Tü nüshajalakat Marcos 1:1-45
-
Aküjashi pütchi Juan chi Awoutisaajüikai (1-8)
-
Woutiisashi Jesús (9-11)
-
Ooʼulaküna aaʼinchi Jesús nutuma Satanás (12, 13)
-
Oʼttushi Jesús sünain aküjaa pütchi chaa Galilea (14, 15)
-
Nuunejaain Jesús na palajanakana nikirajüin (16-20)
-
Nujuʼitirüin Jesús wanee yolujaa nüleʼeruʼujee wanee wayuu (21-28)
-
Watta naalii na wayuu anakana nutuma Jesús chaa Capernaúm (29-34)
-
Oʼuraajüshi Jesús suluʼu wanee mma yüütüüisü (35-39)
-
Aawaleʼennüshi wanee wayuu kanainkai «lepra» (40-45)
1 Suʼttia tü pütchi anasü ashajünakat nüchiki Jesucristo, chi Nüchonkai Maleiwa.
2 Ekeraajüsü tü nüshajakat Isaías, chi nünüikimaajachikai Maleiwa, tü makat mayaa: «(Tajüteechi püpüleerua chi anülieemaajachikai. Meerü neerutkai saaʼin wopu püpüleerua süpüla pülatajachin suluʼupünaa puʼunajaapa).
3 Emetutsü maʼin nünüiki wanee wayuu chaa isashiipaʼa: ‹Yapa jutuma nüpüna Jehová,* wule shia jutuma›», müshi.
4 Chajachi isashiipaʼa Juan chi Awoutisaajüikai. Aküjashi woutiisainjatüin wayuu süpüla sülatinnüinjatüin saainjala suulia.
5 Antawaisü nünainmüin Juan wayuu chejeejatü Jerusalénjee, sainküinjee Judea. Woutiisakalaka naya nutuma Juan shiroku tü süchikat Jordán jee naküjain süchiki tü naainjalakat.
6 Kasheʼinshi Juan soi kameeya otta kaseʼeruʼupünaashi paaʼata. Eküshi nia kaashapa sümaa mapa.
7 Mapuʼusü tü pütchi nüküjakat: «Anteechi tachikumüin wanee wayuu pülaleekai maʼin toulia. Nnojotkalaka süpüla tasiwatüin saalaja nukoʼusüin.*
8 Woutiisashii jia tatuma shiroku wüin, woutiiseenapejeʼe jia nutuma sükajee nüpülain Maleiwa».
9 Soʼu kaʼikat tia antüshi Jesús Nazaretjee tü chakat Galilea. Woutiisaka nia nutuma Juan shiroku tü süchikat Jordán.
10 Nüshaʼwalaapa shirokujee tü wüinkat niʼrüin sujutalaain tü sirumatuʼukat sümaa süntüin tü nüpülainkat Maleiwa naaʼumüin Jesús suluʼu müin shia maʼaka saaʼin wanee toomasü.
11 Saapünakalaka wanee pütchi chejee iipünaajee sünain maa: «Pia chi Tachon aishikai tapüla, talatüshi taya pümaa».
12 Nuʼuninnamaataka Jesús chaa isashiipaʼamüin sükajee tü nüpülainkat Maleiwa.
13 Pienchi shikii kaʼi chajachin nia isashiipaʼa jee ooʼulaküna aaʼinchi nia nutuma Satanás. Pasanainshi nia sünain tü wüchii wünaʼapüjatkat, kaalinpejeʼe nia napüla na aapieekana.
14 Süchikijee nütaʼünüin Juan, oʼunushi Jesús chaa Galileamüin sünain aküjaa pütchi analuʼut nüchiki Maleiwa.
15 Anuu nünüiki: «Antüsü tü kaʼi aküjünatüjütkalia achiki paala, alüʼütsü nükalia Maleiwa süpüla aluwatawaa. Anashii jiyaawajaale suulia jaainjala otta junouja sünain tü pütchi anasükat».
16 Wanaa sümaa warai nümüin sotpünaa tü palaa kanüliakat Galilea, niʼrüin Simón otta müshia Andrés, chi nuwalakai Simón. Ajunaʼatshii naya tü nakusuinkat shiroku tü palaakat süka olojuliin naya jime.
17 Nümakalaka Jesús namüin: «Anashii tamaatalai jia, jüchajaweenaka nachiki wayuu wanaa tamaa maʼaka jüchajaain süchiki tü jime julojokot».
18 Napütamaataka tü nakusuinkat, noʼunaka nümaa.
19 Mamüin aka tüsa niʼrüin Santiago nümaa Juan, na nüchonniikana Zebedeo. Yalajana naya suluʼu tü anuwakat sünain aruwentajaʼalaa tü nakusuinkat.
20 Nuunejaakalaka naya Jesús, nashakanuwaaka suluʼujee tü anuwakat sümaa napütüin chi nashikai jee na aʼyataashiikana nümüin, noʼunakalaka nümaa Jesús.
21 Nüntaka Jesús namaa noʼutku na nikirajüinkana suluʼumüin tü pueulokot Capernaúm.
Soʼu tü kaʼi neemeraakalü oʼu na judíokana, ekirajamaatüshi Jesús suluʼu tü ekirajüleekat nüchiki Maleiwa.
22 Ponusü naaʼin na wayuukana tü sukuwaʼipakat nikirajia Jesús. Nayaawata aaʼu niʼitaaushin nutuma Maleiwa süpüla ekirajaa. Nnojoishi müin nia maʼaka naaʼin na karaloʼutamaajanakana.
23 Wanaa maʼin sümaa tia, yalajachikalaka wanee wayuu kaleʼeruʼushi yolujaa, nuʼwaatakalaka sünain maa:
24 «¿Jamajanakai waya pümüin Jesús, pia chejeʼewaikai Nazaret? ¿Antüshi pia süpüla pajaʼttirajanain waya? Tatüjaa aaʼuchi piain chi Nüjünalakai Maleiwa».
25 Naaʼayajaaka Jesús saaʼin tü yolujaakat sümaa nümüin sümüin: «Koʼuta neʼe pia, pujuʼita nüleʼeruʼujee chira wayuukai».
26 Nuʼuchichajaakalaka chi wayuukai sutuma tü yolujaakat sümaa emetuluin maʼin nikiisa sutuma, sujuʼitaka nüleʼeruʼujee.
27 Saashajaajiraaya sümaka wayuu süka ponuin maʼin saaʼin tü shiʼrakat, anuu sünüiki: «¿Jaraikai wayuukai chii? Eiwaʼalajachi weʼrüin wanee wayuu makai ekirajia, jaʼitakajeʼe neʼe tü yolujaakalüirua jüüjüüsü nümüin süka kaawain nünüiki».
28 Suʼwalakajaakalaka nüchiki Jesús sainküinpünaa tü mmakat Galilea.
29 Nujuʼitaka Jesús namaa na nikirajüinkana suluʼujee tü ekirajüleekat nüchiki Maleiwa. Nuʼunakalaka nümaa Santiago otta Juan nipialuʼumüin Simón jee müshia Andrés.
30 Yalajatkalaka tü nimeshikat Simón juʼletüin sutuma tuttaa,* süküjünaka achiki nümüin Jesús.
31 Nürütkaaka sünainmüin, naapaaka sajapü sümaa nütamateʼerüin shia, saawalaaka. Sütamaaka sünain aʼlakajawaa nayaaluʼu.
32 Nikerotapa chi kaʼikai, süntinnakalaka nümüin wayuu eekai ayuulin otta müsia tü eekai kaleʼeruʼuin yolujaa.
33 Yalajatkalaka jutkatüin wayuu süpüshuaʼa soʼuluʼu tü miichikat.
34 Anasü nutuma wayuu eekai ayuulin sutuma ayuulii eekai eein. Niyuʼluin yolujaa süleʼeruʼujee wayuu. Nnojotpejeʼe nusoutirüin tü yolujaakat süka sütüjaain saaʼu niain Cristo.
35 Nütamaakalaka Jesús eeiwaʼaya aikat, nuʼunaka sünain oʼuraajaa suluʼumüin wanee mma yüütüüisü.
36 Nuʼunakalaka Simón namaa na waneinnua sünain achajawaa nüchiki Jesús.
37 Nantapa nünain, namaka nümüin: «Achajaana achikichi maʼin pia».
38 Nusoutaka Jesús namüin: «Jooʼuya suluʼumüin tü wane pueulokalüirua süpüla taküjainjachin pütchi chayaa, jama shiain tantüin apüla tia».
39 Oʼunushi Jesús sainküinpünaa Galilea sünain aküjaa pütchi sümüin wayuu suluʼupünaa tü ekirajüleekat nüchiki Maleiwa otta ayuʼtshi nia yolujaa süleʼeruʼujee wayuu.
40 Nürütkaaka nünainmüin Jesús wanee wayuu kanainshi tü ayuulii kanüliakat «lepra».* Nüsapainkaka nia nümülatuʼu Jesús sünain maa: «Tatüjaa aaʼu aneechin taya putuma müleka pücheküle süchiki».
41 Sümülialaaka naaʼin Jesús naalin chia wayuukai. Niyurutka nütüna nünainmüin jee nipettaka nia sünain maa: «Tacheküin süpüleerua paawalaainjachin».
42 Saawalaaka nuulia tü leprakat,* anaka nia.
43 Nüjütakalaka nia Jesús, pansaapejeʼe nünüiki nümüin sünain maa:
44 «Püküjaʼalayaai süchiki tüü sümüin wayuu. Anashi puʼunule nümaʼanamüin chi sacerdotekai otta piʼikajaa tü asülajünajatkat nümüin Maleiwa naashin Moisés süpüla sütüjaanajatüin saaʼu anaichipain pia».
45 Nuʼunapa wayuukai, nüküjaʼayatüin sümüin wayuu maʼleekalia tü aainjünakat nüpüleerua. Saapakalaka wayuu nüchiki Jesús jalale nüntüin. Wattapünaʼawaishi nia suulia wanee pueulo, ayatapejeʼe antüin wayuu nünainmüin.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Jee shiale «nüsapaatse».
^ Jee shiale «poloonaa, oushuwaa, aapuwaa».
^ Shia wanee ayuulii ittaka atuma süta wayuu. Pünaʼla tia suluʼu tü kanüliakat «Jamaluʼulu pütchikat».
^ Shia wanee ayuulii ittaka atuma süta wayuu. Pünaʼla tia suluʼu tü kanüliakat «Jamaluʼulu pütchikat».
