Tü Outkajawaakat eere Sotuin Waaʼin Ouktüin Jesuu, sükaaliinjeena waya süpüla jülüjain waaʼin süpüshuaʼa tü kasa eekat sutuma naapajiraain nikii Jesuu. Soʼutku tü kasa eekat, shia eein süpüla süsoʼiraain aaʼin wayuu. Nnojoishii nukumajüin Jeʼwaa na wayuukana süpüla ouktaa. Makalaka alin maʼin nümüin wanee wayuu müleka ouktüle wanee nüpüshi (1Co 15:26, TNM). Mojusü naaʼin Jesuu sutuma niʼrüin na nikirajüinkana sünain aʼyalajaa naaʼu Lázaro (Jn 11:33-35). Wanaawasü nukuwaʼipa Jeʼwaa nümaa Jesuu. Makalaka mojuin naaʼin Jeʼwaa niʼrüle waya sünain aʼyalajaa naaʼu wanee wapüshi eekai ouktüin (Jn 14:7). Naʼatapajüin maʼin Jeʼwaa tü kaʼi nüsoʼireʼerüinjatkalü oʼu na wayuu aʼyataapuʼukana nümüin (Job 14:14, 15).

Lotusü sukuwaʼipa tü kasakalüirua nutuma Maleiwa. Makalaka loteerüin sukuwaʼipa süsoʼiraaya naaʼin na wayuukana (1Co 14:33, 40). Nnojoleena waya aʼyalajüin, talateerü waaʼin namaa na wayuu asoʼiraainjanakana aaʼin. Anasü jülüjale waaʼin nasoʼiraajeenain aaʼin na ouktüshiikana (2Co 4:17, 18). Waapa tü analuʼutkat nümüin Jeʼwaa saaʼu susoʼiraajeerüin aaʼin tü wayuukalüirua nutuma (Col 3:15).

• ¿Jarai chi püpüshi jee paʼaleewain piʼreekai amüin asoʼiraain aaʼin?

• ¿Jaralii na wayuu saashajaakana achiki tü Wiwüliakat piʼraajeekana otta paashajaweekana amaa?