Tü nüshajalakat Marcos 10:1-52
-
Sukuwaʼipa kaʼwayuusee jee ooʼulaajirawaa (1-12)
-
Achuntushi Jesús naaʼu na tepichikana (13-16)
-
Tü nüsakitkalü anain wanee wayuu washirü (17-25)
-
Tü nüpütajatkat wanee wayuu süpüla eein nia nuluwataapeena Maleiwa (26-31)
-
Nüküjain Jesús süchikuaʼa nuʼutunajachin aaʼin (32-34)
-
Tü nuchuntakat Santiago nümaa Juan nümüin Jesús (35-45)
-
Aapajiraashi nikii Jesús süpüla suʼttaainjatüin watta saalii wayuu (45)
-
-
Koʼupaʼashi Bartimeo nutuma Jesús (46-52)
10 Nuʼunaka Jesús yalejee, nüntaka suluʼumüin tü mmakat Judea, waneemüin saʼata tü süchikat Jordán. Süntakalaka nünainmüin watta saalii wayuu, nikirajaka naya maʼakaapuʼu naainjain shia.
2 Narütkaaka waneinnua fariseo nünainmüin Jesús sünain nasakirayaain nia: «¿Nuuʼulaainjatche nuʼwayuuse wanee wayuu?», namaka nümüin.
3 Anuukalaka nünüiki namüin: «¿Jamüsü pütchi süchiki tia naashin Moisés?».
4 Anuujeseʼe nanüiki nümüin: «Naashin Moisés naapüinjatü wanee wayuu sümüin nuʼwayuuse wanee karaloʼuta süpüla suʼunajatüin nuulia nuuʼulaweere shia».
5 Nusoutaka Jesús namüin: «Nüshajüin Moisés nuuʼulaainjachin wanee wayuu suulia nuʼwayuuse süka wayuuin iche aaʼinchii jia.
6 Niʼitaatüjülia Maleiwa nekii na wayuukana nukumajaiwaʼaya ‹wanee wayuu toolo otta wanee wayuu jierü›.
7 ‹Ojuʼiteechi wanee wayuu nümaʼanajee nüshi jee sümaʼanajee nii
8 süpüla saʼaniraain nukuwaʼipa sümaa nuʼwayuuse, nnojoleenaka naya katataawain›. Waneesüitpa nakuwaʼipa.
9 Na wayuu aʼaniraakana akuwaʼipa nutuma Maleiwa nnojoliinjana ooʼulaajiraain sutuma wayuu».
10 Nantapa nachikuaʼa miichipaʼa nasakiraka nia na nikirajüinkana süchiki tia.
11 Anuuka nünüiki Jesús namüin: «Chi wayuu ooʼulaakai suulia nuʼwayuuse otta kasaarüle nia sümaa wane wayuu yalejee, kaainjaleechi suulia tü palajatkat nuʼwayuuse.
12 Tü wayuu eeʼirataakat nuulia suʼwayuuse otta nuʼwayuusetaale shia wanee wayuu yalejee, kaainjaleerü shia».
13 Nayasaʼa na wayuukana nantitka na tepichikana nümaʼanamüin Jesús süpüla anainjatüin nakuwaʼipa nutuma, nachiaapejeʼe na nikirajüinkana Jesús na wayuu kachooinkana naya tepichikana.
14 Mojushiika nümüin Jesús tü naaʼinrakat na nikirajüinkana jee nümakalaka namüin: «Juuʼulaa narütkaai tanainmüin nala tepichikana, ¿jamajanakai naya jümüin? Na wayuu makana akuwaʼipa maʼaka nakuwaʼipa nala tepichikana, neʼreerü tü kasa anasü eejeetkat nuluwataapeena Maleiwa.
15 Shiimain tanüiki jümüin, chi mojutukai amüin nuluwataainjachin Maleiwa sümaa nnojoluin müin nukuwaʼipa maʼaka nukuwaʼipa wanee jintüi, nnojoleerü niʼrüin tü kasa anasü eejeetkat nuluwataapeena Maleiwa».
16 Nutuʼushii na tepichicheinkana, nuchuntaka naaʼu süpüla anainjatüin nakuwaʼipa.
17 Wopuluʼupa Jesús, nuwataaka wanee wayuu nüpanapajee jee nüsapainkaka nia nümülatuʼu sümaa nümüin nümüin: «Anamia maʼin pia Ekirajüikalee, ¿kasa taaʼinrajatka süpüla katüinjatüin toʼu süpüla kaʼikat süpüshuaʼa?».
18 Nusoutaka Jesús nümüin: «¿Jamüshi tayakaʼa anamiain paajüin? Niaʼala neʼe Maleiwa anamiakai nümüiwaʼa.
19 Pütüjaa aaʼulu tü pütchi nuluwataakalü anain Maleiwa, tü makat mayaa: ‹nnojo puʼutuin saaʼin wayuu, nnojo kawalaʼatain putuma puʼwayuuse, nnojo puʼluwajüin, nnojo püküjain alawaa, nnojo pimeejüin wayuu, kojutu pümüin püshi sümaa pii›».
20 Anuujeseʼe nünüiki chi wayuukai nümüin: «Ekirajüikalee, taainjatüjülia tia jintüliiwaʼaya taya».
21 Niirakaaka Jesús nümüin sümaa nümüliajüin nia naaʼinyaka jee nümaka nümüin: «Choʼujaʼalaa neʼe wanee kasa paaʼinrajatka, puika süpüshuaʼa tü kasa pümaʼanakat, paapeetkalaka tü nneetkat namüin na wayuu maʼletsesaliikana, meechika pünaajaakai aaʼin kasa kojutusü chaa iipünaa, püleʼejeechika püchikuaʼa süpüla tamaatalain pia».
22 Naapaiwaʼaya tia chi wayuukai, mojusü maʼin naaʼin, jama washirüin maʼin nia.
23 Süchikijee niirakaain Jesús namüin na wayuukana, nümaka namüin na nikirajüinkana: «Kapüleejeerü maʼin namüin na wayuu wainmakana amaʼana nneerü neʼrüin tü kasa anasü eejeetkat nuluwataapeena Maleiwa».
24 Patatüsü maʼin naaʼin na nikirajüinkana naapapa tia. Anuuka nünüiki Jesús namüin: «Tachonniwaa, kapüleesü maʼin eʼraa tü kasa anasü eejeetkat nuluwataapeena Maleiwa.
25 Mapüleejeerü sümüin wanee kameeya sülatüin suluʼupünaa soʼu wanee wutia suulialeʼeya niʼrüin wanee wayuu washirü tü kasa anasü eejeetkat nuluwataapeena Maleiwa».
26 Süpatanajaaka naaʼin na nikirajüinkana naapaiwaʼaya tü nümakat Jesús jee namaka nümüin: «¿Jaraikaʼa oʼtteʼenneechin?».
27 Niirakaaka Jesús namüin sümaa nümüin namüin: «Isasü süchiki wayuu tia, nnojotpejeʼe kasain isain nüchiki Maleiwa».
28 Anuujeseʼe nünüiki Pedro nümüin: «Wapütüin süpüshuaʼa tü kasa eekat wamaʼana süpüla pümaatalain waya».
29 Nusoutaka Jesús namüin: «Chi eekai nüpütüin nipia, nuwala, nushunuu, nüshi, nii, nüchonnii otta nuumain saaʼujee tekirajanain nia otta saaʼujee nüküjain tü pütchi anasükat,
30 alanaʼaleejeeria maʼin tü kasa aapüneetkat nümüin maʼaka saaʼin polootua shikii, kepieechi nia, kawaleechi, kashunuujeechi, keijeechi, kachonjeechi jee koumainjeechi nia, jaʼitashi müliain atumawaa otta kateerü noʼu mapeena süpüla kaʼikat süpüshuaʼa.
31 Chi eekai palajanain chiiruaajeechi atumawaa, niasaʼa chi eekai chiiruaain palajaneechi atumawaa».
32 Oʼunushi Jesús namaa na nikirajüinkana suluʼupünaa tü wopu chaʼwatkat Jerusalénmüin. Nia palajanaka Jesús jee na nikirajüinkana ponusü maʼin naaʼin tü naaʼinrakat, nayasaʼa na wayuu sejenakana nachiiruajee mmotpuishii naya seema sülataleere wanee kasa. Nuunejaaka Jesús namüiwaʼa na Polookana Piamamüin aluwataaushi jee nüsoʼiraka naaʼin sünain tü kasa alatajatkat nümüin soʼu palit kaʼi.
33 Anuuka nünüiki Jesús namüin: «Anaasaʼa joo waya oʼunuin Jerusalénmüin eeinjachire naapünüin chi Süchonkai Wayuu* namüin nekiipüʼü na sacerdotekana jee namüin na karaloʼutamaajanakana. Saapüneetkalaka nikii süpüla outaa, aapüneechi sajapuluʼu wayuu nnojotka judíoin.
34 Shimeeʼerainpaleechi nia, sejeteechi aaʼu, shiʼyaajeechi nia otta suʼuteechi aaʼin, asoʼiraajeetpejeʼe naaʼin soʼu tü apünüinkat kaʼi».
35 Nürütkaaka nünainmüin Jesús Santiago nümaa Juan, na nüchonniikana Zebedeo jee namakalaka nümüin: «Ekirajüikalee, eesü wanee kasa wachunteeka pümüin».
36 Nümaka Jesús namüin: «¿Kasa juchunteeka tamüin?».
37 Anuuka nanüiki nümüin: «Anashii puuʼulaale waikalaain paʼatoʼu puluwataapeena, wanee pikialuʼujee jee wane pipeʼeruʼujee».
38 Nusoutaka Jesús namüin: «Nnojotsü jiyaawatüin aaʼu tü juchuntakat tamüin, ¿juunteerüjasaʼa jüsüin tü tasüinjatkat jooluʼu? ¿Juunteerüjasaʼa woutiisain jia maʼaka woutiisain taya?».
39 «Aa, wounteerün», namaka nümüin. Nusoutakalaka Jesús namüin: «Shiimain jüseerüin tü asüüshi tasakat otta woutiiseena jia maʼaka woutiisain taya,
40 nnojoipejeʼe tayain aneeküin jaraliinjanain aikalaain tekialuʼujee otta tepeʼeruʼujee. Tü juchuntakat tamüin napülajatü na wayuu keraatüjüliikana apüla shia».
41 Shiasaʼa naapapa tia na polooshiikana nikirajüin Jesús, naashichijaakalaka nooʼomüin Santiago nümaa Juan.
42 Nuunejakalaka naya Jesús jee nümaka namüin: «Na wayuu aluwataashiikana saaʼu mma, alaülaajaashii naaʼu na wayuu naluwataakana aaʼu. Akaataajaʼa neʼe na wayuu kojutukana atumawaa, laülaashii saaʼu wayuu,
43 Nnojotpejeʼe müinjatüin jukuwaʼipa. Chi wayuu miyoʼuweekai jaʼakajee aʼyataainjachi napüleerua na waneinnua.
44 Chi wayuu eekai kojuteein jaʼakajee niainjachi jüchepchiaka.
45 Jaʼitakajeʼe neʼe chi Süchonkai Wayuu, nnojoishi nia antüshin süpüla shiʼyataainjatüin wayuu nümüin, antüshi nia süpüla niʼyataainjachin namüin na waneinnua otta naapüinjatüin nikii* süpüla suʼttaainjatüin watta saalii wayuu».
46 Nekeroloko suluʼumüin tü pueulokot Jericó. Sükoʼulayaa sümaka watta saalii wayuu nümaa Jesús otta na nikirajüinkana noʼunaiwaʼaya suluʼujee tü pueulokot Jericó. Eejaikalaka wanee wayuu moʼupaʼasai joyotuin sotpaʼa tü wopukot, Bartimeo nünülia, nüchon Timeo.
47 Wanaa sümaa naapüin süchiki niain alatüin Jesús, chi chejeʼewaikai Nazaret, nuʼwaataka sümaa nümüin: «Jesús, Nüchonkai David,* pümüliajaʼaya taya».
48 Nüchiaanaka sutuma wayuu süpüla koʼutajachin nia, emetutpejeʼe nikiisa sünain maa: «Pükaalinja taya piakai Nüchonkai David».
49 Nüshaʼwalaakalaka Jesús jee nümaka namüin na wayuukana: «Jüma nümüin nüntaiwa yaamüin». Anuujeseʼe nanüiki na wayuukana nümüin chi moʼupaʼasaikai: «Nnojo mmoluin pia, pütamaa, pia naashin Jesús».
50 Naakatapünaaka saajuna nüsheʼin jee nütamaapünaaka, nuʼunakalaka eemüin Jesús.
51 Nümaka Jesús nümüin: «¿Kasa püchekaka taaʼinrüin püpüleerua?». Anuukalaka nünüiki chi moʼupaʼasaikai nümüin Jesús: «Ekirajüikalee,* anashi koʼule taya putuma».
52 Anuujeseʼe nünüiki Jesús nümüin: «Puʼuna pümaala, anaichipa pia süka kanoulain pia». Koʼukalaka nüchikuaʼa chi wayuukai jee nuʼunakalaka nüchiirua Jesús.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Rabbóni» maluʼulu tia suluʼu griego.
