Tü nüshajalakat Mateo 27:1-66
27 Shiasaʼa waneemüin kaʼi, naashajiraaka nekiipüʼü na sacerdotekana namaa na laülaashiikana süchiki tü naaʼinrajatkat süpüla noʼutajachin naaʼin Jesús.
2 Nijittaanaka Jesús natuma, namaaka nia nümaʼanamüin Pilato, chi aluwataashikai.
3 Mojukalaka maʼin naaʼin Judas, chi aapüshikai paala nikii Jesús süka nuʼutunajachin aaʼin Jesús. Niiteʼerakalaka tü apünüinkat shikii nneerü pülaata namüin nekiipüʼü na sacerdotekana otta namüin na laülaashiikana.
4 Nümakalaka Judas namüin: «Mojutaʼaleesüjaʼa maʼin tü taainjakat süka taapüin nikii wanee wayuu maainjalasai». Nasoutakalaka nümüin: «¿Jamajatkaʼa joo wamüin tia?, nnaajaʼa pukuwaʼipajiraa».
5 Nijinaakalaka tü nneetkat süpaʼa tü aʼwaajüleekat, nuʼunakalaka noulia jee nüülaakaʼa.
6 Nayasaʼa nekiipüʼü na sacerdotekana nakotchojoko tü nneetkat jee namaka: «Sülia isha nneetkat tüü, pülasü wanaajüle shia eere sünaajünüin nneerü suluʼu tü aʼwaajüleekat».
7 Pansaapa nanüiki süchiki tü naaʼinrajatkat süka tia nneetkat, nayaʼlajakalaka wanee mma* eeinjanale neʼikünüin na wayuu wattajeʼewaliikana,
8 müsüjeseʼe «Ishamaʼana» sümünüin tia mmakat maaʼulu yaa.
9 Suluʼujee tia, ekeraajüsü tü pütchi nüküjatüjütkalia Jeremías, chi nünüikimaajachikai Maleiwa tü makat mayaa: «Naapakalaka apünüin shikii nneerü pülaata, tü nüliapalakat chi wayuukai natuma noʼutku na nüchonniikana Israel.
10 Nayaʼlajakalaka wanee mma süka tia nneetkat maʼaka nüküjain shia paala Jehová* tamüin».
11 Yalajachikalaka Jesús shaʼwatüin nümaʼana chi aluwataashikai, nüsakinnakalaka nutuma: «¿Shiimainña piain aluwataain naaʼu na judíokana?». Nusoutakalaka Jesús niʼipajee: «Aa, shiaʼaya tia pümakat».
12 Koʼutapejeʼe neʼe Jesús shiʼipajee tü kasa eʼitaanakalü aaʼu nia natuma nekiipüʼü na sacerdotekana otta natuma na laülaashiikana.
13 Nümakalaka Pilato nümüin: «¿Paapayaainchejeʼe türa püliajatkalü atumawaa?».
14 Koʼutaka neʼe Jesús nuulia, ponoko naaʼin tia chi aluwataashikai.
15 Soʼunnaa wanee miʼiraa, ajütünawai achikichi nutuma chi sülaülashikai mma wanee wayuu eekai püreesain, chi eekai nachuunajalain na wayuukana nümüin.
16 Shiasaʼa wanaa maʼin sümaa tia, eejachikalaka wanee wayuu püreesashi kanüliashi Barrabás, eʼnnaajünüshi maʼin chia wayuukai.
17 Anuukalaka nünüiki Pilato namüin na wayuu yalajanakana jutkatüin: «¿Jarai jüchekaka tajütüin achiki jümüin, Barrabás niataapa Jesús, chi Cristo münakai?».
18 Nütüjaapejeʼe saaʼu Pilato saapünüin nikii Jesús süka nüʼürülaanüin anain.
19 Yalaiwaʼaya joyotuin Pilato suluʼu tü laülaapiakat, suluwataain sünüiki tü nuʼwayuusekat nümüin sünain maa: «Jalia jamajayaai putuma wayuukai, wayuusa loto akuwaʼipachi nia, müliasü maʼin taya taʼlapüinruʼu nünainjee».
20 Nayasaʼa nekiipüʼü na sacerdotekana jee na laülaashiikana nootuin na wayuukana süpüla nachuntajanain niainjachin ajütünüin achiki Barrabás jee niainjachin oʼutunuin aaʼin Jesús.
21 Nümakalaka chi aluwataashikai nüchikuaʼa namüin: «¿Jarai chi tajütajachikai achiki jümüin?». «Anashi niale püjütüin achiki Barrabás wamüin», namakalaka nümüin.
22 Nümakalaka Pilato namüin: «¿Kasakaʼa taaʼinrajatüin nüka Jesús, chi Cristo münakai?». «Pükachera sünain wunuʼun», namayaa namaka napüshuaʼa nümüin.
23 Nümakalaka namüin: «¿Kasanainjeejachikai jümüin? ¿Kasakai naainjalaka juulia?». Naʼwoorolooko maʼin sünain maa: «¡Pükacherapan!».
24 Maaʼatshii jamakaijaʼa naaʼin na wayuukana, nnojoliika kasakainjanain naya nutuma Pilato. Naapaakalaka wüin, nuʼlojooko najapü noʼupala na wayuu yalajanakana jee nümakalaka namüin: «Nnojoishisa tayain kasirüin wayuukai chii, nnaajaʼa jukuwaʼipajiraa nümaa».
25 Namayaa namaka na wayuukana naapaiwaʼaya tia pütchikat: «Wayeenajaʼa kasitka namaa wachonnii nukuwaʼipa chira wayuukai sünain outaa».
26 Nüjütirakalaka Pilato nüchiki Barrabás, naapapejeʼe nikii Jesús süpüla niʼyaajünüin jee nükachennüin sünain wanee wunuʼu süpüla outajachin nia.
27 Nümaanakalaka Jesús natuma na surulaatkana suluʼumüin süpaatiase nipia chi aluwataashikai. Nuutkajaanaka Jesús natuma watta naalii surulaat.
28 Saakajaanaka nüsheʼin Jesús, saʼatünaka nünain wanee kuluulu ishosü maʼin.
29 Nakoʼojoko wanee keipüsesü, nakumajaka wanee kotse süka, naʼataka shia sünain nikii Jesús. Shiʼitaanakalaka suluʼu tü najapü nikiakat wanee kainñaruushi, nasapainkaka naya nümülatuʼu. Nemeeʼerainpalaka nia sünain maa: «¿Anayaashijeʼe pia aluwataashikai naaʼu na judíokana?».
30 Nejetünaka aaʼu Jesús natuma, naʼyaajaka nikiipüna süka tü kainñaruushi neʼitaakat paala najapuluʼu.
31 Shiasaʼa süchikijee nemeeʼerainpalain Jesús, saakatünaka nuulia tü kuluulu aʼatünakat nünain paala. Saʼatünakalaka nünain süchikuaʼa tü nüsheʼintüjütkalia. Nümaanaka süpüla nüchitünajachin sünain wanee wunuʼu.
32 Shiasaʼa nojuʼitapa yalejee, nantiraaka nümaa Simón, wanee wayuu chejeʼewai suluʼujee tü mmakat Cirene. Nülüʼüjinnaka tü wunuʼu* akachennajachikalü anain Jesús.
33 Shiasaʼa nantapa suluʼumüin tü mma kanüliakat «Gólgota», tü «Shikii Wayuu Outusü» münakat,
34 nüsiʼnnakalaka Jesús wiino kaʼakasü wunuʼu ishisü. Nnojotkalaka nüseein shia nuuʼulakaiwaʼaya seʼejü.
35 Nüchitünapa sünain tü wunuʼukat, nashantanajiraaka süpüla natüjaainjatüin saaʼu jaralinjachin apütüüin apüla nüsheʼin Jesús.
36 Naikalaaka sünain eʼrajaa naaʼu.
37 Süshajünaka sünain wanee taapüla iipünaa sünain nikii Jesús kasanainjeein outuin nia, müsü mayaa: «Anii Jesús, chi aluwataashikai naaʼu na judíokana».
38 Nakachennaka wanaa nümaa Jesús piamashii kaʼruwarannuu, wanee nikialuʼujee otta wane nipeʼeruʼujee.
39 Nayasaʼa na wayuu alatakana nüʼütpünaa Jesús, nalialüin nekii nümüin
40 sümaa airuʼuluin nanüiki jee namakalaka nümüin: «¿Nnojoishijasaʼa piain chi ojuttirajachikai tü aʼwaajüleekat Maleiwa otta püshaʼwaleʼerüinjatüin shia soʼu apünüin kaʼi? Nüchonlejeʼe pia Maleiwa, püshakata pümaala saaʼujee türa wunuʼu akachennakalü anain pia, kateetkalaka poʼu».
41 Akaʼaya nia, meeʼerapalashi natuma nekiipüʼü na sacerdotekana, na karaloʼutamaajanakana namaʼaleeya na laülaashiikana. Mataalasü nanüiki nümüin:
42 «Eesü wayuu kataka oʼu nutuma, isapejeʼe nüchiki katajatüin noʼu. Nia aluwataashika saaʼu Israel, anashijaʼa nüshakatüle jooluʼu saaʼujee türa wunuʼu akachennakalü anain nia, wanoujeenaka nünain.
43 Niʼitaain naaʼin nünain Maleiwa, akaalinjünüshijeʼeya nia nutuma Maleiwa kateetkalaka noʼu. ‹Nüchon taya Maleiwa›, mataashi nümakai».
44 Jaʼitakajeʼe neʼe na kaʼruwarannuu akachennakana wanaa nümaa Jesús airuʼutsü nanüiki nümüin.
45 Shipiʼyuushijaaka tü mmapaʼakat maʼaka saaʼin las doce* kaleʼu sünainmüinreʼeya maʼaka saaʼin las tres* aliika.
46 Shiasaʼa sülüʼütpa süpüla las tres aliika, nümakalaka Jesús sümaa emetuluin maʼin nünüiki: «Éli, Éli, ¿láma sabakhtháni?», «Tamaleiwasekalee, Tamaleiwasekalee, ¿jamüshi piyüülajakaʼa taya?», maluʼulu tia pütchikat.
47 Naapaiwaʼaya tia na wayuu yalajanakana, namajiraakalaka: «Nia nuunejaka Elías».
48 Niasaʼa wanee wayuu yalajachikai naʼaka na yalajanakana, awataashi sünain asaajaa wanee maawüi.* Nucholetitkalaka shia shiroku wanee wiino jashüʼüsü, niʼitaaka shia sünain shiʼichi wanee kainñaruushi, niyurutka shia nünainmüin Jesús shiiʼiree nüsüin shia.
49 Namakalaka na waneinnua: «Puuʼulaapan, weʼraiwa nüntüin Elías sünain akaalinjaa nia».
50 Nuʼwaatakalaka Jesús nüchikuaʼa sümaa emetuluin maʼin nikiisa, sajaʼttalaʼa sümaka sütchin naaʼin.
51 Süchatajaakalaka pasanainpünaa sünain tü kuluulu soʼulujunakat tü kuatta shiinaluʼusükat tü aʼwaajüleekat. Sukutkujaaka tü mmakat sümaa suwajaayaa sümüin tü ipakat.
52 Suwajaayaa sümaka tü woowira natasükat na wayuu aʼyataapuʼukana nümüin Maleiwa, jachitaʼalaka neʼe naya.
53 Watta naalii na wayuu eʼrakana naya. (Süchikijee süsoʼireʼennüin naaʼin Jesús, wainma na wayuu ekerolokana Jerusalénmüin* naleʼejapa amuuyuupaʼajee).
54 Mmotkalaka maʼin chi sülaülashikai surulaat namaʼaleeya na yalajanakana nümaa sünain eʼrajaa naaʼu Jesús, neʼrapa sukutkujaain tü mmakat jee wainmain neʼe tü kasa alatakat, namajiraakalaka: «Shiimainjaʼaya maʼin Nüchoin nia Maleiwa».
55 Wainma na jieyuu antüshiikana paala nümaa Jesús Galileajee, na akaalinjapuʼukana nia. Yalajana naya sünain eʼrajaa sukua wattajee tü kasa alatakat.
56 Eejatü María Magdalena, María tü niikat Santiago nümaa Josés otta müsia nei nüchonnii Zebedeo.
57 Shiasaʼa motsouupa, nüntakalaka wanee wayuu washirü chejeʼewai Arimatea kanüliashi José, nikirajüin nia Jesús.
58 Naashajaakalaka chia wayuukai nümaa Pilato süpüla naapünajachin Jesús nümüin, aapünüshijaʼaya nia nümüin nutuma Pilato.
59 Niasaʼa José nülüʼüjaka müliashii, nukoʼoloko nia süka wanee kuluulu anasü maʼin aainjuushi süka lino,
60 niʼitaakalaka nia suluʼu wanee koʼushii nukumajittüjütkalia paala. Niʼiteʼeraka wanee ipa miyoʼu soʼulujuna tü woowirakat, nuʼunaka süchikijee tia.
61 Yalajatü María Magdalena sümaa María joyotuin soʼuluʼu tü woowirakat.
62 Alatüsü tia soʼu tü kaʼi yapajakalü oʼu naya süpüla tü sükaliakalü eemerawaa. Shiasaʼa waneemüin kaʼi süchikijee tia, noʼunakalaka nekiipüʼü na sacerdotekana otta müshiʼiya na fariseokana nümaʼanamüin Pilato.
63 Namakalaka nümüin: «Laülaashikalee, sotusü waaʼin tü nümakat chia emeejüikai wayuu kataiwaʼaya noʼu sünain maa: ‹Apünüinpa kaʼi taya süchikijee outaa, asoʼireʼenneechi aaʼin taya›.
64 Anakajaʼa jooluʼu püjütüle wayuu anajüinjatka saaʼu tü woowirakat soʼu apünüin kaʼi suulia joo nüpataanüin natuma na nikirajüinkana jee suulia namajüin sümüin wayuu: ‹Asoʼireʼennüitpa naaʼin süchikijee outaa›. Mojuleejeeria maʼin tia alawaakat wamüin suulialeʼeya tü alawaa nüküjakat paala chia emeejüikai wayuu».
65 Nusoutakalaka Pilato namüin: «Jümaa waneinnua surulaat anajüinjanakana saaʼu tia woowirakat».
66 Oʼunaajaʼaya namüin sünain achechajaa soʼu tü woowirakat. Napütaka yala na surulaat anajüinjanakana saaʼu.
Noota
^ «Niyüüjain chi atüküikai» maluʼulu tia suluʼu griego. Eeshiijaʼa chapuʼule naʼyataain suluʼu tia mmakat na wayuu atüküliikana.
^ Pünaʼla tia suluʼu tü kanüliakat «Sooʼomüin pütchi A5».
^ Shia tü akachennapuʼukalü anain wanee wayuu süpüla outajachin nia. Nuchuntuin Jesús tia pütchikat süpüla niyaawajeʼerüin shia sümaa tü müliaa niʼrakat wanee wayuu saaʼujee nikirajüin nia Jesús. Pünaʼla tia suluʼu tü kanüliakat «Jamaluʼulu pütchikat».
^ «Maʼaka aipirua oora süchikijee nujuʼitaain kaʼikai» maluʼulu tia suluʼu griego.
^ «Maʼaka mekietsat oora süchikijee nujuʼitaain kaʼikai» maluʼulu tia suluʼu griego.
^ Jee shiale wanee «esponja».
^ Pueulo kojutuka nümüin Maleiwa.
