Karaloʼuta nüshajalaka Santiago 2:1-26
2 Tawalayuwaa, ¿jamüsü kojutaʼatakaʼa wayuu jutuma eerejeʼe junoujainnapain nünain chi Señotkai Jesucristo, chi kojutukai maʼin?
2 Jamüshijaʼa nüntataale wanee wayuu jaʼakamüin sünain outkajawaa sümaa eein süttiija nünain aainjuushi süka ooro otta müsia anale maʼin nüsheʼin jee nüntataale wanee wayuu eekai maʼletsein sümaa yarüttüin maʼin nüsheʼin,
3 ¿nieechiche kojutuka jümüin chi wayuu anakai maʼin asheʼin? «Anuu anain aikalawaa yaʼaya», ¿meenache jia nümüin? otta nümüin chi wayuu maʼletsesaikai «Yalashia pia shaʼwatüin» ¿meenache jia nümüin? «Püikalaa yaa süʼütpaʼa tü wankeetachon süpülajanakat tooʼui», ¿meenache jia nümüin?
4 Shialejeʼeya jaaʼinrüin tia, ¿aashin kojutaʼatain wayuu jutuma? Müinnapaka jia maʼaka naaʼin na kasalajanakana atuma saainjala wayuu sümaa mojuin sukuwaʼipa tü kasa jaaʼinrakat.
5 Jia tawalayuu aishiikana tapüla, jaapajataa tanüiki. ¿Aashin nayain nüneeküin Maleiwa na wayuu maʼletsekana saaʼin namüin na manoujainsaliikana? Nüneeküin naya süpüla müinjanain washinnuukai naaʼin, jama kanoulain maʼin naya otta nayainjana eʼraka tü kasa anasü eejeetkat nuluwataapeena Maleiwa, tü nüküjatüjütkalia achiki namüin na wayuu aikana apüla nia.
6 Mojutupejeʼe jümüin na wayuu maʼletsekana. ¿Aashin nayain müliain atuma jia na washinnuukana jee naya ajaraijaka jia laülaapialuʼumüin?
7 ¿Aashin nayain na washinnuukana airuʼuluin* anüiki nümüin chi kajünalakai jia, chi kojutukai maʼin?
8 Anasü maʼin tü jaaʼinrakat joonoole sümaa tü pütchi nuluwataakalü anain chi aluwataashikai, tü ashajünakat suluʼu tü Karaloʼuta Nüchikimaajatkat Maleiwa, tü makalü anüiki mayaa: «Alinjatü püpüla wayuu maʼaka alin pia püpülajiraa».
9 Kaainjalashii jia ayatüleʼeya kojutaʼatain wayuu jutuma, ayaawatüna aaʼu sükajee tü Pütchi Aapünakat nümüin Moisés nnojoliin joonooin sümaa.
10 Eere wanee wayuu oonookai sümaa süpüshuaʼa tü Pütchi Aapünakat nümüin Moisés sümaa nnojolin noonooin sümaa waneesia neʼe pütchi, nnojotsüjaʼamata noonooin amaa süpüshuaʼa tü Pütchi Aapünakat nümüin Moisés.
11 Chi «Nnojo kawalaʼatain putuma puʼwayuuse» makai niaʼaya neʼe chi «Nnojo puʼutuin saaʼin wayuu» makai. Nnojorüle kawalaʼatain putuma puʼwayuuse* sümaa puʼutataalain saaʼin wayuu, nnojotsüjaʼamata paapaain amaa tü Pütchi Aapünakat nümüin Moisés.
12 Wayuu taashi akuwaʼipachii jia otta kasalajaneerü jaainjala jümüin wanaapünaa sümaa tü pütchi aluwataanakalü anain jia, shiakalaka anain jaashajaale jee juʼunirüle jukuwaʼipa wanaapünaa sümaa tü pütchi aluwataanakalü anain jia.
13 Chi wayuu nnojoikai amülialaain aaʼin saalin wayuu, nnojoleechi amülialaanüin aalin nia nüsakinnapa süchiirua tü kasa naainjakat. Chi wayuu amülialaakai aaʼin saalin wayuu, aneerü nukuwaʼipa nüsakinnapa süchiirua tü kasa naainjakat.
14 Tawalayuu, ¿kasa saamaka nümüin wanee wayuu nüküjale kanoulain nia sümaa nnojoluin jaʼyain tia naaʼu? Nnojoleechi oʼttaain sutuma kanoulain nia, ¿aashi müin?
15 Jamüsüjaʼa eetaale wanee wawala eekai choʼujaain süsheʼin sümüin otta palitchonka amaʼana eküülü süpüla wanee kaʼi jee niataalejeʼeya wanee wawala eekai choʼujaain amüin tia,
16 eetaale wanee wayuu jaʼaka eekai «Puʼuna süka anaka akuwaʼipa, kasataalejeseʼe kasheʼin pia otta keküin pia», nümataarale nümüin chia wawalakai jee sümüin tia wawalakat sümaa nnojoluin kasain nülatirüin namüin, ¿kasa anaka aluʼu tia?
17 Akaataajaʼa neʼe nukuwaʼipa wanee wayuu eekai kanoulain, nnojorüle jaʼyain naaʼu kanoulain nia müsüjaʼaya outakai saaʼin nunoula.
18 Eepejeʼe chi wayuu makai anüiki mayaa: «Wayuu kanoulashi pia jee müshia tayakai aainjashi kasa anasü. ¿Jalapünaainjatü jaʼyain paaʼu wayuuin kanoulashi pia nnojoire paaʼinrüin kasa anasü? Piyaawateerü aaʼu wayuuin kanoulashi taya sükajee taaʼinrüin kasa anasü».
19 Anoujashi pia sünain waneeshin chi Maleiwakai, ¿aashi müin? Anasü tia paaʼinrakat. Anoujapejeʼeya tü yolujaakalüirua sünain tia jee eimmolojoosü shia.
20 Pia wayuu mayaawatüinkai saaʼu pukuwaʼipa, ¿nnojotsükai piyaawatüin aaʼu amülain neʼe püküjain kanoulain pia sümaa nnojoluin jaʼyain shia paaʼu?
21 ¿Aashin süküjünüin lotuin nukuwaʼipa chi washikai Abrahán sükajee naaʼinrüin kasa anasü? Aküjünüsü tia süchikijee saapüneein nikii Isaac nutuma saaʼu wanee aʼajülee.
22 Pütüjaa aaʼulu jaʼyain naaʼu Abrahán kanoulain nia sünainjee tü kasa naaʼinrakat jee anoutunüsü tü nunoulakat sünainjee tü kasa naaʼinrakat.
23 Shikeraajakalaka tü pütchi aküjünakat suluʼu tü Karaloʼuta Nüchikimaajatkat Maleiwa, tü makat mayaa: «Kanoulashi Abrahán nünain Jehová,* lotuitkalaka nukuwaʼipa noʼuluʼu suluʼujee tia». Naʼaleewainkalaka nia Jehová.*
24 ¡Ichaalen! Jütüjaaitpa aaʼu süküjünüin lotuin nukuwaʼipa wanee wayuu saaʼujee tü kasa anasü naaʼinrakat, nnojotsü shiain neʼe saaʼujee kanoulain nia.
25 Akaʼaya neʼe sukuwaʼipa Rahab, tü wayuu maaʼinsatkat. Aküjünüsü wayuuin loto akuwaʼipat shia sükajee tü kasa saaʼinrakat süchikijee kamaneein shia namüin na pütchimaajana antakana sümaʼanamüin jee süjütüin naya suluʼupünaa wanee wopu naatajatü süpüla isajüinjanain naya.
26 Maʼaka outuin wanee wayuu sutuma sajaʼttüin tü sütchinkat naaʼin, müsia neʼe sukuwaʼipa tü wanoulakat, müsü outakai saaʼin sutuma nnojoliin waaʼinrüin kasa anasü.
Noota
^ «Mojusü nanüiki süchiki tü nünüliakat Maleiwa» maluʼulu tia suluʼu griego.
^ Pünaʼla tia suluʼu tü kanüliakat «Jamaluʼulu pütchikat».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
