Tü nüshajalakat Marcos 2:1-28
2 Shiasaʼa mapa, nüleʼejaka Jesús nüchikuaʼa Capernaúmmüin. Saapünakalaka sutuma wayuu yalajachin nia nipialuʼu.
2 Watta naalii na wayuu antakana nümaʼanamüin Jesús. Wotusü neʼe tü miichikat namaa, nnojotsü jalapünaainjatüin ekeroluin wayuu. Nuʼttakalaka Jesús sünain aküjaa pütchi namüin.
3 Nüntinnakalaka nümüin Jesús wanee wayuu makutulaainkai sutuma ayuulii, alüʼüjiraanüshi nia natuma pienchishii wayuu.
4 Shiasaʼa süka wattain naalii na wayuukana, nnojoishii jalapünaainjanain naya. Naakatakalaka süpüshi saajuna tü miichikat wanaapünaa maʼin sümaa eejachire Jesús. Noototoko tü saajunakat jee nashakatiraka chi wayuu makutulaainkai sutuma ayuulii.
5 Niʼrapa Jesús kanoulain maʼin naya wayuukana, nümakalaka nümüin chi wayuu makutulaainkai sutuma ayuulii: «Tachee, alatinnüitpa puulia paainjala».
6 Yalajanaka joyojoyoluin waneinnua karaloʼutamaajana jee namakalaka suluʼu naaʼin:
7 «¿Jamüsükai makaʼa nünüiki wayuukai chii? Mojutusai Maleiwa nümüin, niaʼala neʼe Maleiwa alatitkai saainjala wayuu suulia».
8 Niyaawataka Jesús saaʼu tü jülüjakat naaʼin na karaloʼutamaajanakana, nümakalaka namüin: «¿Jamüsükai makaʼa jünüiki suluʼu jaaʼin?
9 ¿Shiache anaka aluʼu tamüle nümüin chi wayuukai ‹alatinnüitpa paainjala puulia›? ¿Shiataapa anain tamüle nümüin ‹pütamaa, paapaa türa pujulejiakat, puwarairaa pümaala›?
10 Jülüjataa jaaʼin tü taaʼinrajatkat süpüla jütüjaain saaʼu niʼitaanüin chi Süchonkai Wayuu* yaa mmapaʼa süpüla nülatirüin saainjala wayuu». Nümakalaka nümüin chi wayuu makutulaainkai sutuma ayuulii:
11 «Anuu tanüiki pümüin, pütamaa pümaala, paapaa türa pujulejiakat, puʼuna pümaala pipialuʼumüin».
12 Nütamaamaataka chi wayuukai noʼupala napüshuaʼaleʼeya na wayuu yalajanakana, naapaakalaka tü nujulejiakat otta nuwarairaaka. Ponokoloko maʼin saaʼin wayuu tia, suʼwaajakalaka Maleiwa sünain maa: «Nnojotsü weʼrüirüin wanee kasa eekai müin aka saaʼin tüü».
13 Nuʼunakalaka Jesús nüchikuaʼa sotpaʼamüin tü palaakat. Watta maʼin naalii na wayuu antawaikana nünainmüin, nikirajawaika naya.
14 Sümaʼainruʼu nuʼunuin Jesús yalejee, niʼrakalaka wanee wayuu kanüliashi Leví, nüchon Alfeo, joyotushi suluʼu tü miichi eere süchekajünüin nneerü neʼipajee na sülaülakana mma, nümakalaka Jesús nümüin: «Anashi tamaataraire pia». Nütamaamaataka Leví sümaa nuʼunuin nümaa.
15 Shiasaʼa süchikijee tia, chajachikalaka Jesús namaa na nikirajüinkana ekaain nipialuʼu Leví. Yalajanajaʼaya nümaa sünain ekawaa na wayuu kaainjaraliikana jee na achekajüliikana nneerü neʼipajee na sülaülakana mma. Oʼunushii noʼutku naya wayuukana nümaa Jesús.
16 Nayasaʼa na karaloʼutamaajana napüshikana na fariseokana, neʼrapa nikaain Jesús namaa naya wayuukana, namakalaka namüin na nikirajüinkana Jesús: «Ekaashira maʼin nia namaa na achekajüliikana nneerü jee namaa na wayuu kaainjaraliikana».
17 Naapaiwaʼaya Jesús tia, nümakalaka namüin: «Nnojotsü choʼujaain niʼrajeʼerüin wanee wayuu anale nia, akaajasaʼa ayuuire nia, oʼunushi nümaʼanamüin wanee tottoot. Nnojoishi antüshin taya süpüla ekirajaa na lotokana akuwaʼipa, naya tekirajüinjanaka na kaainjaraliikana».
18 Aamajawaishii na nikirajüinkana Juan namaʼaleeya na fariseokana. Narütkaakalaka na nikirajüinkana Juan nünainmüin Jesús jee nasakiraka nia: «¿Jamüshii wayakaʼa aamajüin wanaa namaa na fariseokana? ¿Jamakaʼa maamajüinka na pikirajüinkana?».
19 Anuu nünüiki Jesús namüin: «Nnojotsü choʼujaain naamajüinjanain naʼaleewainyuu wanee wayuu kaʼwayuuseinjachikai müleka eeyüire nia namaa. Nnojotsüje anain naaʼinrüle tia eeiwaʼaya chi kaʼwayuuseinjachikai.
20 Eejeetpejeʼe wanee kaʼi nümaaneechika oʼu chi kaʼwayuuseinjachikai, naamajeenaka naʼaleewainyuu naalinjee.
21 Nnojotsü aruwentajünüin wanee kuluulu eekai laülaain süka wanee eekai jeketüin, süka süsüküijaweerüin tü kuluulu laülaakat sutuma tü kuluulu jeketükat shiyuluʼutapa shia.
22 Nnojotsü alaʼannüin wiino eekai jeketüin suluʼu süta* wiino eekai laülaairüin. Mülejeʼe shia atumawaa, eesü süpüla süchatajaain, amüla meeria tü wiinokot. Nnojoleerü kasain anain apüla tü sütakat wiino. Eekajasaʼa tü wiino jeketükat alaʼannüsü shia suluʼu süta eekai jeketüin».
23 Soʼu tü sükaliakalü eemerawaa, nülatapünaaka Jesús süpaʼapünaa wanee suuʼulia trigo, nasürüttapünaaka na nikirajüinkana shiʼichi tü trigokot.
24 Namakalaka na fariseokana nümüin: «¿Piʼrayaainchejeʼe nala pikirajüinkana? ¿Jamüshiikai naaʼinraka wanee kasa apülajünaka soʼu sükalia eemerawaa?».
25 Nusoutaka Jesús namüin: «¿Nnojotsükai jaashajeʼerüin süchiki tü naaʼinrakat David soʼu niʼrüin müliaa namaa na wayuu nümaajanakana jee outuin naya jamü?
26 ¿Jaashajeʼerayaainchejeʼe süchiki tü naaʼinrakat David wanaa sümaa nikeroluin suluʼumüin nipia Maleiwa soʼu niain Abiatar nekiipüʼükai na sacerdotekana? Nikiraakalaka David namaa na wayuu nümaajanakana tü pan aapünajatkat nümüin Maleiwa. Nnojoluinjatpejeʼe shiküin wayuu tia makat, nayainjana neʼe ekaka tia na sacerdotekana».
27 Nümakalaka namüin: «Niʼitaain Maleiwa tü sükaliakalü eemerawaa süpüla anainjatüin sukuwaʼipa wayuu, nnojotpejeʼe nukumajüin wayuu süpüla saaʼinrajatüin tü achuntunakat soʼu sükalia eemerawaa.
28 Eekajasaʼa chi Süchonkai Wayuu nia Laülaaka saaʼu tü sükaliakalü eemerawaa».
Noota
^ Pünaʼla tia suluʼu tü kanüliakat «Jamaluʼulu pütchikat».
^ Tia sütakat wiino, aainjuushi süka süta mürüt. Pünaʼla tia suluʼu tü kanüliakat «Jamaluʼulu pütchikat».
