Tü nüshajalakat Marcos 16:1-8
-
Asoʼireʼenna aaʼinchi Jesús süchikijee outaa (1-8)
16 Waneemüin kaʼi süchikijee tü sükaliakalü eemerawaa, suʼunakalaka María Magdalena, María tü niikat Santiago otta müsia Salomé sünain ayaʼlajaa wunuʼu jemeta eejuut süpüla nashulejüin shia nünain Jesús.
2 Shiasaʼa soʼu tü kaʼi shiinaluʼujeekat semaana, noʼunakalaka chaa amuuyuupaʼamüin wattachon maʼin, niweetaiwaʼaya kaʼikai.
3 «¿Jaraleetche asünneʼeraka wamüin tü ipa soʼulujunakat tü woowirakat?», namajiraaka.
4 Neirakaapa sümüin, neʼraka süsünneʼeruushin tü ipakat mayaainjeʼe miyoʼuin maʼin shia.
5 Süpatanajaaka naaʼin nekerotoiwaʼaya suluʼu tü woowirakat, neʼrüin wanee jimaʼai joyotushi nekialuʼujee sümaa kasuuin maʼin nüsheʼin.
6 Nümaka chi jimaʼaikai namüin: «Nnojo jainkuuin aaʼin, nia jüchajaaka achiki Jesús, chi chejeʼewaikai Nazaret, chi akachennakai sünain wunuʼu süpüla outajachin nia. Asoʼireʼennüitpa naaʼin, nnojoluichipa nia yaain, anuʼusa tü eejachire niʼitaanüin.
7 Anakajaʼa juʼunule namaʼanamüin na nikirajüinkana jee nümaʼanamüin Pedro sümaa müin jünüiki namüin: ‹Oʼunushi nia müinmaʼa yaa jüpüleerua Galileamüin, jiʼreechi nia chamüin maʼaka nüküjain paala jümüin›».
8 Nojuʼitaakalaka suluʼujee tü woowirakat sümaa napantajaain. Kutkuttaʼatshii neʼe naya sümaa talatüin maʼin naaʼin, nnojotkalaka naküjain süchiki tia sümüin wayuu, jama mmoluin naya.*
Noota
^ Saashin waneirua karaloʼuta sümaiwajatü kaawainka anüiki, ajaʼlajaasü tü karaloʼutakat Marcos sükajee tü pütchi suluʼukat wetsiikulo 8. Pünaʼla tia suluʼu tü kanüliakat «Sooʼomüin pütchi A3».
