Tü nüshajalakat Mateo 25:1-46
25 »Aluwataajeechi Maleiwa chejee iipünaajee. Tia müsü aka nakuwaʼipa polooshii majayünnüü alüʼüjakana ranpara sünain apanapajaa wanee wayuu kaʼwayuuseinjachi.
2 Jaʼraishii na jieyuu maaʼinkana aaʼin otta jaʼraishii na kekiijakana.
3 Alüʼüjashii ranpara na majayünnüü maaʼinkana aaʼin, malüʼüjainpejeʼe naya seita.
4 Aluʼuinjaʼa na majayünnüü kekiijakana, alüʼüjashii ranpara sümaʼaleeya seita.
5 Koulainkalaka chi wayuu kaʼwayuuseinjachikai, süntaka lapü naaʼu na majayünnüükana, natunkayaa namaka napüshuaʼa.
6 Jee süseʼeruʼupünaa aikat saapünaka shikiisa wayuu sünain maa: ‹¡Anii antüin chi kaʼwayuuseinjachikai, jüpanapapan!›.
7 Natamaajaaya namaka napüshuaʼa na majayünnüükana sümaa yapajüin natuma tü naranparasekat.
8 Nayasaʼa na majayünnüü maaʼinkana aaʼin, namakalaka namüin na kekiijashiikana: ‹Ayokojoweematüsü tü waranparasekat, jüsülaja wamüin yootchon seita›.
9 Anuukalaka nanüiki na majayünnüü kekiijashiikana: ‹Achoʼujaataweerü tü seitakat, shia anaka aluʼu juʼunule sümaʼanamüin wayuu eekai suikaain süpüla jiyaʼlajüin shia suulia›.
10 Sümaʼainruʼu chajanain naya sünain ayaʼlajaa tü seitakat, nüntakalaka chi wayuu kaʼwayuuseinjachikai. Nayaka apanapajüin nia na majayünnüü yapatüjüliikana. Nekerotkalaka nümaa sünain eʼrajaa sukua tü miʼiraa shikiirakat kaʼwayuusee jee süsürünnaka tü puettoʼukot.
11 Shiasaʼa süchikijee tia, nantakalaka na wane majayünnüükana jee namakalaka: ‹Pujutala maa wapüleerua Señotkalee›.
12 Nusoutakalaka chi kaʼwayuuseinjachikai namüin: ‹Nnojoishiisa jia teʼraajüin›.
13 »Anakalaka aluʼu eejüle maʼin jaaʼin waneepia süka nnojoluin jütüjaain saaʼu joujeerüin jee jalapüsheerüin sülatüin tia.
14 »Aluwataajeechi Maleiwa saaʼu mmakat. Tia müsü aka nukuwaʼipa wanee wayuu anashi, eenajitkai nüchepchia süpüla nüpütajatüin tü nuwashirüinkat najapuluʼu. Naaʼinrüin tia süpülapünaa oʼunajawaa suluʼumüin wane mma wattamüin.
15 Niʼitaain najapuluʼu wanee jaʼraisü ‹talento›* jee najapuluʼu wane piamasü ‹talento› jee waneesia najapuluʼu waneʼeya. Oʼunusü nutuma süchiirua tü nountakat na nüchepchiakana, nuʼunakalaka süchikijee tia.
16 Niasaʼa chi aapünakai amüin jaʼraisü ‹talento› nuʼunamaatakalaka sünain aʼyateʼeraa tü nneetkat. Kachonkalaka shia jaʼraisü ‹talento› sooʼomüin.
17 Akaataajaʼa neʼe nutuma chi aapünakai amüin piamasü ‹talento›, kachonsü piamasü ‹talento› sooʼomüin.
18 Eekajasaʼa chi aapünakai amüin waneesia ‹talento› apotushi wanee ishi, nojoitoko tü nneerü aapünakat nümüin nutuma chi nülaamainkai.
19 »Kakalia süchikijee tia, nüntakalaka nalaamain naya achepchieekana süpüla nütüjaainjatüin saaʼu sukuwaʼipa tü nneerü niʼitaakat najapuluʼu.
20 Nüntakalaka chi eʼitaanakai ajapuluʼu jaʼraisü ‹talento› jee nüntiraleekaʼaya jaʼraisü ‹talento› sooʼomüin tü aapünakat nümüin. Nümakalaka nümüin chi nülaamainkai: ‹Talaamainkalee, jaʼraisü «talento» piʼitaaka tajapuluʼu, anuupejeʼe jaʼraisü «talento» süchon tü nneerü paapakat tamüin›.
21 Anuujeseʼe nünüiki chi nülaamainkai nümüin: ‹Anasü maʼin tü paaʼinrakat tachepchiee, wayuu anashi pia otta oonooshi pia sümaa tanüiki. Teʼitaajeechi pia süpüla laülawaa saaʼu wainma kasa, jama pikeraajüin tü teʼitaakat pajapuluʼu mayaainjeʼe palitchoin shia. Anakajaʼa jooluʼu talatüle maʼin paaʼin wanaa tamaa›.
22 Nüntakalaka chi eʼitaanakai ajapuluʼu piamasü ‹talento› jee nümakalaka nümüin chi nülaamainkai: ‹Talaamainkalee, piamasü «talento» piʼitaaka tajapuluʼu, anuupejeʼe piamasü «talento» süchon tü nneerü paapakat tamüin›.
23 Anuujeseʼe nünüiki chi nülaamainkai nümüin: ‹Anasü maʼin tü paaʼinrakat tachepchiee, wayuu anashi pia otta oonooshi pia sümaa tanüiki. Teʼitaajeechi pia süpüla laülawaa saaʼu wainma kasa, jama pikeraajüin tü teʼitaakat pajapuluʼu mayaainjeʼe palitchoin shia. Anakajaʼa jooluʼu talatüle maʼin paaʼin wanaa tamaa›.
24 »Nüntakalaka chiiruaa chi eʼitaanakai ajapuluʼu wanee ‹talento› jee nümakalaka nümüin chi nülaamainkai: ‹Talaamainkalee, tatüjaa aaʼuchi puchuntawalin wainma kasa. Pütpajüin süchon tü aʼttiee nnojotkat püpünajalain otta pukotchojüin tü nnojotkat puwaajüin paala.
25 Mmotshijeseʼe taya, tojoitoko suupünaa mma tü ‹talento› paapakat tamüin, anuʼusa joo shiaya›.
26 Nusoutakalaka chi nülaamainkai nümüin: ‹Mojulaakaiche maʼin pia tachepchiee, wayuu shokulashi neʼe pia. Pütüjaa aaʼurula maʼin tatpajüin tü aʼttiee nnojotkat tapünajalain otta takotchojüin tü nnojotkat tawaajüin paala.
27 ¿Jamakaʼa nnojotka piʼikajaain tü tanneetsekat namüin na anaajüliikana nneerü, kachonyütkaleje shia tapüla taleʼejapa?›.
28 »Nümakalaka chi nülaamainkai: ‹Jüsüta nuulia türa talentokot jee jaapa shia nümüin chira kamaʼanashikai poloosü ‹talento›.
29 Chi wayuu eekai amaʼana wanee kasa aapüneerü sooʼomüin nümüin, wainmaleejeetka tü kasa nümaʼanakat. Eekajasaʼa chi nnojoikai kasain amaʼana asütüneerü neʼe nuulia wanee kasa eekai eeyaain nümaʼana.
30 Otta müshia chira achepchiee nnojoikai kasain anain apüla, jiʼikajaa anooipaʼamüin saʼaka tü piʼyuushikat eere niʼyalajeechin sümaa kepisaneerüin tü naikat›.
31 »Nüntapeena chi Süchonkai Wayuu sümaa pülasheechin nia namaʼaleeya na aapiee nümaajanakana, aikalaajeechi nia sünain aluwatawaa saaʼu tü niinase anakat maʼin.
32 Outkajeʼenneerü wayuu maʼleekalia nümülatuʼu. Nükatajeetkalaka shia maʼaka nükatajüin wanee arüleejüi tü anneetkat suulia tü kaaʼulakat.
33 Niʼitaajeenaka nikialuʼujee na wayuu makana aka saaʼin sukuwaʼipa anneerü jee müshiʼiya na wayuu makana aka saaʼin sukuwaʼipa kaaʼula, niʼitaajeena naya nipeʼeruʼujee.
34 »Meetkalaka nünüiki chi aluwataashikai namüin na shaʼwatakana nikialuʼujee: ‹Jalainna jümaala jia anakana akuwaʼipa nutuma chi Tashikai. Saapüneetka jümüin* tü kasa anasü eejeetkat sutuma nuluwataain Maleiwa, tü yapatüjütkat nutuma soʼujeʼereeya shiʼitaanüin shikii wayuu.*
35 Jamüshiijaʼa jia jikirüinka taya soʼu outuinkain taya jamü. Wüinñaasüshinka taya, jüsiʼraka taya wüin. Kamaneeshinka jia tamüin soʼu tantapünaain jümaʼanamüin.
36 Jia aapakainka tasheʼin tamüin soʼu masheʼin taya. Jia aaʼinmajaka taya soʼu ayuulinkain taya otta jia anaʼlaaka tamüin soʼu chajachinkain taya püreesain›.
37 Nameenaka na wayuu loto akuwaʼipachiikana nümüin: ‹Señotkalee, ¿joujachikai pia weʼrüin sünain alatiraa jamü jee wekirataalaka pia? ¿Joujachikai pia weʼrüin sünain wüinñaasüin jee wasirataaka pia wüin?
38 ¿Joujachikai pia antapünaain wamaʼanamüin kamaneetaalaka joo waya pümüin? ¿Joujachikai masheʼin pia weʼrüin waapataalaka joo püsheʼin pümüin?
39 ¿Joujachikai pia ayuulin jee joujachikai pia püreesain wanaʼlaataalaka joo pümüin?›.
40 Nusouteechikalaka chi aluwataashikai namüin sünain maa: ‹Süpüshuaʼa tü kasa jaaʼinrakat napüleerua na tawalayuu motsoyünnüükana toulia müsü jaaʼinrakai saaʼin tapüleerua›.
41 »Nümeechikalaka chi aluwataashikai namüin na niʼitaakana nipeʼeruʼujee: ‹Juʼuna toulia, jia wayuu oʼulejünakana. Anashii juʼunule saʼakamüin tü siki matüjainkalü oyokojowaa,* tü eʼitaanakat nüpüla chi Yolujaakai namaʼaleeya na aapiee nümaajanakana.
42 Outushinka taya jamü, nnojoipejeʼe taya jikirüin. Wüinñaasüshinka taya, nnojoipejeʼe taya jüsiʼrüin wüin.
43 Antüshinka taya jümaʼanapünaa, mamaneepejeʼe jia tamüin, masheʼinsalinka taya, nnojoipejeʼe jüsülajüin asheʼin taya. Ayuuishinka taya jee chajachinka taya püreesain, nnojoipejeʼe jaaʼinmajüin taya›.
44 Nameenakalaka nümüin: ‹Señotkalee, ¿joujachikai weʼrüin pia sünain alatiraa jamü jee sünain wüinñaasü? ¿Joujachikai pia antapünaain wamaʼanapünaa? ¿Joujachikai pia masheʼin weʼrüin? ¿Joujachikai pia ayuulin jee püreesain nnojoitaalaka joo waaʼinmajüin pia?›.
45 Nusouteechikalaka chi aluwataashikai namüin: ‹Süpüshuaʼa tü kasa nnojotkat jaaʼinrüin napüleerua na tawalayuu motsoyünnüükana toulia, nnojotsüjaʼa shia jaaʼinrüin tapüleerua›.
46 Müinnamaʼaleeya naya wayuukana, ajaʼttinneena naya, eekajasaʼa na lotokana akuwaʼipa nayeena katakana oʼu süpüla kaʼikat süpüshuaʼa».
Noota
^ Pünaʼla tia suluʼu tü kanüliakat «Sooʼomüin pütchi B14».
^ «Apaalaa jümüin» maluʼulu tia suluʼu griego.
^ Shia soʼujeʼereeya kachooin Adán sümüin Eva.
^ «Ajaʼttinnaleeinjachia» maluʼulu tia suluʼu griego.
