Aapiraashi Jacob nümaa chi aapieekai süpüla naapüin Jeʼwaa naʼanasia nümüin (Gé 32:24-31; Os 12:3, 4). ¿Jama wayakana? ¿Wachajaainche sukuwaʼipa süpüla woonooin nümaa Jeʼwaa otta naapüin naʼanasia wamüin? ¿Kaseerü waneekaka? ¿Oʼuneenache waya sünain tü outkajawaakat shiataapa makateenain waya sünain aʼyatawaa sooʼomüin oora? Niiʼiyateerü Jeʼwaa naʼanasia wamüin otta nnojoleerü kasain choʼujaain wamüin, waʼyataale nümüin süka süpüshuaʼa watchin, süka tü eekat wamaʼana jee waneeküle kaʼi süpüla waʼyataain nümüin (Mal 3:10). Nuʼunireerü wakuwaʼipa Jeʼwaa, naaʼinmajeena waya otta naapeerü süpüshuaʼa tü choʼujaakat wamüin (Mt 6:33; Heb 13:5).

SÜCHIKIJEE JÜNAJÜIN TÜ VIDEOKOT NNOJO MOTUIN PAAʼIN TÜ PIʼYATAWEEKALÜ ANAIN NÜMÜIN JEʼWAA, JUSOUTA SHIʼIPAJEE TÜÜ:

• ¿Kasa eejiraaka amaa wanee wawala?

• ¿Jamüsü eeka süpüla kapüleein wamüin waʼwaajüin Jeʼwaa sutuma tü waʼyataainkat?

• Mayaapejeʼe laülaain naaʼin Timoteo sünain anoujaa, ¿jamüshi ayatüinjachika nia sünain nukooʼomüinrüin tü niʼyataainkat nümüin Jeʼwaa? (1Ti 4:16).

• ¿Kasa waaʼinrajatka shiimainre kojutuin wamüin waʼyataain nümüin Jeʼwaa?