Karaloʼuta namüinjatka na chajanakana Roma 12:1-21
12 Tawalayuwaa, saaʼu nümülialaain Maleiwa jaalin, tachuntuin maʼin jümüin süpüla müinjanain jaapakai saaʼin jiʼiruku nümüin jee müinjatü jaapakai saaʼin jaaʼin nümüin, jaapüinjatü tia nümüin maʼaka saaʼin wanee kasa eekai wulein, aneetkalaka shia noʼuluʼu. Jiʼyataa nümüin süka süpüshuaʼa tü jülüjakat jaaʼin.
2 Juuʼulaa suulia ashataa nakuwaʼipa na manoujainsaliikana,* shia anaka jiiʼiratüle tü jülüjakat jaaʼin, jiyaawateetkalaka saaʼu anain maʼin tü nüchekakat Maleiwa, aneerü sukuwaʼipa wayuu sutuma jee loteerü maʼin sukuwaʼipa.
3 Sutuma kamaneein maʼin Maleiwa tamüin, tachuntuin jümüin waneʼewai jukua, nnojoluinjatüin jülüjain jaaʼin jiain anaʼleein maʼin akuwaʼipa. Jiyaawata saaʼu jukuwaʼipa suulia sülanaʼaleein tü jülüjakat jaaʼin jüchikijiraa, jama nükaalinjain jia Maleiwa waneʼewai jukua süpüla jiʼitaainjanain jaaʼin nünain.
4 Jamüshijaʼa wanee wayuu, kajapüshi, koʼushi, kooʼuishi jee eesü waneirua kasa nünain. Nnojotpejeʼe wanaawawalain tü kasa naaʼinrakat süka.
5 Akaataajaʼa neʼe wakuwaʼipa, mayaainjeʼe wainmain waya müshii waya maʼaka naaʼin wanee wayuu aʼaniraakai akuwaʼipa nümaa Cristo. Paaʼinwajiraakalaka waya wapüshuaʼa.
6 Kamaneeshi maʼin chi Maleiwakai wamüin, naatayaa müsü tü kasa watüjakalü apüleerua nutuma. Shiale watüjain apüleerua aküjaa tü pütchi nüchikimaajatkat Maleiwa, anasü waküjale süchiki tia, jama nükaalinjain waya Maleiwa waneʼewai wakua süpüla weʼitaainjanain waaʼin nünain.
7 Watüjale nutuma Maleiwa süpüleerua akaalinjaa wayuu, anasü waaʼinmaale maʼin tia. Watüjale süpüleerua ekirajaa, anashii waʼyataale maʼin sünain tia.
8 Watüjale süpüleerua atütüleʼeraa saaʼin wayuu, anashii waaʼinrüle tia. Watüjale asülajaa, anashii wasülajüliire maʼin. Chi wayuu atüjakai süpüleerua oʼuniraa sukuwaʼipa wanee kasa, anashi tütüle maʼin nia sünain aaʼinraa tia. Chi eekai nümüliajülin, anasü naaʼinrüle tia sümaa talataa aaʼin.
9 Nnojotsü aiyaainjatüin wayuu jüpüla. Jiyouta tü kasa eekai mojuin, jaaʼinra tü kasa eekai anain.
10 Anashii aijiraale jia maʼaka aijiraain wanee wayuu namaa nuwalayuu. Anashii palajanale jia sünain kojutuinjanain jutuma na juwalayuukana.
11 Aʼyataaliinjana jia, nnojoishii shokulainjanain jia. Juuʼulaa yalayalaiwa jaaʼin sutuma tü nüpülainkat Maleiwa. Jiʼyataa nümüin Jehová* süka süpüshuaʼa jaaʼin.
12 Anashii talatüle jia sünainjee tü kasa jaʼatapajakat. Jüchechera jaaʼin soʼunnaa müliaa. Nnojo juuʼulaain suulia oʼuraajaa.
13 Anashii jüsülajüle namüin na juwalayuu* eʼrakana müliaa. Kamanee jia sümüin wayuu.
14 Juchunta nümüin Maleiwa anaiwa nakuwaʼipa na wayuu müliakana atuma jia. Nnojo mojuin jünüiki nachiki.
15 Talata jaaʼin namaa na talatakana aaʼin, jiʼyalaja namaa na aʼyalajakana.
16 Kapüla jaaʼin nakuwaʼipa na waneinnua maʼaka kapülain jaaʼin jukuwaʼipa. Nnojo juʼwaataain suluʼu jukuwaʼipa, shia anaka aluʼu nnojorüle yaletüin jaaʼin. Nnojo jülüjain jaaʼin jütüjaleein maʼin noulia na waneinnua.
17 Saainjale wayuu jümüin kasa eekai mojuin, nnojo jaainjain kasa mojusü sümüin. Shia anaka aluʼu jaaʼinrüle tü kasa eekai anain sümüin wayuu.
18 Juuntulejeʼeya anajirawaa sümaa wayuu, anashii anajiraale jia namaa napüshuaʼa.
19 Nnojo pasalaweein jia tawalayuu aishiikana tapüla, juuʼulaa tia nüpüla Maleiwa. Anuu sünüiki tü Karaloʼuta Nüchikimaajatkat: «‹Tayeechi pasalaaka atuma wanee kasa, tayeechi achekajaka›, müshi Jehová».*
20 «Outule jamü jüʼünüü, anashi jikirüle nia, wüinñaasüle nia, jüsiʼra wüin. Poneetkalaka naaʼin jaaʼinrüle tia jee japüliwaajeechi nia suluʼujee tia.
21 Jaainja kasa eekai anain jaʼitasü saaʼinnüin kasa mojusü jümüin, suluʼujee tia, meerü jiyamütkai saaʼin tü kasa eekai mojuin.
Noota
^ Pünaʼla tü pütchikat «Tü kasa alatakat sainküin mma» suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Jee nayale «na aneekuushikana nutuma Maleiwa».
^ Pünaʼla tia suluʼu tü kanüliakat «Sooʼomüin pütchi A5».
