Wajayatüin tü kaʼikat wanaa sümaa wakooʼomüinrüin waʼyataain nümüin Jehová. Anasü waaʼinrüle tia süpülapünaa sajaʼttüin tü kasa mojusükat (1Co 9:26; Éf 5:15, 16, TNM). Anashi pikirajaale sümaa püpüshi soʼu tü ai puʼwaajakalü oʼu Maleiwa süchiki waneirua aʼyatawaa eeka süpüla jiʼyataain anain suluʼu nupueulose Jehová süpüla juyakat 2023. Wayaawajüin tü waʼyataainkat nümüin Maleiwa soʼujee kashikat settienpüroʼu sünainmüinreʼeya akoosütoʼu. Sünain karaloʼutakat tüü, puusüteerü anain waneirua pütchi aashajaaka süchiki waneirua aʼyatawaa nümüin Jehová. Anashi pikirajaale sünain jee puchunta nümüin Maleiwa süpüleerua tia (Snt 1:5).

¿Eeshiiche süpüla jükaalinjiraain süpüla pürekutsoolin rekulaat wanee jaʼakajee? Mmorüle pia sutuma iseerüin püchiki püsaʼwatüin tü oorakat, eeshi süpüla paashajaain namaa waneinnua pürekutsoot wainmakana aʼyataain maʼaka paaʼin piakai (Pr 15:22). Eeshijaʼa süpüla puunejaain wanee pürekutsoot soʼu tü ai Puʼwaajakalü oʼu Maleiwa sümaa Püpüshi süpüla püsakirüin nia süchiki tü naaʼinrakat jee püshaja tü nümakat süpüla puuʼulaküin shia. Müleka pürekutsootpuʼule pia paala, ¿eesüche süpüla puuʼulaküin süchikuaʼa? Eesüjaʼa süpüla puuntuin shia süchikuaʼa.

¿Eeshiche süpüla pürekutsoolin aaʼusiliaat wanee jaʼakajee süpüla wanee kashi jee shiale kojuya kashi? Isale püchiki pürekutsoolin aaʼusiliaat pia sutuma ayuulii, eeshi süpüla püküjawalin pütchi motsomüin. Masetaainre kaʼi püpüla sutuma piʼyataain jee koleejiain pia, eeshi süpüla pürekutsoolin pia soʼunnaa waneirua kaʼi nnojolinjachika oʼu piʼyataain sünainjee wanee kashi jee shiale soʼunnaa tü kashi alüʼüjakat jaʼraisü saawanoʼu sümaa jaʼraisü rimiinkoʼu. Püshaja sünain tü calendariokot tü kashi pürekutsooleekalü oʼu pia aaʼusiliaat jee yaawa putuma tü kaʼi pujuʼituinjachikalü oʼu (Pr 21:5).

SÜCHIKIJEE JÜNAJÜIN TÜ VIDEOKOT MEIMMOLUINJANA JIAKANA, PÜREKUTSOOTKANA, JUSOUTA SHIʼIPAJEE TÜÜ:

• ¿Kasa naaʼinraka Jehová süpüla nükaalinjain Aamand? ¿Kasa watüjaka sünainjee tia?