Génesis 12:1-20
12 Wanaa sümaa kepiain Abram suluʼu tü mmakat Ur, nümakalaka Jehová, chi Maleiwakai, nümüin: “Anakaja jooluʼu müleka puʼunüle yalajee yala suluʼujee tia mmakat eere kepiain pia maaʼulu yaa. Püpütaa nüpüla chi püshikai je süpüla süpüshua tü wayuukolüirua kepiakat pümaa. Oʼuneechi joo pia eemüin wane mma teeʼiyatüinjatkat pümüin.
2 Anakuaippaleechi pia tatüma. Watteerü saalin tü puuʼuliwoʼukalüirua. Kojuteena naya suluʼupünaa tü suumainkalüirua wayuu süpüshua. Eʼnnaajinneerü tatüma tü pünüliakat saaʼujee anainjatüin pükuaippa. Je sünainjee tü kasa anasü taaʼinreetkat püka, anakuaippaleerü wayuu wainmaya.
3 Chi wayuu anakai anüiki pümüin, teeʼiyateerü tü taʼanasiakat nümüʼinya. Aluʼujasa chi wayuu oʼulejakai pia, kasalajaneerü nümüin tia tatüma. Je paaʼujee piakai, süchunteerü tamüin wayuu sainküin mmakat süpüla anakuaippalüinjatüin shia tatüma maa aka anakuaippalin pia tatüma”, müshi chi Maleiwakai nümüin Abram.
4 12:4-5 Shiasaʼa süntapa nuuyase Abram sünainmüin akaratshi shikii jaʼralimüin juya, nuʼunakalaka suluʼujee tü pueulokat Harán uuchimüinkuaishi sünainmüin tü mmakat Canaán, maa aka tü nümakat paala Jehová nümüin. Nümaasü Sarai tü nuʼwayuusekat ooʼulaka Lot nüchonkai wane nimülia ouktüshi. Je nümaasü süpüshua tü namüʼünüinkat je tü nawashirüinkat je tü nachepchiakalüirua nayalainkat wanaa sümaa kepiain naya chaʼaya Harán.
Shiasaʼa nüntapa Abram je na nümaajanakana Canaánmüin,
5 —
6 waraittüshii naya suluʼupünaa tü mmakat sünain nantüin eemüin wane pueulo kanüliasü Siquem. Tü wayuukolüirua cananeokat anülia, yaatüjülia kepiain suluʼu tia mmakat wanaa sümaa nüntüin Abram. Je yaa suluʼu Siquem, antüshi Abram eemüin wane wunuʼu eere nachuntüle na wayuu cananeokana sümüin tü namaleiwaseyaasükalüirua. More münüsü tü wunuʼukot natüma na cananeokana süka kojutüin shia natüma.
7 Süpülapünaa nuʼunüin Abram yalajee eejee tü wunuʼukot More suluʼu noumain na cananeokana, eeʼiyataashi Jehová nümüin sünain maa nümüin: “Süpüshua mmakat tüü, shiimüin sünain taapeerüin shia namüin na puuʼuliwoʼukana”, nümakalaka nümüin. Müshijeseʼe nükumajüin Abram wane aʼajüleepala süpüla naʼajüinjatüin kasa nümüin Maleiwa sünain niiʼiyatüinjatüin nujut nümüin suluʼu tü pueulokat eejachire niiʼiyataain nümüin.
8 Shiasaʼa süchikijee tia, oʼunüshi Abram chaa uuchimüin suluʼumüin wane mma saʼakasü uuchi. Niʼitaain nejepüse yala pasanain sünain piamasü pueulo, wüinpujeeruʼu sünain Bet-el je waapünaa sünain Hai. Je chaʼaya eere natunkapünaain, nükumajüin Abram wane aʼajüleepalaya nümüin Jehová sümaa niiʼiyatüin nujut nümüin.
9 Nuʼunakalaka Abram nüchikua uuchimüin sünain nutunkapünaain sainküinpünaa mma sünain oʼonowaa shiinaluʼumüin tü mmakat Canaán eemüin wane mma maaʼinyatuuisü kanüliasü Neguev.
Abram je Sarai suluʼu Egipto
10 Shiasaʼa süchikijee niʼitaain nejepüse Abramsuluʼu tü mma Neguevkat, antalaa müsüjaʼa wane jamü sümüin süpüshua tü mmakat Canaán. Jashichipa maʼi tü jamükat, noʼonookalaka Abram chaa wopumüinmüin eemüinre kepiain naya kojuya kashi maa aka saaʼin wayuu naatajatü chaʼaya suluʼu tü mmakat Egipto.
11 “Otta nalüʼütpa sünain antaa suluʼu tü mmakat Egipto, nümakalaka Abram sümüin Sarai tü nuʼwayuusekat: “Kaatei, mmotsü taaʼin sooʼopünaa wane kasa. Eesü süpüla kamalain pia namüin na wayuu Egiptojeʼewaliikana süka anasüchoin maʼi pia.
12 ‘Nuʼwayuuse’ meena tamüin neʼrapa pia. Noʼuta aaʼinchijaʼa taya. Otta piakat, nnojoleerü noʼutüin aaʼin.
13 Anakaja jooluʼu müleka punujulajüle tachiki noulia sünain taʼwayuusein pia. ‘Pawalaawashii waya’, püma neʼe namüin. Je saaʼujee mülieenain naya piiʼiree, namüliajeechi taya pünainjee”, nümakalaka Abram sümüin Sarai.
14 Shiasaʼa nantapa suluʼumüin tü mmakat Egipto, neʼrakalaka na wayuu Egiptojeʼewaliikana Sarai sünain anasüchoin maʼi shia.
15 Je neʼrapa Sarai na niʼipajanakana chi sülaülakai Egipto, Faraón münakai, naküjakalaka nümüin süchiki süntüin wane jierü anasüchoin maʼi. Otta müshia Faraón, nüsaajeʼerakalaka shia süpüla nuʼwayuuseinjatüin shia maa aka tü wane nuʼwayuusekalüirua.
16 Je sükajee “tawala” sümüin Sarai nümüin Abram, kaaliikalaka nia sünainjee nütüma chi sülaülakai mma. Nüsülajüin nümüin anneerü, kaaʼula, paaʼa, püliikü, “camello”, ooʼulaka wayuu achepchieeirua.
17 Otta süka naapaain Faraón Sarai süpüla nuʼwayuuseinjatüin, nuluwataakalaka Jehová wane wanülüü aisü maʼi nünainmüin je nanainmüin napüshua na kepiakana nümaa.
18 Neenakünakalaka Abram nütüma Faraón sünain nüsakirüin nia: “Aishaʼajaa, pümeejüin yala maʼi taya. ¿Jamüsü punujulajakaʼa süchiki toulia sünain puʼwayuusein shia,
19 ‘Pawalaawashii waya’ pümakaʼa tamüin? Taapaataairüje shia süpüla taʼwayuuseinjatüin. Eʼrüitaaleejaʼaya maʼi pia wayumüin tamüin. Anuu pümata puʼwayuusekat. Pumaa pümata shia. Juʼuna jumata jooluʼu yaajee yaa toulia”, nümakalaka Faraón nümüin Abram.
20 Nuluwataain joo Faraón chi sülaülakai tü surulaatkalüirua süpüla neʼikajaainjachin Abram sümaa tü nuʼwayuusekat je tü nümüʼünüinkat chaa wiinnaa süpüla najuittirüinjanain naya suluʼujee Egipto.
