Tü nüshajalakat Mateo 9:1-38
-
Anashi nutuma Jesús wanee wayuu makutulaainkai sutuma ayuulii (1-8)
-
Neenajaain Jesús Mateo süpüla nümaataralin nia (9-13)
-
Asakinnüshi Jesús süchiki jamüin maamajüinka na nikirajüinkana (14-17)
-
Nüchon Jairo, shipettüin wanee wayuu sot nüsheʼin Jesús (18-26)
-
Koʼupaʼashii nutuma Jesús waneinnua wayuu moʼupaʼasalii otta kanüika nutuma wanee wayuu manüisai (27-34)
-
Watta saalii tü pünajüt akotchojunakat, palitpejeʼe na aʼyataakana sünain (35-38)
9 Anuwaluʼushi Jesús süpüla nülatüin waneemüin saʼata palaakat, nüntaka nuumainpaʼamüin.
2 Nantapaaka wanee wayuuinnua nümaa wanee wayuu makutulaainkai sutuma ayuulii, alüʼüjiraanüshi nia natuma. Niyaawataka Jesús kanoulain naya wayuukana, nümakalaka nümüin chi wayuu makutulaainkai sutuma ayuulii: «Nnojo mojuin paaʼin tachee, alatinnüitpa paainjala puulia».
3 Anuujeseʼe nanüiki nüchiki Jesús wanee karaloʼutamaajana: «Eʼrüshi wayumüin chira nümüin Maleiwa süka nünüiki».
4 Nütüjaapejeʼe saaʼu Jesús tü suluʼukat naaʼin naya wayuukana. Nümakalaka namüin: «¿Jamüshiikai jia jülüjaka jaaʼin kasa mojusü?
5 ¿Kasache anaka saaʼin jümüin? ¿Shiache anaka tamüle nümüin chi wayuukai ‹alatinnüitpa paainjala puulia›? ¿Shiataapa anain tamüle nümüin ‹pütamaa pümaala püwarairaai›?
6 Jülüjataa jaaʼin tü taaʼinrajatkat süpüla jütüjaain saaʼu niʼitaanüin chi Süchonkai Wayuu yaa mmapaʼa süpüla nülatirüin saainjala wayuu». Nümakalaka nümüin chi wayuu makutulaainkai sutuma ayuulii: «Pütamaa pümaala, paapaa türa pujulejiakat, puʼuna pümaala pipialuʼumüin».
7 Nütamaaka chia wayuukai sümaa nuʼunuin nipialuʼumüin.
8 Ponoko maʼin saaʼin wayuu tü kasa naaʼinrakat Jesús, suʼwaajaka Maleiwa süka naapüin laülawaa sümüin wayuu süpüla suuntajatüin saaʼinrüin tia.
9 Shiasaʼa nuʼunapa Jesús yalejee, niʼrüin wanee wayuu kanüliashi Mateo joyotuin suluʼu tü miichi eere süchekajünüin nneerü neʼipajee na sülaülakana mma. Anuujeseʼe nünüiki Jesús nümüin: «Anashi tamaataraire pia». Nütamaaka Mateo sümaa nuʼunuin nümaa.
10 Eejachikalaka Jesús sünain ekawaa suluʼu wanee miichi, nantapaaka waneinnua wayuu kaainjaralii namaa wanee achekajülii nneerü neʼipajee na sülaülakana mma. Nekaakalaka nümaa Jesús otta namaa na nikirajüinkana.
11 Neʼrapa tia na fariseokana, namakalaka namüin na nikirajüinkana Jesús: «¿Jamüshi nikaakaʼa chi ekirajakai jia namaa na achekajüliikana nneerü jee namaa na wayuu kaainjaraliikana?».
12 Nusoutaka Jesús namüin naapapa nanüiki: «Nnojotsü choʼujaain niʼrajeʼerüin wanee wayuu anale nia. Akaajasaʼa ayuuire nia, oʼunushi nümaʼanamüin wanee tottoot.
13 Anakajaʼa jiyaawatüle saaʼu jamaluʼuluin pütchikat tüü: ‹Shia tachekaka jümülialaain aaʼin saalin wayuu, nnojotsü juʼutajatüin neʼe saaʼin mürüt tamüin›. Jee müshia taya nnojoishi antüshin süpüla ekirajaa na lotokana akuwaʼipa, naya tekirajüinjanaka na kaainjaraliikana».
14 Narütkaakalaka na nikirajüinkana Juan nünainmüin Jesús jee nasakiraka nia: «¿Jamüshii wayakaʼa aamajüin wanaa namaa na fariseokana? ¿Jamakaʼa maamajüinka na pikirajüinkana?».
15 Nümaka Jesús namüin: «Jamüsüjaʼa eetaale wanee miʼiraa shikiira kaʼwayuusee, nnojotsü mojuin naaʼin naʼaleewainyuu chi wayuu kaʼwayuuseinjachikai, jama eein nia namaa, ¿aashi müin? Eejeetpejeʼe wanee kaʼi nümaaneechika oʼu chi kaʼwayuuseinjachikai, naamajeenaka naʼaleewainyuu naalinjee.
16 Nnojotsü aruwentajünüin wanee kuluulu eekai laülaain süka wanee eekai jeketüin, süka süsüküijaweerüin tü kuluulu laülaakat sutuma tü kuluulu jeketükat shiyuluʼutapa shia.
17 Nnojotsü alaʼannüin wanee wiino eekai jeketüin suluʼu wanee süta* wiino eekai laülaairüin. Mülejeʼe shia atumawaa eesü süpüla süchatajaain, amüla meeria tü wiinokot. Nnojoleerü kasain anain apüla tü sütakat wiino. Eekajasaʼa sutuma wayuu, alaʼannüsü tü wiino jeketükat suluʼu wanee eekai jeketüin. Nnojotka amüloulin tü wiinokot otta tü sütasükat».
18 Sümaʼainruʼu yootuin Jesús süchiki tia, nürütkaaka wanee wayuu aluwataashi nünainmüin sümaa nüsapainkain nia nümülatuʼu jee nümüin nümüin: «Eesüjaʼa sünaajaaitpale tü tachonkat müinmaʼa yaa. Anakajaʼa puʼunule tamaa süpüla piʼitaainjachin tü pajapükat saaʼu, süsoʼiraweetkalaka aaʼin».
19 Nuʼunakalaka Jesús nümaa chia wayuukai namaʼaleeya na nikirajüinkana.
20 Eekalaka wanee wayuu polooirü piamamüin juya amülain isha sümüin. Sürütkaakalaka nünainmüin Jesús nüchiiruajee, shipettakalaka sot nüsheʼin.
21 Müsü tia wayuukot suluʼu saaʼin: «Aneetpejeʼe taya müleka tepettüle neʼe nüsheʼin».
22 Nümakalaka Jesús sümüin niʼraiwaʼaya shia: «Nii waaʼiraa, nnojo mojuin paaʼin, anaitpa pia süka kanoulain pia». Anatüjütka tia wayuukot soʼuleʼeya tia.
23 Nüntapa Jesús suluʼumüin nipia chi aluwataashikai, niʼrüin wayuu sünain aʼyalajiraa tü kanüliakat «flauta» jee watta naalii na alapajakana.
24 Nümaka Jesús namüin: «Anashii juʼunule, nnojotsü outuin türa jintutkat, atunkusü neʼe». Nasirajayaa namaka na wayuukana nüka Jesús naapaiwaʼaya tü nümakat.
25 Nojuʼitinnapa anooipaʼamüin na wayuukana, nikerotaka Jesús eejatüle tü jintutkat. Naapaakalaka sajapü jee sütamaakalaka.
26 Suʼwalakajaaka sainküin tia mmakat süchiki tü naaʼinrakat Jesús.
27 Shiasaʼa nuʼunapa Jesús yalejee, naʼwaataka piamashii wayuu moʼusalii nüchiiruajee: «Pümüliajaʼaya waya, piakai Nüchonkai David».
28 Nüntapa Jesús suluʼumüin tü miichikat, narütkaaka na moʼusaliikana nünainmüin jee nüsakiraka naya: «¿Junouja anainrü aneenain jia tatuma?». «Aa, wanouja anainrü Señotkalee», namakalaka nümüin.
29 Niʼitaaka Jesús najapü sünain noʼu na moʼusaliikana jee nümaka namüin: «Anasüjaʼamata shiale alatüin jümüin tü juchuntakat wanaapünaa sümaa tü junoulakat».
30 Koʼu müshiijaʼa naya wayuukana, nüchiaapejeʼe naya Jesús sünain nümüin namüin: «Jüküjaʼalayaai süchiki tia sümüin wayuu».
31 Naküjapejeʼe süchiki tia sainküinpünaa tia mmakat noʼunapa nümaʼanajee Jesús.
32 Noʼunapa naya wayuukana, nüntinnakaʼa nümaʼanamüin Jesús wanee wayuu manüisai kaleʼeruʼushi yolujaa.
33 Kanüika chi wayuukai süka nujuʼitirüin Jesús tü yolujaakat nüleʼeruʼujee. Ponoko maʼin saaʼin wayuu tia jee majiraashii naya: «Nnojotsü alatüirüin wanee kasa eekai müin aka tia yaa Israel».
34 Mapajeʼe nanüiki na fariseokana: «Nujuʼitirüin tü yolujaakat sükajee nüpülain chi sülaülashikai yolujaa».
35 Nuʼunaka Jesús sainküin pueulo eekai miyoʼuin jee eekai joʼuuchoin. Ekirajüshi nia suluʼu tü ekirajüleekat nüchiki Maleiwa. Aküjashi nia pütchi anasü süchiki niainjachin aluwataain Maleiwa saaʼu wayuu. Anasü nutuma wayuu eekai ayuulin sutuma ayuulii eekai eein.
36 Amülialaasü naaʼin Jesús naalin na wayuukana süka müliain naya niʼrüin. Müshii unatakai naaʼin maʼaka saaʼin anneerü eekai marüleejuuin.
37 Nümaka Jesús namüin na nikirajüinkana: «Watta saalii tü pünajüt eekai keraairüin süpüla akotchojünaa, palitpejeʼe na wayuu aʼyataakana sünain.
38 Shiaka anain juchuntule nümüin chi Kaʼttiashikai tü pünajütkat süpüla nuluwataainjanain wayuu aʼyataainjanakana sünain».
Noota
^ Tia sütakat wiino, aainjuushi süka süta mürüt. Pünaʼla tia suluʼu tü kanüliakat «Jamaluʼulu pütchikat».
