Tü nüshajalakat Mateo 3:1-17
3 Nuʼttakalaka Juan chi Awoutisaajüikai sünain aküjaa pütchi nüchiki Maleiwa süpaʼa tü isashii chajatkat Judea.
2 Anuukalaka nünüiki: «Anashii jiyaawajaale suulia jaainjala süka sülüʼülüin nükalia Maleiwa süpüla aluwatawaa chejee iipünaajee».
3 Aküjünatüjülia paalainka nüchiki Juan nutuma Isaías chi nünüikimaajachikai Maleiwa: «Emetutsü maʼin nünüiki wanee wayuu chaa isashiipaʼa: ‹Yapa jutuma nüpüna Jehová,* wule shia jutuma›», müshi.
4 Kasheʼinshi Juan soi kameeya otta kaseʼeruʼupünaashi paaʼata. Eküshi nia kaashapa sümaa mapa.
5 Antawaisü nünainmüin Juan wayuu chejeejatü Jerusalénjee, sainküinjee Judea otta müsia wayuu suluʼujeejatü tü mma chakat Jordán.
6 Woutiisakalaka naya nutuma Juan shiroku tü süchikat Jordán jee naküjain süchiki tü naainjalakat.
7 Shiasaʼa niʼrapa Juan nantapaain na fariseokana jee na saduceokana chaa eejatüle woutiisain wayuu nutuma, müshi nia namüin: «Jiakana süchooinkana wüi outasiroʼu, ¿jarat aküjaka jümüin isajeenain jia suulia nüʼürüla Maleiwa?
8 Jaʼyainjatü jaaʼu jiyaawajaain suulia jaainjala.
9 ‹Nia washikaʼaya Abrahán›, jümajayaaijeʼe. Nüchekülejeʼe chi Maleiwakai eesü süpüla nüikeyuujaain Abrahán türa ipakalüirua nutuma.
10 Kettaaitpa tü potkat süpüla süshottünajatüin tü wunuʼukat suuralanainjee. Wanee wunuʼu eekai nnojoluin anain süchon, ashottüneerü shia otta aʼajüneerü shia.
11 Woutiisashii jia tatuma shiroku wüin saaʼujee jiyaawajaain suulia jaainjala. Akaajasaʼa chi anteechikai tachikumüin pülaleeshia maʼin nia toulia otta nnojoishi taya keraain süpüla taakatüin nukoʼusüin.* Woutiiseena jia nutuma sükajee nüpülain Maleiwa otta sükajee siki.*
12 Nümaʼanaitpa tü awaajiakat otta wuleerü nutuma tü niyüüjainkat. Nükotchojeerü tü trigokat otta nünaajeerü shia suluʼu tü anaajaaleekat süchon pünajüt, akaajasaʼa tü suʼutalakat naʼajeerü shia süka wanee siki matüjainka ayokojowaa».
13 Nuʼunakalaka Jesús chejee Galileajee chamüin Jordánmüin süpüla woutiisainjachin nia nutuma Juan.
14 Niyoutakalaka Juan süchiki tia. Nümakalaka nümüin Jesús: «Nnojoishi piainjachin woutiisain tatuma, tayainjachi woutiisaka putuma».
15 Nusoutaka Jesús nümüin: «Anasü paaʼinrüle tü tachuntakat pümüin süka shiainjaʼaya tia nücheküin chi Maleiwakai». Naaʼinraka Juan tü nuchuntakat nümüin.
16 Shiasaʼa nuwoutisaajünapa Jesús, ashaʼwalaashi nia shirokujee tü wüinkat, sujutalaakalaka tü sirumatuʼukat jee niʼrakalaka* süntüin tü nüpülainkat Maleiwa naaʼumüin Jesús suluʼu müin shia maʼaka saaʼin wanee toomasü.
17 Saapünakalaka wanee pütchi chejee iipünaajee sünain maa: «Aniisa chi Tachon aishikai tapüla, talatüshi taya nümaa».
Noota
^ Pünaʼla tia suluʼu tü kanüliakat «Sooʼomüin pütchi A5».
^ Jee shiale «nüsapaatse».
^ Tia shia nüneekünüle wanee wayuu sükajee tü nüpülainkat Maleiwa otta najaʼttinnüle süka siki.
^ Eeshijaʼa niale Juan eʼrüin tia.
