Karaloʼuta namüinjatka na chajanakana Roma 6:1-23
-
Jeketü wakuwaʼipa saaʼu woutiisain waya süpüla paaʼinwajiraain waya nümaa Cristo (1-11)
-
«Nnojo juuʼulaain süʼlaülaajaain tü kaainjalaakat jaaʼu» (12-14)
-
Süchepchiapuʼushii waya kaainjalaa, nüchepchiainnapa waya Maleiwa (15-23)
-
«Tü eekat sünainjee tü kaainjalaakat shia tü outaakat, eekajasaʼa tü nüsülajakat wamüin Maleiwa shia katüinjatüin woʼu» (23)
-
6 ¿Kamaneʼereejeeiche chi Maleiwakai wamüin ayatüle waaʼinrüin kasa mojusü?
2 Nnojottaa. Saaʼujee nnojoliinnapain sajapuluʼuin waya tü kaainjalaakat, ¿jalapünaainjanakaʼa kaainjalain waya?
3 ¿Nnojottaale jütüjaain saaʼu woutiisain waya wapüshuaʼa süpüla paaʼinwajiraain waya nümaa Cristo Jesús? Woutiisashii waya süpüla müin outakai waaʼin wanaa nümaa.
4 Maʼaka nojoitünüin Cristo soʼu outuin nia, müshiijaʼaya wojoitünakai aaʼin wanaa sümaa woutiisain waya. Maʼaka nüsoʼireʼennüin aaʼin Cristo nutuma chi Nüshikai sükajee tü nüpülainkat, müshiijaʼaya wasoʼireʼennakai aaʼin wanaa nümaa. Jeketüitkalaka tü wakuwaʼipakat.
5 Wanaawalejeʼeya waaʼin sünain outaa maʼaka outuin niakai, wanaaweerüjaʼaya waaʼin wanaa nümaa wasoʼiraapa aaʼin maʼaka nüsoʼiraain aaʼin niakai.
6 Müsü sükachennakai aaʼin tü wakuwaʼipapuʼukat wanaa sümaa nükachennüin süpüla outaa. Tia süpülajatü nnojoluinjatüin süʼlaülaajaain saaʼu weʼiruku tü kaainjalaakat otta wooʼulaainjanain suulia süchepchiain waya.
7 Chi wayuu eekai outuin, alaʼajaanüsü naainjala nuulia.
8 Müshii outakai waaʼin wanaa nümaa Cristo jee wanouja anainrü kateerüin woʼu wanaa nümaa.
9 Watüjaa aaʼu nnojoleechin outuin Cristo nüchikuaʼa, jama nüsoʼireʼennüichipain aaʼin süchikijee outaa jee nnojoluitpa laülaain tü outaakat naaʼu.
10 Outushi nia süpüla najaʼlajeʼerüinjatüin tü kaainjalaakat süpüla nnojorüleeinjatüin shia, katoʼuchi nia müinmaʼa yaa, naaʼinrüinjeseʼe tü nuluwataakalü anain Maleiwa.
11 Müinjana outakai jaaʼin suulia aainjaa kasa mojusü, müinjatpejeʼe katakai saaʼin joʼu süpüla jaaʼinrajatüin tü nuluwataakalü anain Maleiwa, jama juushikajaain süchiirua nukuwaʼipa Cristo Jesús.
12 Nnojo juuʼulaain süʼlaülaajaain tü kaainjalaakat jaaʼu. Nnojo jaapaain sümaa tü suchuntaakat jiʼiruku.
13 Nnojo jaapüin jaaʼin sünain aainjaa kasa mojusü shiiʼiree kaainjalainjanain jia. Jaapüinjatü jaaʼin nümüin Maleiwa, jama jüsoʼireʼennüinnapain aaʼin süchikijee outaa. Jaapüinjatü jaaʼin nümüin Maleiwa süpüla jaaʼinrüinjanain kasa anasü.
14 Nnojoluinjatü laülaain jaaʼu tü kaainjalaakat, jama nnojoluitpain choʼujaain joonooin sümaa tü Pütchi Aapünakat nümüin Moisés.* Talatüitpa jaaʼin süka kamaneein chi Maleiwakai jümüin.
15 ¿Aaʼinrüinjanache waya kasa mojusü süka kamaneein chi Maleiwakai wamüin otta süka nnojoluitpain choʼujaain woonooin sümaa tü Pütchi Aapünakat nümüin Moisés? Nnojorüleejaʼa süpüla waaʼinrajatüin tia.
16 ¿Nnojotsükai jütüjaain saaʼu nüchepchieenain jia wanee wayuu joonoole sümaa tü nuluwataakalü anain jia? Süchepchiale jia tü kaainjalaakat, outeena jia. Eekajasaʼa nüchepchiale jia Maleiwa sükajee joonooin sümaa nünüiki, loteerü jukuwaʼipa.
17 Süchepchiapuʼushii jia tü kaainjalaakat, waapapejeʼe analuʼut nümüin Maleiwa jaaʼu süka joonooinnapain süka süpüshuaʼa jaaʼin sümaa tü pütchi ekirajünakalü anain jia.
18 Taashipa jia suulia jaainjala, müinnapa süchepchiakai jaaʼin aaʼinraa tü kasa lotokalü akuwaʼipa.
19 Shia taashajaaka aka wanee pütchi eekai jiyaawatüin aaʼu, jama shiain jülüjain jaaʼin tü kasa suchuntaakat jiʼiruku. Süchepchiapuʼushii jia tia kasa suchuntaakat jiʼiruku süpüla jaaʼinrajanain wanee kasa eekai kashüülain maʼin jee wanee kasa eekai mojuin. Eekajasaʼa jooluʼu, müinjana süchepchiakai jaaʼin tü kasa lotokalü akuwaʼipa jee tü kasa wulekalü akuwaʼipa.
20 Süchepchiaiwaʼaya jia tü kaainjalaakat, nnojotpuʼusü choʼujaain jaaʼinrüin tü kasa lotokalü akuwaʼipa.
21 ¿Kasa eeka suluʼujee tü jukuwaʼipapuʼukat sümaiwa? Aainjapuʼushii jia kasa jiʼraka anainjee japülii jee eesü outaa suluʼujee tü jaaʼinrapuʼukat.
22 Saaʼujee taashinnapain jia suulia kaainjalaa, anasü wulere jukuwaʼipa, jama nüchepchiain jia Maleiwa, kateetkalaka joʼu süpüla kaʼikat süpüshuaʼa.
23 Tü eekat sünainjee tü kaainjalaakat shia tü outaakat, eekajasaʼa tü nüsülajakat wamüin Maleiwa shia katüinjatüin woʼu süpüla kaʼikat süpüshuaʼa nükajee Cristo Jesús chi Waseñotsekai.
Noota
^ Pünaʼla tia suluʼu tü kanüliakat «Jamaluʼulu pütchikat».
