Karaloʼuta namüinjatka na chajanakana Roma 11:1-36
11 Asakitshi paala taya, ¿niyüülajüinche Maleiwa na israelitakana? Nnojottaa. Wayuu israelita taya, nülüin taya Abrahán, napüshi taya na nüchooinkana Benjamín.
2 Nnojoishii niyüülajüin Maleiwa na israelitakana, jama nayain nüneekatüjüliin paala. ¿Nnojotsükai jütüjaain saaʼu tü sümakat tü Karaloʼuta Nüchikimaajatkat Maleiwa, tü aashajaakat süchiki tü nüküjakat Elías nümüin Maleiwa nachiki na israelitakana?
3 Anuu nünüiki Elías: «Jehovákalee,* noʼuta aaʼinchii na wayuu pünüikimaajanakana otta nojunnajirüin tü eere saʼajünapuʼuin pümüin wanee kasa, tayaʼala neʼe apütaaka, oʼutuneepejeʼe taaʼin* maaʼulu».
4 Anuujeseʼe nünüiki Maleiwa nümüin: «Eeyüliʼiya 7.000 wayuu tamaajana nnojoliikana aʼwaajüin Baal».
5 Maaʼutpünaa yaa, eeyüliʼiya paliʼirü israelita nüneekakana Maleiwa süka kamaneein maʼin nia.
6 Nüneeküin naya Maleiwa saaʼujee kamaneein nia namüin, nnojotsü saaʼujeejatüin naaʼinrüin wanee kasa. Naneekünülejeʼeya nutuma Maleiwa sünainjee naʼyataain maʼin süchiirua tia, nnojotsüjaʼamata choʼujaain kamaneein nia namüin.
7 ¿Jamüsüche paala tanüiki süchiki tia? Nnojotsü nountuin na israelitakana tü keeʼireekat maʼin naaʼin, nountapejeʼe tia na wayuu aneekuushikana. Eepejeʼe na nnojoliikana kasajanain amüin tia
8 maʼaka süküjünüin suluʼu tü Karaloʼuta Nüchikimaajatkat Maleiwa eere sümüin: «Müsü nüntirakai saaʼin Maleiwa naaʼumüin naya wayuukana wanee lapü kaʼlekat maʼin süpüla nnojoluinjatüin neʼrüin wanee kasa jee süpüla nnojoluinjatüin naapüin wanee kasa. Ayatayülia müin nakuwaʼipa maaʼulu yaa».
9 Anuu nünüiki David: «Watta saalii tü kasa anasü neʼrakat, tü makalü aka saaʼin wanee ekawaa, kasataalejeseʼe müin sütaʼülakai saaʼin nakuwaʼipa tia makat, kasalajaneetka naainjala namüin.
10 Kasataalejeseʼe müin shipiʼyuushijaakai aaʼin noʼupaʼaluʼu süpüla nnojoluinjatüin neʼrüin wanee kasa. Otta kasataalejeseʼe müin jokotokoi naaʼin suupünaa wanee kasa eekai jawatüin».
11 Anuupejeʼe tanüiki: ¿Matamaainreesaliiche na judíokana süchikijee müin wototokoi naaʼin? Atamaashii. Nayapejeʼe oʼttaain suluʼujee tia na wayuu nnojoliikana judíoin. Suchunjaka naaʼin na judíokana naaʼujee naya wayuukana.
12 Sünainjee müin wototokoi naaʼin, eʼrüsü wayuu anaa suluʼujee tia otta süka müin napaliʼirajakai aaʼin, eʼraleeshiʼiya anaa na wayuu nnojoliikana judíoin. Miyoʼuleejeetpejeʼe tü anaa neʼreetkat, kottapa na judíokana namaa na wayuu nnojoliikana judíoin.
13 Anuu tanüiki jümüin jia wayuu nnojoliikana judíoin, ajütüüshi taya jümaʼanamüin, kojutuka maʼin tamüin tü taʼyataainkat nümüin Maleiwa.
14 Kasataalejeseʼe suchunjain naaʼin na tapüshi judíokana saaʼujee tü kasa aapünakat jümüin, kamaʼa noʼttaweenale napüshi.
15 Niyüülajüin naya Maleiwa, aleewaitpaka wayuu nümaa suluʼujee tia. ¿Jameetkalaka nakuwaʼipa noʼtteʼennapa nachikuaʼa nutuma? Meena nasoʼiraakai aaʼin süchikijee outaa.
16 Wulerejeʼeya tü palajatkat saʼata wanee pan, wulesüjaʼaya shia süpüshuaʼa. Analejeʼeya suurala wanee wunuʼu, anasüjaʼamata tü sütünakat.
17 Ashoʼttunusü süpüshi sütüna tü wunuʼu kanüliakalü olivo süpüla piʼitaanajachin saʼakamüin tü sütünakat eerejeʼe olivoin wünaʼapüjachi pia. Anaichikalaka pia sünainjee suurula tia wunuʼukat.
18 Nnojotkalaka anain jülüjale paaʼin piain anaʼleein maʼin akuwaʼipa suulia tü wane sütünakat. Jülüjalejeʼeya paaʼin tia, soteesü paaʼin nnojolin piain anain atuma suurula tia wunuʼukat, pia neʼe anaka sünainjee.
19 Eeshijaʼa pümeechire: «Ashoʼlojünüsü süpüshi sütüna tia wunuʼukat süpüla teʼitaanajachin shiiʼirakaluʼu».
20 Shiimainñaaje tia pümakat, ashoʼlojünüsü süpüshi sütüna tia wunuʼukat süka müin shia maʼaka saaʼin wanee wayuu eekai manoulain, aniiyüitpejeʼe pia süka kanoulain pia. Nnojotkalaka anain yaletayaale paaʼin, jalia pia suulia tia.
21 Nüshoʼttirülejeʼeya Maleiwa sütüna tia wunuʼukat, ¿pieechikajaʼa nnojolin nüshoʼttireematüin?
22 Piʼrüin nümanee chi Maleiwakai, eepejeʼe naashichijaale sooʼomüin wayuu. Aashichijaashi nia nooʼomüin na wayuu nnojoliikana kanoulain nünain, kamaneejeechipejeʼe nia pümüin ayatüle paaʼinrüin wanee kasa kamaneejeechika aaʼujee nia pümüin. Nnojorüle paainjain tia, ashoʼttuneechi pia sünainjee tia wunuʼukat.
23 Jamüshiijaʼa kanoulataale nachikuaʼa na judíokana, eʼitaaneena naya nachikuaʼa maʼaka shiʼitaanüin süchikuaʼa sütüna wanee wunuʼu, jama nnojolin isain nüchiki Maleiwa naaʼinrüin tia napüleerua.
24 Ashoʼttuushi pia sünainjee wanee olivo wünaʼapüjatü jee piʼitaanaka sünain wanee olivo apünajuushi, eerejeʼe nnojoluin maajaajüin sukuwaʼipa tia atumawaa. Shiaka nnojoluin eʼitaaneematüin süchikuaʼa tü sütünatüjütkalia tia olivokot.
25 Tawalayuwaa, shia tachekaka jüpüleerua jiyaawatajatüin saaʼu tü kasa nütüjaakalü aaʼu Maleiwa süpüla nnojoluinjatüin jülüjain jaaʼin wayuuin kekiishii jia. Nnojoishii jaa müin napüshi na israelitakana, ayateeria müin tia kottoleepa atumawaa napüshuaʼa na wayuu nnojoliikana judíoin, na aneekuushikana nutuma Maleiwa.
26 Meeriaʼaya sukuwaʼipa tia atumawaa süpüla noʼtteʼennajanain napüshuaʼa na israelitakana. Maʼaka süküjünüin suluʼu tü Karaloʼuta Nüchikimaajatkat Maleiwa, tü makat mayaa: «Anteechi Sionjee chi oʼtteʼereechikai naya, najaʼttireetka süpüshuaʼa tü kasa mojusü naaʼinrakat na nüikeyuukana Jacob.
27 Talatirapa sooʼopünaa taaʼin naainjala, tapansaajeerü tanüiki namaa».
28 Shiimainñaaje eein na judío ayoutakana süchiki tü pütchi anakat maʼin, anaitka jukuwaʼipa suluʼujee tia. Nayapejeʼe aneekünatüjüliin na judíokana nutuma Maleiwa otta aishii naya nüpüla nanainjee na natuushinuukana.
29 Nnojoleerü isain naaʼin Maleiwa süchiirua tü kasa anasü naapakat sümüin wayuu otta nnojoleerü wainmajüin naaʼin naaʼujee na wayuu nüneekakana.
30 Nnojoipuʼushii jia oonooin sümaa nünüiki Maleiwa, amülialaapejeʼe naaʼin Maleiwa jaalin süka nnojoliin noonooin na judíokana sümaa nünüiki.
31 Saaʼujee nnojoliin noonooin na judíokana, amülialaasü naaʼin Maleiwa jaalin. Eepejeʼe süpüla nümülialaain Maleiwa naalin nayakana maʼaka sümülialaain naaʼin jaalin.
32 Müshii püreesakai naaʼin napüshuaʼa nutuma Maleiwa süka nnojoliin noonooin sümaa nünüiki, naaʼinrüin tia süpüla nümülialaain aaʼin naalin napüshuaʼa.
33 Alanaʼaleesia maʼin tü kasa naapakat Maleiwa, kekiishi maʼin nia jee atüjashi maʼin nia. Nnojotsü ayaawatünüin aaʼu jamüin sukuwaʼipa nutuma süpüla kasalajanainjatüin saainjala wayuu jee nnojotsü atüjaanüin maʼin saaʼu süpüshuaʼa tü kasa naainjakat.
34 «¿Eeshiche wanee wayuu atüjaakai saaʼu tü jülüjakat naaʼin Jehová?* ¿Eeshiche wanee wayuu aküjakai nümüin tü anakat süpüla naaʼinrüin?».
35 «¿Eeshiche wanee wayuu aapakai wanee kasa nümüin Maleiwa süpüla nuwalaajüinjatüin shia Maleiwa nümüin?».
36 Nükorolo Maleiwa kasa süpüshuaʼa, eesü shia nutuma jee süpülajatü shia tü keeʼireekat naaʼin. Niainjachi aʼwaajünaka süpüla kaʼikat süpüshuaʼa. Amén.*
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Jamaluʼulu pütchikat».
