Karaloʼuta nüshajalaka Santiago 5:1-20
-
Tü eejüinjatkalü oulia naaʼin na washinnuukana (1-6)
-
Eʼreena kasa anasü nutuma Maleiwa na nnojoliikana ashapajaain aaʼin jee na achechetkana naaʼin (7-11)
-
«Müleka ‹Aa› jümüle paala sümüin wanee kasa, ayatüinjatü jaaʼinrüin tü jümakat» (12)
-
Aapüna anüikichi chi wayuu oʼuraajakai nümüin Maleiwa sümaa kanoulain nia (13-18)
-
Emeʼejünajachi aaʼin wanee wayuu süpüla niyaawajaainjachin suulia naainjala (19, 20)
5 Jaapaja tanüiki jia washinnuukana, anakajaʼa jiʼyalajüle jee mojule maʼin jaaʼin saalinjee tü müliaa jiʼreetkat.
2 Ittüsü neʼe tü juwashirüinkat, akaʼaya joo tü jüsheʼinkalü, ajaʼttüsü sutuma keʼein shia.
3 Kachaʼajeerü neʼe tü ooro jümaʼanakat jee müsia tü pülaatakat. Sükajee kachaʼain shia, atüjaaneerü aaʼu kaainjaraliin jia jee tia süchaʼakat meena shikakai jaaʼin. Tü juwashirüin jünaajaakat meerü aka saaʼin wanee sikoʼu sülüʼütpa sükalia süpüla sajaʼttüin kasa mojusü.
4 Müshii naʼwaatakai aaʼin na wayuu aʼyataakana jümüin sünain akotchojoo süchon jüpünajüin, jama nnojoliin juwalaajüin naya. Naapüin Jehová* chi laülaashikai naaʼu na aapiee chakana iipünaa nekiisa naya wayuukana sünain achuntaa kaalinwaa nümüin.
5 Washinnuushii neʼe jia yaa mmapaʼa jee shia neʼe jaaʼinraka tü suchuntaakat jaaʼin. Müshii jia maʼaka saaʼin wanee mürüt eekai sükaüsijünüin süpülaleʼeya tü kaʼi suʼutunajatkalü oʼu aaʼin.
6 Jiyoujain chi wayuu lotokai akuwaʼipa jee juʼuta aaʼinchi nia, müshijeseʼe peʼipaain nia jümaa.
7 Suluʼujee tia tawalayuu, anakajaʼa nnojoliire jüshapajaain aaʼin yaaʼaleepaʼaya* chi Señotkai. Jülüjataa jaaʼin nukuwaʼipa chi wayuu apünajüikai, ayatüshia nia aʼatapajüin kachoinjatüin nüʼttia juyapoʼu jee süntaleepaʼaya sükalia iiwa.
8 Akaainjanaʼaya jia, nnojoliinjana jia ashapajaain aaʼin, jüchechera jaaʼin, jama sülüʼülüin maʼin tü kaʼi yaainjachikalü oʼu chi Señotkai.
9 Nnojo jiʼyounnalaain nachiki juwalayuu, nnojoliijeenaka jia süsalain jaainjala. Jülüjataa jaaʼin nünteechin soʼu palit kaʼi* chi Süsalainjachikai atuma saainjala wayuu.
10 Tawalayuu, jülüjataa jaaʼin nakuwaʼipa na nünüikimaajanakana Jehová,* na aashajaakana saaʼu nünülia. Achechetshii naya naaʼin soʼunnaa tü müliaa neʼrakat jee nnojoishii naya ashapajaain aaʼin.
11 Wayaawata aaʼu anakuwaʼipaliin na wayuu achechetkana naaʼin, jaapüirü süchiki nüchecherüin naaʼin Job jee jütüjaa aaʼu tü naaʼinrakat Jehová* nüpüleerua. Jiyaawataka saaʼu alin maʼin wayuu nüpüla Jehová* jee nümüliajülin wayuu.
12 Tawalayuwaa, anakajaʼa nnojoliire jaapüin jünüiki saaʼu tü sirumatuʼukat, nnojo jaapüin jünüiki saaʼu tü mmakat jee nnojo jaapüin jünüiki saaʼu wanee kasa eekai eein. Müleka «Aa» jümüle paala sümüin wanee kasa, ayatüinjatü jaaʼinrüin tü jümakat. Müleka «Nnojo» jümüle, nnojoluinjatü jaaʼinrüin shia suulia süsalajüin jia atumawaa.
13 ¿Eeshichejeʼe wanee wayuu eekai müliain jaʼaka? Anakajaʼa ayatüle nuʼuraajüin. ¿Eeshichejeʼe wanee wayuu eekai talatüin? Anakajaʼa niiʼirajüle salmos.
14 ¿Eeshichejeʼe wanee wayuu eekai ayuulin jaʼaka? Anakajaʼa neenajirüle na laülaashiikana napüleerua na anoujashiikana, noʼuraajeenaka nüpüleerua jee nashulereenaka seita nünain chia wayuukai saaʼu nünülia Jehová.*
15 Aawalaajeechi chia wayuu ayuuishikai saaʼujee nuʼuraajünüin apüleerua natuma na laülaashiikana sümaa kanoulain naya, atamaajeechi chia wayuukai nutuma Jehová.* Kaainjaralejeʼeya nia, alatinneerü naainjala nuulia.
16 Anakajaʼa jüküjiraale süchiki tü jaainjalakat jee juʼuraajiraale jüpüleeruajiraa, meenaka jaawalaakai aaʼin. Kaawainsü maʼin nünüiki chi wayuu lotokoi akuwaʼipa nuchuntapa nümüin Maleiwa, jama naapüin Maleiwa nünüiki chia wayuukai.
17 Wanaawasü nukuwaʼipa Elías wamaa, oʼuraajapejeʼe maʼin nia nümüin Maleiwa süpüla nnojoluinjatüin süʼitüin tü juyakat. Nnojotkalaka süʼitüin soʼu apünüin juya shiatapünaamüin.
18 Nuʼuraajaka nüchikuaʼa, süʼitaka tü juyakat otta kachonkalaka pünajüt yaa mmapaʼa.
19 Tawalayuwaa, eere wanee wayuu akaaʼinjaaka jaʼakajee suulia tü pütchi shiimainkat otta eetaale wanee wawala emeʼejakai naaʼin süpüla nüleʼejüinjachin nüchikuaʼa,
20 jütüjaa saaʼu nuʼttaajeechin suulia outaa chi wayuu kaainjarai ayaawajaakai suulia tü kasa mojusü naainjakat, jama nimeʼejünüin aaʼin nutuma chi wawalakai süpüla nüleʼejüinjachin nüchikuaʼa, sülatinneetka naainjala nuulia.
Noota
^ Pünaʼla tia suluʼu tü kanüliakat «Sooʼomüin pütchi A5».
^ «Parousía» maluʼulu tia suluʼu griego. Pünaʼla tü pütchikat «Eewaa» suluʼu tü kanüliakat «Jamaluʼulu pütchikat».
^ «Shaʼwatüshi soʼuluʼu miichikat» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
