Tü nüshajalakat Mateo 10:1-42
-
Na polookana piamamüin aluwataaushi (1-4)
-
Sukuwaʼipainjatka aküjaa pütchi (5-15)
-
Mülieena atumawaa na nikirajüinkana Jesús (16-25)
-
Mmoluinjana neema Maleiwa, nnojoliinjana mmoluin seema wayuu (26-31)
-
Nnojoleerü anajiraain wayuu nutuma Jesús, nnojoleerü paaʼinwajiraain nutuma (32-39)
-
Na kapülakana aaʼin na nikirajüinkana Jesús (40-42)
10 Nuutkajeʼerüin Jesús na polookana piamamüin nikirajüin jee naapakalaka laülawaa namüin süpüla nayuʼluinjatüin yolujaa süleʼeruʼujee wayuu jee süpüla anainjatüin wayuu natuma suulia ayuulii eekai eein.
2 Anuu nanülia na polookana piamamüin aluwataaushi: chi palajachikai nia Simón, chi Pedro münakai otta müshia Andrés, chi nuwalakai. Eetaaka joo Santiago nümaa Juan, chi nuwalakai. Nayajaʼa na nüchonniikana Zebedeo.
3 Felipe nümaa Bartolomé, Tomás nümaa Mateo, niajaʼa chi achekajüikai nneerü neʼipajee na sülaülakana mma. Eejachi Santiago chi nüchonkai Alfeo otta eejachia Tadeo.
4 Eejachi Simón «chi Yalayalakai aaʼin» otta Judas Iscariote chi aapakai nikii Jesús mapa.
5 Anuu nünüiki Jesús namüin na polookana piamamüin nikirajüin: «Anashii nnojoliire juʼunuin suluʼupünaa tü wopu chaʼwatkat sünainmüin wanee pueulo otta miʼita jia suulia wanee pueulo eekai chain Samaria.
6 Naya juʼunawalinjanakana amaʼanamüin na wayuu yaakana Israel, na makana aka saaʼin anneerü eekai amüloulin.
7 Anuu tü jünüikinjatkat sümüin wayuu: ‹Alüʼütsü nükalia Maleiwa süpüla aluwatawaa chejee iipünaajee›.
8 Jaawaleʼera chira eekai ayuulin, jusoʼireʼera naaʼin chira eekai outuin, jaawaleʼera chira eekai ayuulin sutuma ‹lepra›, jiyuʼla yolujaa nüleʼeruʼujee chira eekai yolujaashin. Nnojoishii achekajüinjanain jia saaʼu tia maʼaka nnojoluin süchekajünüin jümüin paala.
9 Nnojo jülüʼüjain ooro, pülaata otta cobre suluʼu tü woʼot jüseʼeruʼupünaakat.
10 Nnojo kachisepalain jia süka jikinneenain chaa eeʼewaliire jia, nnojo jülüʼüjain suwalaʼata* jüsheʼin, nnojo jülüʼüjain suwalaʼata jukoʼusüin otta nnojo jülüʼüjain piamasü waraarat.
11 »Jüntapa suluʼumüin wanee pueulo miyoʼu jee shiale wanee pueulo joʼuuchon, jüchajaainjachi chi wayuu aapaajeechikai sümaa tü pütchikat, yalainnaʼaya jia nümaʼana waneʼereeya juʼunapa suluʼujee tü pueulokot.
12 Jüntapa suluʼumüin wanee miichi, jüsaküinjana na nepiajanakana.
13 Kamaneere jümüin na wayuu nepiajanakana, aneerü nakuwaʼipa,* eekajaʼa mamaneere naya jümüin, mojeerü nakuwaʼipa.
14 Mamaneere na wayuu jüntakana epialuʼumüin jee nayale na wayuu suluʼukana wanee pueulo jee nnojorüle naapaain sümaa tü pütchi jüküjakat, joʼotojoojeerü juuʼui juʼunapa namaʼanajee.
15 Shiimain tü tamakat jümüin, soʼu tü Kaʼi Kasalajaneetkalü oʼu Saainjala Wayuu nutuma Maleiwa, alanaʼaleejeeria tü müliaa neʼreetkat naya wayuukana suulia tü müliaa neʼrakat na wayuu chajanakana suluʼu tü mmakat Sodoma sümaa Gomorra.
16 »Anaa jooluʼu tajütüin jia maʼaka saaʼin anneerü saʼakamüin erü simoluuna. Eejüinjatpejeʼe jaaʼin maʼaka eejüin saaʼin wanee wüi otta anamiainjana jia maʼaka saaʼin toomasü.
17 Jalia jia saaʼin wayuu süka sümaweenain jia laülaapialuʼumüin otta shiʼyaajeena jia suluʼu tü ekirajüleekat nüchiki Maleiwa.
18 Saaʼujee junoujain tanain, amaaneena jia namaʼanamüin na aluwataashiikana jee namaʼanamüin na sülaülashiikana mma. Naapeetkalaka tachiki suluʼujee tia otta saapeerü wayuu tachiki.
19 Jiʼikajaanapeena namaʼanamüin, nnojo shapaain jaaʼin saaʼu tü jünüikinjatkat jee jamüinjatüin sukuwaʼipa jutuma. Aküjüneerü jümüin tü jünüikinjatkat soʼu kaʼikat tia.
20 Nnojoliipejeʼe jieenain neʼe aashajaain, nüküjeerü jümüin Maleiwa tü jünüikinjatkat.
21 Eejeechi wayuu aapakai nikii nuwala süpüla nuʼutunajachin aaʼin, chi wayuu eekai kachooin naapeechi ekii nüchon süpüla nuʼutunuinjachin aaʼin otta eejeena wayuu aapakana nikii nashi sümaa nei süpüla oʼutunaa aaʼin.
22 Süʼürüleena jia wayuu saaʼujee tekirajanain jia, chi wayuu achechetkai naaʼin nieechi oʼttaaka sajaʼttapa tü kasa alatakat sainküin mma.*
23 Müliale jaaʼin atumawaa suluʼu wanee pueulo, juʼuna suluʼumüin waneʼeya. Antajachi chi Süchonkai Wayuu nnojoliiwaʼaya juʼunuin suluʼupünaa süpüshuaʼa tü pueulo yaakat Israel.
24 »Chi wayuu ekirajünakai nnojoishi alanaain nuulia chi wayuu ekirajakai nia. Akaʼaya chi achepchieekai nnojoishi alanaain nuulia chi nülaamainkai.
25 Kapüleesü nümüin chi wayuu ekirajünakai müinjatüin nukuwaʼipa maʼaka naaʼin chi ekirajüshikai nia. Akaataajaʼa chi achepchieekai, kapüleesü nümüin müinjatüin nukuwaʼipa maʼaka naaʼin chi nülaamainkai. ‹Belcebú›,* nümünülejeʼe chi wayuu laülaashikai saaʼu nipia, ‹Belcebú›, müneenajaʼa na wayuu yalajanakana nipialuʼu.
26 Nnojo mmoluin jia, süka jamüin suunjunnüle wanee kasa antüneerü anain. Akaataajaʼa suunjulajünüle achiki wanee kasa, atüjaaneerü aaʼu mapa sutuma wayuu.
27 Tü taküjakat jümüin jümüiwaʼa jüküja shia sümüin wayuu süpüshuaʼa. Tü taküjakat jümüin sümaa jiattain tanüiki, jüküja shia saaʼujee tü miichikat saapaiwa shia wayuu.
28 Nnojo mmoluin jia neema na eekana süpüla oʼutuin jaaʼin, nnojoliipejeʼe müinnamaʼaleein jia natuma. Nia mmoluinjachika eema jia Maleiwa süka eein süpüla nuʼutuin jaaʼin sümaa müinnamaʼaleein jia.*
29 ¿Aashin suikünüin piamasü wüchiichein saaʼu piamasü nneerü kachueerachein neʼe? Nütüjaapejeʼe saaʼu chi kakumainkai shia sujutuule mmoluʼumüin.*
30 Jialeekajaʼa jiakana, yaawasü süpüshuaʼa tü juʼwalakat nutuma chi Jüshikai.
31 Nnojo mmoluin jia, alanaʼaleesia maʼin jaalin nüpüla suulialeʼeya tü wüchiicheinkat.
32 »Chi eekai nüküjain suʼupala wayuu tekirajanain nia, taküjeeriaʼaya nuʼupala chi Tashi iipünaajachikai niain wanee tekirajüin.
33 Chi eekai japülin taka, japüijeechi taya nüka nuʼupala chi Tashi iipünaajachikai.
34 Nnojoishi antüshin taya süpüla anajiraainjatüin wayuu tatuma, antüshi taya süpüla nnojoluinjanain paaʼinwajiraain naya.
35 Antüshi taya süpüla mojujiraainjatüin tatuma wayuu. Peʼipaajeechikalaka wanee wayuu nümaa nüshi. Akaataajaʼa wanee wayuu, peʼipaajeerü sümaa shii otta sümaa saʼüt.
36 Aʼürülaaneechi anain wanee wayuu natuma na wayuu kepiajiraakana nümaa.
37 Chi wayuu aireekai apüla nüshi sümaa nii toulialeʼeya tayakai, nnojoishijaʼamata anain süpüla tekirajüin nia. Akaataajaʼa chi wayuu aireekai apüla nüchonnii toulialeʼeya nnojoishijaʼamata anain süpüla tekirajüin nia.
38 Chi wayuu ayoutakai süchiki nülüʼüjain tü wunuʼu* akachennakalü anain wayuu, nnojoishijaʼamata anain süpüla tekirajüin nia.
39 Chi wayuu achajaakai sukuwaʼipa süpüla katüinjatüin noʼu, outeechi nia, akaajasaʼa chi outakai saaʼujee tekirajüin nia, kateerü noʼu nüchikuaʼa.
40 »Chi kapülakai aaʼin jia kapüleechi taya naaʼin otta chi wayuu kapülakai aaʼin taya, kapülashiaʼaya naaʼin chi Kajünalakai taya.
41 Chi kapülakai aaʼin wanee nünüikimaajachi Maleiwa, eʼreechi kasa anasü maʼaka niʼrüin kasa anasü chi nünüikimaajachikai Maleiwa. Chi kapülakai aaʼin wanee wayuu lotokoi akuwaʼipa, eʼreechi kasa anasü maʼaka niʼrüin kasa anasü chi wayuu lotokoi akuwaʼipa.
42 Shiimain tü tamakat jümüin, chi wayuu eekai nüsiʼrüin wüin noʼutku na tekirajüinkana, jaʼitashi mapülain chi tekirajüinkai, eʼreechi nia kasa anasü sünainjee tia».
Noota
^ «Piamasü» maluʼulu tia suluʼu griego.
^ «Kasataalejeseʼe jimatüin paaʼin», mapuʼusü nanüiki na judíokana nasakapa wayuu.
^ «Sajaʼttaleepa» maluʼulu tia suluʼu griego. Eesü shiale saashajaain achiki outaleepaʼaya wanee wayuu.
^ Jee niale «Beelzebub». Münüshi Satanás chi sülaülakai yolujaa.
^ «Gehena» maluʼulu tia suluʼu griego. Pünaʼla tia suluʼu tü kanüliakat «Jamaluʼulu pütchikat».
^ «Suʼttule mmoluʼumüin» eesüjaʼa sümünüle.
^ Shia tü akachennapuʼukalü anain wanee wayuu süpüla outajachin nia. Nuchuntuin Jesús tia pütchikat süpüla niyaawajeʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
