Karaloʼuta nüshajalaka Santiago 1:1-27
-
Asaküshi Pablo (1)
-
Talateerü jaaʼin jüchecherüle jaaʼin (2-15)
-
Süpüshuaʼa kasa eekai anain naapajala shia Maleiwa wamüin (16-18)
-
Anasü jülüjale maʼin jaaʼin tü münakat jümüin jee joonoo sümaa tü nümakat Maleiwa (19-25)
-
«Wanee wayuu anaʼlaakai suluʼu rouya» (23, 24)
-
-
Wuleinjatü sukuwaʼipa nuʼwaajia Maleiwa watuma jee nnojoluinjatü yarüttüin sukuwaʼipa (26, 27)
1 Karaloʼutakat tüü tashajala tayakai Santiago, nüchepchia taya chi Maleiwakai jee nüchepchia taya chi Señotkai Jesucristo, tasaküin tü poloosükat piamamüin eʼirukuu sainküinka mma.
2 Tawalayuwaa, anasü talatüle maʼin jaaʼin soʼunnaa jiʼrüin müliaa.
3 Atüjaaneerü aaʼu shiimain tü junoulakat jüchecherüle jaaʼin soʼunnaa suuʼulakünüin jaaʼin.
4 Shiakalaka anain aluʼu jüchecherüle jaaʼin soʼunnaa tü kasa alatakat jümüin, loteetkalaka jukuwaʼipa sünain kasa süpüshuaʼa otta nnojoleetkalaka eein wanee kasa mojukuwaʼipatkat jutuma.
5 Jaʼakale wanee wayuu eekai mekiin, anashi nuchuntule waneepia nümüin Maleiwa, kekiijeechikalaka nia nutuma, jama nüsülajülin Maleiwa namüin napüshuaʼa na wayuukana otta nnojoishii naya niyoujain saaʼujee tia.
6 Achuntajachipejeʼe nia sümaa kanoulain nia, nnojoluinjatü wainmajüin naaʼin. Chi wayuu eekai wainmajüin naaʼin, müshi aka saaʼin tü sümünakat palaa yalejewaain makat sutuma joutai.
7 Chi wayuu makai akuwaʼipa nnojotsü jülüjainjatüin naaʼin saapüneerüin nümüin wanee kasa nutuma Jehová.*
8 Wainmajüsü naaʼin chia wayuukai otta nnojotsü lotuin nukuwaʼipa sünain süpüshuaʼa tü kasa naaʼinrakat.
9 Eekajasaʼa chi wawala eekai maʼletsein, talatüinjatü naaʼin saaʼu kojutuin nia atumawaa.
10 Talatüinjatiaʼaya naaʼin chi wawala eekai washirüin niʼrüle japülii, jama motsoʼopünaajeerüin namaʼa na washinnuukana maʼaka motsoʼopünaain sümaʼa süsii wunuʼu.
11 Jamüshijaʼa niweetapa chi kaʼikai, oosojoosü tü wunuʼukat süka jaʼin maʼin chi kaʼikai. Sujutuukalaka süsii tü wunuʼukat jee nnojoluitpakalaka anain maʼin shiyolojo. Akaweeria neʼe nukuwaʼipa wanee wayuu eekai washirüin, outeechi nia sümaʼainruʼu shiain kachiiruain naaʼin washirüü.
12 Anakuwaʼipai chi wayuu achecherakai naaʼin soʼunnaa niʼrüin müliaa. Anapa nukuwaʼipa noʼuluʼu Maleiwa, aapüneerü kataa oʼuu* nümüin nutuma Jehová* maʼaka nüküjain shia namüin na wayuu ayatakana alin apüla nia.
13 «Ooʼulaküna aaʼinchi taya nutuma Maleiwa», nnojoishi müinjachin wanee wayuu soʼunnaa niʼrüin müliaa süka nnojolin süpüla nuuʼulakünüin aaʼin Maleiwa süka kasa mojusü otta nnojotsü nuuʼulaküin aaʼin wayuu süka kasa mojusü.
14 Shiainjaʼaya ooʼulaküin naaʼin wanee wayuu tü kasa suchuntaakaliaʼaya neʼe naaʼin otta müshi nütaʼünakai aaʼin sutuma.
15 Shiasaʼa süchikijee tia, suchuntaapa maʼin naaʼin wanee wayuu tü keeʼireekat naaʼin, kaainjalashi suluʼujee tia.* Shiasaʼa suluʼujee kaainjalain nia, outa meechia nia.
16 Nnojo jimeejiraain aaʼin jia tawalayuu aishiikana tapüla.
17 Süpüshuaʼa tü kasa eekai anain jee eekai lotuin akuwaʼipa naapajala shia Maleiwa wamüin, nümaʼanajeejatü chi Washi kakumalakai chi kaʼikai, tü kashikat jee müsia tü shüliwalakat. Matüjainsai eeʼirataa nukuwaʼipa maʼaka shiiʼiratüin seemiouse wanee kasa.
18 Müshii joʼuukai waaʼin wachikuaʼa nutuma Maleiwa sükajee tü nünüiki shiimainkat, jama nüchekalain tia wapüleerua. Wayainnakalaka nüneeküin palajana saʼakajee süpüshuaʼa tü kasa nukumalakat.
19 Jia tawalayuu aishiikana tapüla, anasü jülüjale maʼin jaaʼin tü münakat jümüin, nnojoishii jia asoutamaatüinjanain shiʼipajee tü münakat jümüin jee nnojoishii jia aashichijaamaatüinjanain.
20 Naashichijaale wanee wayuu nnojotsü nuuntuin lotuin nukuwaʼipa maʼaka tü nüchekakat Maleiwa süpüleerua wayuu.
21 Anakajaʼa jüsünneʼerüle juulia wanee kasa eekai yarüttüin atuma jukuwaʼipa jee ooʼulaainjana jia suulia süpüshuaʼa kasa eekai mojuin, anamiainjana jia sümaa jaapaain sümaa tü pütchi oʼtteʼerajanakana jia. Müinjatü jüpünajakai saaʼin tia suluʼu jaaʼin.
22 Anakajaʼa joonoole sümaa tü nümakat Maleiwa, nnojotsü jaapajüinjatüin neʼe shia sümaa jimeejiraain.
23 Eere wanee wayuu aapakai nünüiki Maleiwa sümaa nnojolin naaʼinrüin tü sümakat, müsü nukuwaʼipa maʼaka wanee wayuu anaʼlaakai suluʼu rouya,
24 nuʼunakalaka süchikijee nünaʼlaain suluʼu tü rouyakat, motoʼloo müsü naaʼin jamüin maʼin niyolojo.
25 Eekajasaʼa chi wayuu jülüjakai aaʼin tü pütchi lotokalü akuwaʼipa, tü nuluwataakalü anain Maleiwa, taashikalü atuma sukuwaʼipa wayuu, naaʼinrüin tü sümakat tia pütchikat, nnojotsü neʼe naapajüin shia jee motuin shia naaʼin, oonooshi nia sümaa tü pütchi nuluwataakalü anain Maleiwa otta talateerü naaʼin sünain aaʼinraa tia.
26 Eere wanee wayuu jülüjakai aaʼin nuʼwaajüin Maleiwa sümaa nnojottaain niyaawatüin saaʼu nünüiki, emeejiraashi neʼe nia otta nnojotsü kasain saamüin tü naaʼinrakat süpüla nuʼwaajüin Maleiwa.
27 Anuu tü waaʼinrajatkat naashin chi Washikai Maleiwa süpüla wuleinjatüin sukuwaʼipa nuʼwaajia watuma jee nnojoluinjatüin yarüttüin sukuwaʼipa: nakaalinjünüinjanain na mooʼutshiikana, nakaalinjünüinjanain soʼunnaa neʼrüin müliaa na jieyuu outa aʼwayuusechiikana otta eejüinjatüin waaʼin suulia yarüttajüin wakuwaʼipa maʼaka yarüttüin nakuwaʼipa na wayuu nnojoliikana anoujain.
Noota
^ Pünaʼla tia suluʼu tü kanüliakat «Sooʼomüin pütchi A5».
^ «Kotse kataka atuma soʼu wayuu» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ «Müsü shiweetaakai aaʼin tü kaainjalaakat sutuma suchuntaain naaʼin wanee wayuu wanee kasa mojusü» maluʼulu tia suluʼu griego.
