Tü nüshajalakat Marcos 12:1-44
-
Nachiki na apünajülii uwomuyuukana (1-12)
-
Maleiwa nümaa «César» (13-17)
-
Asakinnüshi Jesús süchiki süsoʼiraainjatüin saaʼin wayuu (18-27)
-
Piamasü pütchi alanaʼaleeka maʼin ojutu (28-34)
-
¿Jaraiche kachonka Cristo? ¿Nüchonche nia David? (35-37 1)
-
Eʼreena müliaa na karaloʼutamaajanakana (37 2-40)
-
Tü piamashiichein nneerü shijitakat tü wayuu müliasü outa aʼwayuusetkat (41-44)
12 Naashajaaka Jesús namaa sümaa kayaawasein nutuma tü nikirajakalü anain jee nümakalaka namüin: «Eetaalashi wanee wayuu koumainshi apünajakai uuwoʼulia suluʼu, kakulaatseka shia nutuma. Nupotoko wanee mma eere süchüüjünüinjatüin tü uuwakat otta nukumajaka wanee torre. Naʼanapiraka tü nuumainkat saaʼu nneerü namüin wanee apünajülii, nuʼunakalaka wattamüin suluʼumüin wane mma naata.
2 Kettaapa sükalia tü aʼttieekat süpüla atpajünaa, nüjütaka wanee nüchepchia namaʼanamüin na apünajüliikana süpüla naluwataainjatüin nümüin süpüshi süchon tü aʼttieekat.
3 Nayasaʼa na apünajüliikana nataʼülaka chia achepchieekai, naʼyaajaka nia jee najütaka nia nüchikuaʼa sümaa majapüitpain nia natuma.
4 Niasaʼa chi koumainshikai, nüjütaka wane nüchepchiaya nanainmüin na apünajüliikana, niʼyaatünaka ekiipünaa chia achepchieekai jee airuʼutka nanüiki nümüin.
5 Nüjütaka wane nüchepchiaya, nuʼutunataaka aaʼin chiaya. Nüjütaka nooʼomüin na nüchepchiakana, eeshii na aʼyaajünakana otta eeshii na oʼutunakana aaʼin.
6 Niakalaka neʼe apütaain chi nüchon aishikai nüpüla, nüjütaka nia namaʼanamüin na apünajüliikana. ‹Nieechikajasaʼa kojutuin namüin chi tachonkai›, maa müsü naaʼin.
7 ‹Niasaʼa eʼipünaanajachikai apüla mmakat chi makai antüin. Anashi woʼutule naaʼin, woumainjeetka tü mmakat›, namajiraaka na apünajüliikana.
8 Nataʼülaka nia sümaa noʼutuin naaʼin. Nojutaka nia anooipaʼa sünain tü uuwoʼuliakat.
9 ¿Kaseetche naaʼinraka chi koumainshikai naka na apünajüliikana? Anteechi nia nooʼomüin na apünajüliikana, nuʼuteenaka naaʼin jee naapeetka tü mmakat namüin waneinnua apünajülii.
10 ¿Nnojotsükai jaashajeʼerüin tü Karaloʼuta Nüchikimaajatkat Maleiwa, tü makat mayaa: ‹Tü ipa nayoutakat na akumajüliikana miichi, shia tü ipa* choʼujaakat maʼin›?
11 ¿Jee nnojotsü jaashajeʼerüin tü pütchi makat mayaa: ‹Nia keʼinaajalaka shia Jehová* otta anashaatasü maʼin tia saaʼin wamüin›?».
12 Nayaawataka saaʼu na nüʼünüükana nayain kaliajanain tü nümakat. Napüreesajireeka nia, mmotpejeʼe naya seema jamajaa natuma na wayuukana. Nooʼulaaka nia jee noʼunakalaka nuulia.
13 Najütünaka nümaʼanamüin Jesús waneinnua fariseo namaʼaleeya waneinnua nümaajana Herodes, süsalainjachi nia natuma saaʼujee wanee pütchi eekai nujuʼitirüin.
14 Namakalaka nümüin Jesús nantaiwaʼaya nümaʼanamüin: «Ekirajüikalee, watüjaa aaʼuchi matüjain pia aküjaa alawaa, shia pikirajaka anain tü nümakat Maleiwa suluʼu shiainjaʼa shiimain otta nnojotsü shiain püchajaain achiki talatüinjatüin wayuu pümaa, jama nnojoluin koʼuin pukuwaʼipa sümüin wayuu. ¿Anasüche saaʼin pümüin wawalaajüle tü nneerü nümüinjatkat chi ‹César›* münakai? ¿Nnojottaapa anain?
15 ¿Wawalaajüinjatche shia? ¿Nnojottaapa wawalaajüinjatüin?». Nütüjaapejeʼe saaʼu Jesús wayuuin piama oʼupünaachii naya, nümakalaka namüin: «¿Jamüshi juuʼulakaka taaʼin? Jüsaaja tamüin wanee ‹denario›* süpüla teʼrüinjatüin shia».
16 Süsaajünaka nümüin, nümakalaka Jesús namüin: «¿Jarai kayaakuaka tü sünainkat tü nneetkat? ¿Jarai kanüliamaaka shia?». «Nia ‹César›», namakalaka nümüin.
17 Anuujeseʼe nünüiki Jesús namüin: «Jaapa jümata nümüin ‹César› tü kasa nümüinjatkat, jaapüinjatpejeʼe nümüin Maleiwa tü kasa nümüinjatkalia». Ponoko maʼin naaʼin naya wayuukana tü nümakat Jesús naapaiwaʼaya nünüiki.
18 Nantaka nünainmüin Jesús na saduceokana, na manoujainkana sünain süsoʼiraainjatüin aaʼin wayuu outusü jee namakalaka nümüin Jesús:
19 «Ekirajüikalee, saashin tü nümakat Moisés, nünaajaale wanee wayuu sümaa machooin nia sümüin nuʼwayuuse, niainjachi eisatka chi nuwalakai nüchikumüin. Kachooinjatkalaka tü jietkat nutuma süpüla müinjachin niakaijaʼa kachooin aaʼin chi amülouishikai.
20 Eejanainka akaratshishii wayuu pawalaawashii, kaʼwayuusetaalaka chi epayaakai, anaajaapejeʼe nia sümaa machooin nia sümüin tü nuʼwayuusekat.
21 Niakalaka eisalüin chi nimüliakai sümüin tü jietkat, nünaajaaka neʼe chiaʼaya sümaa machooin nia sümüin. Mataajaʼaya neʼe nukuwaʼipa chi nutujeejachikai.
22 Nanaajaaka naya akaratshishiikana wayuu sümaa machooin naya sümüin tü jietkat. Shiasaʼa mapa maʼin, sünaajaaka tü jietkat.
23 Nasoʼireʼennapa aaʼin na outushiikana, ¿jaraleechi kaʼwayuuseka tia wayuukot naʼakajee na akaratshishiikana wayuu, jama suʼwayuuseshiin naya napüshuaʼa paala?».
24 Nusoutakalaka Jesús namüin: «¿Aashin shiain maaʼawain atuma jia tia? Nnojotsü jütüjaain saaʼu jamüin sünüiki tü Karaloʼuta Nüchikimaajatkat Maleiwa jee nnojotsü jütüjaain saaʼu tü nuuntakat Maleiwa sükajee tü nüpülainkat.
25 Jamüshiijaʼa nasoʼireʼennapa aaʼin na outushiikana nnojoleena kaʼwayuusein na tooloyuukana jee müshiʼiya na jieyuukana nnojoleena aapünüin süpüla kaʼwayuusee, meerü nakuwaʼipa maʼaka nakuwaʼipa na aapiee chakana iipünaa.
26 ¿Nnojotsükai jaashajeʼerüin tü nümakat Maleiwa süchiki nasoʼireʼennajanain aaʼin na outushiikana, tü nüshajakat Moisés süchiki tü wunuʼu keipüsesükat?, mataashi nümakai Maleiwa mayaa: ‹Taya chi Nümaleiwasekai Abrahán, chi Nümaleiwasekai Isaac otta chi Nümaleiwasekai Jacob›.
27 Chi Maleiwakai, nnojoishi Sümaleiwasein wayuu outusü, Sümaleiwase eekai katüin soʼu. Maaʼawashii neʼe jia».
28 Eejachika wanee napüshi na karaloʼutamaajana antanuwaakana paala, naapüin tü yootojirawaakat, niyaawataka saaʼu anain maʼin nünüiki Jesús sünain asoutaa. Nüsakinnaka Jesús nutuma sünain maa: «¿Jarat tü pütchi nuluwataakalü anain Maleiwa alanaʼaleeka maʼin saʼakajee tü Pütchi Aapünakat nümüin Moisés?».*
29 Nümakalaka Jesús nümüin: «Tü palajatkat shia tü makat mayaa: ‹Jülüjataa jaaʼin pütchikat tüü jia wayuu israelkana, Jehová* chi Wamaleiwasekai waneeshia niain Maleiwain Jehová.*
30 Alinjachi püpüla Jehová* chi Pümaleiwasekai, alinjachi nia püpüla süka süpüshuaʼa paaʼin,* sükajee pukuwaʼipa, süka süpüshuaʼa pütchin otta jülüjainjachi nia paaʼin waneepia›.
31 Otta tü süchikumüinkat müsü mayaa: ‹Alinjatü püpüla wayuu maʼaka alin pia püpülajiraa›. Nnojotsü eein wanee pütchi aluwataanaka anain eekai alanaʼaleeinña suulia tia piamasükat».
32 Nümakalaka chi karaloʼutamaajachikai: «Anasü susoutia pütchikat putuma Ekirajüikalee, shiimain tü pümakat, pansaasü. ‹Waneeshia neʼe chi Maleiwakai, niaʼala neʼe suluʼu Maleiwain›.
33 Alanaʼaleesia maʼin alinjachin wapüla Maleiwa süka süpüshuaʼa waaʼin, sükajee süpüshuaʼa tü kasa wayaawatakalü aaʼu otta süka süpüshuaʼa watchin jee alanaʼaleesia maʼin alinjatüin wapüla wayuu, alanaʼaleesia shia suulia wasülajüin wanee kasa jee woʼutuin saaʼin mürüt nümüin Maleiwa süpüla waʼajüin shia nümüin».
34 Niyaawataka Jesús anain nünüiki chia wayuukai, nümakalaka nümüin: «Isasü neʼe motsomüin süpüla piʼrüin tü kasa anasü eejeetkat nuluwataapeena Maleiwa». Nnojoireeka nüsakinnüin Jesús piantua soʼujeʼereeya kaʼikat tia.
35 Ayataka nikirajüin Jesús suluʼu tü aʼwaajüleekat, nümakalaka: «¿Jamüshii namaka na karaloʼutamaajanakana niain Cristo chi nüchonkai David?
36 Anuu nünüiki David sükajee nüpülain Maleiwa: ‹Müshi Jehová* nümüin chi Taseñotsekai: «Püikalaa yaa tekialuʼujee waneʼereeya puuʼuipalapa tatuma na püʼünüükana»›.
37 Nüchonlejeʼe nia David, ¿jamakaʼa Señotkai nümaka nümüin?».
Kamalainka namüin na wayuu wattakana naalii naapajüin nünüiki Jesús.
38 Jee wanaa sümaa nikirajüin Jesús, nümakalaka: «Jalia jia naaʼin na karaloʼutamaajanakana, kamalainsü namüin warai namüin sümaa miyoʼuin nasheʼin jee kamalainsü namüin nasakünüinjanain metkaaraluʼu.
39 Aikalaashii naya palajana suluʼu tü miichi ekirajüleekat nüchiki Maleiwa jee noʼunapa sünain wanee ekawaa, aikalaashii naya eere naikalaain na wayuu kojutukana atumawaa.
40 Neʼra amüinrü wanee wayuu eekai outuin suʼwayuuse süpüla nasütajatüin suulia wanee kasa eekai sümaʼanain jee kamaʼawaishii naya sünain oʼuraajaa shiiʼiree shiʼrüinjanain naya wayuu. Alanaʼaleejeeria tü müliaa neʼreetkat süsalapa naya naainjala atumawaa».
41 Nüikalaaka Jesús yala peje sünain tü kojonkot eere shijitünüin nneerü, niʼrajawaain nümaka na wayuu ejitakana nanneetse. Wainma wayuu washinnuu ejitaka wainma nneerü suluʼu tü kojonkot.
42 Süntaka wanee wayuu müliasü outa aʼwayuuset, shijitaka suluʼu tü kojonkot piamasüchein nneerü maliapalasat.
43 Nuunejaka Jesús na nikirajüinkana jee nümakalaka namüin: «Shiimain tü tamakat jümüin, tü nneerü shijitakat suluʼu tü kojonkot tü wayuu müliasü outakalü aʼwayuuse, alanaʼaleesia suulia tü nejitakat napüshuaʼa na waneinnua.
44 Jamüshiijaʼa na wayuukana, nasülajüin neʼe tü süpütaalakat wanee kasa namaʼana, eekajasaʼa tü wayuu müliasükat shijitüin süpüshuaʼa tü eejatkat sümaʼana, tü shipijaainjatkalü aaʼu».
Noota
^ Eʼitaanüsü iipünaa tia ipakat eere süntiraain süsepü wanee miichi süpüla icheinjatüin shia.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
^ Nneerü kachueera nanneetsepuʼuka na romanokana. Pünaʼla tia suluʼu tü kanüliakat «Sooʼomüin pütchi B14».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
