Tü nüshajalakat Mateo 2:1-23
2 Süchikijee chajachin joʼuuin Jesús Belén, tü chakat Judea soʼu nükalia Herodes chi aluwataashikai, antapaashii chaa Jerusalénmüin waneinnua wayuu ooʼulakülii süka sukuwaʼipa jolotsü. Wüinpüjeʼewalii naya
2 jee nasakitkalaka: «¿Jalashi joʼuuin chi aluwataainjachikai naaʼu na judíokana? Antüshii waya süpüla weeʼiyatüin nujutu nümüin, jama shiiʼiyalaain weʼrüin wanee jolotsü chaiwaʼaya waya wüinpümüin».
3 Niasaʼa Herodes, chi aluwataashikai, namaʼaleeya napüshuaʼa na chajanakana Jerusalén ainkuusü maʼin naaʼin sutuma tia pütchikat.
4 Neenajiraka chi aluwataashikai napüshuaʼa na nekiipüʼükana na sacerdotekana namaa na karaloʼutamaajanakana. Nüsakitkalaka naya süchiki jalainjachin joʼuuin Cristo.
5 Namakalaka nümüin: «Chainjachi joʼuuin Belén, tü chakat Judea, anuʼusa tü ashajünakat nüchiki nutuma chi nünüikimaajachikai Maleiwa:
6 ‹Otta müsia piakat Belén, tü mma chakat Judá, nnojotsü mojutuinjatüin pia namüin na aluwataashiikana saaʼu Judá, süka eejeechin wanee aluwataashi joʼuuinjachikai chaa Belén, oʼunirajachikai nakuwaʼipa na tapüshikana, na israelitakana›».
7 Neenajitkalaka Herodes ojuunaa na wayuu ooʼulaküliikana süka sukuwaʼipa jolotsü jee nüsakitkalaka naya joujatüin maʼin shiiʼiyalaain tü jolotsükat.
8 Nüjütakalaka naya chaa Belénmüin sümaa nümüin namüin: «Juʼuna jümaala jüchajaaiwa nüchiki jintüikai sainküinpünaa tia. Jüntapa nünain, aleʼejeena jia jüchikuaʼa, jüküjeetka shia tamüin süpüla teeʼiyatüinjatüin nujutu nümüin».
9 Noʼunakalaka süchikijee naapajüin nünüiki chi aluwataashikai. Shiasaʼa tü jolotsü neʼrakat paala chaiwaʼaya naya wüinpümüin, unatüsü napüleerua. Jimaʼlaʼa sümaka iipünaa saaʼu tü miichi eejachire chi jintüikai.
10 Talataka naya neʼrapa tü jolotsükat.
11 Nekerotapa suluʼumüin tü miichikat, neʼrüin chi jintüichonkai sümaa María, tü niikat. Nasapainkaka naya nümülatuʼu süpüla neeʼiyatüin nujutu nümüin. Nasülajakaʼa nümüin ooro, «olíbano»* otta «mirra».*
12 Naapinnakaʼa naʼlapüinruʼu nutuma Maleiwa süpüla nnojoliinjanain naleʼejüin nümaʼanapünaa Herodes. Naleʼejakalaka noumainpaʼamüin suluʼupünaa wane wopu naatajatü.
13 Süchikijee noʼunuin, niʼrüin José nüʼlapüinruʼu chi aapiee nümaʼanajeejachikai Jehová,* nümakalaka chi aapieekai nümüin: «Pütamaa, pümaa chi jintüikai sümaa tü niikat chaa Egiptomüin. Waneʼereeya püleʼejüin taapiraleepaʼaya pia püchikuaʼa. Achajaaneechi achiki jintüikai nutuma Herodes süpüla nuʼutunajachin aaʼin».
14 Oʼunaʼaleejaʼa nümüin José soʼu aikat tia chaa Egiptomüin nümaa chi jintüikai sümaa María.
15 Chajanaka naya kepiain nünaajaʼaleepa Herodes. Ekeraajüsüjeseʼe tü nümakat Jehová* nükajee chi nünüikimaajachikai wanaa sümaa nümüin mayaa: «Teenajirüin chi tachonkai chaa Egiptojee».
16 Naashichijaakalaka Herodes sutuma naʼalainpalain nia na wayuu ooʼulaküliikana süka sukuwaʼipa jolotsü. Sotoka naaʼin tü namakat nümüin süchiki joujainjachin joʼuuin chi jintüikai. Nuʼutirakalaka naaʼin napüshuaʼa na tepichichein eekai nnojoluin sülatüin suulia piamain juya nouyase, na chajanakana kepiain suluʼu tü pueulokot Belén jee pejepünaa sünain.
17 Suluʼujee tia, shikeraajaka tü nümakat chi Maleiwakai paala nükajee Jeremías, chi nünüikimaajachikai Maleiwa:
18 «Saapünakalaka shiiʼira wanee wayuu sünain shiʼyalajüin maʼin chaa suluʼu tü pueulokot Ramá. Shia aʼyalajaka maʼin Raquel naalinjee na süchonniikana. Shiyouta achikit sümüliannüin aaʼin, jama nnojoliinnapain naya».
19 Shiasaʼa nünaajaapa Herodes, niiʼiyalaakalaka wanee aapiee nümaʼanajeejachi Jehová* nüʼlapüinruʼu José chaiwaʼaya nia Egipto.
20 Nümakalaka nümüin: «Pütamaa, puʼuna suluʼumüin tü mmakat Israel, pümaa chi jintüikai sümaa tü niikat süka outuinnapain na wayuu oʼuteepuʼukana naaʼin chi jintüikai».
21 Nüleʼejaakalaka nüchikuaʼa suluʼumüin tü mmakat Israel nümaa chi jintüikai sümaʼaleeya María.
22 Mmotkalaka José seema ekeroloo suluʼumüin tü mmakat Judea süka naapüin nüchiki niain aluwataain Arquelao nüchikumüin Herodes, chi nüshikai. Jee aapinnüshi nia paala nüʼlapüinruʼu nutuma Maleiwa, chakuaikalaka nia suluʼumüin tü mmakat Galilea.
23 Chajachika nia kepiain suluʼu wanee pueulo kanüliasü Nazaret. Suluʼujee tia, shikeraajakalaka tü nümakat Maleiwa nakajee na nünüikimaajanakana tü makat mayaa: «Nazaretjeʼewai müneechi nia».
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
