Tü nüshajalakat Marcos 13:1-37
-
SAJAʼTTAJATPA TÜ KASA ALATAKAT SAINKÜIN MMA (1-37)
13 Nujuʼitapa Jesús suluʼujee tü aʼwaajüleekat, arütkaashi wanee nikirajüin nünainmüin jee nümakalaka nümüin: «Ekirajüikalee, anajüsü maʼin türa ipakat jee anasü maʼin shiyolojo tü aʼwaajüleekat».
2 Anuujeseʼe nünüiki Jesús nümüin: «¿Ponusü maʼin paaʼin türa piʼrakat? Eekajasaʼa türa ojuʼttinneerü, osolojuneerü süpüshuaʼa türa ipakat».
3 Wanaa sümaa joyotuin Jesús eekai tü wutai kanüliakat Olivos sümaa chain niʼipapaʼa sünainmüin tü aʼwaajüleekat Maleiwa, asakinnüshi nia nümüiwaʼa nutuma Pedro, Santiago, Juan otta Andrés jee namaka nümüin:
4 «Püma wamüin kasoʼuleerüin alatüin tü makat otta sülüʼülaain sükalia süpüla sajaʼttajatüin tü kasa alatakat sainküin mma».*
5 Nusoutakalaka Jesús namüin: «Eeja jaaʼin suulia shimeejüin jia wayuu.
6 Eejeena na wayuu tayayaakana naashin. ‹Tayasa chia makai›, meena otta wainmeena na wayuu nemeejakana.
7 Aapeena jia süchiki atkawaa suluʼu mma pejepünaa jünain jee suluʼu mma wattapünaa. Nnojotsü ainkuuinjatüin jaaʼin süka sülatüinjatüinña makalü aka saaʼin tia. Nnojotpejeʼe antamaateerüin tü kaʼi sajaʼlajaainjatkalü oʼu tü kasa alatakat sainküin mma.
8 »Atkaajiraajeerü wayuu suluʼujee wanee pueulo sümaa waneʼeya, atkaajiraajeerü wayuu suluʼujeejatü wanee mma sümaa waneʼeya. Akutkujaweerü mma sainküinpünaa mmakat otta aijeerü jamü, suʼttiapejeʼe neʼe müliaa tia makat.
9 »Jalia jia saaʼin wayuu süka sümaweenain jia laülaapialuʼumüin otta shiʼyaajeena jia suluʼu tü ekirajüleekat nüchiki Maleiwa. Amaaneena jia eemüin na sülaülajanakana mma jee na aluwataashiikana saaʼujee junoujain tanain, naapeetkalaka tachiki suluʼujee tia.
10 Aküjünüinjatü palajana sainküin mma tü pütchi anasükat.
11 Jiʼikajaanapa namaʼanamüin na sülaülajanakana mma, nnojo shapaain jaaʼin saaʼu tü jünüikinjatkat. Jüküjainjatü tü münakat jümüin soʼu kaʼikat tia. Nnojoleena jiain aashajaain, aküjüneerü jümüin tü jünüikinjatkat sutuma tü nüpülainkat Maleiwa.
12 Eejeechi wayuu aapakai nikii nuwala süpüla nuʼutunajachin aaʼin, chi wayuu eekai kachooin naapeechi ekii nüchon süpüla nuʼutunuinjachin aaʼin otta eejeena wayuu aapakana nikii nashi sümaa nei süpüla oʼutunaa aaʼin.
13 Süʼürüleena jia wayuu saaʼujee tekirajanain jia, chi wayuu achechetkai naaʼin nieechi oʼttaaka sajaʼttapa tü kasa alatakat sainküin mma.
14 »Jiʼrapa tü kasa kashüülasü jee ajaʼttirakat wanee kasa, shaʼwatüin eere nnojoluinjatüin shia (anasü niyaawatüle saaʼu tia chi wayuu aashajeʼerakai shia), anashii naʼluwataale saaʼumüin tü uuchikat na wayuu chakana Judea.
15 Chi wayuu yalakai saaʼu nipia, anashi nnojoire nikeroluin paülüʼümüin sünain ayuʼlaa wanee kasa
16 otta chi chakai yüüjapaʼa, anashi nnojoire nüleʼejaain sünainmüin tü kasa nüpütakat sümaa nüsaapünaain saajuna nüsheʼin.
17 Aluʼutaʼaleeshiijaʼa maʼin na jieyuu ipuonnuukana otta na atujeʼerakana wanaa maʼin sümaa tia kaʼikat.
18 Juʼuraaja maʼin süpüla nnojoluinjatüin sülatüin tia juyapoʼu.
19 Eʼreerü maʼin wayuu müliaa soʼu tia. Nnojotsü eeirüin wanee müliaa makalü aka saaʼin tia soʼujee nukumajüin Maleiwa wayuu sünainmüinreʼeya maaʼutpünaa otta nnojoleerü eein süchikuaʼa wanee müliaa makalü aka saaʼin tia.
20 Nnojorülejeʼe naawalüin Jehová* tia müliaakat, ajaʼtteerü wayuu süpüshuaʼa, naawaleetpejeʼe shia naaʼujee na nüneekajalakana.
21 »Junoujaʼalayaai sünüiki eekai sümüin jümüin ‹Anii Cristo, ichaa chayaan›.
22 Süka eejeenain na wayuu cristokana naashin otta eejeena na nünüikimaajanayaakana Maleiwa. Naaʼinreerü kasa pülasü ponuinjatka saaʼin wayuu shiiʼiree nemeejeein shia, jaʼitakajaʼa na aneekuushikana ooʼulaküneena aaʼin natuma.
23 Eeja jaaʼin, taapirüinnapa jia süchiki tü kasa alatajatkat.
24 »Mayaasü sülatüin tia müliaakat, ekuujeechi chi kaʼikai, ekuujeeriaʼaya tü kashikat.
25 Ojunuwaajeerü tü shüliwalakat otta meerü sülianajaanakai aaʼin tü sirumatuʼukat.
26 Shiʼreechi wayuu chi Süchonkai Wayuu sünain antaa saaʼu tü sirumakat sümaa pülasheechin nia otta kojuteechin nia atumawaa.
27 Nüjüteenakalaka na aapiee nümaʼanajeejanakana süpüla noutkajeʼerüin na aneekuushi chajanakana palaamüin, wüinpümüin, uuchumüin, wopumüin jee eejeere suʼttuin tü mmakat sünainmüinreʼeya wane saʼata tü sirumatuʼukat.
28 »Jülüjataa jaaʼin sukuwaʼipa tü wunuʼu kanüliakat higuera. Wanaa sümaa yotuin tü sütünakat jee sujuʼinuwaain tü süpanakat, jiyaawata aaʼu sülüʼülüin joutaleʼu.
29 Akaʼaya jiʼrapa sülatüin süpüshuaʼaleʼeya tü taküjaitpakat jümüin, jütüjaajeerü aaʼu nülüʼülüin maʼin chi Süchonkai Wayuu.
30 Tamüshii paala jia, eejeena na wayuu eekana maaʼulu yaa sülataleepa süpüshuaʼa tü taküjaitpakalü achiki jümüin.
31 Jaʼitasü nnojoluin tü sirumatuʼukat jee tü mmakat, ayateeria tü tanüikikat süpüla kaʼikat süpüshuaʼa.
32 »Matüjaaju aaʼu tü kaʼi jee tü oora sülatüinjatkalü oʼu tia, nnojotsü natüjaain aaʼu tia na aapiee chajanakana iipünaa, jaʼitakajeʼe tayakai,* nnojotsü tatüjaain aaʼu. Niaʼala neʼe atüjaaka saaʼu chi Tashikai.
33 Eeja maʼin jaaʼin, jalia jutunkajayaai, jama nnojoluin jütüjaain saaʼu joujeerüin sülatüin tia.
34 Tia müsü aka nukuwaʼipa wanee wayuu, apütakai nipia najapuluʼu na nüchepchiakana jee naapüin aʼyatawaa namüin waneʼewai nakua. Nümaka nümüin chi yalajachikai soʼuluʼu tü miichikat eejüinjatüin naaʼin waneepia.
35 Müsüjeseʼe eejüinjatüin maʼin jaaʼin waneepia süka nnojoluin jütüjaain saaʼu tü kaʼi nünteechikalü oʼu chi kepiashikai tü miichikat. Nünteechire nikerotapa chi kaʼikai, süseʼeruʼupünaa aikat, maalia jee shiale wattachon.
36 Jalia nüntajayaai jaaʼu sünain atunkaa.
37 Tü anuu jooluʼu taküjain jümüin, sümüinjatü wayuu süpüshuaʼa, eeja jaaʼin waneepia».
Noota
^ «Sajaʼttaleepa» maluʼulu tia suluʼu griego. Eesü shiale saashajaain achiki outaleepaʼaya wanee wayuu.
^ Pünaʼla tia suluʼu tü kanüliakat «Sooʼomüin pütchi A5».
^ Jee niale «chi Nüchonkai Maleiwa».
