Tü nüshajalakat Mateo 19:1-30
19 Nuʼunaka Jesús Galileamüin süchikijee nikirajüin, nüntaka suluʼumüin tü mmakat Judea, waneemüin saʼata tü süchikat Jordán.
2 Wattakalaka maʼin saalii wayuu oushikajaaka nüchiirua Jesús, anakalaka nutuma tü eekai ayuulin.
3 Narütkaaka waneinnua fariseo nünainmüin Jesús sünain nasakirayaain nia: «¿Nuuʼulaainjatche nuʼwayuuse wanee wayuu sünainjee kasa eekai eein neʼe?», namaka nümüin.
4 Nusoutaka namüin: «¿Nnojotsüjasaʼa jaashajeʼerüin süchiki nukumajüin Maleiwa paala wanee wayuu toolo otta wanee wayuu jierü?
5 Mataasü makai nünüiki mayaa: ‹Ojuʼiteechi wanee wayuu nümaʼanajee nüshi jee sümaʼanajee nii süpüla saʼaniraain nukuwaʼipa sümaa nuʼwayuuse, nnojoleenaka naya katataawain›.
6 Nnojoliinnapaka piamain naya, waneesüitpa nakuwaʼipa. Na wayuu aʼaniraakana akuwaʼipa nutuma Maleiwa nnojoliinjana ooʼulaajiraain sutuma wayuu».
7 Anuujeseʼe nanüiki nümüin: «¿Jamakaʼa nümaka Moisés naapüinjachin wanee wayuu sümüin nuʼwayuuse wanee karaloʼuta süpüla suʼunajatüin nuulia nuuʼulaweere shia?».
8 Nusoutaka Jesús namüin: «Nuuʼulaain Moisés nuuʼulaainjachin wanee wayuu suulia nuʼwayuuse süka wayuuin iche aaʼinchii jia. Nnojotpejeʼe majatüin sukuwaʼipa tia nukumajaiwaʼaya Maleiwa chi palajachikai wayuu toolo otta tü palajatkat jiet.
9 Anuupejeʼe tanüiki jümüin: ‹Chi wayuu ooʼulaakai suulia nuʼwayuuse sümaa nnojoluin suʼluwajiraasüin sukuwaʼipa* nümaa wane wayuu naata nuulia otta kasaarüle nia sümaa wane wayuu yalejee, kaainjaleechi* nia›».
10 «Müinjatülejeʼe nukuwaʼipa wanee wayuu sümaa nuʼwayuuse, shia anaʼleekajaʼa maʼwayuusere nia», namaka na nikirajüinkana nümüin.
11 Anuujeseʼe nünüiki Jesús namüin: «Nnojotsü suuntuin saaʼinrüin wayuu süpüshuaʼa tü münüitpakat, nayaʼala neʼe na naapakana amüin Maleiwa tia makat.
12 Eeshii na maʼwayuusekana süka joʼuujiraain naya sümaa wanee ayuulii, nnaʼaya joo na maʼwayuusekana sutuma nakapajuushin, eepejeʼe na maʼwayuusekana sutuma naʼyataweein nümüin Maleiwa, jama nuluwataajeechin Maleiwa chejee iipünaajee. Chi ountakai maʼwayuusein, eeshijaʼa süpüla nümüiwaʼain nia».
13 Nantinnaka na tepichikana nümaʼanamüin Jesús süpüla anainjatüin nakuwaʼipa nutuma jee nuʼuraajüin naaʼu. Nachiaapejeʼe na nikirajüinkana Jesús na wayuu kachooinkana naya tepichikana.
14 Nümaka Jesús namüin na nikirajüinkana: «Juuʼulaa narütkaai tanainmüin nala tepichikana, ¿jamajanakai naya jümüin? Na wayuu makana akuwaʼipa maʼaka nakuwaʼipa nala tepichikana, nayeena eʼraka tü kasa anasü eejeetkat nuluwataapeena Maleiwa chejee iipünaajee».
15 Nuchuntaka naaʼu na tepichikana süpüla anainjatüin nakuwaʼipa jee nuʼunaka süchikijee tia.
16 Nürütkaakalaka wanee wayuu nünainmüin Jesús sümaa nümüin nümüin: «Ekirajüikalee, ¿jeʼtsüchejeʼe maʼin tü kasa anasü taaʼinrajatkat süpüla katüinjatüin toʼu süpüla kaʼikat süpüshuaʼa?».
17 Nusoutaka Jesús nümüin: «¿Jamüshi tayakaʼa püsakirüin sünain jeʼtsüin tü kasa anasü paaʼinrajatkat? Waneeshiaʼala neʼe chi anakai akuwaʼipa, kateerejeʼe poʼu jaa müinjachijaʼa pia sümüin tü pütchi nuluwataakalü anain Maleiwa».
18 «¿Jeʼtsükat?», nümaka chi wayuukai nümüin. Anuujeseʼe nünüiki Jesús nümüin: «Nnojo puʼutuin saaʼin wayuu, nnojo kawalaʼatain putuma puʼwayuuse, nnojo puʼluwajüin, nnojo püküjain alawaa,
19 kojutuinjachi pümüin püshi sümaa pii, alinjatü püpüla wayuu maʼaka alin pia püpülajiraa».
20 «Aa, kakaliairü taainjain tia, ¿eetaaka wane sooʼomüin?», nümaka chi jimaʼaikai nümüin.
21 Nümaka Jesús nümüin: «Paainjeerejeʼe süpüshuaʼaleʼeya tia, puika süpüshuaʼa tü kasa pümaʼanakat, paapeetkalaka tü nneetkat namüin na wayuu maʼletsesaliikana, meechika pünaajaakai aaʼin kasa kojutusü chaa iipünaa. Püleʼejeechika püchikuaʼa süpüla tamaatalain pia».
22 Naapaiwaʼaya tia chi jimaʼaikai mojusü maʼin naaʼin, jama washirüin maʼin nia.
23 Nümakalaka Jesús namüin na nikirajüinkana: «Kapüleejeerü maʼin nümüin wanee wayuu washirü niʼrüin tü kasa anasü eejeetkat nuluwataapeena Maleiwa chejee iipünaajee.
24 Anuu sooʼomüin tanüiki, mapüleejeerü sümüin wanee kameeya sülatüin suluʼupünaa soʼu wanee wutia suulialeʼeya niʼrüin wanee wayuu washirü tü kasa anasü eejeetkat nuluwataapeena Maleiwa».
25 Süpatanajaaka naaʼin na nikirajüinkana naapaiwaʼaya tia nümakat Jesús jee namaka nümüin: «¿Jaraikaʼa oʼtteʼenneechin?».
26 Niirakaaka Jesús namüin sümaa nümüin namüin: «Isasü süchiki wayuu tia, nnojotpejeʼe kasain isain nüchiki Maleiwa».
27 Nümaka Pedro nümüin: «Wapütüin süpüshuaʼa tü kasa eekat wamaʼana süpüla pümaatalain waya, ¿kasakaʼa aapüneerüin wamüin?».
28 Nusoutaka Jesús namüin: «Jeketeerü süchikuaʼa kasa süpüshuaʼa nutuma Maleiwa otta nüikalaapa chi Süchonkai Wayuu sünain aluwatawaa saaʼu tü niinase anakat maʼin, jiakana oushikajaakana süchiirua takuwaʼipa, aikalaajeena jia saaʼu tü poloosükat piamamüin einasee, süsaleetkalaka jutuma tü poloosükat piamamüin eʼirukuu yaakat Israel.
29 Chi eekai nüpütüin nipia, nuwala, nushunuu, nüshi, nii, nüchonnii otta nuumain saaʼujee tekirajanain nia, alanaʼaleejeeria maʼin tü kasa aapüneetkat nümüin maʼaka saaʼin polootua shikii otta kateerü noʼu süpüla kaʼikat süpüshuaʼa.
30 »Chi eekai palajanain, chiiruaajeechi atumawaa, niasaʼa chi eekai chiiruaain palajaneechi atumawaa.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
