¿Kasa shapaʼawaika atuma paaʼin waneepia? ¿Pia laülaaka naaʼu na püpüshikana? ¿Aʼyataashi pia napüleerua süpüla paapüin namüin tü choʼujaakat namüin? Pipijüle püchon sümaa maʼwayuusein pia, ¿kapüleesü pümüin püntüin sünain tü jiyaalujutkat? ¿Aturaajünüshi pia chaa eere koleejiain pia jee mojulaajüshii naya pümüin? ¿Ayuuishi pia? ¿Eʼrüshi pia mülia sutuma laülaain pia? Eʼrüshii waya mülia wapüshuaʼa, eepejeʼe wawalayuu alatakana amüin wainma kasa mojusü. Talatapejeʼe waaʼin sutuma watüjaain saaʼu nnojoleerüin weʼrüin sooʼomüin tia müliaakat (2Co 4:16-18).

Sümaʼinruʼu waʼatapajüin tia kaʼikat, talatüsü waaʼin sutuma watüjaain saaʼu niyaawatüin Jeʼwaa saaʼu tü alatakat wamüin. Talatüsü naaʼin sutuma waneepiain waya nümaa otta wachecheraain nünain otta nüpansaajüitpa wamüin weʼreenain kasa anasü nutuma (Jer 29:11, 12). Jülüjashii waya naaʼin Jesuʼuya. «Shiimüin sünain jümaainjachin taya waneepia», müshi Jesuu wamüin sümaʼinruʼu waʼyataain nümüin Maleiwa (Mt 28:20). Wasakireʼerüle waaʼin sünain tü kasa anasü weʼreetkat sutuma Nuluwataaya Maleiwa, talateerü waaʼin sutuma tü kasa waʼatapajakat otta katchinjeerü waaʼin süpüla woʼttaain süchikumüin tü kasa ooʼulakünakalü aka waaʼin (Ro 8:19-21).

SÜCHIKIJEE JÜNAJÜIN TÜ VIDEOKOT SÜLÜʼÜTPA MAʼIN TÜ WAWAIKAT, JÜLÜJA PAAʼIN KÜRISÜTO WANEEPIA, JUSOUTA SHIʼIPAJEE TÜÜ:

• ¿Kasa saainjaka wayuu maaʼulu akayaleʼeraka shia nuulia Maleiwa? ¿Kasa neʼraka suluʼujee tia?

• ¿Kasa anasü neʼreetka na waneepiakana nümaa Jeʼwaa?

• Eʼreena waya kasa anasü, ¿kasa aaʼujee?

• Sünainjee tü kasa eejeetkat soʼu palit kaʼi, ¿jarat maʼin piʼreeka sünain shikeraajüin?