Tü nüshajalakat Lucas 9:1-62
-
Aküjünüsü namüin na Polookana Piamamüin aluwataaushi tü sukuwaʼipainjatkalü aküjaa pütchi natuma (1-6)
-
Jiwaʼatüsü naaʼin Herodes sutuma naapüin nüchiki Jesús (7-9)
-
Eküshii 5.000 tooloyuu nutuma Jesús (10-17)
-
Nüküjain Pedro niain Jesús chi Cristokai (18-20)
-
Nüküjain Jesús nuʼutunajachin aaʼin (21, 22)
-
Chi achekakai süchiki nikirajüin nia Jesús (23-27)
-
Eeʼiranajaasü nukuwaʼipa Jesús (28-36)
-
Ayuʼnnusü wanee yolujaa nüleʼeruʼujee wanee jintüi (37-43 1)
-
Nüküjain Jesús süchikuaʼa nuʼutunajachin aaʼin (43 2-45)
-
Aʼülüjiraashii na nikirajüinkana Jesús sooʼopünaa jaralin nemiyoʼusein (46-48)
-
Chi wayuu nnojoikai weʼipoloin, paaʼinwashi wamaa (49, 50)
-
Mamaneesalii nümüin Jesús na wayuu sulujunakana wanee pueulo chaa Samaria (51-56)
-
Naaʼinrajatka wanee wayuu süpüla nümaataralin nia Jesús (57-62)
9 Nuutkajeʼerüin Jesús na Polookana Piamamüin aluwataaushi jee naapakalaka laülawaa namüin süpüla nayuʼluinjatüin yolujaa süleʼeruʼujee wayuu jee süpüla anainjatüin natuma wayuu eekai ayuulin.
2 Nüjütaka naya sünain aküjaa süchiki nuluwataajeechin Maleiwa saaʼu tü mmakat otta süpüla anainjatüin wayuu natuma.
3 Anuukalaka nünüiki Jesús namüin: «Nnojo kasain jülüʼüjain juʼunajanapa. Nnojo kachisepalain jia, nnojo jülüʼüjain waraarat, jimia, nneerü otta nnojo jülüʼüjain suwalaʼata* jüsheʼin.
4 Jüntapa suluʼumüin wanee miichi, anashii yalainnale jia waneʼereeya juʼunapa suluʼujee tia miichikat.
5 Mamaneere wayuu jümüin suluʼu wanee pueulo, joʼotojoojeerü juuʼui juʼunapa namaʼanajee nayaawateetka saaʼu mojuin tü naainjakat».
6 Noʼunakalaka na nikirajüinkana Jesús sainküinpünaa tü pueulokot sünain aküjaa tü pütchi anakat maʼin, shiasaʼa eepünaale nantüin naawaleʼerüin wayuu eekai ayuulin.
7 Niasaʼa Herodes, chi aluwataakai saaʼu tü mmakat Galilea, naapüin tü sümakat wayuu süchiki tü alatakat. Jiwaʼatakalaka naaʼin sutuma tia, jama eein na wayuu aküjakana süchiki nüsoʼireʼennüin aaʼin Juan.
8 Eeshii na aküjakana süchiki niiʼiyalaain Elías otta eetaashii joo na aküjakana süchiki niain asoʼiraain aaʼin wanee nünüikimaajachi Maleiwa nümaiwajachi.
9 Anuujeseʼe nünüiki Herodes: «Tashoʼttirapejeʼe nunutpünaa Juan, ¿jaraikaʼa chi wayuu taapakai achiki sünain aaʼinraa wainma kasa?». Niʼraajüneeka maʼin Jesús nutuma Herodes.
10 Naleʼejapa na aluwataaushikana naküjain nümüin Jesús süchiki süpüshuaʼa tü kasa naaʼinrakat. Nümaakalaka naya Jesús namüiwaʼa wanaapünaa maʼin sümaa tü mma kanüliakat Betsaida.
11 Wattapejeʼe naalii na wayuu aapakana nüchiki, nakoʼulayaa namaka nüchiirua, kamaneeka nia namüin. Nüküjakalaka namüin süchiki nuluwataajeechin Maleiwa saaʼu tü mmakat otta anashii nutuma wayuu eekai ayuulin.
12 Motsopa kaʼikat, narütkaakalaka nünainmüin Jesús na Polookana Piamamüin aluwataaushi jee namakalaka nümüin: «Anashii püjütüle nala wayuukana noʼunaiwa chaa pueulopaʼamüin jee chaa metkaaraluʼumüin sünain ayaʼlajaa wanee kasa jee sünain achajawaa jalainjanain natunkaain süka wattain tü mma yaakalü aluʼu waya».
13 Nusoutaka Jesús namüin: «Jüchajaa wanee kasa nayaaluʼu». Anuujeseʼe nanüiki na nikirajüinkana nümüin: «Jaʼraisaʼala neʼe pan eekat wamaʼana otta piamasü jime. Aluʼusaʼa wayataale oʼunuin sünain ayaʼlajaa wanee kasa nayaaluʼu».
14 Eejana maʼaka 5.000 tooloyuu soʼu tia. Nümakalaka Jesús namüin na nikirajüinkana: «Jüma namüin na wayuukana naikaajaaiwa, jaʼraiwalinjatü nekii».
15 Müsüjaʼaya shia natuma, naküjaka namüin na wayuukana naikaajaainjanain.
16 Naapaaka Jesús tü jaʼraisükat pan jee tü piamasükat jime, nuʼuraajaka nümüin Maleiwa sümaa niirakaain iipünaamüin. Nüshanaajakalaka tü pankat jee naapaka shia namüin na nikirajüinkana süpüla neitajüin shia namüin na wayuukana.
17 Emirakalaka napüshuaʼa na wayuukana, sukotchojunaka poloo piamamüin kanaasüta tü eküülü apütaasükat.
18 Shiasaʼa mapa, chajachikalaka Jesús sünain oʼuraajaa nümüiwaʼa, narütkaaka na nikirajüinkana nünainmüin. Nümakalaka namüin: «¿Jamüsü sünüiki wayuu tachiki?».
19 Nasoutaka na nikirajüinkana nümüin: «‹Nia Juan chi Awoutisaajüikai›, eeshii na makana, ‹nia Elías›, eetaashii joo na makana, ‹nia wanee nünüikimaajachi Maleiwa nümaiwajachi asoʼiraaka aaʼin›, eeshii na wayuu makanaya».
20 Anuujeseʼe nünüiki Jesús namüin: «¿Jaraikaʼa maʼin taya jaashin?». Nusoutaka Pedro nümüin: «Pia chi Cristokai, chi nüjünalakai Maleiwa».
21 Nüchiaaka na nikirajüinkana suulia naküjaʼalüin sümüin wayuu süchiki tia
22 jee nümakalaka namüin: «Eʼreechi maʼin müliaa chi Süchonkai Wayuu* otta leteechi nia naaʼin na laülaashiikana, nekiipüʼü na sacerdotekana otta na karaloʼutamaajanakana jee oʼutuneechi aaʼin nia sümaa nüsoʼireʼennüinjachin aaʼin apünüin kaʼi süchikijee tia».
23 Nümakalaka Jesús namüin napüshuaʼa na wayuu yalajanakana: «Chi achekakai süchiki tekirajüin nia, nnojotsü naaʼinrüinjatüin tü nüchekakat neʼe nümüiwaʼa. Müinjatü nülüʼüjakai saaʼin waneepia tü wunuʼu* akachennakalü anain wayuu sümaa nuushikajaain süchiirua takuwaʼipa.
24 Nieechi outaka chi eekai oʼttaweein, eekajasaʼa chi outakai saaʼujee niʼyataain tamüin, nieechi kataka oʼu.
25 ¿Kasa saamaka nümüin wanee wayuu tü nuwashirüinkat numojujale nukuwaʼipa jee outule nia?
26 Chi eekai japülin taka jee japüikai süka tü pütchi tamakat, japüijeechia chi Süchonkai Wayuu nüka nüntapeena namaa na aapiee aneekuushikana sümaa pülasheechin nia maʼaka naaʼin chi Nüshikai.
27 Shiimain tü tamakat jümüin, juʼutku jiakana yaakana yaa, nnojoleena jia outuin sümaa nnojoluin jiʼrüin palajana nuluwataain Maleiwa».
28 Müsüjaʼaya sukuwaʼipa tia. Maʼaka mekiisat kaʼi süchikijee tü nümakat Jesús, nümaakalaka Pedro, Juan otta müshia Santiago saaʼumüin wanee uuchi sünain oʼuraajaa.
29 Sümaʼainruʼu nuʼuraajüin Jesús, warattaka maʼin tü nuʼupünaakat otta kasuusü maʼin tü nüsheʼinkat.
30 Neeʼiyalaaka piamashii wayuu, nia Moisés nümaa Elías jee naashajaakalaka nümaa Jesús.
31 Warattakalaka neʼe naya wayuukana, naashajaaka süchiki nuʼunajachin Jesús, alatajatü tia chaa Jerusalén.
32 Atunkeesü maʼin naaʼin Pedro otta na wayuu nümaajanakana. Suwatapa lapükat noulia, neʼrakalaka warattüin maʼin Jesús otta müshiʼiya na piamashii wayuu yalajanakana shaʼwatüin nüʼütpaʼa.
33 Shiasaʼa noʼunajanapa na wayuukana, nümakalaka Pedro nümüin Jesús: «Ekirajüikalee, anataʼaleeshiijaʼa maʼin waya süka yaain waya. Anashii wakumajüle apünüinsü miichi jipiayaainjatü, wanee püpüla, wane nüpüla Moisés otta wane nüpüla Elías». Aashajaapejeʼe nia sooʼopünaa naaʼin.
34 Nnojoluiwaʼaya kettaain nünüiki Pedro, sukumajaaka wanee siruma sümaa pasanainjaain naya sünain, neimmolojooko sutuma tia.
35 Saapünakalaka wanee pütchi saʼakajee tü sirumakat sünain maa: «Anii chi Tachonkai, chi taneekajalakai, jaapaa sümaa tü nümakat jümüin».
36 Saapünapa tia pütchikat, niaʼala neʼe Jesús yalajachikai neʼe nümüiwaʼa. Koʼutaka neʼe na nikirajüinkana, nnojotsü naküjain sümüin wayuu süchiki tü kasa neʼrakat.
37 Waneemüin kaʼi, nashakatapa saaʼujee tü uuchikat, watta naalii na wayuu apanapakana Jesús.
38 Nuʼwoottooko wanee wayuu naʼakajee na wayuukana, nümakalaka nümüin Jesús: «Ekirajüikalee, pükaalinjaʼaya maa tachon, waneeshiaʼala neʼe nia tamüin.
39 Saapaʼawalin nia wanee yolujaa, kookotowaishi nia sutuma, oʼuchichajaashi nia otta katoloinshi nia nuwaraluʼupünaa. Shiasaʼa suʼunawaipa nuulia, maʼlainreesaiya sutuma.
40 Tachuntayaainjeʼe namüin na pikirajüinkana nayuʼluinjatüin tü yolujaakat nüleʼeruʼujee, isapejeʼe nia nachiki».
41 Anuujeseʼe nünüiki Jesús: «Mojulaajakatche maʼin wayuu maaʼulu jee manoulasat, ¿yaakuʼu müinjaiche taya namaa naaʼinruʼu? Kakaliairü müin nakuwaʼipa, püsaaja tamüin chi püchonkai».
42 Shiasaʼa nülüʼülaapa chi jintüikai nünainmüin Jesús, nuʼuchichajünakalaka sutuma tü yolujaakat sümaa sujutuin nia mmoluʼumüin. Nuuʼuleʼerakalaka Jesús tü yolujaakat suulia müliain chi jintüikai sutuma, anaka nia. Sujuʼitaka tü yolujaakat nüleʼeruʼujee, «anii püchon», nümakalaka Jesús nümüin nüshi chi jintüikai.
43 Ponokoloko maʼin saaʼin wayuu pülain maʼin Maleiwa.
Shiasaʼa sümaʼainruʼu ponuin maʼin saaʼin wayuu tü naaʼinrakat Jesús, nümakalaka namüin na nikirajüinkana:
44 «Kacheʼe jia sümüin tü tamakat jümüin otta sotuinjatü shia jaaʼin süka naapüneechin ekii sümüin wayuu chi Süchonkai Wayuu».
45 Nnojotpejeʼe nayaawatüin saaʼu tü nümakat Jesús namüin, müsü suunjunnakai aaʼin akuwaʼipa tia noulia süpüla nnojoluinjatüin nayaawatüin saaʼu. Mmotka naya seema nasakirüin nia.
46 Naʼülüjiraaka na nikirajüinkana Jesús sooʼopünaa jaralinjachin nemiyoʼusein.
47 Süka nütüjaain saaʼu Jesús tü suluʼukat naaʼin na nikirajüinkana, neenajakalaka wanee jintüi jee nüshaʼwaleʼeraka nia nüʼütpaʼa.
48 Nümakalaka namüin: «Chi eekai kamaneein nümüin jintüikai chii, kamaneeshi nia tamüin. Niasaʼa chi eekai kamaneein tamüin, kamaneeshiaʼaya nia nümüin chi Kajünalakai taya. Chi eekai nnojolin yaletüin aaʼin maʼaka nnojolin yaletüin naaʼin jintüikai chii, nia jimiyoʼuseka».
49 Naapaiwaʼaya Juan tia, nümakalaka nümüin Jesús: «Ekirajüikalee, weʼrüin wanee wayuu ojuʼitirakai yolujaa süleʼeruʼujee wayuu sükajee nuchuntuin pünülia. Nnojoipejeʼe nia wamaajachin, wachiaaka nia suulia naaʼinrüin tia».
50 Anuukalaka nünüiki Jesús nümüin: «Nnojo jüchiaain nia suulia tia. Chi wayuu nnojoikai jiʼipoloin, paaʼinwashi nia jümaa».
51 Sülüʼülaapa nükalia Jesús süpüla nümaanajachin chaa iipünaamüin, suʼuneekalaka maʼin naaʼin Jerusalénmüin.
52 Nüjütaka Jesús wayuu nünüikimaajana nüpüleerua. Noʼunakalaka naya wayuukana jee nantaka suluʼumüin wanee pueulo suluʼu tü mmakat Samaria. Antüshii naya chamüin süpüla yapainjatüin natuma tü nuluwataakalü anain naya Jesús.
53 Nnojotpejeʼe kamaneein wayuu chajatü nümüin, jama suʼuneein maʼin naaʼin Jerusalénmüin.
54 Niʼraiwaʼaya tia Santiago nümaa Juan, namakalaka nümüin Jesús: «Señotkalee, puluwataa waya süpüla wachuntajanain siki chejee iipünaajee, ajaʼttirajatka wayuukalüirua tüü».
55 Nujununtaaka Jesús nanainmüin sümaa nüchiaain naya.
56 Shiasaʼa süchikijee, noʼunakalaka suluʼumüin wane pueuloya.
57 Shiasaʼa wopuluʼupa naya, nümakalaka wanee wayuu nümüin Jesús: «Oʼuneechi taya pümaa eepünaale neʼe puʼunuin».
58 Nusoutaka Jesús nümüin: «Tü walitkat kepiasü suluʼu koʼushii, akaʼaya tü wüchiikat kepiasü. Akaisaʼa chi Süchonkai Wayuu, nnojoishi jalainjachin nia eisalaain».
59 Nümakalaka nümüin wanee wayuʼuya: «Anashi tamaatarale pia». Nusoutakalaka chi wayuukai nümüin: «Señotkalee, paawala paala taya, teʼikeein palajana chi tashikai».
60 Anuujeseʼe nünüiki Jesús nümüin: «Puuʼulaa neʼikünaiwa na outushiikana natuma na outakana wanaa namaa, akaajasaʼa piakai, anashi puʼunule sainküin mma sünain aküjaa süchiki nuluwataajeechin Maleiwa saaʼu tü mmakat».
61 Nümakalaka joo waneʼeya nümüin Jesús: «Señotkalee, pümaataleechi taya, apütaweepejeʼe taya palajana napüla na tapüshikana».
62 Nusoutakalaka Jesús nümüin: «Chi wayuu eekai najaralüin sümaa niirakaain sümüin tü kasa nüpütakat paala, nnojoishi anain süpüla niʼrüin tü kasa anasü eejeetkat nuluwataapeena Maleiwa».
Noota
^ «Piamasü» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Shia tü akachennapuʼukalü anain wanee wayuu süpüla outajachin nia. Nuchuntuin Jesús tia pütchikat süpüla nuʼwanaajireʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
