1 Pedro 4:1-19
4 Saaʼu nüchecherüin naaʼin Cristo suʼutpünaa tü müliaa niʼrakat ouktapa nia, anakaja müle aka jia naaʼin sünain jüchecherüin jaaʼin suʼunnaa tü müliaa jiʼrakat maaʼulu yaa. Katsüinsü waaʼin sünain anoujaa sütüma tü müliaa weʼrakat, süka nnojolüitpain kasajatüin kaainjalaa nümüin chi wayuu eekai niʼrüin müliaa.
2 Je sükajee tia, sümaʼinruʼu waraittüin jia süpaʼa mma, anakaja müleka juuʼulaale suulia süchepchiaa jaainjala süpüla nüchepchiainjanain jia Maleiwa süpüla jaaʼinrüinjatüin waneepia tü nüchekakat jüpüleerua.
3 Kakaʼiya maʼi jia paalainka sünain juuʼulaküin tü mojusükot wanaa namaa na manoujainsaliikana. Juuʼulaa jumaala suulia kasa müin aka tia, maa aka jümaʼüjaain sümaa wayuu nnojotkat juʼwayuusein, maa aka jiperüin sümaa maaʼin jaaʼin sünain emiʼijaa, je maa aka aaʼinraa kasa mojushaatain sükajee jüüjüüin jia namüin na maleiwayaashiikana.
4 Otta müsia jooluʼu, patatshii na wayuu manoujainsaliikana sükajee nnojoliinapain jaʼaleewajaain namaa sünain aaʼinraa kasa eekai mojushaatain. Eʼrüliishii wayumüin maʼi naya jümüin saaliijee jiyouktüin tü kasa mojusü naaʼinrakat.
5 Soto jaaʼin sünain sülüʼülüin tü kaʼi kasalajaneetkat oʼu saainjala wayuu nütüma Cristo, eekai ouktüin maa aka eekai katayülüin soʼu. Otta na eʼrüliikana wayumüin jümüin, ashaʼwaleʼenneena nümülatuʼu Cristo süpüla nasouktüinjanain nümüin sooʼopünaa süpüshua tü kasa mojusü naaʼinrapüʼükat.
6 Saaʼu eʼitaaushin Cristo süpüla kasalajanainjatüin nütüma sümüin saainjala wayuu, aküjünüsü paala nüchiki sümüin wayuu shiiʼiree suʼtteʼennüinjatüin. Ouktüshii naya maa aka wayuu süpüshua maaʼulu yaa. Nüküjüna achikit namüin süpüla eeinjaneenain naya nümaa Maleiwa süpüla kaʼikat süpüshua.
7 Otta jiakana jooluʼu, sükajee sülüʼülüin tü kaʼi sajaʼlajaainjatkat oʼu tü kasa weʼrakat maaʼulu yaa, anakaja müleka laülaale jaaʼin süpüla eeinjatüin jaaʼin sünain achuntaa nümüin Maleiwa.
8 Müleka aire na juwalayuukana jüpüla, moteerü jaaʼin müleka kaainjarale naya juulia. Sükajee tia, müleka aijiraale jia jüpüla waneepia süka süpüshua jaaʼin, alanaʼaleesia maʼi tia sünain anain suulia süpüshua tü anasü jaaʼinrakat.
9 Anakaja müleka eere jaaʼin süpüla keʼiyouin jia na juwalayuukana sünain nnojolüin mojushiin jümüin.
10 Naataʼawaisü tü atüjaa aapünakat jümüin nütüma Maleiwa. Anakaja müleka jükaaliijiraale süka tü atüjaa aapünakat jümüin waneʼewaʼire jukua, maa aka wane aʼyataai eekai naaʼinrüin waneepia tü nüchekakat Maleiwa nüpüleerua.
11 Saaʼu saʼaniraaitpain jukuaippa nümaa Jesucristo, müleka piale aapünüin amüin atüjaa süpüla aküjaa nünüiki Maleiwa, jalia pia suulia aküjaa wane pütchi eekai naatajatüin suulia. Je müleka piale aapünüin amüin atüjaa süpüla akaaliijaa na puwalayuukana, chi katsüinjachikai atüma paaʼin, nieechi Maleiwa. Anakaja nuʼwaajünüle sükajee tü paaʼinrakat süka tü atüjaa aapünakat pümüin. Süka laülaain nia saaʼu kasa süpüshua, nieechi kojutka sütüma wayuu wainma süpüla kaʼikat süpüshua. Amén.
Nnojoleena japülin na anoujashiikanaeekai müliain nünainjee Cristo
12 Tatünajutumuyuwaa, jia aishiikana tapüla, nnojo jainkuuin aaʼin sütüma tü müliaa miyoʼu jiʼrakat maaʼulu yaa sükajee juuʼulakünüin aaʼin sütüma tü kasa mojusü naaʼinrakat jümüin na wayuu eʼrüliikana wayumüin jümüin. Je nnojo jümüin: “¿Jamüshii waya makalaka suʼttaain wamüin tüü?”.
13 Shia anaka aluʼu müleka talatüle maʼi jaaʼin suʼutpünaa, süka jamüin, tü jukuaippakat sünain müliain, müsü aka saaʼin nukuaippa Cristo sünain müliain. Je soʼuweena tü kaʼi niiʼiyataajeetkat oʼu Jesucristo sünain anashaatain maʼi nukuaippa, alanaʼaleejeeria maʼi sünain talatüin jaaʼin.
14 Müleka shiʼrüle wayumüin wayuu jümüin sümaa shimeʼerainpalain jia sünainjee juushikajaain nüchiirua Cristo, anataʼaleeshiijaʼa jia. Sütümajee tia, jütüjaajeerü aaʼu sünain shiimüin suluʼuin jaaʼin chi Naaʼinkai Maleiwa anashaatakai maʼi.
15 Otta müleka jiʼrüle müliaa saaliijee jaaʼinrüin kasa mojusü, maa aka uwomoyuuin, maa aka kaʼruwaralin, maa aka perulaayuulin, müliashii jia süsalajee tü kasa mojusü jaaʼinrakat.
16 Akaajasa müleka shiale eʼrülüin wayumüin wayuu jümüin sünainjee juushikajaain nüchiirua Cristo, anakaja nnojorule japülin jia süka tia. Shia anaka aluʼu müleka jaapüle analuʼut nümüin Maleiwa süka müliain jia sünainjee jiain nüpüshin Cristo.
17 Waya nüpüshikana chi Maleiwakai, kalioʼupajeʼe waya maaʼunnaa yaa nütüma sükajee tü müliaa weʼrakat, otta na eekai moonooin sümaa tü nüchikikat chi Oʼtteʼerüikai, shialeekajaʼa jameematüin namüliala soʼuweena tü kaʼi kasalajaneetkat oʼu namüin naainjala nütüma Maleiwa.
18 Shia tü ashajünakat achiki suluʼu tü karaloukta nüchikimaajatkat Maleiwa sünain müin mayaa:
“Wane wayuu eekai naaʼinrüin tü kasa anasükat,ayatshia neʼe niʼrüin müliaa,nnojoishi ajuittinnüin maalü suulia nütümaMaleiwa.¿Jama na wayuu nnojotkana oonooin sümaa tü kasa anasü nüküjakat Maleiwa namüin?¿Jameerü nakuaippa mapeena?”.
19 Maluʼulu tü taküjaitpakat jümüin: Müleka nücheküle Maleiwa süpüleerua jiʼrüin müliaa, anakaja müleka jaapajiraale jukuaippa najapuluʼu niakai, chi akumajakai kasa süpüshua. Je anakaja müleka ayatüle jia sünain aaʼinraa kasa anasü süka jütüjaain naaʼu sünain nikeraajüinjatüin süpüshua tü nümakat jümüin.
