu aapakana tü nünüikikat Maleiwa, asütünapejeʼe tü pütchikat suluʼujee naaʼin nutuma chi Yolujaakai süpüla nnojoliinjanain nanoujain otta süpüla nnojoliinjanain noʼtteʼennüin.
13 Tü waüyee ejituukalü eere arülain mma saaʼu ipa müsü aka nakuwaʼipa na wayuu aapakana tü pütchikat sümaa talatüin maʼin naaʼin, nnojotpejeʼe shia ichein suluʼu naaʼin, motsoʼo neʼe nanoujain, ooʼulaashii naya suulia anoujaa suuʼulakünapa naaʼin.
14 Tü waüyee ejituukat saʼaka tü mojuui keipüsesükat müsü aka nakuwaʼipa na wayuu aapakana tü pütchikat, nnojotpejeʼe sütanalüin naaʼin süka shapaakuʼu sümüin naaʼin. Kachiiruasü naaʼin washirüü otta naaʼinrüin tü suchuntaakat naaʼin, müshii aka saaʼin wanee wunuʼu eekai machooin.
15 Tü waüyee ejituukat saaʼu tü mma anasükat müsü aka nakuwaʼipa na wayuu anamia aapakana tü pütchikat, nanaajaain shia suluʼu naaʼin otta nachecherüin naaʼin sülatüle kasa mojusü namüin. Müshii naya maʼaka saaʼin wanee pünajüt eekai kachooin.
16 »Jamüshijaʼa wanee wayuu nipejaale wanee ranpara, nnojotsü nuʼwachirüin wanee julaʼa saaʼu jee nnojotsü niʼitaain suupünaa tü atunkuleekat, niʼitaain saaʼu tü süpülajanakat süpüla shiʼnnajatüin tü suwaralakat sutuma wayuu eekai shikerolüin.
17 Sunjunnule wanee kasa antüneerü anain, akaataajaʼa suunjulajünüle achiki wanee kasa atüjaaneerü aaʼu mapa sutuma wayuu.
18 Jülüja jaaʼin tü pütchi jaapajakat, chi wayuu eekai amaʼana wanee kasa aapüneerü sooʼomüin nümüin, eekajasaʼa chi nnojoikai eein amaʼana wanee kasa, asütüneerü nuulia tü eekai nümaʼanain saaʼin nümüin.
19 Süntakalaka tü niikat Jesús namaa na nuwalayuukana, nnojoliipejeʼe naya arütkaain nünainmüin süka wattain saalii wayuu.
20 Naapinnakalaka Jesús sümaa nümünüin amüin: «Isaa tü piikat namaa na puwalayuukana anooipaʼa, neʼree amüinchi piasan».
21 Anuukalaka nünüiki Jesús: «Nnaaʼasa tei namaa tawalayuu, naya na aapakana tü nünüikikat Maleiwa sümaa naaʼinrüin tü nuluwataakalü anain».
22 Soʼu wanee kaʼi, noʼotooko Jesús suluʼu wanee anuwa namaa na nikirajüinkana jee nümakalaka namüin: «Anashii walatüle waneemüin saʼata wüinkat» jee oʼunaajaʼa namüin.
23 Nutunkakalaka Jesús sümaʼainruʼu noʼunuin, sukumajaʼalaa sümaka wanee wawai miyoʼu maʼin shiroku tü wüinkat, shipirajaweeka wüin tü anuwakat jee choʼujaʼalaa neʼe motsoʼo süpüla shimerotuin.
24 Nüchijinnaka Jesús natuma na nikirajüinkana sümaa namüin nümüin: «¡Ekirajüikalee! ¡Outushiitaa waya!». Nütamaaka Jesús jee nüchiaaka tü joutaikat sümaa tü wüin katchinkat maʼin, jimatuuika shia süchikijee tia.
25 Nümakalaka Jesús namüin na nikirajüinkana: «¿Jamüshiikai manoulaka jia?», mmotpejeʼe neʼe naya sümaa ponuin naaʼin tü neʼrakat, «¿jaraikai wayuukai chii, jüüjüükai amüin joutai sümaʼaleeya wüin?», namajiraaka.
26 Nantaka waneemüin saʼata tü palaakat, noumainpaʼamüin na kanüliakana gerasenos, tü mma shiʼipoʼujeekat Galilea.
27 Nüshakatapa Jesús suluʼujee tü anuwakat, nüpanapünaka nutuma wanee wayuu kaleʼeruʼushi yolujaa, chejeʼewai chia wayuukai suluʼujee tia mmakat. Kakalia masheʼinkuʼu müin chia wayuukai, nnojoishi nia kepiain suluʼu wanee miichi, kepiashi neʼe amuuyuupaʼa.
28 Nuʼwaataka niʼraiwaʼaya Jesús jee nüsapainkaka nia nümülatuʼu, nümakalaka nümüin sümaa emetuluin nünüiki: «¿Kasajachikai taya pümüin pia Nüchonkai chi Maleiwa Miyoʼushikai?, tachuntuin pümüin nnojolinjachin müliain taya putuma».
29 Nuluwataain Jesús tü yolujaakat süpüla sujuʼitajatüin nüleʼeruʼujee chi wayuukai. Kojuyatua paala sajapuluʼuin chi wayuukai tia yolujaakat, kojuyatuasa kaleenaluʼuin nia sutuma wayuu. Kaleenaluʼusü najapü jee nuuʼui otta eʼrajüna aaʼuchi nia, nuchoujeʼerawaipejeʼe tü kaleenakat otta oʼunushi nia sutuma tü yolujaakat eere yüütüülin.
30 Nümakalaka Jesús nümüin chi wayuukai: «¿Kasaichi pünülia?». «Watta waalii» nümakalaka chi wayuukai nümüin, jama wattain saalii tü yolujaa ekerotkat nüleʼeruʼu.
31 Jee suchuntaka tü yolujaakat nümüin Jesús nnojoluinjatüin nüjütüin shia suluʼu tü ishi oʼutakat maʼin.*
32 Eejatkalaka watta saalii püülükü ekajaain saaʼu tü uuchikat, suchuntaka maʼin tü yolujaakat nümüin Jesús nüjütajatüin shia süleʼeruʼumüin tü püülükükalüirua, nüjütaka shia Jesús.
33 Sujuʼinuwaakalaka tü yolujaakalüirua nüleʼeruʼujee chi wayuukai jee shikerunuwaaka süleʼeruʼumüin tü püülükükalüirua, sujunuujaayaa sümaka tü püülükükalüirua shirokumüin tü wüinkat, wüinsitka shia.
34 Napantajaakalaka na aaʼinmajüliikana tü püülükükalüirua neʼrapa tü kasa alatakat, naküjaka süchiki tia suluʼu tü pueulokot jee wünaʼapüpünaa.
35 Sükoʼulayaa sümaka wayuu süpüla shiʼrüinjatüin tü kasa alatakat, nantapa nümaʼanamüin Jesús, neʼraka joyotuin nüʼütpaʼa Jesús chi wayuu kaleʼeruʼushikai paala watta saalii yolujaa. Anaichipa nia, kasheʼinshi, neimmolojooka na wayuukana neʼraiwaʼaya nia.
36 Nayasaʼa na wayuu eʼrajakana sukua tü kasa alatakat, naküjain süchiki jamüin sukuwaʼipa süpüla naawalaainjachin chi wayuu kaleʼeruʼushikai paala yolujaa.
37 Na wayuu kepiakana süʼütpünaa noumain na wayuu kanüliakana gerasenos, nachuntuin nümüin Jesús nuʼunajachin noumainpaʼajee, jama mmoluin maʼin naya. Noʼotookalaka Jesús suluʼu tü anuwakat süpüla nuʼunajachin.
38 Niasaʼa chi wayuu ojuʼitinnakai aleʼeruʼujee yolujaa, nuchuntuin nümüin Jesús nümaainjachin nia, niyoutapejeʼe Jesús süchiki tia jee nümakalaka nümüin:
39 «Anashi puʼunule pipialuʼumüin, püküja süchiki süpüshuaʼaleʼeya tü kasa naaʼinrakat Maleiwa püpüleerua». Nuʼunakalaka chi wayuukai, nüküjaka suluʼupünaa tü pueulokot süchiki süpüshuaʼa tü naainjakat Jesús nüpüleerua.
40 Nüleʼejapa Jesús nüchikuaʼa, kapülashi nia naaʼin na wayuu wattakana naalii süka yalajanain naya sünain aʼatapajaa nia.
41 Wanaa sümaa tia, nüntaka nünainmüin Jesús wanee wayuu kanüliashi Jairo, laülaashi nia suluʼu tü ekirajüleekat nüchiki Maleiwa. Nüsapainkaka nia nümülatuʼu Jesús jee nuchuntaka nümüin nuʼunajachin nipialuʼumüin
42 süka jamüin, mayeinsü maʼin tü waneesükat nüchon, polooirü piamamüin suuyase.
Sümaʼainruʼu nuʼunuin Jesús, chentaawaka maʼin wayuu nünain.
43 Eejatkalaka wanee wayuu polooirü piamamüin juya amülain isha sümüin jee nnojotsü wayuu anakalü atuma shia.
44 Sürütkaakalaka nüchiiruajee Jesús, shipettakalaka sot nüsheʼin, süshaʼwalaʼalaa sümaka tü ishakat suulia.
45 «¿Jarat epettaka tasheʼin?», nümakalaka Jesús. Naküjayaa namaka na wayuukana nnojoliin nayain epettüin nia. Anuujeseʼe nünüiki Pedro nümüin Jesús: «Ekirajüikalee, wattasaʼa saalii wayuu pasanainka anain pia otta chentaawaka pünain».
46 Anuupejeʼe nünüiki Jesús: «Eesü tü epettakat tasheʼin, tayaawata aaʼu taaʼinrüichipain wanee kasa pülasü».
47 Shiyaawatapa saaʼu tü wayuukat kanüliaitpain shia, sürütkaakalaka nünainmüin sümaa kutkuttaʼalüin neʼe shia, süsapainkaka shia nümülatuʼu. Süküjaka nümüin suʼupala wayuu maʼleekalia jamüin shipettaka nia jee süküjain saawalaʼalaa sümüitpain.
48 Nümakalaka Jesús sümüin: «Nii waaʼiraa, anaitpa pia süka kanoulain pia, puʼuna pümaala».
49 Yalaiwaʼaya naashajaain Jesús, nüntakalaka wanee wayuu nünülialuʼushi chi laülaashikai suluʼu tü ekirajüleekat nüchiki Maleiwa. Nümakalaka nümüin chi laülaashikai: «Anaajaaitpa tü püchonkat, nnojo pikeʼejüin naaʼin chi Ekirajüikai».
50 Naapaiwaʼaya Jesús tia, nümakalaka nümüin Jairo: «Nnojo piyoʼujaain aaʼin, kanoula pia süsoʼiraajeetka aaʼin* tü püchonkat».
51 Nüntapa Jesús nipialuʼumüin Jairo, nia neʼe ekerotoko nümaa Pedro, Juan, Santiago jee müshia süshi tü jintutkat sümaʼaleeya tü shiikat.
52 Iralamuuin müshii napüshuaʼa na wayuukana jee mojusü maʼin naaʼin.* Anuupejeʼe nünüiki Jesús namüin: «Nnojo jiʼyalajüin, nnojotsü outuin türa jintutkat, atunkusü neʼe».
53 Nasirajayaa namaka na wayuukana nüka Jesús naapaiwaʼaya tü nümakat süka natüjaain saaʼu outuin tü jintutkat.
54 Naapaakalaka Jesús sajapü tü jintutkat sümaa nümüin sümüin: «Uuton, pütamaa».
55 Süsoʼiraaka aaʼin tü jintutkat jee sütamaamaataka, nuluwataaka Jesús süchajaanajatüin wanee kasa shiyaaluʼu.
56 Talatüshi maʼin chi süshikai sümaa tü shiikat, nüchiaapejeʼe naya Jesús süpüla nnojoluinjatüin naküjain süchiki tia sümüin wayuu.
Noota
^ «Abismo» maluʼulu tia suluʼu griego. Pünaʼla tia suluʼu tü kanüliakat «Jamaluʼulu pütchikat».
^ «Oʼtteʼeraa» maluʼulu tia suluʼu griego.
^ Jee shiale «nasheʼejüin naʼluuwain sutuma alin namüin tü alatakat namüin».
