Tü nüshajalakat Marcos 15:1-47
15 Mayaasü jaʼyuuin noutkajaaka nekiipüʼü na sacerdotekana, na laülaashiikana otta na karaloʼutamaajanakana, nayajaʼaya napüshuaʼa na sulujunakana tü kanüliakat Sanedrín.* Outkajaashii naya süpüla natüjaainjatüin saaʼu kasainjatüin naaʼinrüin. Süchikijee nijittaanüin Jesús natuma, namaaka nia nümaʼanamüin Pilato.
2 Anuuka nünüiki Pilato nümüin: «¿Shiimainña piain aluwataain naaʼu na judíokana?». Nusoutakalaka Jesús niʼipajee: «Aa, shiaʼaya tia pümakat».
3 Wainma neʼe tü kasa eʼitaanakalü aaʼu Jesús natuma nekiipüʼü na sacerdotekana.
4 Nüsakinnaka Jesús nüchikuaʼa nutuma Pilato, anuujeseʼe nünüiki nümüin: «¿Nnojoishi pia asoutajachin?, ¿paapayaainchejeʼe tü eʼitaanakalü aaʼu pia?».
5 Koʼutapejeʼe neʼe Jesús nuulia, ponoko maʼin naaʼin Pilato tia.
6 Soʼunnaa wanee miʼiraa ajütünawai achikichi nutuma Pilato wanee wayuu eekai püreesain, chi eekai nachuunajalain na wayuukana nümüin.
7 Shiasaʼa wanaa maʼin sümaa tia, eejachikalaka wanee wayuu püreesashi kanüliakai Barrabás. Naʼakajachi nia na wayuu uwomuyuukana, na eʼrüliijaakana wayumüin namüin na sülaülajanakana mma.
8 Süntakalaka joo watta saalii wayuu nünainmüin Pilato süpüla achuntaa nümüin tü naaʼinrapuʼukat napüleerua.
9 Anuukalaka nünüiki Pilato namüin: «¿Jücheküin tajütüin nüchiki chi aluwataashikai naaʼu na judíokana?».
10 Nütüjaapejeʼe saaʼu Pilato saapünüin nikii Jesús süka nüʼürülaanüin anain natuma nekiipüʼü na sacerdotekana.
11 Nayasaʼa nekiipüʼü na sacerdotekana nootuin na wayuukana süpüla nachuntajanain niainjachin ajütünüin achiki Barrabás.
12 Nümakalaka Pilato nüchikuaʼa namüin: «¿Kasakaʼa taaʼinrajatüin nüka chi aluwataashikai naaʼu na judíokana jaajüin?».
13 «Pükachera sünain wunuʼun», namayaa namaka nachikuaʼa.
14 Nümakalaka Pilato namüin: «¿Kasanainjeejachikai jümüin? ¿Kasakai naainjalaka juulia?». Naʼwoorolooko maʼin sünain maa: «¡Pükacherapan!».
15 Nüjütirakalaka Pilato nüchiki Barrabás shiiʼiree talatüinjatüin wayuu nümaa, naapapejeʼe nikii Jesús süpüla niʼyaajünüin jee nükachennüin sünain wanee wunuʼu süpüla outajachin nia.
16 Nümaanaka Jesús natuma na surulaatkana suluʼumüin süpaatiase nipia chi aluwataashikai. Noutkajeʼennaka watta naalii surulaat.
17 Saʼatünaka nünain wanee kuluulu jepisiiyaa. Nakoʼojoko wanee keipüsesü, nakumajaka wanee kotse süka, naʼataka shia sünain nikii Jesús.
18 Naʼwoolojoko nümüin sünain maa: «¿Anayaashijeʼe pia aluwataashikai naaʼu na judíokana?».
19 Naʼyaajüin nikiipüna süka kainñaruushi otta nejeta aaʼuchi nia. Nasapainkayaaka naya sümaa nejepülaain nümülatuʼu.
20 Shiasaʼa süchikijee nemeeʼerainpalain Jesús, saakatünaka nuulia tü kuluulu jepisiiyaa aʼatünakat nünain paala. Saʼatünakalaka nünain süchikuaʼa tü nüsheʼintüjütkalia. Nümaanaka süpüla nüchitünajachin sünain wanee wunuʼu.
21 Alatüshi wanaa maʼin sümaa tia wanee wayuu sejechi anuuipaʼajee sünain tü pueulokot. Simón nünülia, chejeʼewai suluʼujee tü mmakat Cirene. Nüshi nia Alejandro nümaa Rufo. Nülüʼüjinnaka tü wunuʼu* akachennajachikalü anain Jesús.
22 Nümaanaka Jesús suluʼumüin tü mma kanüliakat «Gólgota», «shikii wayuu outusü» maluʼulu tia.
23 Nasiʼreekalaka Jesús wiino kaʼakasü «mirra».* Nnojotkalaka nüseein shia.
24 Nüchitünaka sünain tü wunuʼukat, nashantanajiraaka süpüla natüjaainjatüin saaʼu jaralinjachin apütüüin apüla nüsheʼin Jesús.
25 Nüchitünaka Jesús sünain tü wunuʼukat maʼaka saaʼin las nueve* wattaʼa maalü.
26 Süshajünaka sünain wanee taapüla iipünaa sünain nikii Jesús kasanainjeein outuin nia, müsü mayaa: «Chi aluwataashikai naaʼu na judíokana».
27 Nakachennaka wanaa nümaa Jesús piamashii kaʼruwarannuu, wanee nikialuʼujee otta wane nipeʼeruʼujee.
28 *
29 Nayasaʼa na wayuu alatakana nüʼütpünaa Jesús, nalialüin nekii nümüin sümaa airuʼuluin nanüiki jee namakalaka nümüin: «Anashitatayaale, ¿nnojoishijasaʼa piain chi ojuttirajachikai tü aʼwaajüleekat Maleiwa otta püshaʼwaleʼerüinjatüin shia soʼu apünüin kaʼi?
30 Püshakata pümaala saaʼujee türa wunuʼu akachennakalü anain pia, kateetkalaka poʼu».
31 Akaataʼaya neʼe nanüiki nekiipüʼü na sacerdotekana jee müshiʼiya na karaloʼutamaajanakana, nemeeʼerainpalashi nia. Mataalasü nanüiki nümüin: «Eesü wayuu kataka oʼu nutuma, isapejeʼe nüchiki katajatüin noʼu.
32 Anashijaʼa nüshakatüle jooluʼu chi Cristokai saaʼujee türa wunuʼu akachennakalü anain nia, jama niain chi aluwataashikai saaʼu Israel, wanoujeenaka nünain». Jaʼitakajeʼe neʼe na akachennakana wanaa nümaa Jesús, airuʼutsü nanüiki nümüin.
33 Shipiʼyuushijaaka tü mmapaʼakat maʼaka saaʼin las doce* kaleʼu sünainmüinreʼeya maʼaka saaʼin las tres aliika.*
34 Shiasaʼa maʼaka saaʼin las tres aliika, nümakalaka Jesús sümaa emetuluin maʼin nünüiki: «Éli, Éli, ¿láma sabakhtháni?», «Tamaleiwasekalee, Tamaleiwasekalee, ¿jamüshi piyüülajakaʼa taya?», maluʼulu tia pütchikat.
35 Naapaiwaʼaya tia na wayuu yalajanakana, namajiraakalaka: «Nia nuunejaka Elías».
36 Nuwataaka wanee wayuu sünain asaajaa wanee maawüi.* Nucholetitkalaka shia shiroku wanee wiino jashüʼüsü, niʼitaaka shia sünain shiʼichi wanee kainñaruushi, niyurutka shia nünainmüin Jesús shiiʼiree nüsüin shia. Nümakalaka chi wayuukai: «Juuʼulaapan, weʼraiwa nüntüin Elías sünain ashakatiraa nia».
37 Nuʼwaatakalaka Jesús sümaa emetuluin maʼin nikiisa jee outakalaka nia.
38 Süchatajaakalaka pasanainpünaa sünain tü kuluulu soʼulujunakat tü kuatta shiinaluʼusükat tü aʼwaajüleekat.
39 Wanaa sümaa niʼrüin chi sülaülashikai surulaat tü kasa alatakat soʼu outuin Jesús, nümakalaka: «Shiimainjaʼaya maʼin Nüchoin Maleiwa wayuukai chii».
40 Eejanaka wanee jieyuu eʼrajakana sukua wattajee tü kasa alatakat. Eejatü María Magdalena, María tü niikat Santiago chi «Emülieekai»* jee müshia Josés otta eejatü Salomé.
41 Eekajasaʼa naya jieyuukana nümaataralii naya otta naya na akaalinjapuʼukana nia wanaa sümaa chajachin nia Galilea. Eejanaʼaya yala waneinnua jieyuu antakana nümaa Jerusalénmüin.
42 Motsouupa, soʼu tü kaʼi yapajakalü oʼu wayuu süpüla tü sükaliakalü eemerawaa,
43 nuʼunaka José chi chejeʼewaikai Arimatea nümaʼanamüin Pilato sümaa meimmoluin nia sünain achuntaa naapünajachin Jesús nümüin. Wayuukai chia nia noʼutku na laülaashii sulujunakana tü laülaapiakat, wayuu kojutushi atumawaa jee naʼatapajüin nüntajachin Maleiwa sünain aluwatawaa.
44 Nütüjawee aaʼu Pilato müleka outuichipale Jesús, nuunejitkalaka chi sülaülashikai surulaat jee nüsakitkalaka nia sünain tia.
45 Süküjünapa nümüin Pilato nutuma chi sülaülashikai surulaat sünain outuichipain Jesús, naapaka müliashii nümüin José süpüla nülüʼüjainjachin nia.
46 Niyaʼlajaka José wanee kuluulu anasü maʼin aainjuushi süka lino, nüshakatiraka Jesús jee nukoʼoloko nia süka tia kuluutkat. Niʼitaakalaka nia suluʼu wanee koʼushii, akumajünatüjülia paala. Niʼiteʼeraka wanee ipa miyoʼu soʼulujuna tü woowirakat.
47 Yalajatü María Magdalena sümaa María tü niikat Josés, neʼrajawaain namüsü eejachire niʼitaanüin müliashii.
Noota
^ «Sanedrín» münapuʼusü tü Laülaapia Miyoʼusükat natuma na judíokana.
^ Shia tü akachennapuʼukalü anain wanee wayuu süpüla outajachin nia. Nuchuntuin Jesús tia pütchikat süpüla niyaawajeʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Maʼaka apünüin oora süchikijee nujuʼitaain kaʼikai» maluʼulu tia suluʼu griego.
^ Ashajünüsü wetsiikulokot tüü suluʼu waneirua Biblia, nnojotpejeʼe shia eʼitaanüin suluʼu waneirua karaloʼuta sümaiwajatü ashajuushikat suluʼu griego. Pünaʼla tia suluʼu tü kanüliakat «Sooʼomüin pütchi A3».
^ «Maʼaka aipirua oora süchikijee nujuʼitaain kaʼikai» maluʼulu tia suluʼu griego.
^ «Maʼaka mekietsat oora süchikijee nujuʼitaain kaʼikai» maluʼulu tia suluʼu griego.
^ Jee shiale wanee «esponja».
^ Jee niale «chi Motsochonkai».
