Tü nüshajalakat Mateo 11:1-30
11 Kettaapa nünüiki Jesús namüin na polookana piamamüin nikirajüin, oʼunushi nia yalejee süpüla ekirajaa otta aküjaa pütchi suluʼupünaa waneirua pueulo.
2 Soʼu chajachin püreesain Juan chi Awoutisaajüikai naapa achikit tü kasa naaʼinrakat Cristo, nuluwataakalaka na nikirajüinkana nümaʼanamüin
3 süpüla nasakirajachin nia: «¿Piaʼaya chi antajachikai anülia? ¿Iseeyüittaapa wane?».
4 Nümaka Jesús namüin: «Anashii juʼunule süpüla jüküjain nümüin Juan süchiki tü kasa jiʼrakat jee tü jaapakalü achiki:
5 koʼupaʼashii na eekai moʼupaʼain, awarairaashii na eekai masaʼain, ashatüsü nata na eekai ajaʼttüin nata sutuma ‹lepra›, kacheʼeshii na eekai macheʼein, asoʼiraasü naaʼin na eekai outuin otta aküjünüsü süchiki tü pütchi anakat namüin na wayuu maʼletsekana.
6 Anakuwaʼipaitaʼaleejaʼa maʼin chi wayuu eʼitaakai naaʼin tanain sümaa nnojolin wainmajüin naaʼin».*
7 Noʼunapa na nikirajüinkana Juan, naashajaaka Jesús namaa na wayuu wattakana naalii süchiki nukuwaʼipa Juan, nümaka namüin: «¿Kasa jünaʼalaaka amüin chaa isashiipaʼa? ¿Shia jünaʼalaaka amüin wanee türiia liantaka sutuma joutai?
8 ¿Kasakaʼa jünaʼalaain amüin? ¿Niache jünaʼalaaka amüin wanee wayuu anakai maʼin asheʼin? Chapejeʼe na wayuu anapüijakana asheʼin nepialuʼu na aluwataashiikana.
9 ¿Kasakaʼa jünaʼalaain amüin? ¿Niache jünaʼalaaka amüin wanee nünüikimaajachi Maleiwa? Tamüshii paala jia, alanaʼaleesia maʼin nukuwaʼipa Juan nuulia wanee nünüikimaajachi Maleiwa.
10 Aashin niayaain chi münakai achiki: ‹Tajüteechi püpüleerua chi anülieemaajachikai. Meerü neerutkai saaʼin wopu püpüleerua süpüla pülatajachin suluʼupünaa puʼunajaapa›.
11 Shiimain tü tamakat jümüin, nnojoishi eeichin wanee wayuu eekai nülanaʼaleeinña nuulia Juan chi Awoutisaajüikai. Eekajasaʼa nuluwataapeena Maleiwa chejee iipünaajee, nieechi kapülainreeka nuulia Juan chi wayuu eekai mapülain chaa nümaʼana Maleiwa.
12 Soʼujeʼereeya nükalia Juan shia maʼin saaʼinmaaka wayuu nuluwataainjachin Maleiwa chejee iipünaajee. Nayasaʼa na aʼyataakana maʼin süchiirua tia nayeena eʼraka tü kasa anasü eejeetkat nuluwataapeena Maleiwa chejee iipünaajee.
13 Nnojoliiwaʼaya niweetüin Juan naküjatüjülia na Nünüikimaajanakana Maleiwa tü kasa alatajatkat otta aküjünüsü tia suluʼu tü Pütchi Aapünakat nümüin Moisés.
14 Niaʼaya Juan chi Elías antajachikai anülia, jaʼitasü müin alawaayaakai saaʼin jümüin.
15 Eekai kacheʼejüin sümüin tü pütchikat naapaainjatü amaa.
16 »¿Kasa maka aka saaʼin nakuwaʼipa na wayuukana maaʼulu? Müshii naya maʼaka naaʼin na tepichi joyotokana metkaaraluʼu, aʼwoolojokana namüin na tepichi nashaitiraakana amaa sünain namüin namüin:
17 ‹Waʼyalajirüin jümüin tü kanüliakat «flauta», nnojoliipejeʼe jia ayonnojuin. Aʼyalajüshii waya jümüin weeʼirainruʼu, nnojoliipejeʼe jia mojuin aaʼin›.*
18 Jamüshijaʼa Juan nnojotsü kasain niküin jee nnojotsü kasain nüsüin, ‹wayuu yolujaashi neʼe chira›, mapejeʼe jia nümüin.
19 Niasaʼa chi Süchonkai Wayuu,* eküshi nia, asüshi nia, anuupejeʼe jünüiki nüchiki: ‹Wayuu kasa aleʼechi neʼe chira makai. Asüi wiino otta aleewashi nia namaa na achekajüliikana nneerü neʼipajee na sülaülakana mma jee aleewashi nia namaa na kaainjaraliikana›. Ayaawatüneetpejeʼe saaʼu kekiin maʼin wanee wayuu sünainjee tü kasa naaʼinrakat».
20 Nüchiajaaka na wayuu sulujunakana tü pueulokot eere naaʼinrüin maʼin kasa pülasü, jama nnojoliin nayaawajaain suulia naainjala. Müshi nia namüin:
21 «Aluʼuwatshii jia chakana Corazín jümaʼaleeya jiakana chakana Betsaida. Saainjünüle chaa Tiro otta chaa Sidón tü kasa pülasü jiʼrakat, ayaawajaashiije naya wayuukana suulia naainjala, naʼatüinjeʼe nanain tü kuluulu shiyaawasekat mojuu aaʼin jee joyotushiije naya saʼaka paliʼi.
22 Shiimain tü tamakat jümüin, soʼu tü Kaʼi Kasalajaneetkalü oʼu Saainjala Wayuu nutuma Maleiwa, alanaʼaleejeeria maʼin tü müliaa jiʼreetkat suulialeʼeya tü müliaa neʼreetkat na wayuu chakana Tiro otta Sidón.
23 Otta jia wayuu chakana Capernaúm, ¿amaanüinjanayaa jia jaaʼinruʼu chaa iipünaamüin?, chainjanasaʼa neʼe jia Amuuyuupaʼamüin.* Saainjünüle chayaa Sodoma tü kasa pülasü jiʼrakat, anuuyüleje maaʼutpünaa tia pueulokot.
24 Shiimain tü tamakat jümüin, soʼu tü Kaʼi Kasalajaneetkalü oʼu Saainjala Wayuu nutuma Maleiwa, alanaʼaleejeeria maʼin tü müliaa jiʼreetkat suulialeʼeya tü müliaa neʼreetkat na wayuu chakana Sodoma».
25 Anuu nünüiki Jesús soʼu tia: «Tashikalee, pia Laülaashikai chaa iipünaa jee saaʼu tü mmakat, taʼwaajüin pia suʼupala wayuu süka nnojoluin püküjain süchiki tüü namüin na atüjashiikana jee namüin na kekiishiikana. Püküjapejeʼe shia namüin na tekirajüinkana.
26 Tashikalee, müsiaʼaya sukuwaʼipa putuma süka pücheküin suluʼu müinjatüin shia».
27 Jee müshi nia: «Niʼitaain tajapuluʼu chi Tashikai süpüshuaʼa tü kasakalüirua. Nnojoishi jaralin eʼraajüin maʼin taya niaʼala neʼe chi Tashikai otta nnojoishi jaralin eʼraajüin maʼin chi Tashikai, tayaʼala neʼe eʼraajaka nia otta tekirajüle wanee wayuu, nieechi eʼraajaka chi Tashikai.
28 Jürütkaa tanainmüin, jüpüshuaʼa jiakana aʼyataakana maʼin otta müliakana aaʼin sutuma tü achuntunakat jümüin. Jamaameerü jaaʼin tatuma.
29 Anashii tekirajüle* jia jee jütüjeenaka tanainjee. Jama wayuuin anamia taya jee nnojotsü yaletüin taaʼin. Jamaameerü jaaʼin tatuma.
30 Nnojoleerü kapüleein jümüin jiʼyataain tamaa otta juunteerü tü taluwataakalü anain jia».
Noota
^ «Ashanaashi» maluʼulu tia suluʼu griego.
^ Jee shiale «jüsheʼejüin juʼluuwain sutuma alin jümüin tü alatakat jümüin».
^ Pünaʼla tia suluʼu tü kanüliakat «Jamaluʼulu pütchikat».
^ «Hades» eesü sümünüle. Shia eere na outushiikana. Pünaʼla tia suluʼu tü kanüliakat «Jamaluʼulu pütchikat».
^ «Jülüʼüjiraa tamaa tü wunuʼu tanutpunaakat» maluʼulu tia suluʼu griego. Tü wunuʼu münakat yaa eesüjaʼa shiale wanee wunuʼu jee shiale wanee kachueera eʼitaanapuʼukat nunuloʼu wanee wayuu jee shiale sunuloʼu wanee mürüt süpüla sülüʼüjain wanee kasa.
