Tü nüshajalakat Mateo 22:1-46
22 Kayaawaseka nutuma Jesús süchikuaʼa tü nikirajakalü anain. Nümakalaka namüin nekiipüʼü na sacerdotekana otta na fariseokana:
2 «Aluwataajeechi Maleiwa chejee iipünaajee. Tia müsü aka nukuwaʼipa wanee aluwataashi aainjirakai wanee miʼiraa shikiira kaʼwayuuseinjachin nüchon.
3 Nüjütaka na nüchepchiakana süpüla nounejaainjanain na wayuu eʼrajüinjanakana sukua tü miʼiraakat, ayoutapejeʼe naya oʼunaa.
4 Nüjütaka chi aluwataashikai waneinnua nüchepchia sümaa müin nünüiki namüin: ‹Müinjatü jünüiki namüin na wayuu tounejaakana: «Keraaitpa tü eküülü ekaanajatkat. Toʼutirüitpa aaʼin tü paaʼa toolo eejatkalüirua tamaʼana sümaʼaleeya tü mürüt akaüsajünakat paala. Anashii jüntüle sünain eʼrajaa sukua tü miʼiraakat, yapaitpa kasa süpüshuaʼa tatuma»›.
5 Nnojotpejeʼe kasajatüin namüin tü münakat namüin. Eeshii na oʼunakana suluʼumüin neʼe nayüüjase otta eeshii na oʼunakana neʼe sünain ayaʼlajaa jee oikawaa wanee kasa.
6 Nayasaʼa na waneinnua nataʼülaka na achepchieekana, müliaka maʼin naya natuma sümaa noʼutuin naaʼin.
7 »Naashichijaakalaka chi aluwataashikai. Nuluwataakalaka surulaat süpüla noʼunaʼalüin naaʼin na uwomuyuushiikana jee naʼajirakalaka tü napueulosekat.
8 Nümakalaka chi aluwataashikai namüin na nüchepchiakana: ‹Kettaaitpa tü ekaanajatkat soʼu tü miʼiraa shikiirakat kaʼwayuusee, nnojoliipejeʼe anain süpüla antaa na wayuu tounejaakana paala.
9 Anakajaʼa juʼunule suluʼupünaa süpüna tü pueulokot jee juunejaa wayuu eekai jüntiraain amaa süpüla nanajüin sukua tü miʼiraakat›.
10 Noʼunakalaka na achepchieekana suluʼupünaa tü wopukot jee nounejaaka napüshuaʼa na wayuu nantiraakana amaa, wayuu eekai anamiain jee eekai mojulaain. Wainmakalaka wayuu suluʼu tü miichi eeinjatüle saainjünüin tü miʼiraakat.
11 »Nüntaka chi aluwataashikai süpüla niʼrüinjanain na wayuu ounejaanakana. Niirakaaka nümüin wanee wayuu nnojoikai kanain tü nüsheʼinjatkat wanee wayuu anajakai sukua kasaalüü.
12 Nümakalaka chi aluwataashikai nümüin: ‹Waʼle, ¿jalasükai tü püsheʼin pünainjatiaakat süpüla piʼrajüin sukua kasaalüü?›, koʼutakalaka neʼe chi wayuukai nuulia.
13 Anuujeseʼe nünüiki chi aluwataashikai namüin na nüchepchiakana: ‹Jükaülaja nuuʼui sümaa najapü, jujuteechika nia anooipaʼamüin saʼaka piʼyuushi, eere niʼyalajeechin sümaa kepisaneerüin tü naikat›.
14 »Wattayaaje naalii na wayuu ounejaanakana, palitpejeʼe neʼe na aneekünakana».
15 Nayasaʼa na fariseokana naashajaajiraaka nikiira Jesús süpüla süsalainjachin nia natuma saaʼujee wanee pütchi eekai nujuʼitirüin.
16 Naluwataaka waneinnua wayuu nekirajala namaʼaleeya waneinnua nümaajana Herodes süpüla müinjatüin nanüiki nümüin Jesús: «Ekirajüikalee, watüjaa aaʼuchi matüjain pia aküjaa alawaa, shia pikirajaka anain tü nümakat Maleiwa suluʼu shiainjaʼa shiimain otta nnojotsü shiain püchajaain achiki talatüinjatüin wayuu pümaa, jama nnojoluin koʼuin pukuwaʼipa sümüin wayuu.
17 Wasakireeka pia: ¿Anasüche saaʼin pümüin wawalaajüle tü nneerü nümüinjatkat chi ‹César›* münakai? ¿Nnojottaapa anain?».
18 Nütüjaapejeʼe saaʼu Jesús wayuuin mojulaashii naya, müshijeseʼe nümüin namüin: «Piama oʼupünaachii jia, ¿jamüshi juuʼulakaka taaʼin?
19 Jüsaaja tamüin wanee ‹denario›»,* süsaajünaka wanee «denario» nümüin.
20 Nümakalaka Jesús namüin: «¿Jarai kayaakuaka tü sünainkat tü nneetkat? ¿Jarai kanüliamaaka shia?».
21 «Nia ‹César›», namakalaka nümüin. Anuujeseʼe nünüiki Jesús namüin: «Jaapa jümata nümüin ‹César› tü kasa nümüinjatkat, jaapüinjatpejeʼe nümüin Maleiwa tü kasa nümüinjatkalia».
22 Ponoko naaʼin tü nümakat Jesús naapaiwaʼaya nünüiki. Nnojoika nia jamajachin namüin jee noʼunakalaka nümaʼanajee.
23 Soʼuleʼeya kaʼikat tia, nantaka nünainmüin Jesús na saduceokana, na manoujainkana sünain süsoʼiraainjatüin aaʼin wayuu outusü jee namakalaka nümüin Jesús:
24 «Ekirajüikalee, naashin Moisés ‹nünaajaale wanee wayuu sümaa machooin nia sümüin nuʼwayuuse, niainjachi eisatka chi nuwalakai nüchikumüin. Kachooinjatkalaka tü jietkat nutuma süpüla müinjachin niakaijaʼa kachooin aaʼin chi amülouishikai›.
25 Eejanainka yaa waʼaka akaratshishii wayuu pawalaawashii. Kaʼwayuusetaalaka chi epayaakai, anaajaapejeʼe nia sümaa machooin nia sümüin tü nuʼwayuusekat. Niakalaka eisalüin chi nimüliakai sümüin tü jietkat.
26 Nünaajaaka joo chiaʼaya, akaʼaya chi nutujeejachikai. Najaʼlajaaka naya akaratshishiikana wayuu sümaa machooin naya sümüin tü jietkat.
27 Shiasaʼa mapa maʼin, sünaajaaka tü jietkat.
28 Wasakireeka pia, nasoʼireʼennapa aaʼin na outushiikana, ¿jaraleechi kaʼwayuuseka tia wayuukot naʼakajee na akaratshishiikana wayuu, jama suʼwayuuseshiin naya napüshuaʼa paala?».
29 Nusoutakalaka Jesús namüin: «Maaʼawashii neʼe jia süka nnojoluin jütüjaain saaʼu jamüin sünüiki tü Karaloʼuta Nüchikimaajatkat Maleiwa jee nnojotsü jütüjaain saaʼu tü nuuntakat Maleiwa sükajee tü nüpülainkat.
30 Jamüshiijaʼa nasoʼireʼennapa aaʼin na outushiikana, nnojoleena kaʼwayuusein na tooloyuukana jee müshiʼiya na jieyuukana, nnojoleena aapünüin süpüla kaʼwayuusee. Meerü nakuwaʼipa maʼaka nakuwaʼipa na aapiee chakana iipünaa.
31 ¿Nnojotsükai jaashajeʼerüin tü nümakat Maleiwa jümüin süchiki nasoʼineʼennajanain aaʼin na outushiikana?, tü makat mayaa:
32 ‹Taya chi Nümaleiwasekai Abrahán, chi Nümaleiwasekai Isaac otta chi Nümaleiwasekai Jacob›. Chi Maleiwakai, nnojoishi Sümaleiwasein wayuu outusü, Sümaleiwase eekai katüin soʼu».
33 Ponoko naaʼin na wayuu wattakana naalii nünüiki Jesús süka nütüjain maʼin ekirajaa.
34 Naapapa na fariseokana koʼutuin neʼe na saduceokana nutuma Jesús, nasakaajiraakalaka nooʼomüin.
35 Eejachika wanee naʼaka atüjakai süpüleerua tü Pütchi Aapünakat nümüin Moisés, nüsakinnayaaka Jesús nutuma shiiʼiree nuuʼulaküin naaʼin, nümakalaka nümüin:
36 «Ekirajüikalee, ¿jarat tü pütchi nuluwataakalü anain Maleiwa alanaʼaleeka maʼin saʼakajee tü Pütchi Aapünakat nümüin Moisés?».
37 Nusoutakalaka Jesús nümüin: «‹Alinjachi püpüla Jehová* chi Pümaleiwasekai, alinjachi nia püpüla süka süpüshuaʼa paaʼin,* sükajee pukuwaʼipa otta jülüjainjachi nia paaʼin waneepia›.
38 Tia shia tü palajatkat pütchi aluwataanaka anain otta shia tü alanaʼaleekat maʼin ojutu.
39 Otta eesü wane süchikumüin meematsü aka saaʼin, müsü mayaa: ‹Alinjatü püpüla wayuu maʼaka alin pia püpülajiraa›.
40 Tia piamasükat pütchi shia saaʼinka maʼin süpüshuaʼa tü Pütchi Aapünakat nümüin Moisés jee tü namapuʼukat na Nünüikimaajanakana Maleiwa».
41 Wanaa sümaa yalajanain jutkatüin na fariseokana, nüsakirüin naya Jesús:
42 «¿Jamüsüjaʼa jünüiki nüchiki Cristo? ¿Jaraiche kachonka nia?». «Nüchon David», namakalaka nümüin.
43 Anuujeseʼe nünüiki Jesús namüin: «¿Jamakaʼa ‹Taseñotsekai› nümaka David nümüin sükajee nüpülain Maleiwa? Anuʼusa nünüiki David:
44 ‹Müshi Jehová* nümüin chi Taseñotsekai: «Püikalaa yaa tekialuʼujee waneʼereeya puuʼuipalapa tatuma na püʼünüükana»›.
45 Nüchonlejeʼe nia David, ¿jamakaʼa Señotkai nümaka nümüin?».
46 Isakalaka nachiki tü nanüikinjatkat nümüin. Nnojoireeka nasakirüin nia piantua soʼujeʼereeya kaʼikat tia.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Nneerü kachueera nanneetsepuʼuka na romanokana. Pünaʼla tia suluʼu tü kanüliakat «Sooʼomüin pütchi B14».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
