Karaloʼuta namüinjatka na chajanakana Roma 7:1-25
7 Tawalayuwaa, anuu tanüiki jooluʼu jümüin jiakana atüjaakana saaʼu tü Pütchi Aapünakat nümüin Moisés. Jütüjaa aaʼu müin sülaülaajaakai aaʼin tü Pütchi Aapünakat nümüin Moisés naaʼu wanee wayuu kataiwaʼaya noʼu.
2 Saashin tü pütchi aluwataanakalü anain wayuu, ayatüsia kasaalüin wanee wayuu nümaa chi suʼwayuusekai kataiwaʼaya noʼu, outulejeʼeya nia, nnojoluitpa kasaalüin nümaa.
3 Kaʼwayuusere shia wanee wayuu yalejee kataiwaʼaya noʼu chi suʼwayuusekai, «eeʼirataasü nuulia» müneerü. Eekajaʼa outule chi suʼwayuusekai jutatüitpa sukuwaʼipa. Nnojoleerü kaainjalain shia kaʼwayuusere shia süchikuaʼa.
4 Tawalayuu, akaataajaʼaya neʼe sutuma naapajiraain nikii* Cristo, jutatüitpa jukuwaʼipa suulia tü Pütchi Aapünakat nümüin Moisés.* Alatüsiaʼaya tia süpüla niainjachin aluwataain jaaʼu wanee wayuu, nia chi asoʼireʼennakai aaʼin süchikijee outaa. Eeinnakalaka süpüla waʼyataain nümüin Maleiwa suluʼujee tia.
5 Waainjaiwaʼaya tü kasa mojusü suchuntaakat waaʼin, wayaawata aaʼu sükajee tü Pütchi Aapünakat nümüin Moisés mojuin tia kasa suchuntaakat waaʼin, jama eein süpüla outuin waya suluʼujee tia.
6 Taashitpa wakuwaʼipa suulia tü Pütchi Aapünakat nümüin Moisés, nnojoluitpa laülaain saaʼu wakuwaʼipa. Nüchepchiainnakalaka waya Maleiwa saaʼujee nuʼunirüin wakuwaʼipa sükajee tü nüpülainkat, nnojotsü shiain saaʼujee woonooin sümaa tü Pütchi Aapünakat nümüin Moisés.
7 ¿Eesüche tü mojukalü aaʼujee tü Pütchi Aapünakat nümüin Moisés? Nnojottaa. Nnojotsüjeʼe tatüjaain aaʼu mojuin wanee kasa nnojorüle tatüjaain saaʼu tü sümakat tü Pütchi Aapünakat nümüin Moisés. «Nnojo suchuntaain paaʼin wanee kasa naata kakorotshi», nnojoliire wamünüin amüin sünain tia pütchikat, nnojotsüjeʼe tatüjaain saaʼu mojuin tia.
8 Tayaawata aaʼu sükajee tia pütchi aluwataanakalü anain kasain maʼin wayu tü kaainjalaakat. Wainma neʼe tü kasa mojusü suchuntaakat taaʼin, eekalaka kaainjalaa suluʼujee tia. Nnojoliiwaʼaya saapünüin wamüin tü pütchi aluwataanakalü anain waya, nnojotsü sütüjaain aaʼu wayuu kaainjalain shia.
9 Katajatiaa toʼu taaʼinruʼu nnojoliiwaʼaya toonooin sümaa tü Pütchi Aapünakat nümüin Moisés. Saapünapa wamüin tia pütchikat, tayaawata aaʼu kasain wayu tü kaainjalaakat. Kaainjalashi taya, tayaawatakalaka saaʼu nnojoluinjatüin katüin toʼu.
10 Eʼrüshi neʼe taya outaa sutuma tü pütchi aluwataanakalü anain wayuu, tü katajatiaakalü atuma toʼu taaʼinruʼu.
11 Sükajee tü pütchi aluwataanakalü anain wayuu, tayaawata aaʼulu kasain wayu tü kaainjalaakat. Shimeejakalaka taya tü kaainjalaakat, outuichikalaka taya sutuma.
12 Tü Pütchi Aapünakat nümüin Moisés nümaʼanajeejatü Maleiwa. Akaʼaya tü pütchi aapünakat sümüin wayuu nümaʼanajeejatü niakai, lotusü sukuwaʼipa tia pütchikat otta pütchi anasü shia.
13 ¿Outakalaka taya sünainjee wanee kasa eekai anain? Nnojotsü sünainjeejatüin tia. Outushi taya sutuma tü kaainjalaakat. Anasü tü Pütchi Aapünakat nümüin Moisés, tayaawatüin sükajee shiain outuin atuma taya tü kaainjalaakat. Tatüjaakalaka saaʼu sükajee tü pütchi aluwataanakalü anain wayuu mojuin maʼin tü kaainjalaakat.
14 Watüjaa aaʼu nümaʼanajeejatüin Maleiwa tü Pütchi Aapünakat nümüin Moisés, nüküjala shia sükajee tü nüpülainkat. Taya mojuka akuwaʼipa, wayuu kaainjarai taya. Müshi toikünakai aaʼin süpüla süchepchiainjachin taya tü kaainjalaakat.
15 Nnojotsü tatüjaain aaʼu jamüin taaʼinraka wanee kasa, nnojotsü taaʼinrüin tü kasa taaʼinreekalü amüin, shia neʼe taaʼinraka tü kasa mojusü tayoutakat.
16 Tatüjaa aaʼulu anain tü Pütchi Aapünakat nümüin Moisés, ayatapejeʼe neʼe taainjain tü kasa nnojotkat taainjeein amüin.
17 Nnojoishi tayain kasirüin tü kasa mojusü taaʼinrakat, taainjain shia süka taleʼeruʼuin süchiki kaainjalaa.
18 Nnojotsü taleʼeruʼuin süchiki kasa eekai anain, wayuu kaainjarai taya. Mayaainjeʼe taainjeein sümüin wanee kasa eekai anain, isasiaʼaya neʼe tachiki.
19 Nnojotsü shiain taainjain tü kasa anasü taainjeekalü amüin, shia neʼe taainjaka tü kasa mojusü tayoutakalü achiki.
20 Shiale taainjain tü kasa mojusü nnojotkat taainjeein amüin, nnojoishi tayain kasirüin tia, taainjain neʼe tia süka taleʼeruʼuin süchiki kaainjalaa.
21 Anuukalaka maʼin tü kasa alatakat tamüin, taainjeepa sümüin wanee kasa eekai anain, shia neʼe taleʼeruʼuka achiki aaʼinraa kasa mojusü.
22 Shiaʼaya maʼin suluʼuka taaʼin toonooinjachin sümaa tü pütchi nuluwataakalü anain Maleiwa.
23 Tü kasa suchuntaakat teʼiruku naata maʼin suulia tü kasa yaakat tekiiruʼu, müsü peʼipaajiraakai saaʼin. Müshijeseʼe müin püreesakai taaʼin sutuma tü kaainjalaakat, jama shiain taleʼeruʼuin achiki tia.
24 Mojutaʼaleesüjaʼa maʼin takuwaʼipa. ¿Jaraleechi akaalinjaka taya suulia tü teʼiruku ajaʼttajatkat sutuma outaa?
25 Nia taapaka amüin analuʼut Maleiwa süka nuʼtteʼerüin taya nükajee Jesucristo chi Waseñotsekai. Sutuma tü kasa tekiiruʼukot, müshi süchepchiakai taaʼin tü pütchi nuluwataakalü anain Maleiwa. Eekajasaʼa sükajee tü teʼirukukot, süchepchiashi taya tü kaainjalaakat.
Noota
^ «Niʼiruku» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
