Tü nüshajalakat Marcos 9:1-50
-
Eeʼiranajaasü nukuwaʼipa Jesús (1-13)
-
Ayuʼnnusü wanee yolujaa nüleʼeruʼujee wanee jintüi (14-29)
-
Nnojotsü kasain isain nüchiki chi wayuu eekai kanoulain (23)
-
-
Nüküjain Jesús süchikuaʼa nuʼutunajachin aaʼin (30-32)
-
Aʼülüjiraashii na nikirajüinkana Jesús saaʼujee jaralin nemiyoʼusein (33-37)
-
Chi wayuu nnojoikai weʼipoloin paaʼinwashi wamaa (38-41)
-
Tü kasa amalajeʼerakat sunoula wayuu (42-48)
-
Müinjana jia maʼaka saaʼin sukuwaʼipa ichii (49, 50)
9 Jee müsü nünüiki Jesús: «Shiimain tü tamakat jümüin, juʼutku jiakana yaakana yaa, nnojoleena jia outuin sümaa nnojoluin jiʼrüin palajana nuluwataain Maleiwa suluʼu pülashin nia».
2 Aipirua kaʼi süchikijee tia, oʼunushi Jesús saaʼumüin wanee uuchi miyoʼu eere yüütüülin mmapaʼakat otta nia nümaaka Pedro, Santiago otta müshia Juan. Shiiʼiranajaaka nukuwaʼipa Jesús noʼupala.
3 Jorottoko maʼin tü nüsheʼinkat jee kasuʼuleesia maʼin shia suulialeʼeya kuluulu eekai süshijaaushin yaa mmapaʼa.
4 Niiʼiyalaaka Moisés nümaa Elías noʼupala jee naashajaakalaka nümaa Jesús.
5 Nümakalaka Pedro nümüin Jesús: «Ekirajüikalee, anataʼaleeshiijaʼa maʼin waya süka yaain waya. Anashii wakumajüle apünüinsü miichi jipiayaainjatü, wanee püpüla, wanee nüpüla Moisés otta wanee nüpüla Elías».
6 Eekajasaʼa Pedro nnojotsü nütüjaain aaʼu tü naaʼinrajatkat süka mmoluin maʼin naya.
7 Sukumajaaka wanee siruma sümaa pasanainjaain naya sünain jee saapünaka wanee pütchi saʼakajee tü sirumakat sünain maa: «Anii chi Tachon aishikai tapüla, jaapaa sümaa tü nümakat jümüin».
8 Mayaashii nayalerüin nekii, nnojotsü wayuu neʼrüin, niaʼala neʼe Jesús eejachika nümüiwaʼa.
9 Nashakatapa saaʼujee tü uuchikat, nüchiaain naya Jesús suulia naküjaʼalüin sümüin wayuu süchiki tü kasa neʼrakat, naküjaleeinjatü tia nüsoʼireʼennapa aaʼin süchikijee outaa chi Süchonkai Wayuu.
10 Naapaaka sümaa tü nümakat namüin, ayatapejeʼe naya aashajaajiraain süchiki jamaluʼuluin nüsoʼireʼennajachin aaʼin naʼakajee na outushiikana.
11 Namakalaka na nikirajüinkana nümüin: «¿Jamakaʼa niainjachika antüin Elías palajana naashin na karaloʼutamaajanakana?».
12 Nusoutakalaka Jesús namüin: «Antajachiaʼaya palajana Elías otta pansaainjatü nutuma sukuwaʼipa wanee kasa. ¿Jamakaʼa süshajünaka süchiki müliainjachin chi Süchonkai Wayuu otta mojutuinjachin nia atumawaa?
13 Tamüshii paala jia, antüshiaʼaya Elías, saaʼinrapejeʼe neʼe wayuu tü saaʼinreekat nüka, maʼaka süshajünatüjülüin paala nüchiki».
14 Nantapa naʼakamüin na wane nikirajüinkana Jesús, neʼrakalaka pasanain naya sünain watta saalii wayuu jee naʼülüjiraain waneinnua karaloʼutamaajana namaa.
15 Ponokoloko naaʼin na wayuukana neʼraiwaʼaya Jesús jee nawataaka nüpanapa sünain asakaa nia.
16 Nüsakirakalaka naya Jesús: «¿Kasa jüʼülüjiraaka aaʼujee namaa?».
17 Nusoutaka wanee naʼakajee na wayuu wattakana naalii: «Ekirajüikalee, anii tachon tantirüin pümüin süpüla piyuʼlajatüin wanee yolujaa nüleʼeruʼujee manüika atuma nia.
18 Saapaapa nia tü yolujaakat sujuttirüin nia mmoluʼumüin, kotoloinko chi jintüikai nuwaraluʼupünaa sutuma, nüchechejaain nai otta maʼlainreesai* nia. Tachuntuinyaajeʼe namüin na pikirajüinkana nayuʼluinjatüin tü yolujaakat nüleʼeruʼujee, isapejeʼe nia nachiki».
19 Nümakalaka Jesús namüin: «Manoulakatche maʼin wayuu maaʼulu, ¿yaakuʼu müinjaiche taya namaa naaʼinruʼu? Kakaliairü müin nakuwaʼipa, jüsaaja tamüin chi jintüikai».
20 Nüntinnakalaka chi jintüikai nümüin. Mayaashi niʼnnüin Jesús sutuma tü yolujaakat nuʼuchichajünaka maʼin chi jintüikai sutuma, sujuttitka nia mmoluʼumüin eere walewettaʼalüin nia sutuma sümaa kotoloinshaatain nia naanükülüʼüpünaa.
21 Nüsakinnaka nüshi chi jintüikai nutuma Jesús: «¿Jeʼrairü maʼin nümaa chi jintüikai sünain müin nia?». «Matüjüiya nia sutuma joʼuuiwaʼaya nia», nümakalaka chi nüshikai nümüin.
22 «Ojutuʼuwaishi nia sutuma tü yolujaakat soʼu siki jee shiroku wüin shiiʼiree suʼutajachin naaʼin. Eerejeʼeya süpüla pümüliajüin waya, jaliaʼaya maa waya, pükaalinja waya».
23 Nusoutakalaka Jesús nümüin: «¿Jamüshi ‹eerejeʼeya süpüla pümüliajüin waya› pümaka? Nnojotsü kasain isain nüchiki chi wayuu eekai kanoulain».
24 Nusoutamaataka nüshi chi jintüikai nümüin Jesús: «Kanoulashiyaajeʼe taya, pükaalinjeepejeʼe maʼin taya süpüla kanoulaleein maʼin taya».
25 Niʼrapa Jesús nüpanapünüin natuma na wayuu wattakana naalii, naaʼayajaaka saaʼin tü yolujaakat. Nümakalaka sümüin: «Pia yolujaa manüikat jee macheʼekat, anakajaʼa pujuʼitüle nüleʼeruʼujee chira jintüikai jee nnojoluinjatü pia ekerotuin piantua».
26 Suʼwaatakalaka tü yolujaakat sümaa nuʼuchichajawaain nümüin chi jintüikai sutuma. Jee süchikijee tia, sujuʼitaka nüleʼeruʼujee, makaʼa outakai neʼe naaʼin chi jintüikai. «¡Outushin!», namayaa namaka na wayuukana.
27 Naapaakalaka Jesús najapü chi jintüikai süpüla nütameʼerüin nia, nüshaʼwalaaka chi jintüikai.
28 Nikerotkalaka Jesús suluʼumüin wanee miichi namaa na nikirajüinkana, nüsakinnaka ojuunaa natuma jee namaka nümüin: «¿Jamüsü nnojotka wountuin wayuʼluin tü yolujaakat nüleʼeruʼujee chi jintüikai?».
29 Nusoutakalaka Jesús namüin: «Eekajasaʼa yolujaakat tia ojuʼitüsü müleka nuʼuraajünüle amüin Maleiwa».
30 Noʼunakalaka yalejee yala jee nalatapünaaka suluʼupünaa tü mmakat Galilea, nnojotpejeʼe nücheküin Jesús kanüliainjachin nia sümüin wayuu.
31 Süka nayain niʼiküin na nikirajüinkana, müshi nia namüin: «Eekajasaʼa chi Süchonkai Wayuu aapüneechi ekii sümüin wayuu jee nuʼutuneechika aaʼin, asoʼiraajeetpejeʼe naaʼin apünüin kaʼi süchikijee tia».
32 Nnojotsü nayaawatüin saaʼu jamaluʼuluin nünüiki, mmotka naya seema nasakirüin nia.
33 Nantakalaka Capernaúmmüin jee yalapa naya suluʼu tü miichikat, nüsakitkalaka Jesús na nikirajüinkana: «¿Kasa jüʼülüjiraaka anainjee wopuluʼu?».
34 Yüütaka neʼe naya nuulia süka naʼülüjiraain wopuluʼu saaʼujee jaralin nemiyoʼusein.
35 Nüikalaaka Jesús jee nuunejaaka na Polookana Piamamüin aluwataaushi. Nümakalaka namüin: «Chi eekai jimiyoʼuseein niainjachi jümotsoinka otta aʼyataainjachi nia napüleerua na waneinnua».
36 Neenajaka Jesús wanee jintüi jee nüshaʼwaleʼeraka nia pasanain nanain, niʼitaaka nütüna saaʼu nütünakii chi jintüikai jee nümaka namüin na nikirajüinkana:
37 «Kamaneeshi tamüin wanee wayuu eekai kamaneein namüin na wayuu tajünalakana, na makana aka saaʼin nukuwaʼipa jintüikai chii otta nnojoishi nia kamaneein neʼe tamüin, kamaneeshiaʼaya nia nümüin chi Kajünalakai taya».
38 Nümaka Juan nümüin: «Ekirajüikalee, weʼrüin wanee wayuu ojuʼitirakai yolujaa süleʼeruʼujee wayuu sükajee nuchuntuin pünülia. Nnojoipejeʼe nia wamaajachin, wachiaaka nia suulia naaʼinrüin tia».
39 Anuukalaka nünüiki Jesús namüin: «Nnojo jüchiaain nia suulia tia, nnojoleechi aaʼinrüin kasa pülasü wanee wayuu sükajee nuchuntuin tanülia sümaa mojutaain mapa nünüiki tachiki.
40 Chi wayuu nnojoikai weʼipoloin, paaʼinwashi nia wamaa.
41 Shiimain tü tamakat jümüin, eʼreechi kasa anasü chi wayuu asiʼrakai jia wanee waasü wüin saaʼujee jiain na nikirajüinkana Cristo.
42 Eekajasaʼa chi eekai nümalajeʼerüin nunoula wanee tekirajüin, shia anaka nümüin nujutunule pasanain sünain palaa sümaa shiʼitaanüin nunutpünaa wanee ipa miyoʼu maʼaka saaʼin tü ipa asirujia eʼitaanakat süpüla süʼleeyalüin shia püliikü.
43 »Kaainjarale pia süka pajapü, müinjatü pushottokoi saaʼin. Shia anaka aluʼu katüle poʼu sümaa perain pütüna suulia amülouireeinña* pia sümaa tü piamasükat pütüna.
44 *
45 Kaainjarale pia süka puuʼui müinjatü pushottokoi saaʼin. Shia anaka aluʼu katüle poʼu sümaa perain püsaʼa suulia amülouireeinña pia sümaa tü piamasükat püsaʼa.
46 *
47 Akaataajaʼa kaainjarale pia sutuma piirakaain sümüin wanee kasa, müinjatü pujutakai saaʼin wattamüin tü poʼukot. Shia anaka aluʼu eere pia nuluwataapeena Maleiwa sümaa waneesüin neʼe poʼu suulia amülouireeinña* pia sümaa tü piamasükat poʼu
48 chaa eere matüjain outaa tü jokomakat otta eere matüjain ayokojowaa siki.
49 »Eʼichiijünajatü wayuu süpüshuaʼa süka tü ichii makalü aka saaʼin siki.
50 Anasü maʼin tü ichiikat, akaajasaʼa irale shia, nnojotsü süpüla palaain shia süchikuaʼa. Müinjana jia maʼaka saaʼin sukuwaʼipa ichii, anajiraainjana jia namaa na waneinnua».
Noota
^ Jee shiale «matsüinreesai».
^ «Gehena» maluʼulu tia suluʼu griego. Pünaʼla tia suluʼu tü kanüliakat «Jamaluʼulu pütchikat».
^ Ashajünüsü wetsiikulokot tüü suluʼu waneirua Biblia, nnojotpejeʼe shia eʼitaanüin suluʼu waneirua karaloʼuta sümaiwajatü ashajuushikat suluʼu griego. Pünaʼla tia suluʼu tü kanüliakat «Sooʼomüin pütchi A3».
^ Ashajünüsü wetsiikulokot tüü suluʼu waneirua Biblia, nnojotpejeʼe shia eʼitaanüin suluʼu waneirua karaloʼuta sümaiwajatü ashajuushikat suluʼu griego. Pünaʼla tia suluʼu tü kanüliakat «Sooʼomüin pütchi A3».
^ «Gehena» maluʼulu tia suluʼu griego. Pünaʼla tia suluʼu tü kanüliakat «Jamaluʼulu pütchikat».
