Karaloʼuta namüinjatka na chajanakana Roma 8:1-39
-
Katoʼuchii waya jee oʼtteʼennüshii waya sükajee nüpülain Maleiwa (1-11)
-
Watüjaaitpa saaʼu sutuma tü nüpülainkat Maleiwa, nüchooinnapain waya Maleiwa (12-17)
-
Tü nukumalakat Maleiwa saʼatapajüin taashin nakuwaʼipa na nüchooinkana Maleiwa (18-25)
-
Nükaalinjeena waya Maleiwa sükajee tü nüpülainkat (26, 27)
-
Na wayuu nüneekatüjüliikana Maleiwa paala (28-30)
-
Oʼttaashii waya sutuma wakaalinjünüin nutuma Maleiwa, chi aikai apüla waya (31-39)
8 Na wayuu paaʼinwakana nümaa Cristo Jesús nnojoleerü kasalajanain namüin naainjala.
2 Chi Maleiwa aapakai kataa oʼuu, nuʼtteʼerüin sükajee tü nüpülainkat na wayuu oushikajaakana süchiirua nukuwaʼipa Cristo Jesús. Nuʼtteʼerüin naya suulia kaainjalaa jee suulia outaa.
3 Nnojotsü taashin wayuu suulia saainjala sutuma tü Pütchi Aapünakat nümüin Moisés, jama nnojoluin lotuin sukuwaʼipa wayuu. Taashipejeʼe shia nutuma Maleiwa süka nuluwataain chi Nüchonkai suluʼu müin nia maʼaka saaʼin wayuu, niyoutakalaka Maleiwa süchiki tü kasa mojusü saaʼinrakat wayuu.
4 Wooʼulaain nuʼunirüin Maleiwa wakuwaʼipa sükajee tü nüpülainkat, wountuinjeseʼe waaʼinrüin tü sümakat tü Pütchi Aapünakat nümüin Moisés. Nnojotkalaka waaʼinrüin tü suchuntaakat weʼiruku.
5 Na wayuu aaʼinrakana tü kasa suchuntaakat neʼiruku, jülüjasü naaʼin waneepia kasa mojusü. Akaajasaʼa na wayuu oʼuninnakana akuwaʼipa nutuma Maleiwa sükajee tü nüpülainkat, shia jülüjaka naaʼin tü kasa nüchekakat Maleiwa napüleerua.
6 Kaluʼusü outaa jülüjakuʼu sümüle waaʼin tü kasa mojusü kaainjalakalü atuma waya. Akaajasaʼa jülüjale waaʼin tü kasa nümakat wamüin chi Maleiwakai sükajee tü nüpülainkat, kateerü woʼu otta jimateerü waaʼin.
7 Nüʼünüüjeena waya Maleiwa shiale neʼe jülüjain waaʼin tü kasa mojusü suchuntaakat weʼiruku. Nnojotsü süpüla noonooin sümaa tü nuluwataakalü anain Maleiwa wanee wayuu eekai kaainjaralin, isasü nüchiki aaʼinraa tia makat.
8 Na wayuu aaʼinrakana neʼe tü kasa mojusü suchuntaakat neʼiruku, nnojotsü anain nakuwaʼipa noʼuluʼu Maleiwa.
9 Tawalayuwaa, shiimainrejeʼeya naapüin jümüin Maleiwa tü nüpülainkat, nnojotsüjaʼamata jaaʼinrüin tü kasa mojusü suchuntaakat jiʼiruku. Shia jaaʼinraka tü nümakat chi Maleiwakai jümüin sükajee tü nüpülainkat. Chi wayuu nnojoikai müin akuwaʼipa maʼaka saaʼin nukuwaʼipa Cristo, nnojoishijaʼamata nümaajachin nia.
10 Naapeerü Maleiwa kataa oʼuu jümüin sükajee tü nüpülainkat paaʼinwale jia nümaa Cristo, jama lotuitpain jukuwaʼipa noʼuluʼu Maleiwa, jaʼitasü müin outakai saaʼin jiʼiruku sutuma tü kaainjalaakat.
11 Eerejeʼeya jaaʼu tü nüpülainkat Maleiwa, tü nüsoʼirakalü akajee naaʼin Cristo Jesús, kateeriaʼaya joʼu* nutuma Maleiwa sükajee tü nüpülainkat.
12 Tawalayuwaa, nnojotkalaka waaʼinrajatüin tü kasa mojusü suchuntaakat weʼiruku.
13 Shiimain outeenain jia shiale jaaʼinrüin tü kasa mojusü suchuntaakat jiʼiruku. Akaajasaʼa juuʼulaale nuʼunirüin Maleiwa jukuwaʼipa sükajee tü nüpülainkat, meerü juʼutakai saaʼin tü kasa mojusü jaaʼinrawaikat, kateetkalaka joʼu suluʼujee tia.
14 Nayainjaʼaya nüchonniin Maleiwa na wayuu oʼuninnakana akuwaʼipa nutuma sükajee tü nüpülainkat.
15 Nnojotsü naapüin jümüin chi Maleiwakai tü nüpülainkat süpüla müinjanain jia maʼaka naaʼin wanee achepchiee jee süpüla mmoluwaakuʼu sümüinjatüin jaaʼin. Naapüin jümüin tü nüpülainkat süpüla müinjanain jia maʼaka naaʼin nüchonnii. Eeinnapakalaka süpüla wamüin nümüin Maleiwa sümaa emetuluin wanüiki: «¡Abba, Tashikalee!».
16 Watüjaaitpakalaka saaʼu sutuma tü nüpülainkat Maleiwa, nüchooinnapain waya Maleiwa.
17 Nüchooinrejeʼeya waya Maleiwa, aapeechi nia kasa anasü wamüin maʼaka naapüin kasa anasü nümüin Cristo. Müliainjanapejeʼe waya palajana maʼaka müliain Cristo, kojuteenakalaka waya wanaa nümaa.
18 Kojuteena waya nutuma Maleiwa, alanaʼaleesia maʼin tia suulia tü müliaa weʼrakat maaʼulu.
19 Süpüshuaʼa tü nukumalakat Maleiwa saʼatapajüin maʼin tü kaʼi niiʼiyatajanakana oʼu Maleiwa na nüchooinkana.
20 Nnojotsü sücheküin tü nukumalakat Maleiwa shiyüülajünajatüin, nuuʼulaapejeʼe Maleiwa sülatüin tia. Soʼu tü kaʼi nüküjakalü oʼu Maleiwa tia sümüin, nüküjaleeinña shiʼreerüin kasa anasü.
21 Nütüjaa aaʼu Maleiwa taasheerüin tü kasa nukumalakat suulia kaainjalaa jee suulia outaa. Taasheetkalaka sukuwaʼipa maʼaka taashin nakuwaʼipa na nüchooinkana Maleiwa.
22 Watüjaa aaʼu müin shiʼyalajakai aaʼin tü kasa nukumalakat Maleiwa otta ayatayülia shia eʼrüin sümüliala.
23 Naapüin wamüin Maleiwa tü nüpülainkat. Shiyaawasesü tia nutuma tü kasa eeinjateetkat mapeena. Müshii waʼyalajakai aaʼin sujuuna waʼatapüin nüchooinjanain waya Maleiwa. Naainjeerü tia Maleiwa süka nuʼtteʼerüin waya Cristo suulia tü kasa kaainjalakalü atuma weʼiruku jee outaka anainjee shia.
24 Wanaa sümaa woʼtteʼennüin, jülüjasü waaʼin tü kasa waʼatapajakat. Nnojotsü aʼatapajünüin wanee kasa eekai shiʼnnüin. ¿Naʼatapeetche wanee wayuu wanee kasa eekai niʼrüin?
25 Shiapejeʼe waʼatapüin maʼin wanee kasa nnojotka weʼrüin, wachecherüin waaʼin soʼunnaa tia mayaapejeʼe weʼrüin müliaa.
26 Matchinre waaʼin eejeerü tü kaʼi kapüleejeetkalü oʼu wamüin watüjaain saaʼu tü wachuntajatkalü ooʼopünaa nümüin Maleiwa. Nükaalinjeenapejeʼe waya Maleiwa sükajee tü nüpülainkat, jaʼitasü isain wachiki tü wanüikinjatkat nümüin saaʼujee waʼyalajüin.
27 Nütüjaa aaʼu Maleiwa tü suluʼukat saaʼin wayuu, niyaawatüinjeseʼe saaʼu tü waküjeekalü achiki nümüin, jama nükaalinjain sükajee tü nüpülainkat na wayuu nüneekajalakana. Naaʼinrüin tia wanaapünaa sümaa tü nüchekakat napüleerua.
28 Watüjaa aaʼu lotuin sukuwaʼipa süpüshuaʼa tü naaʼinrakat Maleiwa shiiʼiree aneein nakuwaʼipa na wayuu aikana apüla nia, na wayuu nüneekakana Maleiwa wanaapünaa sümaa tü nüchekakalü achiki.
29 Nayakalaka naaʼinmaain palajana Maleiwa jee nücheküin napüleerua müinjatüin nakuwaʼipa maʼaka naaʼin chi Nüchonkai. Niaichikalaka epayaain chi Nüchonkai naʼakajee na nuwalayuukana.
30 Neenajakalaka Maleiwa na wayuu nüneekatüjüliikana paala, lotuitkalaka nakuwaʼipa noʼuluʼu jee süchikijee tia kojutushii naya nutuma.
31 ¿Jameetka wanüiki süchiki tia? Eerejeʼeya Maleiwa wamaa, ¿jaratkalaka peʼipaajeerüin wamaa?
32 Nnojoishi naʼalijirüin Maleiwa chi Nüchonkai süpüla naapajiraainjachin nikii waaʼu. Kamaneeshi maʼin chi Maleiwakai, naapeetkalaka wamüin süpüshuaʼa tü kasa choʼujaakat wamüin.
33 Nnojotsü jaralüinjatüin mojuin anüiki nachiki na wayuu nüneekajalakana Maleiwa. ¿Aashin niayaain Maleiwa aküjain lotuin nakuwaʼipa?
34 ¿Jaratkalaka ayoujeenain naya? Nnojotsü jaralüin ayoujeenain naya. Nia Cristo Jesús chi aapajiraakai nikii naaʼu, chi asoʼiraakai aaʼin süchikijee outaa. Chashi nia maaʼulu nikialuʼu Maleiwa sünain achuntaa maʼin wapüleerua.
35 ¿Eesüchejeʼe wanee kasa amalajaajeetka atuma waalin nüpüla Cristo? ¿Amalajaajeetche waalin nüpüla sutuma tü kasa mojusü alatakat wamüin, shapaale waaʼin, müliale waya atumawaa, walatirüle jamü, masheʼinre waya, woʼutuneere aaʼin?
36 Anuu tü sümakat tü Karaloʼuta Nüchikimaajatkat Maleiwa: «Ajachijünüshii waya waneepia sünainjee waʼyataain pümüin. Müshii waya sümüin wayuu maʼaka saaʼin anneerü eekai süüjaanajatüin».
37 Oʼttaapejeʼe waya süchikumüin süpüshuaʼa tia makalü sutuma wakaalinjünüin nutuma chi aikai apüla waya.
38 Tatüjaa aaʼu nnojoluin eein wanee kasa amalajaajeetka atuma waalin nüpüla Maleiwa. Nnojoleerü amalajaain waalin nüpüla jaʼitashii outuin waya jee jaʼitasü katüin woʼu. Nnojoleerü amalajaain waalin nüpüla natuma na aapieekana, natuma na sülaülashiikana mma, sutuma tü kasa eekat maaʼulu jee tü kasa eejeetkat mapeena. Nnojoleeriaʼaya amalajaain waalin nüpüla Maleiwa sutuma wanee kasa eekai pülain,
39 sutuma wanee kasa eekai chain iipünaa, sutuma wanee kasa eekai oʼutuin wünapümüin otta sutuma wanee kasa eekai akumajuushin. Nnojotsü eein wanee kasa amalajeʼereetka waalin nüpüla Maleiwa, tü waalin weʼrakat nükajee chi Waseñotsekai Cristo Jesús.
Noota
^ «Eʼirukuu atüjaka outaa» maluʼulu tia suluʼu griego.
