Génesis 7:1-24
7 Shiasaʼa süchikijee tia, nümakalaka Jehová nümüin Noé:
—Noékalee, saʼakajee tü wayuukolüirua katakat oʼu wanaa pümaa, tatüjaa aaʼuchi piain pümüiwa anamiain waneepia sümüin wayuu je sünain lotüin pükuaippa toʼupala. Je sükajee tia, poʼotoo pümaala suluʼumüin tü anuakat sümaa tü puʼwayuusekat ooʼulaka na püchonniikana je naʼwayuuse namaa.
2 Pikerotira pümaala kasa süpüshua suluʼumüin tü anuakat, tü maüsükalüirua je tü simoluunakalüirua. Tü kasa eekai anain süpüla ekünaa je tü eekai anain süpüla oʼutinnaa aaʼin tamüin, pikerotira tooloyuu akaratshisü ooʼulaka jieyuu akaratshisü waneʼewaire sukua. Otta tü kasa eekai nnojolüin anain süpüla ekünaa je süpüla oʼutinnaa aaʼin tamüin, pikerotira waneesia neʼe toolo ooʼulaka waneesia jierü waneʼewaire sukua.
3 Je pikerotira pümaala suluʼumüin tü anuakat süpüshua tü wuchiikalüirua waawatakat chaa iipünaa, pikerotira tooloyuu akaratshisü ooʼulaka jieyuu akaratshisü waneʼewaire sukua. Puuʼulaka tüü süpüla katüinjatüin soʼu süpüshua tü kasakalüirua je tü wuchiikalüirua kachonjaiwa shia süpüla kooʼomüinjatüin tü suuʼuliwoʼukalüirua süchikua sainküin mmakat.
4 Kaatei, akaratshipa kaʼi, aʼiteerü wane juya miyoʼushaata maʼi tatüma sainküin mmakat süpüshua. Wataaweerü kaʼi je saʼwai soʼu pienchi shikii kaʼi sünain aʼitaa süpüla sajaʼttüinjatüin wayuu ütamüinreʼeya je kasa süpüshua sainküin mma. Shiimüin sünain ooʼuwoʼuleerüin sütüma tü wüinkat kasa süpüshua eekai katüin soʼu —müshi Jehová nümüin Noé.
5 Oonooshi Noé sümaa nünüiki Jehová, chi Maleiwakai, sünain naaʼinrüin süpüshuaʼaya tü nuluwataakat anain.
6 Aʼitüsü tü juya miyoʼushaatakat sainküin mmakat wanaa sümaa 600 nuuyase Noé.
7 Süpülapünaa süntüin tü juyakat, oʼotooshi Noé suluʼumüin tü anuakat sümaa tü nuʼwayuusekat ooʼulaka namaa na nüchonniikana je naʼwayuuse.
8 7:8-9 Je sütüma tü nümatüjütkat paala chi Maleiwakai nümüin Noé, ekerotüsü nümaa kasa süpüshua suluʼumüin tü anuakat, tü maüsükalüirua je tü simoluunakalüirua, je tü wuchiikalüirua je tü lemütüsükalüirua. Piamawalin shia nütüma, toolo ooʼulaka jierü. Ekerotüsü eekai anain süpüla ekünaa je süpüla oʼutinnaa aaʼin nümüin Maleiwa, ooʼulaka eekai nnojolüin anain süpüla ekünaa je süpüla oʼutinnaa aaʼin nümüin.
9 —
10 Shiasaʼa shikettaajapa akaratshisükat kaʼi, oʼttüsü tü juyakat sünain süʼitüin sainküin mmakat süpüshua.
11 Wanaa sümaa 600 nuuyase Noé, oʼttüsü sünain asetaa tü wüinkat. Soʼu tü piamaitkat kashi sünainmüin poloo akaratshimüin kaʼi, asetsü süleʼeruʼujee tü mmakat wane wüin miyoʼushaata je aʼita müsia wane juya kaʼüliashaatasü maʼi.
12 Shia tü juya miyoʼu nümakat Maleiwa siraainjatkat amaa kaʼi je saʼwai waneepia soʼu pienchi shikii kaʼi.
13 Soʼu tü kaʼi suʼttakat oʼu tü juyakat sünain aʼitaa, ekerotüshi Noé je tü nuʼwayuusekat suluʼumüin tü anuakat namaa na nüchonnii apünüinshiikana, Sem, Cam ooʼulaka Jafet, namaa naʼwayuuse.
14 Ekerotinnüsü nümaa Noé kasa süpüshua suluʼumüin tü anuakat, tü maüsükalüirua je tü simoluunakalüirua, je tü wuchiikalüirua je tü lemütüsükalüirua.
15 Ekerotinnüsü shia sünain piamawalin nütüma Noé, toolo ooʼulaka jierü.
16 Ekerotinnüsü tü kasakalüirua süpüshua, tü nümakat paala chi Maleiwakai nümüin Noé. Nüsülüjaa nümüsia chi Maleiwakai soʼu tü anuakat namaa.
17 Soʼu pienchi shikii kaʼi, aʼitüsü waneepia süpaʼapünaa tü mmakat süpüshua sünain siraain kaʼi je saʼwai sümaa. Mayaasü shipirajaain tü mmapaʼakat sütüma eepünaweere neʼe, shiyalera shiyalera sümüsü tü anuakat iipünaamüin.
18 Siraasü mapa tü mmakat sütüma tü wüinkat, unantüsü tü anuakat shirokupünaa.
19 Alatüsü tü wüinkat suulia tü uuchikalüirua süpüshua.
20 Miyoʼushaana joo tü wüinkat sülatirüin tü uuchikalüirua maa aka akaratshi “metro”.
21 7:21-22 Makuaippatsüjeseʼe ooʼuwoʼulüin kasa süpüshuaʼaya aapünakalüinka amüin kataa oʼu süpaʼapünaa tü mmakat. Ouktüsü tü wuchiikalüirua, tü kasakalüirua eekai maüsüin je eekai simoluunain, tü lemütüsükalüirua, je wayuu sümaʼaya ütamüinreʼeya.
22 —
23 Najaʼttirüin Jehová kasa süpüshua katakat oʼu paalainka sainküin mmakat. Najaʼttirüin wayuu otta mürüt otta tü kasa lemütüsükat mmoluʼu otta wuchii. Nayaʼala neʼe makatakana namüiwa sümaa kataa oʼu Noé je na nümaakana suluʼu tü anuakat je tü kasakalüirua je tü wuchiikalüirua eekat suluʼu tü anuakat.
24 Wainma sükalia siraain tü mmakat wüin, waneʼereʼeya shikeraajapa tü 150 kaʼi.
