Tü nüshajalakat Mateo 26:1-75
-
Aashajaajiraashii nikiira Jesús na sacerdotekana süpüla noʼutajachin naaʼin (1-5)
-
Oʼyotunüsü seita jemeta eejuut saaʼu nikii Jesús (6-13)
-
Tü Pascuakat otta aapüna ekiichi Jesús (14-25)
-
Sukuwaʼipa tü ekawaa aipaʼajatkat nutuma chi Señotkai (26-30)
-
Aküjünüsü nuunjulajeechin Pedro nüchiki Jesús (31-35)
-
Oʼuraajüshi Jesús chaa Getsemaní (36-46)
-
Ataʼünnüshi Jesús (47-56)
-
Asakiijünüshi Jesús natuma na sulujunakana tü kanüliakat Sanedrín (57-68)
-
Nüküjain Pedro nnojolin niʼraajüin Jesús (69-75)
26 Keraapa tü nikirajakalü anain Jesús, nümakalaka namüin na nikirajüinkana:
2 «Jütüjaaitpa aaʼu choʼujaʼalaain neʼe piama kaʼi süpüla tü Pascuakat.* Naapüneechikalaka ekii chi Süchonkai Wayuu* süpüla nükachennüin sünain wunuʼu jee nuʼutunuin aaʼin».
3 Nayasaʼa nekiipüʼü na sacerdotekana namaa na laülaashiikana outkajaashii naya suluʼu süpaatiase nipia Caifás, chi laülaashikai napüleerua na sacerdotekana.
4 Aashajaajiraashii naya nikiira Jesús, nemeejeein nia süpüla nataʼülajachin jee noʼutajachin naaʼin.
5 «Nnojoleerü waainjain tia soʼunnaa tü miʼiraakat, jama saashichijaʼaleere wayuu wooʼomüin», namajiraaka.
6 Wanaa sümaa chajachin Jesús Betania, nipialuʼu Simón wanee wayuu ajaʼtta atachi sutuma tü ayuulii kanüliakat «lepra»,
7 sürütkaaka nünainmüin Jesús wanee wayuu sümaa wanee amüchichon aainjuushi süka tü ipa kanüliakalü «alabastro»,* kaluʼusü seita jemeta eejuut kojutukat maʼin. Shiasaʼa sümaʼainruʼu nikaain Jesús, shiʼyotoko shia saaʼu nikii.
8 Naashichijaakalaka na nikirajüinkana Jesús neʼrapa tia sümaa namüin: «Amülataʼaleesüjaʼa maʼin türa seitakat makaʼa shia sutuma.
9 Oikünüsüje türa seitakat süpüla saapünüin tü süliapalakat namüin na wayuu maʼletsekana».
10 Nütüjaapa Jesús saaʼu tia nümakalaka namüin: «¿Jamüinjatkai jümüin türa wayuukot? Anasü maʼin tü kasa saaʼinrakat tapüleerua.
11 Süpülajachire joo taya yaawaa jümaa waneepia, eekajasaʼa na wayuu maʼletsekana yaajeena jümaa waneepia.
12 Wanaa sümaa sushulerüin tanain tü seita jemetakalü eejuu, müsü shikeraajakai saaʼin takuwaʼipa süpüla teʼikünajachin outapeena taya.
13 Shiimain tanüiki jümüin, sainküin mmakat eepünaale süküjünüin tü pütchi anakat maʼin, aapüneerü süchiki tü saaʼinrakat wayuukot tüü süpüla sotuinjatüin shia saaʼin wayuu».
14 Niasaʼa Judas chi kanüliakai Iscariote, napüshi na Polookana Piamamüin aluwataaushi, nuʼunakalaka namaʼanamüin nekiipüʼü na sacerdotekana,
15 nümakalaka namüin: «¿Kaseerü jaapaka tamüin müleka taapüle nikii Jesús jümüin?». Naküjakalaka süchiki naapeerüin nümüin apünüin shikii nneerü pülaata.
16 Shiasaʼa soʼujeʼereeya tia, nüchajaain maʼin sukuwaʼipa Judas süpüla naapajatüin nikii Jesús.
17 Shiasaʼa soʼu tü palajatkat sükalia tü Miʼiraa Saainjünakalü oʼu tü Pan Maʼakasatkat Soolojia, namakalaka na nikirajüinkana Jesús nümüin: «¿Jalasü pücheküin yapain watuma eeinjachire pikaain tü Pascuakat?».
18 Nusoutakalaka Jesús namüin: «Anashii juʼunule pueulopaʼamüin, jüchajaa nüchiki wanee wayuu, jümeenakalaka nümüin: ‹Anuu nünüiki chi Ekirajüikai: «Alüʼütsü takalia, ekaainjachi taya namaa na tekirajüinkana tü Pascuakat yaa pipialuʼu»›».
19 Naaʼinrüinjaʼaya na nikirajüinkana Jesús süpüshuaʼa tü nuluwataakalü anain naya. Yapakalaka kasa süpüshuaʼa natuma süpüla nekaainjanain soʼu tü Pascuakat.
20 Shiasaʼa aipoʼupa, aikalaashi Jesús sünain ekawaa* namaa na polookana piamamüin nikirajüin.
21 Wanaa sümaa nikaain Jesús, nümakalaka namüin na nikirajüinkana: «Shiimain tanüiki jümüin, aapünajachi ekii taya nutuma wanee jaʼakajee».
22 Mojukalaka maʼin naaʼin na nikirajüinkana Jesús naapaiwaʼaya tia, namayaa namaka nümüin Jesús: «¿Aashin nnojolin tayain Señotkalee?».
23 Nusoutakalaka Jesús namüin: «Nieechi aapaka tekii chi achüʼttakai tü pankat suluʼu tü iitakat wanaa tamaa.
24 Shiimain outajachin chi Süchonkai Wayuu maʼaka süküjünüin paala nüchiki. Aluʼuleekaijaʼa maʼin chi wayuu aapüinjachikai nikii chi Süchonkai Wayuu. Anashije nnojolinkale joʼuuin nia».
25 Anuuka nünüiki Judas, chi aapüinjachikai nikii Jesús: «¿Aashin nnojolin tayain Ekirajüikalee?»,* nusoutaka Jesús nümüin: «Piaichijaʼa atüjaaka saaʼu tia».
26 Wanaa sümaa nekaain, naapaain Jesús wanee pan jee süchikijee nuʼuraajüin, nüshaletüin jee naapüin shia namüin na nikirajüinkana sümaa nümüin namüin: «Anuu jiküin, tüü shiyaawase teʼiruku».
27 Naapaaka wanee iita kaluʼusü wiino jee süchikijee nuʼuraajüin nümüin Maleiwa, naapaka shia namüin na nikirajüinkana sümaa nümüin namüin: «Anashii jüsüle jüpüshuaʼa asüüshikat tüü,
28 shiyaawase shia tasha. Tü anuu jooluʼu amülainjatüin süpüla süikaleʼennüin tü pütchi apansaajünakat jee shia anainjatka atuma sukuwaʼipa wainma wayuu süpüla sülatinnajatüin saainjala suulia.
29 Tamüshii paala jia, nnojoleerü tasüin süchikuaʼa süsha tü uuwakat, waneʼereeya tasüin shia jümaa nuluwataapeena chi Tashikai».
30 Süchikijee tia, naʼwaajaka Maleiwa süka jayeechi jee noʼunaka saaʼumüin tü wutai kanüliakat Olivos.
31 Nümaka Jesús namüin: «Soʼu aikat tüü jüpüteechi* taya tamüiwaʼa. Mataasü sümakai tü nüshajiralakat Maleiwa: ‹Toʼuteechi aaʼin chi anneetpüʼükai suʼwalakajaajeetkalaka tü naʼanneetsekat›.
32 Oʼuneechi taya jüpüleerua Galileamüin tasoʼireʼennapa aaʼin».
33 Nusoutaka joo Pedro nümüin Jesús: «Nnojoireejaʼa tapüteechin pia pümüiwaʼa,* jaʼitashi napütüin pia pümüiwaʼa na waneinnua».
34 Anuujeseʼe nünüiki Jesús nümüin: «Shiimain tü tamakat pümüin, soʼu aikat tüü, süpülapünaa nukootoleerajaain wanee kaliina, apünüintueerü püküjain sümüin wayuu nnojolin piʼraajüin taya».
35 Nusoutaka Pedro nümüin: «Nnojoireejaʼa taküjainjachin suʼupala wayuu nnojolin teʼraajüin pia, jaʼitashi toʼutunuin aaʼin wanaa pümaa». Mayaa müsü joo nanüiki na wane nikirajüinkana Jesús.
36 Süchikijee tia nuʼunaka Jesús namaa na nikirajüinkana suluʼumüin tü mma kanüliakat Getsemaní jee nümaka namüin: «Yaashiʼiya joyotuin jia tapüla, chejeeshi paala taya oʼuraajüin».
37 Nümaaka Pedro otta na piamashiikana nüchonnii Zebedeo, shiasaʼa chamüin mojukalaka maʼin naaʼin Jesús sümaa shapaain maʼin naaʼin.
38 Nümaka namüin: «Süpüleerua aaʼinchi maʼin taya tü shapawaakalü aaʼin, müshi outeekaijaʼaya taaʼin, yaashiʼiya jia tapüla, jalia jutunkajayaai».
39 Nuʼunakalaka noulia mamüin aka tüsa jee nüsapainkaka nia sünain oʼuraajaa. Nümaka mayaa: «Tashikalee, nnojo puuʼulaain tasüin tü asüüshi suluʼukat iitakat* tüü. Nnojotpejeʼe shiainjatüin ekeraajüin tü tachekakat neʼe, shia anaka aluʼu shikeraajüle tü püchekakat tapüleerua».
40 Nüleʼejaka nüchikuaʼa nanainmüin, yalajanaka naya atunkajaʼalüin nüpüla, nümaka nümüin Pedro: «¿Jamüshiikai jutunkajakaʼa?, eeyaai katüin joʼu wanaa tamaa waneeyaakaije neʼe oora.
41 Nnojo jutunkajüin, shia anaka aluʼu juʼuraajüle waneepia suulia suuʼulakünüin jaaʼin. Mayaapejeʼe naaʼinreein maʼin wanee wayuu wanee kasa, eesüjaʼa matsüinre niʼiruku* süpüla naaʼinrajatüin shia».
42 Nuʼunaka nüchikuaʼa sünain oʼuraajaa jee nümaka mayaa: «Tashikalee, nnojorülejeʼe süpüla pütaʼülüin takuwaʼipa suulia tasüin asüüshikat tüü, shia anaka aluʼu paaʼinrüle tü püchekakat tapüleerua».
43 Nüleʼejaka nüchikuaʼa nanainmüin, yalajanaka naya atunkajaʼalüin nüpüla, jama kaʼlein maʼin lapü naaʼu.
44 Nuʼunakalaka nüchikuaʼa namaʼanajee mamüin aka tüsa. Ayatüsüjaʼa nuchuntuin tü nuchuntakat paala sünain oʼuraajaa. Apünüintuairü nukua sünain oʼuraajaa.
45 Nüleʼejaka nüchikuaʼa nanainmüin na nikirajüinkana jee nümaka namüin: «¿Jamüshiikai jutunkajakaʼa? ¿Nnojotsükai jütüjaain aaʼu tü alatajatkat? Alüʼütsü tü oora saapünajatkalü oʼu nikii chi Süchonkai Wayuu sümüin wayuu kaainjarannuu.
46 Jütamaa jümaala. ¡Jooʼuya! Alüʼülaashi chi wayuu aapüinjachikai tekii».
47 Yalaiwaʼaya naashajaain Jesús, nüntaka Judas, niajaʼa noʼutku na Polookana Piamamüin aluwataaushi. Eejanaka nümaa watta naalii wayuu chajaruutamaajana jee wunuʼumaajana, aluwataanüshii naya natuma nekiipüʼü na sacerdotekana jee na laülaashiikana.
48 Kettaatüjülia nünüiki chi aapüinjachikai nikii Jesús sümaa nümüin: «Niainjachi jütaʼülaka chi eekai tatuʼluin awalapaʼa».
49 Nürütkaaka nünainmüin Jesús sümaa nümüin nümüin: «¿Jaman Ekirajüikalee?», nutuʼlaka nuwalapaʼa.
50 Nümaka Jesús nümüin: «Waʼle, ¿kasa püntaka eeʼiree?». Narütkaaka nooʼomüin Jesús jee nataʼülaka nia.
51 Niasaʼa wanee nümaajachi Jesús, nuwataakalaka sümaa nüchajaruutse nooʼomüin nüchepchia chi laülaashikai napüleerua na sacerdotekana, nushottoko nücheʼe.
52 Nümakalaka Jesús nümüin: «Pünaajaa türa püchajaruutsekat, na wayuu atkaakana süka chajaruuta oʼutuneena aaʼin naya süka chajaruuta.
53 ¿Isasüjasaʼa tachiki saaʼin pümüin tachuntajachin nümüin chi Tashikai süpüla nuluwataainjanain tamüin jooluʼuleʼeya watta naalii* aapiee?
54 Taaʼinrüle tia, nnojoleerüjaʼamata ekeraajüin tü pütchi aküjünakat suluʼu tü Karaloʼuta Nüchikimaajatkat Maleiwa süchiki müinjatüinjaʼaya sukuwaʼipa tia».
55 Nümaka Jesús namüin na wayuukana: «¿Kaʼruwaraiyaa taya jaaʼinruʼu, chajaruutamaaka jia jee wunuʼumaaka jia tooʼomüin süpüla jütaʼülajachin taya? Mataashi chapuʼukai tekirajüin weinshi suluʼu tü aʼwaajüleekat Maleiwa, nnojoipejeʼe taya jütaʼülüin.
56 Alatüsü tü makalü yaa süpüla shikeraajüinjatüin tü namatüjütkalia na nünüikimaajanakana Maleiwa». Napantajaayaa namaka na nikirajüinkana jee napütaka nia nümüiwaʼa.
57 Nayasaʼa na ataʼülakana Jesús, noʼunirüin nia nipialuʼumüin Caifás, chi laülaashikai napüleerua na sacerdotekana, yalajachi nia jutkatüin namaa na karaloʼutamaajanakana jee na laülaashiikana.
58 Nuʼunaka Pedro nüchiirua Jesús kaʼyatajee nünain, nüntaleeka suluʼumüin süpaatiase nipia chi laülaashikai napüleerua na sacerdotekana. Nüikalaaka naʼatoʼu na wayuu aʼyataakana suluʼu tia miichikat süpüla nütüjaainjatüin saaʼu kasainjatüin alatüin mapa.
59 Nayasaʼa nekiipüʼü na sacerdotekana jee napüshuaʼa na sulujunakana tü kanüliakat Sanedrín,* nachajaain wayuu aküjainjanakana alawaa nüchiki Jesús shiiʼiree nuʼutunajachin aaʼin.
60 Nnojoipejeʼe nantüin anain wanee wayuu keraakai süpüla tia, mayaapejeʼe wainmain na antakana süpüla aküjaa alawaa. Nantapaataka mapa piamashii wayuu
61 jee namaka: «Anuusa nünüiki wayuukai chii: ‹Tojuttireerü tü aʼwaajüleekat Maleiwa jee tashaʼwaleʼereerü süchikuaʼa soʼu apünüin kaʼi›».
62 Nüshaʼwalaaka chi laülaashikai napüleerua na sacerdotekana jee nümaka nümüin Jesús: «¿Nnojoishi pia asoutajachin? ¿Jamüsü pünüiki shiʼipajee tü namakat nala wayuukana püchiki?».
63 Koʼutapejeʼe Jesús nuulia, nümaka chi laülaashikai napüleerua na sacerdotekana nümüin: «Püküja wamüin nuʼupala chi Maleiwa matüjainkai outaa piain chi Cristokai, chi Nüchonkai Maleiwa».
64 Nümaka Jesús nümüin: «Aa, tayaʼayan, nnaaʼasa püküjaitpain shia, anuupejeʼe tanüiki jümüin: Noʼujeʼereeya kaʼikai chii, jiʼreechi chi Süchonkai Wayuu* nikialuʼujee chi Maleiwa Pülashikai maʼin jee jiʼreechi nia sünain antaa saaʼu siruma».
65 Niasaʼa chi laülaashikai napüleerua na sacerdotekana, nüsüküijaaka nüsheʼin sümaa nümüin: «Mojutusai Maleiwa nümüin, nnojotsü choʼujaain wachajaainjanain nooʼomüin wayuu süpüla naküjainjanain süchiki tia. Nnaaʼasa jaapüin nünüiki sünain mojutuin Maleiwa nümüin.
66 ¿Jamüsüjaʼa jünüiki süchiki tia?». «¡Anashi outulein!», namayaa namaka na wayuu yalajanakana jutkatüin.
67 Nejetünaka oʼuutajee Jesús sümaa nüsheʼetünüin. Eetaashii na aʼyaatakana nia nuwalapünaa.
68 Namaka nümüin: «Cristo, shiimainrejeʼe nünüikimaajachin pia Maleiwa püküja wamüin jaralin aʼyaatüin pia».
69 Chajachika joyotuin Pedro suluʼu tü paatiakat. Sürütkaaka wanee achepchiee nünainmüin sümaa sümüin nümüin: «Nümaataraipuʼu pia Jesús chi chejeʼewaikai Galilea».
70 Nüküjapejeʼe Pedro suʼupala wayuu süpüshuaʼa nnojolin niʼraajüin Jesús jee nümakalaka: «Maaʼawataasü neʼe pia tooʼomüin».
71 Nuʼunakalaka Pedro soʼuluʼumüin tü paatiakat, niʼnnaka nüchikuaʼa sutuma wane majayüt sümaa sümüin namüin na yalajanakana yala: «Chira wayuukai nümaataraipuʼu Jesús, chi chejeʼewaikai Nazaret».
72 Nüküjakalaka Pedro nüchikuaʼa nnojolin niʼraajüin Jesús, müshi nia: «Taküjaleeinña nuʼupala Maleiwa nnojolin teʼraajüin chia wayuukai».
73 Shiasaʼa yaaulerü mapa, narütkaaka waneinnua wayuu nünainmüin Pedro sümaa namüin nümüin: «Napüshi pia na wayuu nümaapuʼukana Jesús. Wayaawata aaʼu tia sükajee tü pünüikipalakat».
74 Anuukalaka nünüiki Pedro namüin: «Oʼulejüneechi taya nnojoire taküjain tü shiimainkat nuʼupala Maleiwa. Tamüshii paala jia, nnojoishi teʼraajüin chia wayuukai». Nukootoleerajaaka wanee kaliina.
75 Sotojooka naaʼin Pedro nünüiki Jesús wanaa sümaa nümüin nümüin: «Süpülapünaa nukootoleerajaain wanee kaliina, apünüintueerü püküjain sümüin wayuu nnojolin piʼraajüin taya». Nujuʼitaakalaka Pedro anooipaʼamüin sümaa niʼyalajüin maʼin, jama mojuin maʼin naaʼin.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Jamaluʼulu pütchikat».
^ «Aikaajaashii süʼütpaʼa meesakat» maluʼulu tia suluʼu griego.
^ Jee shiale «Rabí».
^ «Soʼu aikat tüü, wototeena jia taaʼujee» maluʼulu tia suluʼu griego.
^ «Jaʼitashii wototuin na waneinnua paaʼujee, nnojoireejaʼa wototojochin taya» maluʼulu tia suluʼu griego.
^ «Iitakat tüü», shiyaawase nuuʼulaain Maleiwa nuʼutunuin aaʼin Jesús sünainjee airuʼuluin nünüiki nüchiki Maleiwa saashin wayuu.
^ Tia shia süleʼeruʼuin wayuu süchiki kaainjalaa.
^ «12 legiones» maluʼulu tia suluʼu griego. «Legión» münapuʼusü eere 4.000 sünainmüin 6.000 surulaat romajeʼewalii.
^ «Sanedrín» münapuʼusü tü Laülaapia Miyoʼusükat natuma na judíokana.
^ Pünaʼla tia suluʼu tü kanüliakat «Jamaluʼulu pütchikat».
