Tü nüshajalakat Mateo 6:1-34
-
PÜTCHI EKIRAJÜNAKA ANAIN SAAʼU WANEE UUCHI (1-34)
6 »Nnojo jaaʼinrüin neʼe wanee kasa anasü shiiʼiree jiʼnneein natuma na waneinnua. Müle sukuwaʼipa jutuma, nnojoleena eʼrüin jia kasa anasü nutuma chi Jüshi iipünaajachikai.
2 Jümüliajüle wanee wayuu, nnojo juʼwaataain suluʼu tia maʼaka naaʼinrüin shia suluʼu tü ekirajüleekat nüchiki Maleiwa na wayuu piamakana oʼupünaa jee maʼaka naaʼinrüin shia suluʼupünaa kaaye süpüla naʼwaajünüin sutuma wayuu. Eekajasaʼa naya wayuukana, shia neʼe neʼreetka naʼwaajünüin sutuma wayuu.
3 Pümüliajapa wanee wayuu, anasü nnojorüle sütüjaain saaʼu tü pipeʼekat tü paaʼinrakat süka tü pajapü pikiakat.
4 Pümüliajapa wanee wayuu, nnojotsü atüjaanajatüin aaʼu, eʼreechipajaʼa pia kasa anasü nutuma chi Püshi iipünaajachikai süka niʼrüin pia.
5 »Otta juʼuraajapa nnojo jüshatüin nakuwaʼipa na piamakana oʼupünaa. Kamalainsü namüin oʼuraajaa sümaa shaʼwatüin naya suluʼu tü ekirajüleekat nüchiki Maleiwa otta shaʼwatüshii naya eere sujununtaain kaaye süpüla neʼnnajanain sutuma wayuu. Eekajasaʼa naya wayuukana, shia neʼe neʼreetka naʼwaajünüin sutuma wayuu.
6 Puʼuraajüinjachipa, pikerota suluʼu pipia jee püsürüt soʼu pipia pümaa. Puʼuraajechika nümüin chi Püshi iipünaajachikai eʼrakai pia. Piʼreechika kasa anasü nutuma.
7 Puʼuraajapa nümüin Maleiwa nnojo piiteʼerakuʼu pümüin pünüiki maʼaka saaʼinrüin shia wayuu sainküin mmakat. Aapajüneerü sünüiki süküjainruʼu süka wattain saalii pütchi suchuntaka.
8 Majayaai jia maʼaka naaʼin, nütüjaatüjülia aaʼu chi Jüshi iipünaajachikai tü kasa choʼujaakat jümüin süpülapünaa juchuntuin shia nümüin.
9 »Müinjatü jünüiki juʼuraajapa:
»‹Washikai iipünaajachikai kasataalejeseʼe shiʼraajüin wayuu pünülia otta kojutuin pia sümüin.
10 Wachuntuin pümüin puluwataainjachin saaʼu tü mmakat. Kasataalejeseʼe saainjünüin tü keeʼireekat paaʼin yaa mmapaʼa maʼaka sukuwaʼipa putuma chaa iipünaa.
11 Paapa maa wamüin tü weküinjatkat soʼukai.
12 Moto paaʼin tü kasa nnojotkalü anain watuma, maʼaka motuin waaʼin tü kasa mojusü aainjünakat wamüin.
13 Pükaalinja waya suulia suuʼulakünüin waaʼin. Jalia maa waya nuulia chi Yolujaakai›.*
14 »Müleka motule jaaʼin naainjala na waneinnua, moteerü naaʼin jaainjala chi Jüshi iipünaajachikai.
15 Nnojorüle motuin jaaʼin naainjala na waneinnua, nnojoleerü motuin naaʼin jaainjala chi Jüshi iipünaajachikai.
16 »Jaamajapa nnojotsü jaʼyainjatüin jaaʼu mojuin jaaʼin maʼaka naainjain shia na wayuu piamakana oʼupünaa. Mojuyaasü naaʼin shiiʼiree neʼnnüin sutuma wayuu sünain naamajüin. Eekajasaʼa naya wayuukana, shia neʼe neʼreetka naʼwaajünüin sutuma wayuu.
17 Paamajapa, pushulereerü seita jemeta eejuut sünain puʼwala otta puʼlojoojeerü puʼupünaa.
18 Paainjainjatü tia suulia sütüjaain saaʼu wayuu paamajüshin. Niainjachi neʼe atüjaaka saaʼu tia chi Püshi iipünajachikai, piʼreechika kasa anasü nutuma süka niʼrüin pia.
19 »Nnojo jünaajüin kasa kojutusü yaa mmapaʼa suulia sajaʼttüin sutuma seʼe mma, suulia kachaʼain shia otta suulia suʼluwajüin shia kaʼruwarannuu.
20 Shia anaka aluʼu jünaajüle kasa kojutusü chayaa iipünaa, eere nnojoleerüin keʼein shia, eere nnojoleerüin kachaʼain otta eere nnojoleerüin suʼluwajünüin sutuma kaʼruwarannuu,
21 jama shiain naaʼinmaain wanee wayuu tü kasa kojutukat nümüin.
22 »Tü poʼukot müsü aka saaʼin wanee luusa, anale tü poʼukot meerü chuwatuuikai saaʼin tü pütapaʼakat.
23 Eekajaʼa suchunjale paaʼin saaʼu tü kasa piʼrakat, meerü kojokoi saaʼin piʼyuushi paaʼu. Müleka nnojorüle chuwatuuin paaʼu, kojosüjaʼa maʼin tü piʼyuushi eekat paaʼu.
24 »Piamale nülaamain wanee wayuu, aijeechi waneeshia nüpüla otta müshia chi wane, maalinjeechi nüpüla. Waneepieechi nia nümaa wanee otta mojuteechi nümüin chi wane. Nnojoishii nüchepchiainjanain jia Maleiwa sümaa chataain jaaʼin süchiirua tü washirüükat.
25 »Anuu tanüiki jümüin jooluʼu, nnojo shapaain jaaʼin saaʼu wainma kasa, maʼaka saaʼin saaʼu tü jiküinjatkat, saaʼu tü jüsüinjatkat otta saaʼu tü jüsheʼinjatkat. ¿Aashin shiain kojutuleein maʼin katüle noʼu* wanee wayuu suulialeʼeya tü niküinkat otta tü nüsheʼinkat?
26 Jamüsüjaʼa tü wüchiikalüirua, nnojotsü apünajüin, nnojotsü anaajaain shiküin, keküinpejeʼe shia nutuma chi Washi iipünaajachikai. Alanaʼaleesia jaalin nüpüla Maleiwa suulialeʼeya tü wüchiikalüirua.
27 ¿Epijaajeenache jia shapaakuʼu sümüle jaaʼin?
28 Nnojo shapaain jaaʼin saaʼu tü jüsheʼinjatkat. Jamüsüjaʼa tü süsiikat mojuui, asotusü neʼe shia, nnojotsü aʼyataain otta nnojotsü asuttajüin.
29 Anaʼleepejeʼe sünoʼu süsii tia mojuuikat suulialeʼeya sünoʼu nüsheʼin Salomón eerejeʼe washitpuʼuin maʼin nia.
30 Mülejeʼe sünoʼu tü süsiikat mojuui nutuma Maleiwa, tü asotokot soʼukai otta tü ojotunakat waneemüin kaʼi soʼu siki, jiakaʼa nnojoliin naapeematüin asheʼin. ¿Jamüshii manoulakaʼa jia?
31 Nnojo müin jünüiki sünain shapawaa aaʼin: ‹¿Jaleerü wapüla tü weküinjatkat? ¿Jaleerü wapüla tü kasa wasüinjatkat? ¿Jaleerü wapüla tü washeʼinjatkat?›.
32 ¿Aashin shiain tia kachiiruain maʼin saaʼin wayuu sainküin tü mmakat? Nütüjaa aaʼu chi Jüshi iipünaajachikai tü kasa choʼujaakat jümüin.
33 »Süka niain Maleiwa aluwataajeechin saaʼu tü mmakat, ayataʼaya jaaʼinmaain tü aʼyatawaakat nümüin otta tü kasa anakat noʼuluʼu. Naapeetka jümüin tü kasa choʼujaakat jümüin.
34 Nnojo shapaain jaaʼin saaʼu tü kasa choʼujaajeetkat jümüin wattaʼa, eejeerü tü kasa shapaakalü atuma jaaʼin wattaʼaya. Wainmawai tü kasa alatakat wamüin soʼukaiwai.
Noota
^ «Kamaʼürai» maluʼulu tia suluʼu griego.
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
