Karaloʼuta namüinjatka na chajanakana Roma 10:1-21
10 Tawalayuwaa, keeʼireesü maʼin taaʼin noʼtteʼennajanain na israelitakana, shiaʼaya tachuntaka maʼin tia nümüin Maleiwa.
2 Tatüjaa aaʼuchii naʼyataweein nümüin Maleiwa, nnojotpejeʼe nayaawatüin saaʼu tü nuchuntakat Maleiwa.
3 Saaʼujee nnojoluin natüjaain saaʼu tü kasa lotokalü akuwaʼipa naashin Maleiwa, naainjain neʼe tü kasa anakat saaʼin namüin, nnojotkalaka naaʼinrüin tü kasa anakat noʼuluʼu Maleiwa.
4 Nüshaʼwaleʼera akuwaʼipat Cristo tü Pütchi Aapünakat nümüin Moisés, suluʼujee tia, lotusü nakuwaʼipa napüshuaʼa na wayuu kanoulakana nünain.
5 Ashajüshi Moisés süchiki tü naaʼinrajatkat wanee wayuu eekai loteein akuwaʼipa noʼuluʼu Maleiwa wanaapünaa sümaa tü Pütchi Aapünakat nümüin Moisés, anuu tü nüshajakat: «Kateechi oʼu waneepia chi wayuu oonookai sümaa pütchikat tüü».
6 Ashajünapejeʼe suluʼu tü Karaloʼuta Nüchikimaajatkat Maleiwa nüchiki chi wayuu lotokoi akuwaʼipa sünainjee kanoulain nia, anuu tü ashajünakat: «‹¿Jaraleechi oʼunaka sirumatuʼumüin?›, nnojoishi müinjachin pia suluʼu paaʼin. ¿Jaraleechi oʼunaka sirumatuʼumüin süpüla nüshakatirüin Cristo?, maluʼulu tia pütchikat.
7 ‹¿Jaraleechi ashakataka shiinaluʼumüin mma?›,* nnojotsü müinjatüin pünüikiya. ¿Jaraleechi ashakataka shiinaluʼumüin mma süpüla nüsoʼireʼerüin naaʼin Cristo?, maluʼulu tia pütchikat».
8 ¿Jamüsü sünüiki tü Karaloʼuta Nüchikimaajatkat Maleiwa? Anuu sünüiki: «Nnojotsü wattain tü pütchikat puulia. Puwaraluʼusü shia jee suluʼusü shia paaʼin», tia shia «tü pütchi» waküjakat sümüin wayuu, kanoulainjatü wanee wayuu süpüla saapaain sümaa tia.
9 Oʼtteʼenneechi pia püküjale suʼupala wayuu niain Jesús chi Señotkai otta kanoulale pia suluʼu paaʼin sünain nüsoʼireʼennüin aaʼin nutuma Maleiwa süchikijee outaa.
10 Jaʼyainjatü paaʼu sükajee tü suluʼukat paaʼin kanoulain pia süpüla lotuin pukuwaʼipa jee oʼtteʼenneechi pia püküjale pütchi sümüin wayuu.
11 Anuu sünüiki tü Karaloʼuta Nüchikimaajatkat Maleiwa: «Nnojoleechi amülain neʼe chi wayuu kanoulakai nünain».
12 Nnojotsü kasain naatain aluʼu nukuwaʼipa wanee wayuu judío nuulia wanee griego, waneeshia neʼe chi Naseñotsekai,* nia chi akaalinjakai maʼin wayuu eekai suchuntuin kaalinwaa nümüin.
13 «Nieechi oʼttaaka chi wayuu achuntakai nünülia Jehová».*
14 ¿Jamakuwaʼipaliinjana süpüla nachuntuin nünülia manoujainre naya nünain? ¿Jamakuwaʼipaliinjana süpüla kanoulain naya nünain nnojoliire naapüin nüchiki? ¿Jamakuwaʼipaliinjana süpüla naapüin nüchiki nnojorüle wayuu aküjaka pütchi namüin?
15 ¿Jamakuwaʼipaliinjana süpüla naküjain pütchi nnojoliire najütünüin sünain aaʼinraa tia? Anuu sünüiki tü Karaloʼuta Nüchikimaajatkat Maleiwa: «Anashii maʼin eʼraa na wayuu* aküjakana tü pütchi anakat maʼin* süchiki kasa eekai anain».
16 Nnojoliipejeʼe naya oonooin napüshuaʼa sümaa tü pütchi anakat maʼin, anuu nünüiki Isaías süchiki tia: «Jehová,* ¿eetaayaai jaralüin anoujain sünain tü wamakat?».
17 Kanoulashi wanee wayuu sükajee naapüin tü pütchikat jee tü pütchi naapakat shia tü nüchikikat Cristo.
18 Anuupejeʼe wanee kasa tasakireeka anain nachiki na israelitakana, ¿nnojotsüchejeʼe naapajüin tü pütchikat? Aa, naapajüinyaaje, anuʼusa sünüiki tü Karaloʼuta Nüchikimaajatkat Maleiwa süchiki tia: «Aapünüsü wanee pütchi sainküinpünaa tü mmakat. Saapüin shia wayuu maʼleekalia suluʼupünaa mma wattapünaa».
19 Asakitshi paala taya tachikuaʼa: ¿nnojotsüche natüjaain aaʼu tia na israelitakana? Anasü shiale taküjain jümüin palajana tü nümakat Moisés, anuu nünüiki: «Achumujeena jia tatuma naaʼujee na wayuu nnojoliikana israelitain. Jashicheena maʼin jia tatuma namüin na wayuu nnojoliikana kasain natüjaain aaʼu».
20 Anuupejeʼe nünüiki Isaías sümaa yalayalain naaʼin: «Antüshii tanainmüin na wayuu nnojoliikana achajaain tachiki jee neʼraajüin taya na wayuu nnojoliikana asakirüin tanain».
21 Anuupejeʼe nünüiki nachiki na israelitakana: «Siraasü kaʼi taaʼu shiiʼiree tarütkeʼereein tanainmüin na wayuu nnojoliikana jaa meein tamüin, eʼrülii neʼe naya wayumüin».
Noota
^ «Abismo» maluʼulu tia suluʼu griego. Pünaʼla tia suluʼu tü kanüliakat «Jamaluʼulu pütchikat».
^ Eeshijaʼa niale «Señot» münüin amüin Jehová jee niale Jesús.
^ Pünaʼla tia suluʼu tü kanüliakat «Sooʼomüin pütchi A5».
^ «Nooʼui» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
