Tü nüshajalakat Marcos 5:1-43
5 Nüntaka Jesús waneemüin saʼata tü palaakat, noumainpaʼamüin na kanüliakana gerasenos.
2 Nüshakataiwaʼaya Jesús suluʼujee tü anuwakat nüpanapünaka nutuma wanee wayuu kaleʼeruʼushi yolujaa, amuuyuupaʼajeejachi.
3 Chapuʼushi nia kepiain amuuyuupaʼa, nnojoipejeʼe kasakainjachin nia sutuma wayuu jaʼitashi kapüin nia kaleena sutuma.
4 Kojuyatua kaleenaluʼuin nia atumawaa, kaleenaluʼusü najapü jee nuuʼui. Nuchoujeʼerawalin tü kaleenakat, isashi süchiki wayuu.
5 Warai maʼwaishi nia saʼwai jee soʼukai amuuyuupaʼa. Kookotowaishi nia saaʼupünaa tü uuchikat otta nükashajüin nüta süka ipa.
6 Nuwataaka nüpanapa Jesús niʼraiwaʼaya nia wattajee jee nüsapainkaka nia nümülatuʼu.
7 Nuʼwoottooko sünain maa: «Jesúsuu, Nüchonkai chi Maleiwa Miyoʼushikai, ¿kasajachikai taya pümüin? Püküja tamüin nooʼopünaa Maleiwa nnojoleechin müliain taya putuma».
8 «Pujuʼita nüleʼeruʼujee chira wayuukai», majüshi Jesús paala sümüin tü yolujaakat.
9 Nümakalaka Jesús nümüin: «¿Kasaichi pünülia?». «‹Watta waalii›* münüshi taya», sümakalaka tü yolujaakat nümüin.
10 Suchuntaka maʼin tü yolujaakat nümüin Jesús süpüla nnojoluinjatüin nüjünajaain shia suluʼujee tia mmakat.
11 Eejatkalaka watta saalii püülükü ekajaain saaʼu tü uuchikat.
12 Suchuntaka maʼin tü yolujaakat nümüin Jesús sünain maa: «Anashii püjütüle waya süleʼeruʼumüin tüsa püülükükalüirua».
13 Nüjütaka shia Jesús, sujuʼinuwaakalaka nüleʼeruʼujee chi wayuukai jee shikerunuwaaka süleʼeruʼumüin tü püülükükalüirua. Sujunuujaayaa sümaka tü püülükükalüirua shirokumüin tü palaakat, eesü maʼaka 2.000 ooʼuwoʼutka.
14 Napantajaakalaka na aaʼinmajüliikana tü püülükükalüirua. Naküjaka süchiki suluʼu tü pueulokot jee wünaʼapüpünaa, sukoʼulayaa sümaka wayuu süpüla shiʼrüinjatüin tü kasa alatakat.
15 Nantapa nümaʼanamüin Jesús, neʼraka joyotuin chi wayuu kaleʼeruʼushikai paala watta saalii* yolujaa. Anaichipa nia, kasheʼinshi, neimmolojooko na wayuukana neʼraiwaʼaya nia.
16 Nayasaʼa na wayuu eʼrajakana sukua tü aaʼinnakat nüpüleerua chi wayuu kaleʼeruʼushikai paala yolujaa jee tü alatakat sümüin tü püülükükalüirua, naküjain süchiki tia namüin na wayuu antapaatüshiikana.
17 Nachuntaka na wayuukana nümüin Jesús nuʼunajachin noumainpaʼajee.
18 Noʼotooiwaʼaya Jesús suluʼu tü anuwakat, nürütkaaka nünainmüin Jesús chi wayuu kaleʼeruʼushikai paala yolujaa süpüla nuchuntuin nümüin Jesús nümaainjachin nia.
19 Niyoutakalaka Jesús süchiki nümaainjachin nia, nümakalaka nümüin: «Anashi puʼunule pipialuʼumüin, püleʼeja namaʼanamüin na püpüshikana jee püküja süchiki süpüshuaʼaleʼeya tü kasa naaʼinrakat Jehová* püpüleerua otta süchiki sümülialaain naaʼin paalin».
20 Nuʼunakalaka chi wayuukai, nüküjaʼayataka suluʼupünaa tü kanüliakat Decápolis* süchiki süpüshuaʼa tü naaʼinrakat Jesús nüpüleerua. Ponokoloko maʼin saaʼin wayuu tü nüküjakat.
21 Anuwaluʼuka Jesús waneemüin saʼata tü palaakat. Shiasaʼa yalaiwaʼaya nia sotpaʼa tü palaakat, süntayaa sümaka watta saalii wayuu nünainmüin.
22 Nüntaka nünainmüin Jesús wanee wayuu kanüliashi Jairo, napüshi na laülaashiikana suluʼu tü ekirajüleekat nüchiki Maleiwa. Nüsapainkaka nia nümülatuʼu Jesús.
23 Kojuyatuaka nuchuntuin nümüin sünain maa: «Mayeinsü maʼin tü tachonkat, anashi puʼunule tamaa süpüla piʼitaainjatüin pajapü saaʼu, saawalajeetka jee ayateetka katüin soʼu».
24 Nuʼunamaataka Jesús nümaa, sukoʼulayaa sümaka watta saalii wayuu nümaa chentaawaka nünain.
25 Jee naʼaka na wayuukana eejatü wanee wayuu polooirü piamamüin juya amülain isha sümüin.
26 Wainma na tottoot suʼunakana amaʼanamüin, eʼrapejeʼe neʼe shia müliaa. Ajaʼttüsü sünneetse soʼuinnain tottoot, mayeinreepejeʼeya neʼe shia.
27 Süka saapüin süchiki tü kasa naaʼinrakat Jesús, shikerotoko naʼakapünaa na wayuukana. Sürütkaakalaka nünainmüin Jesús nüchiiruajee, shipettakalaka nüsheʼin.
28 Müsü tia wayuukot suluʼu saaʼin: «Aneetpejeʼe taya müleka tepettüle neʼe nüsheʼin».
29 Süshaʼwalaʼalaa sümaka tü ishakat suulia, shiyaawataka saaʼu saawalüitpain shia tü ayuuliikat.
30 Niyaawatamaataka Jesús saaʼu naaʼinrüitchipain wanee kasa pülasü. Nuuyantaakalaka nanainmüin na wayuukana jee nümakalaka namüin: «¿Jarat epettaka tasheʼin?».
31 Namakalaka na nikirajüinkana nümüin: «¿Jamüshikai püsakiraka jaralin epettüin püsheʼin? Piʼrayaainchejeʼe pasanain pia sünain wayuu».
32 Ayatapejeʼe eirakaain Jesús namüin na wayuukana süpüla nütüjaainjatüin saaʼu jaralin epettüin nüsheʼin.
33 Kutkuttaʼalaka neʼe tü wayuukot süka shiain atüjaain saaʼu tü kasa alatakat. Sürütkaaka nünainmüin Jesús, süsapainkaka shia nümülatuʼu jee süküjaka nümüin süpüshuaʼa tü alatakat.
34 Nümakalaka Jesús sümüin: «Nii waaʼiraa, nnojo mojuin paaʼin, anaitpa pia süka kanoulain pia. Puʼuna pümaala, aawalaaitpa tü ayuuliikat puulia».
35 Yalaiwaʼaya naashajaain Jesús, nantapaaka waneinnua wayuu chejeejana nipialuʼujee chi laülaashikai suluʼu tü ekirajüleekat nüchiki Maleiwa, namakalaka nümüin: «Anaajaaitpa tü püchonkat, nnojo pikeʼejüin naaʼin chi Ekirajüikai».
36 Naapaiwaʼaya Jesús tia, nümakalaka nümüin chi laülaashikai suluʼu tü ekirajüleekat nüchiki Maleiwa: «Nnojo piyoʼujaain aaʼin, kanoula pia».
37 Niyoutaka Jesús süpüleerua wainmainjatüin wayuu nümaa, niakalaka neʼe nümaain Pedro, Santiago otta müshia Juan, chi nuwalakai Santiago.
38 Nantapa nipialuʼumüin chi laülaashikai suluʼu tü ekirajüleekat nüchiki Maleiwa, niʼrakalaka Jesús na wayuukana iralamuuin sümaa naʼwaatüin maʼin.
39 Shiasaʼa nikerolopa Jesús paülüʼümüin, nümakalaka namüin: «¿Jamüshii jiʼyalajaka sümaa juʼwaatüin maʼin? Nnojotsü outuin tü jintutkat, atunkusü neʼe».
40 Nasirajayaa namaka na wayuukana nüka Jesús naapaiwaʼaya tü nümakat. Shiasaʼa süchikijee nujuʼitirüin Jesús napüshuaʼa na wayuukana, nikeroloko eejatüle tü jintutkat nümaʼaleeya chi süshikai, tü shiikat otta namaʼaleeya na nikirajüin eejanakana nümaa.
41 Naapaakalaka Jesús sajapü tü jintutkat sümaa nümüin sümüin: «Tálitha cúmi», «uuton, pütamaa müshi taya pümüin», maluʼulu tia pütchikat.
42 Sütamaakalaka tü jintutkat sümaa suwarairaain, poloo piamamüin suuyase. Nayasaʼa na wayuu kachooinkana shia, ponusü maʼin naaʼin tia sümaa talatüin maʼin naaʼin.
43 Nüchiaakalaka naya Jesús kojuyatua süpüla nnojoliinjanain naküjain süchiki tia sümüin wayuu otta nüküjainña namüin süchajaanajatüin wanee kasa shiyaaluʼu tü jintutkat.
Noota
^ Saashin tü Karaloʼuta Nüchikimaajatkat Maleiwa, shia «Legión» münaka wayuu eekai wattain maʼin saalii.
^ Pünaʼla tia suluʼu tü kanüliakat «Sooʼomüin pütchi A5».
^ «Poloosü mma» eesü sümünüle.
