Tü nüshajalakat Marcos 8:1-38
-
Eküshii nutuma Jesús 4.000 tooloyuu (1-9)
-
Achuntunusü nümüin Jesús naaʼinrüinjatüin wanee kasa pülasü (10-13)
-
Soolojia pan namaʼanajeejatka na fariseokana nümaʼaleeya Herodes (14-21)
-
Koʼupaʼashi wanee wayuu nutuma Jesús chaa Betsaida (22-26)
-
Nüküjain Pedro niain Jesús chi Cristokai (27-30)
-
Nüküjain Jesús nuʼutunajachin aaʼin (31-33)
-
Chi achekakai süchiki nikirajüin nia Jesús (34-38)
8 Soʼunnaa tia, sürütkaakalaka süchikuaʼa watta saalii wayuu nünainmüin Jesús. Shiasaʼa süka nnojoluin kasain neküinjatüin, nuunejitkalaka Jesús na nikirajüinkana jee nümakalaka namüin:
2 «Aisü tamüin namüliala nala wayuukana süka apünüinnain naya kaʼi wamaa jee nnojotsü kasainjatüin neküin.
3 Nnojoishii tajüteein naya sümaa jamü, jama noʼuchichajaʼaleere wopuluʼu sutuma jamü. Eeshii na wayuu wattajeejanakana».
4 Anuukalaka nanüiki na nikirajüinkana nümüin: «Wattasü maʼin tü mma yaakalü aluʼu waya, ¿jalejeekuwalüinjatü pan süpüla shiküinjatüin tü wayuu wattakat maʼin saalii?».
5 Nüsakiraka naya Jesús: «¿Jeʼrasü pan eeka jümaʼana?». Nasoutaka nümüin: «Akaratshisü neʼe».
6 Nuluwataakalaka Jesús na wayuukana süpüla naikaajaainjanain mmoluʼu jee süchikijee tia, naapaaka tü akaratshisükat pan, naapaka analuʼut nümüin Maleiwa saaʼu. Nüshanaajaka shia jee naapaka shia namüin na nikirajüinkana süpüla neitajüinjatüin shia namüin na wayuukana.
7 Eejatia jimechein namaʼana. Shiasaʼa süchikijee nuʼuraajüin Jesús, naapakalaka shia namüin na nikirajüinkana süpüla neitajüinjatüinya shia namüin na wayuukana.
8 Emirashii napüshuaʼa na wayuukana, sükotchojünaka akaratshisü kanaasüta miyoʼuyuu sümaajatü tü eküülü apütaasükat.
9 Eeshii maʼaka naaʼin 4.000 tooloyuu ekakana soʼu tia, nüpaajaaka Jesús namaa na wayuukana.
10 Nuʼunamaataka Jesús suluʼu wanee anuwa namaa na nikirajüinkana. Nüntaka suluʼumüin tü mma kanüliakat Dalmanuta.
11 Narütkaakalaka na fariseokana nünainmüin Jesús. Naʼülüjaka nümüin sümaa nachuntayaain naaʼinrajatüin wanee kasa pülasü noʼupala süpüla nooʼulaküin naaʼin.
12 Nüsanatkalaka naaʼin Jesús jee nümakalaka namüin: «Wayuu mojulaashii jia, shia neʼe jiʼreeka amüin kasa pülasü, nnojoleetpejeʼe jiʼrüin shia».
13 Nuʼunaka noulia, noʼotooko nüchikuaʼa suluʼumüin tü anuwakat süpüla nülatajachin waneemüin saʼata tü palaakat.
14 Nnojotsü kasain eejatüin namaʼana na nikirajüinkana Jesús suluʼu tü anuwakat, waneesia neʼe pan eejatka namaʼana, jama motuin naaʼin nalüʼüjain sooʼomüin.
15 Nüchiaakalaka naya Jesús sünain maa: «Eeja jaaʼin, jalia jia suulia soolojia tü pan namaʼanajeejatkat na fariseokana jee tü nümaʼanajeetkat Herodes».
16 Naʼülüjiraaka na nikirajüinkana süka malüʼüjain naya pan.
17 Naapapa Jesús nanüiki, nümaka namüin: «¿Jamüshii jaashajiraaka süchiki malüʼüjain jia pan? ¿Nnojotsükai jiyaawatüin saaʼu tü taküjeekalü achiki jümüin? Ayatüsia neʼe süttüin jikii, nnojotsü kasain jiyaawatüin aaʼu.
18 ‹Koʼushii jia, nnojotpejeʼe kasain jiʼrüin, kacheʼeshii jia, nnojotpejeʼe kasain jaapüin›. ¿Sotoyaasükaijeʼe jaaʼin wanaa sümaa
19 neküin 5.000 tooloyuu süka tü jaʼraisükat neʼe pan? ¿Jeʼrasü kanaasüta akotchojunaka sümaa tü eküülü apütaasükat?». «Poloo piamamüin», namakalaka nümüin.
20 «¿Jama soʼu neküin 4.000 tooloyuu süka akaratshisü pan?, ¿jeʼrasü kanaasüta miyoʼuyuu akotchojunaka aluʼu tü eküülü apütaasükat?». «Akaratshisü», namakalaka nümüin.
21 Nümakalaka Jesús namüin: «¿Jamakaʼa nnojotka jiyaawatüin saaʼu tü taküjeekalü achiki jümüin?».
22 Nantakalaka Betsaidamüin, nüntinnaka nümüin Jesús wanee wayuu moʼupaʼasai, suchuntunaka nümüin Jesús nipettajachin chi wayuukai.
23 Najattakalaka chi moʼupaʼasaikai anooipaʼamüin sünain tü pueulokot, nushuletka nuwaa sünain noʼu chi wayuukai. Niʼitaaka najapü sünain noʼu chi moʼupaʼasaikai jee nümakalaka nümüin: «¿Eesia piʼrüin?».
24 Niirakaaka chi wayuukai sümaa nümüin: «Eesia wayuu teʼrüin, mapajeʼe naya maʼaka saaʼin wunuʼu eekai waraittüin toʼupaʼaluʼu».
25 Niʼitaakalaka Jesús nüchikuaʼa najapü sünain noʼu chi wayuukai, nnojoluitpaka müsatüin noʼuluʼu, koʼukalaka nia.
26 Nüjütaka nia nipialuʼumüin sümaa nümüin nümüin: «Pikerojayaai suluʼumüin tü pueulokot».
27 Nuʼunakalaka Jesús namaa na nikirajüinkana suluʼumüin tü pueulo eejatkat suluʼu tü mmakat Cesarea de Filipo. Shiasaʼa wopuluʼupünaa, nümaka Jesús namüin na nikirajüinkana: «¿Jamüsü sünüiki wayuu tachiki?».
28 Nasoutaka nümüin: «‹Nia Juan chi Awoutisaajüikai›, eeshii na makana. ‹Nia Elías›, eetaashii joo na makana. ‹Nia wanee nünüikimaajachi Maleiwa›, eeshii na makanaya».
29 Nümaka Jesús namüin: «¿Jaraikaʼa maʼin taya jaashin?». Nusoutaka Pedro nümüin: «Pia chi Cristokai».
30 Nüchiaaka na nikirajüinkana suulia naküjaʼalüin süchiki tia sümüin wayuu.
31 Nüküjain Jesús namüin na nikirajüinkana niʼrüinjachin müliaa chi Süchonkai Wayuu* otta letüinjachin nia naaʼin na laülaashiikana, nekiipüʼü na sacerdotekana, na karaloʼutamaajanakana otta nüküjainña namüin nuʼutunajachin aaʼin jee nüsoʼireʼennajachin aaʼin apünüin kaʼi süchikijee tia.
32 Jaʼyasü naaʼu shiimain tü nümakat, amaanapejeʼe nia nutuma Pedro mamüin aka tüsa sünain nüchiaain nia.
33 Nujununtaaka Jesús nuulia Pedro. Niirakaaka namüin na nikirajüinkana jee nüchiaakalaka Pedro sünain maa: «Puʼuna toulia Satanás, nnojotsü jülüjain paaʼin tü jülüjakat naaʼin Maleiwa, shia neʼe jülüjaka paaʼin tü jülüjakat saaʼin wayuu».
34 Nuunejaka Jesús na wayuu wattakana naalii namaʼaleeya na nikirajüinkana jee nümakalaka namüin: «Chi achekakai süchiki tekirajüin nia, nnojotsü naaʼinrüinjatüin tü nüchekakat neʼe nümüiwaʼa. Müinjatü nülüʼüjakai saaʼin tü wunuʼu* akachennakalü anain wayuu sümaa nuushikajaain süchiirua takuwaʼipa.
35 Nieechi outaka chi eekai oʼttaweein, eekajasaʼa chi outakai saaʼujee niʼyataain tamüin jee sünainjee nüküjain tü pütchi anakat maʼin, nieechi kataka oʼu.
36 ¿Kasa saamaka nümüin wanee wayuu tü nuwashirüinkalü outule nia?
37 ¿Kaseerü naapaka wanee wayuu shiiʼiree katüin noʼu?
38 Chi eekai japülin taka noʼupala na wayuu mojulaashii eekana maaʼulu jee japüikai süka tü pütchi tamakat, japüijeechia chi Süchonkai Wayuu nüka nüntapeena namaa na aapiee aneekuushikana sümaa pülasheechin nia maʼaka naaʼin chi Nüshikai».
Noota
^ Pünaʼla tia suluʼu tü kanüliakat «Jamaluʼulu pütchikat».
^ Nuchuntuin Jesús tia pütchikat süpüla nuʼwanaajireʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
